💎مكتملة💎
🌙🌙🌙مرجـــــــــــانة🌙🌙🌙
✨كان يا مكان في قديم الزمان! ✨
جملة سحرية فتحات البيبان وخلات الأنس يتزوج بالجن والغول حتى هو ليه مكان..
كاين السلطان وكاين الخدم والحشم...وكيفما كاينة الفهيمة كاينا الدميمة..
كان يا مكان جملة تقالت فكل مكا...
شمس الدين: سميتك صفوان..الأمير صفوان..ومن بعدي السلطان صفوان..كيف تذكر فسورة البقرة "كَمَثَلِ صَفْوَانٍ عَلَيْهِ تُرَابٌ" غتكون كيف معنى اسمك صخرة قوية قدام لي يستاهل..بحال اسمك لي مشتق من الصفاء والنقاء غادي تكون..وتعيش بلا نكد ولا هم..بعقل وقلب صافي..طموح ومتميز فلي كتدير بمجهودك وصبرك..وتوقف مع المظلوم وما تآدي حد ولا تسكت قدام الحق!
تبسم كيشوف فيه وحطو حدا مرجانة..لي غير شداته بدات كتحقق فيه..خلات شمس الدين حال عينيه..فاش قدامه جبدات بزولتها حاطاها ففم الولد الصغير كترضعه!
مرجانة: كان واحد من الأحلام ديالي نخرج لحليب من هنا ويرضع!
ضرب على جبهته كيضحك..باسها فجبهتها وناض يجيب ليها تشرب!
الولد الصغير كبر ومن العام لحق لثلث سنين!
كان كيجري ويضحك فالجناح ورحيمو كيف عادتها مقابلاه.
غير وقفات عليها مرجانة وتلفتات ليها..رحيمو كتزلع وتنزل فيها.
كانت كرشها بدات كتبان وسط القفطان!
داخلة فالشهر الرابع..وعيات ما تشرب الدوا لكنه غفلها ودار فعلته فيها!
رحيمو: لا ألالة هاد ليلة مغاديش نشدو وحدايا نعسو..ناوية ندخل الحمام نبياض ونزيان.
مرجانة: كون كان الحمام يبيص كون بيض قبابو..أما الزين الا بغيتي خباره شوفه قبل ما يفيق من نعاسو..يغسل وجهو..وشدي لبعلوك خلاص ارحيمو!
رحيمو: لا ألالة غير خليني..واش كل ليلة تنوي تقضي الغرص تلصقيه فيا..بنادم ضاحك فليل وانا عاسة عليه!
كانت غير كتبغي تقلبها ليلة طويلة مع السلطان..تلصق لولد فرحيمو ولا منى باش يهنوها منه ومن صداعه!
مرجانة: ما بقات حشمة ارحيمو! منى نقولها شدي لولد تقول لي كتوجد لولدها لجاي من الجيش..ونتي نقولك شديه تقول ليا باغة نمشي لحمام..وإلا ما حيدت الحطب عليك هاد ليلة ما نتسماش مرجانة!
هزات عينيها فالولد وكان بعد عليهم كيلعب هنا ولهيه ومرة مرة ينوض كيجري!
مرجانة: نوضي تبعي صفوان لا يبعد!
ناضت رحيمو كتغبن وتجر فجلايلها..وهو بعد من حدا مرجانة وهي تابعاه كتجر رجلها.
سمعات صوت ضحكته حبسات ومعاها هزات عينيها..والعينين تحلو فاش شافت عصمان كيلعب فحضن واحد غريب!
لابس لباس الجيش وشحال واتاه..بطولته وتجريدته جا معاه اللباس..وزينه كمل لي بقا!
عصمان شافها ومشا كيجري عندها..هز حتى هو عينيه فيها..وحل فمه نص حلة كيشوف فيها.
على اثر تعياط منى تلفتو بجوج وكانت غير كتردد بـ ولدي سعد اولدي سعد!
ولي زاد حل فم رحيمو غير لي قبالتها..فاش تلفت وجاوبها بـ نعام أيما!
ناض جامع نوضته..وعينه بزز حتى تفكات على رحيمو غادي جيهت مو.
ضربات اليد على اليد..وعشرتها مع مرجانة خلاتها تعلم منها.
