▪️مرجـــــــــــــــانة▪️
▫️من كتابة هيرا▫️
▪️الجزء السادس والعشرون▪️
قصر مبني على ساس..وعامر بالناس..الخدم والعبيد..الجواري وعائلة المجيد..المجيد السلطان شمس الدين!
كان فبيته..من بعد يوم طويل كيف غيره..واقف كيشعل الشموع لي يضويو عليه..ساعة دخل عبد من لي حاضين الباب عليه.
-لآلة هنية قدام باب بيتك أمولاي.
أشار ليه يدخلها..والعبد دار لي بغى.
دخلات هنية عنده..جداته لي رباته..مرة الشيب طغى فراسها..ولكن باقة شادة فالدنيا والعاطي يعطي!
اللباس الزين غير ليها..ديما مسابقة مع الحريم عليه..تكره لي يقول ليها كبرتي..وتبغي لي يقول ليها صغارتي!
شدات من عنده الشمعة كتشعل الشمع بلاصته.. وهو مشى جلس على سريره.
هنية: وليت نسمع خبار زواجك من الخدم!
سكت ومجاوبهاش حاضي سقف..ومحاضيهاش!
تغددات فبلاصتها..عرفاته نهار كيسكت..بمعنى راه الموضوع بعيد عليك..ونتي بعيدة عليه!
زواج السلطان الثالث وهي مخاصش تدخل! هي خاص تعزل وتنقي ليه..وهادشي دارته..ختارت ليه المرة على دوقها..وهو كيعاملها كيف الباقي..بحالها بحال الحريم! الشوفة مكطلعش فيها من نهار الزواج!
هنية: نوجد ليك خيط الروح لهاد ليلة؟
عاوتاني سكات! خلاها تقلى فسمها!
خيط الروح..البنت لي قالت تخيرات ليه..وهي زينت البنات..كانت اسم على مسمى..خيط وواحلة فيه روح!
زينت البنات غير حيث من عائلتها..وبغات ولاد السلطان يكونو منها..وتزيد عائلتها تطول فحكم البلاد!
هنية: من الحرب الكبيرة..قلتي غتولد من مرة وحدة..باش الخوت على القصر ميتقاتلوش..ويكونو من عرق واحد! هدي قبلناها..وتخيرنا لك غير الزين على خوه..اش كتسنى؟
عيونو العسلية تحطات عليها..وجاوبها مهنيها
-الزين كيزول..وكيبقى غير المعقول!
هنية: إوا حتى المعقول كاين عند خيط الروح..قررتي معامن غتولد؟ عنداك تقول ليا فخرية!
قالت مفكرة فخرية..وعلامات العيفة بانت على وجهها..فاش تفكرات مرته الثانية..المرة لي ختارتها امه لطيفة بيديها..امه لي ما ولداته لكن حتى هي رباته!
لطيفة لي سميتها ما كتشبه ليها..من نهار دخلات مرة لولدها لقمان الله يرحمه..وهي وياها كي المش والفار!
حركات راسها مبعدة فكرت يولد مع تريكت لطيفة..وهي كتقول فخاطرها تريكت السحارة!
هنية: إوا قول ليا معامن قررتي تولد الولد؟
وقف حاط يده على كتافها مخرجها.
شمس الدين: حتى تحمل وتعرفي!
وقفات ليه ما بغات تزيد..لاصقة فالأرض.
هنية: إوا راه خاص تكون تعرف تربي!
قال كلامه..دافعها مخرجها من بيته.
-قلت كلامي!
صبح الصباح..والديك صاح..نايضة مرجانة وهاد المرة ما فيقها حد..غير صحصحات..وحوايجها بدلات..وناضت جيهت الكشينة!
غير شافوها لخدم وناضو خارجين بالصف! نهار كتدخل مرجانة للكشينة..النهار لكحل عليهم!
كاع الماعون كيتجبد معاها..والفلوس لي كيتخلصو كتخرجها منهم قطران!
جبدات خيزو..وتخيرت غير الكبيرة والزينة..قطعاتها ونقاتها وحطاتها تسلق!
غير تسلقات..وجبدات المهراس كتدگها حتى تمعصات..هزات من الگدرة العسل الحر..معلقة ففمها ومعلقة خلطاتها مع خيزو!
وهزات بدات فوجها تطلي..حتى عمراته..عاد خرجات من تما كتدور بوجهها هكاك.. حتى نشف ومشات غسلاته..مخلي بشرتها صافية..غير على قبل هادشي خلات الكشينة مقربلة وراها غير بالتقلاب!
وقفات عليها شامة..وهي مسرحة رجليها وسط القصبة..نغزاتها برجلها..حتى مرجانة تكلمات ليها.
شامة: نوضي العزبة..عرسك بقا ليه غير ربعيام!
مرجانة: إوا هادي لي عرسها بقا ليه غير ربعيام.. جاها صندوق ذهب عامر..فين هو!
شامة: مخبياه ليك..حتى يتحط مع دهازك.
جمعات النوضة من الأرض كتشوف فيها..كلشي إلا ذهب!
مرجانة: غير عطيه ليا..انا نعرف نخبيه..لاهو لا دهازي!
شامة: ريحي باركة من صداع.. صيفطت مرسول لحورية على قبل عرسك..ومنانة ختك شوي وتجي..وحتى لي بقا من خوتك وعائلتك.
مرجانة خرجات عينيها: وا بنادم بعيد لاش كتجبديه لاش.. خلي بنادم فداره هاني..جايبا ليا الناس من قردة حنة اويلي..بغيتي تعمري القصبة! لي سولك قوليه كولشي جا على غفلة!!
مشات وخلاتها ومرجانة غير تابعاها بـ عطيني ذهبي عطيني ذهبي !!
حتى بانت لها رحيمو ووقفات جارها.
مرجانة: وجدي راسك بليل..عرفتي شحال من رزمة ديال لفلوس خاص نجبدو!!
رحيمو: وخا ألالة..تكون أخر حاجة ندير معاك قبل ما تمشي.
مرجانة: قبل ما نمشي! عوالة تفرقي مني؟ رجلي برجلك فينما مشيت..كتابك تحط حدا كتابي..لاصقة فيك!
إوا وجه رحيمو فهاد لحظة..كيقول غير الله يخرجها على خير!
خلاتها مصدومة ومشات كتطل من البالكون لي كان قريب..بانت لها ختها الكبيرة منانة داخلة!
من الصغر بجوجهم حد ما يحمل لآخر..لي بغاته مرجانة بغاته منانة والعكس كاين!
منانة شافتها حاضياها..حطات يجيها على جنابها وبتعواج قالت
-إوا كوليني!
حطات لاخرة يديها على جنابها..نقلدة نبرة صوتها..وقالت
-الله حرم لحم الخنزير!
▪️إلى الغد انشاء الله ▪️
الماسك زوين لاصحاب البشرة الذهنية..خليه 15 دقيقة وحيديه..ولكن بقاي من سيمانة لسيمانة تديريه.
اوا بانت المسمومة لولة د هنية باقية الثانية لطيفة 😂.
أنت تقرأ
مرجانة🌙مكتملة🌙
Romansa💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
