▪️مرجـــــــــــــــانة▪️
▫️من كتابة هيرا▫️
▪️الجزء التاسع والعشرون▪️
الغالي وقف عليهم..يد شاد بيها لجام الخيل..ويد حطها فخصر حورية جارها ليه!
-علاش؟ "حيد عينيه من على الگزار وشاف فحورية وهو كيقول" زيد مزال لحم الغنمي مرتي كيعجبها!
الغالي راجل بحاله بحال الگزار لي قدامه..وعارف شوفاته اش كيعنيو داكشي علاش حطه قدام لي واقع!
نجوى شدات اللحم..والگزار فمه لجم..مشا معاهم وباقي حاط يده عليها..مخلي الناس كيشوفو فيها..عاد تفكرو الموكب والعروسة!
هي شافت عينيه لي فيها آثار السهير..ولعان راسها حيث خوافة! قالت تدير لي طرى لبارح ما جرى وتنساه وتنقيه من بالها..كيف فافت ولقات حدا الباب نقي بحالة ما وقع والو!
عيونها مشاو للخيل لي جاره..وضحكات ماساه
حورية: لونه زوين..فاش تسالي عطيني نركب عليه!
وقف فاش سمع اش قالت..لعنات فخاطرها..حيث دوات قالت يمكن باقي مقلق منها..لكن لي دار هو قال لنجوى تسبقهم..ووقف ماد يديه ليها باش تطلع!
شدات فيديه طالعة فوق العود..وهو طلع وراها..شاد لجام وسايق بيها!
الغالي: وجدي راسك على قبل عرس ختك..شوي ونمشو!
ــــــــــــــــــــ
جالسة فالبيت بزز كتسنا امتى يتجمعو كلهم باش يمشو للحمام..حمام العروس..بيت جامع ختها منانة ومرت خوها لكبير راضية!
مجمع ما فيه نفس خفيفة!
راضية: صبح ورا القثبة كله محفور..الله يستر.
ضحكات منانة..عارفة ختها كتخبي لفلوس تما..وغتكون جبداتهم !
منانة: إوا كوراه لكلاب باتو يحفرو تما..على العضام.
ضحكات مرجانة معوجة بنفس نبرة منانة ردات.
-سبحان الله لي خلق..وفرق! فينما توسل شي حد على لي كيبغيه..يقول ليك بلاصته وفين كان.
كل وحدة ميقات الشوفة فالأخرى مسممة..مخلين مرت خوهم..راضية وسطهم!
جات منانة تنوض بحالها..وناضت لها مرجانة جارها!
مرجانة: شنو هادشي؟!
دفعاتها تطلق منها وقالت
منانة: شنو بغا يكون..طلقي مني!
بالهواش طلعات مرجانة كم قفطان ختها..وبانت آثار صباع حمرة فيدها.
مرجانة: دبا غتقولي ليا اش هاد شي ولا غنشوهك فهاد رياض!
منانة نطرات بدها منها: سيري تلعبي..بسعي مني!
مرجانة: مبغيتيش؟وامي.. مي اجي تشوفي..امي!!
كتعيط على مها شامة بالغتوات حتى سدات لها منانة فمها..مگلساها حداها !
منانة: غير تخاصمت معا راجلي..قبل ما نجي.
مرجانة مطلعة لحاجب: عاودي لي كلشي من الأول!
منانة: فاش بغيت نجي..كنت كنقلب على قفطان بغيت نلبسه..ما لقيتوش قلت يمكن مع التصبان حطيته فحوايجه..فاش مشيت نشوف ونقلب عليه..لقيته باقي مخلي حوايج مرته لي ماتت! تزايجنا فالهضرة..حتى جرني بنطرة..مالقيت ماندير غير نشدها فقلبي..منقدرش نقول لا ونرجع مطلقة وولادي يتفرقو عليا..غير فاش بغيت نخرج شدهم ليا!
ضحكات مرجانة مفقوسة: قلت ليك متزوجيش بيه..ونتي ما سمعتيش ليا مرتاحيتش ليه!
نقزات راضية..تقول تاهية معندها.
راضية: مراته القديمة راه شابعة موت..نتي باقة حية..يدير لي يدير راه يرجع ليك ولولاده..المرة المطلقة…كيقولو السباب منها ماشي منه..وديما تابعاها هضرت الناس..كيبان ليا دفني فقلبك لي وقع..وتصالحي معاه "ضحكات ميعة" ديري شي ليلة حمراء ونسيه!
شافت فيها مرجانة..شوفة مصدومة فلي تزوج خوها!
مرجانة: إوا أنا لا كنت نتي كنت قتلت راسي وهنيت الدنيا مني! واش المرة تولدت باش تبقا حانية الراس للراجل..لي دارها هي لي كاينة! شنو عاود قلتي؟ ليلة حمرة! "ضربات على فخاضها ضاحكة مفقوسة" واش المرة تخلقات غير لهاد شي معندها لسان ولا كلام لي تقول!
منانة: أنا تقاداو لي معرفت ما ندير!
مرجانة: هو غيحضر ليوم فليل..متسوقيش ليه ولا تسولي فيه..هضري مع ولد خالك وضحكي مع ولد عمتك..يهضر ولا يقول شي حاجة قوليه نفس لكلام لي قالو فاش لقيتي حوايج مرتو لي ماتت! وأنا متأكدة غيهضر..وخى يكون مكيحملش فيك الشعرة ميخليش مرة على دمته دير هكا..ولادك باقي صغار وغيبغو مهم بلهلا يطريه ليه..ديك ساع هضري معاه بالخاطر يانتي ولا الله يعاون! قالك هاه ولا هاه قوليه محدي فدار با سير خلي ليك الوقت تفكر..ومتبقايش تدوزي حداه ولا تسوقيه!
تجمعو لي غادي يمشو مع مرجانة للحمام..بزز عليها غادية..الحمام مكري ليهم ومدخلينها بالسلاة والسلام ليه!
العرس عرسها والحمام ليها..ولكن مخلات حد يقرب ليها..كتغسل بحدها..وتلبس بحدها !
الشعرة لي طاحت فالأرض تبعها حتى تلويها فيدها..ولا بقات فالمشطة تحيدها..كاع لي غسلات بيه شراته جديد على قبل السحور حگا ما حگا قالك الحساد كثرو والسحور حتى هو!
قصبة القاضي عمرات..فاش طاحت الظلمة وتوالات..الليلة مرجانة رضاتها ليلة الحنة وخطبة وزواج وگاع لي يكون!
حورية هي وراجلها حتى هي جات..تعنق مها وتبارك لختها!
ومرجانة طل من شق بيتها بيتها على راجلها الغالي لي مع باها..لمهم تعيبه وتفقس حورية ملاهيا بيها..على ما يجي السلطان شمس الدين وتهضر على صداقها!
▪️توقعاتكم وأرائكم ▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
