▪️مرجـــــــــــــــانة▪️
▫️من كتابة هيرا▫️
▪️الجزء السبعون▪️
غير خرجات ناض شمس الدين وقف قدامها حتى ولا مضرگها..وما خلى الجندي يشوف ساسها من راسها.
وبيده شير عليه يخرج من جناحه!
غير خرج وتلفت لها..حط يديه على خدها..واليد لي بقات على خصرها و لعنده جارها.
مرجانة: علاش ما فيقتينيش فات الحال وشبعت نعاس أمولاي.
شمس الدين: المهم هو تشبعي!
حققات الشوفة فيه..ولقات عينيه العسلية دابلين وباين العيا عليه والنعاس مازار عينيه!
مرجانة: واش ما نعستيش امولاي؟
مجاوبهاش وغير تبسم طالق منها ومن الجناح خارج مخليها..غادي وحاشيته تابعاه..ومن الحريم خرج مبعد كيشوف عرس الليلة فين واصل!
عينيه تحطات على صيفطت الغاشي فجيهة ماشي تاعته!
لباسه ما لباس خدامه ولا عبيده..ضور لسانه بين فمه..فاش عرفه المهدي ولدت خالت الغالي..ولي زاد كمل الباهية فين كان هاز عينيه!
عينيه كانت محطوطة على تراس جناحه..لي كانت مرجانة كتطل منه..طالقة شعرها وحاطة يدها على جناب التراس والبرد كيدي فحوايجها ويجيبهم!
جبد شمس الدين سيفه وعلى عنق المهدي حطه..ضار مفاهم والو ووتش فالأرض فاش شافه.
شمس الدين: كلامي ليك آخر مرة اش كان؟
المهدي كيتفتف حدر عينيه..وجمعه يديه قدامة كيطلبه ويعاود.
المهدي: قلتي ما نحطش عليها العين أمولاي..سمح ليا طالب رحمتك وعفوك عليا.
بيده شير شمس الدين لعبيد من عبيده..وجا عنده حاني راسه.
شمس الدين:لوحوه فالحبس لا ماكلة لا شراب حتى نقول حكامي فيه.
هزوه من تما كيتفركل..وشمس الدين رفع راسه منهد كيشوف فالتراس لي تسد وما بقاتش منه كتطل.
زاد مكمل طريقه للمجلس لي تجمع وكيناقش فيه أمور البلاد..حتى جداه هنية وقافات عليه.
هنية: جاياك نهضر معاك كمت باك..نتا ولد ولدي وانا جداك..سمعني نقولك راني غنسخط عليك!
هز عينيه فيها مدهوش وهي سهات فليلة لبارح فاش كانت خارجة من جناحه وشافت مرجانة وحتى مشات لنص طريق ووقفتها كتهضر معاها!
مرجانة: سمعت بلي العالي جد السلطان لي غيتزوج عائشة..بغا يخطبك والغد ليه من هنا يديك وعرس واحد يجمعكم..ولكن خفت غير مولاي يقول لا..أنا قلت ليك لي كاين باش تشوفي اش تديري واش بغيتي!
قربات ليها حتى ولات كتوشوش فودنيها.
هنية: شفتيه بعينيك!
مرجانة: عويناتي لي ياكلهم الدود فقبري!
رجعات من سهوتها على شمس الدين لي مفاهم والو وباقي واقف عليها.
هنية: راه خبار القصر كتوصل..الخطاب جاوني ونتا مانعني!
شمس الدين: الخطاب؟ الزواج أجدة الزواج!!
هنية: راني فمقام باك ونسخط عليك لا وقفتي فطريقي..وتخلي خدم القصر فيا يهضرو ويشمتو..وبلي ولد ولدها واقف فطريقها!
قالت لي عندها..وزادت مخلياه..وجهه ما كيبين والو..ما عرف يضحك ولا يندب!
خرجات من جناحه مقادة حالتها..وللحريم داوها رجليها..وعلى الباب وقفات ولرحيمو لي جات عندها غمزات.
مرجانة: امضرا درتو لي قلت؟
بدات رحيمو كتفرنس..حاطة يدها على فمها.
رحيمو: مشينا انا ومنى حداه وبدينا نهضرو كيف ديما..قلنا بلي لالة هنية باغة تزوجه والا مشا وقالها لمولاي تقبل ليوم قبل غدا..وهي من صغرها محمقها..عرفتي مورا هضرتنا مشا كيجري من حدانا..حتى طارت ليه البلغة ورجع ليها لابسها..أما لالة هنية راه جمعات حوايجها گاع!
ضحكات مرجانة بلي كتقول..وفرحانة بالقصر لي قرب يتخوى.
مرجانة: اوا جوج فدقة..وها لقصر خوى..وخا محاملاش صيفت لطيفة لي غتجي تحضر لعرس بنتها هاد ليلة!
رحيمو بان لها خدم جايين وحيدات من حداها مفكرة بلي قدامهم راه باقين مخاصمين..وحتى مرجانة ميكات عليها.
بانت لها مشة جاية حداها وكتلعب بديلها..وتحنات عندها كتمسها وتعاود..حتى قفزات المشة فيدها فاش يونس جا يجري جيهتها!
يونس: وا مشة مشة مشة.
بقا كيعاودها بشكل هستيري وحتى هو تحنى حدا المشة كيلعب معاها ويجر ديلها حتى تقفز!
شوية مد يديه لجيهت المشة..وهو يجر ليها بزولتها حتى قفزات من بلاصتها هربانة!
تلفتات ليه مرجانة مخرجة عينيها..وهو تبسم لها حال فمه حتى تسدو عينيه.
يونس: إلا كانو غلاض غتكون نثوة والا رقاق راها ذكر.
بلا متحمس مرجانة جمعات صدرها عندها..لا يجرو لها!
▪️توقعاتكم وأرائكم▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
