▪️مرجـــــــــــــــانة▪️
▫️من كتابة هيرا▫️
▪️الجزء الخامس والستون▪️
سكتات ووسط دموعها خرجات تبسيمة مايعة من فمها وكتلوي فلسانها!
مرجانة: مفهمتش أنا لي وقع كتقولو مرجانة السباب..ها لحكيمة لصقات فيا الحمل وانا باقي تا مبلغت..الغد ليه تلصق فيا حاجة أخرى وگاع ما تيق فيا!
هز يديه كيلعب فشعرها..ونفسه كتضرب فعنقها.
شمس الدين: متأكدة باقي ما بلغتي؟
مرجانة: إيوا هانتا أمولاي عوتاني!
على ضوء الشمس لي دخل حلات عينيها..فاق طالع ليها الدم كيف عوايدها..مكاينش شمس الدين حداها.
ضورات فلبيت عينيها وما بان لها..ناضت كتكسل وبان لها الفطور محطوط على الطبلة ليها..مشات لاحمام هو الأول عاد لطبلة گالة وتاكل على خاطرها.
ومرة مرة تدوي مع راسها بحال الحمقة!
مرجانة: ساهلة العويد نهرسو ونتري عليه هاد ليلة..والشيبة العاصية مع عائشة نزوجها..والجواري الخمسة لي بقاو نعطيهم الفلوس ويخرجو من هنا!
مرجانة: الفلوس..آه الفلوس خاصني نجيبها تالاش غتبقا مدفونة!
بقات هكاك دغمة ففمها..ومية كلمة بلسانها..حتى ناضت من تما وشبعاتة فكرشها.
مشات خارجة كتقاد فتاجها وقفطانها..دفعات صدرها وتمات غادة لسماء هازة خنافرها.
الخدم والعبيد لي دازت من حداهم كيحنو ليها الراس ويضهرو فيها..ها لي يقول راها بايتى فجناحه ومني جات ما خطاته..ها لي يقول راها حامة وفشهر الثاني گاع!
غادة وكتسمع الهضرة شي عاجبها شي لا..وفرحات كتر فاش كلشي بالسلطان كيربطها!
وقفات عليها خدامة من خدامات هنية..محنية لها وقايلة لها بلي بغاتها!
حتى هي تمات غادية لبيتها..ميعة سيفتها..وعارفة اش بغاتها.
دخلات لعندها لقاتها جالسة والفطور باقي قدامها..وشيرات ليها تجلس حداها..و هادشي لي دارت وجات قبالتها.
هنية: إمتى بلغتي وحملتي وعلاش النفار مقالهاشي!
تبسمات مادة يدها لكاس أتاي كتشربه وتبنن فيه.
مرجانة: صباح النور والسرور يازينة العيالات.
ضحكات لاخرة ساخرة من هضرتها..وضربات بيدها فالطبلة لي قدامها.
هنية: أديك السوسة الحية هضري حسن ليك!
تگبعات مرجانة حاطة الكاس فالطبلة قدامها.
مرجانة: حشومة عليك أنا مكنعرف حتى أش كيدير راجل مع مرته عاد نحمل!
هنية: وأش كتضلي تديري مخشية فجناح السلطان؟
مرجانة: من نهار لمصايب طاحو فوق راسي..وهو تما مخبيني..مكنشوفه گاع!
ميعات هنية وجها..فرحانة بلي سمعات ودنها..و باغة عود الروح تحمل بولد حفيدها..وخا تدور تدور ولعقلها تقول لا تيقي فمرجانة.
هنية: إيوا وجدي راسك الجواري لي خرجو..غنعاود نجيب وحدين جداد يدخلو..عنداك ينوض صداع معاهم حتى هوما!
ضحكات مرجانة مسايراها..خافت تقول لها بلي حتى شي مرة ما تقدر تدخل للقصر من وراها..كيف كيقول صداقها..وسكتات خافت من بيتها تجري عليها.
كحزات مرجانة حداها..حتى لصقات حداها..حاطة الراس عليها.
مرجانة: علاش مرجعتيش تزوجتي؟ ونتي باقة تدگي وتدردكي..صغيرة وزينة وعاطية للعين!
ضحكات هنية فرحانة بالهضرة لي كتسمع عليها..لي يمدح زينها تحطه فقلبها!
هنية: إيوا مجاتش مرة تعاود تزوج وخا نكون نفتن بالزين..وأنا كنت كنربي ولادي وولادهم..وحد ما بقا فسهمي بنت سلطان ومرات سلطان!
مرجانة: لي غيتزوج بعائشة جده سمعته بوديناتي لي ياكلهم الدود..كيهضر عليك وقايل كيعرفك..وكان ناوي يتزوجك!
مدات هنية يدها..كتسرح فشعرها..وتقاد گلستها.
هنية: إيوا قبل ما نتزوج كان حاط عليا العين..الزغبي وخا تزوج والمرة ماتت باقي لدابا!
مرجانة: زعما إلا عاود هضر فيك تبغي تزوجي!
هنية: ايوا وهضرة الناس.
مرجانة: وشكون يقدر يهضر فجدات السلطان وزينة العيالات!
قالتها كتلحون عليها..و بجوج كيضحكو بحال الحبابات كل وحده واش كتقول فخاطرها..وحدة تقول هاني جريت عليها من دبا..ووحدة تقول زعما أنا باقة قد الزواج!
خرجات مرجانة من عندها ضاحكة بانت لها رحيمو وگلسات تنغز فيها..حتى الاخرى فهمات وناضت لبلاصة المخبية لي كيتجمعو فيها!
ضورات عينيها وبانت لها منى كتمسح فالطابلة لي حداها..حيدات الشيفون من يدها..وجراتها من قرفادتها.
تجمعو بثلاثة تحت الشجرة..عين حاضية جنابهم وعين فيهم.
رحيمو: لالة اش قضية الحمل؟
مرجانة: الحكيمة خرجات عليا قلت لها تمرضني صدقات محملاني.
منى: إيوا محگلهم جراو عليها هاد صباح!
مرجانة: معندي فلوس هزي من اللوبان لي عندي وعطيها لي يكفيها..حتى نشوف كيف ندير ليها.
حطات يدها على وجها كتخمم ومن بعد كملات.
مرجانة: راني عمرت راس هنية بالزواج ونتوما اش درتو معاه؟
رحيمو: راه أنا ومنى هضرنا قدامه..وقلنا بلي لالة هنية مني عرفاته جاي وهي واقفة توجد كلشي على قبله..وباقي ما نساته..مخلينا ما قلنا قدامه..وهو سمعنا وتم غادي ضاحك.
منى: الله يا لالة وغديري فيهم خير وتجمعيهم.
مرجانة: باش تعرفيني ضريفة! هنية ما دارت لي والو وخا مسمومة وهاني غنزوجها!
رحيمو: شحال وانا نعرفك..وعمرني غضرتك..وحتى الزواج اللخر ما زوجتيني!
شافت فيها مرجانة مخرجة عينيها..ولاخرة صقلات واقفة حداها!
▪️توقعاتكم وأرائكم▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
