▪️مرجـــــــــــــــانة▪️
▫️من كتابة هيرا▫️
▪️الجزء السابع والخمسون▪️
قالت كلامها..والدموع فعينها..كلشي تخلط عليها..وبغات غير السبة باش تبكي وتشكي!
رحيمو: لالة نتي دبا علاش دايرة فراسك هاد لحالة..لي وقع وقع وما عند الميت ما يدير قدام غسالو.
ضارت مرجانة عندها..وتبسمات كتضحك ليها!
مرجانة: واش يحسابلك مرجانة غادي تسالي..راه قلت لك حتى نتري على كلشي عاد يهنا بالي!
سكتات كتمسح دموعها وتضحك عاد رجعات كملات.
مرجانة: واش أنا عارفة سر عود الروح وديك لطيفة وبغتيني نبقا ساكتة..نشوف مع لطيفة وندوز لديك لعويد!
ضحكات رحيمو حتى هي وسبقاتها..ومرجانة غادة وراها..الضحكة طاحت من وجهها..وتنهدات سايسة يدها..عاد عاودت رجعاتها لوجها!
نزلو حتال عند لطيفة وكانت غير بحدها..بنتها مشات وخلاتها..كانت گالسة وهوما وقفو وتقابلو معاها..وهي غير شافت مرجانة وميقات فيها.
گلستها فكرات مرجانة غير فديك الليلة..نهار تطلقت فخرية!
كانت لطيفة خارجة تطل على الشوهة لي وقعات..وفخرية لي مشات.
ساعة زغبية ديال فخرية جراتها تدوي معاها..عالله تكفها من الحفرة لي طاحت فيها.
داتها لجنان مغطية وجها باش حد ما يشوفها..ولا بشوف وجهها لي حمر مطلي بالحناء وخلاها تولي حالتها!
حطو الراس عالراس وبداو يوشوشو لبعضهم..غافلين على مرجانة لي من لفوق كطل عليهم!
لطيفة: أش هاد لمصيبة درتي..السحور أفخرية السحور!
فخرية : طيحاتني فالحفرة طيحاتني..مانويت ندير بيدي ولا رجلي..لفعة ولوات لي عنقي..فكيني فكيني.
لطيفة ما عندي ما ندير ليك..التهمة تبتات عليك..أش داك لسحور راه ماغيهنيك!
فخرية: وليتي تعايريني بالسحور! تعقلي نهار وقفتي عليه وديتك بيدي لفطوش وبيه قتلتي السلطان لقمان!
تلاحت لطيفة كتسد فمها..وحاضية هنا ولهيه وجنابها..والرعدة شداتها.
لطيفة: أش داك تذكري هادشي..ياك زوجتك بالسلطان باش تسكتي!
فخرية : ماشي غير سلطان واحد لي قتلتي..جوج ! بديتي بلول باش الحكم يشده راجلك..ونهار شده ونساك والولد جابو مع غيرك..عريتي على نيابك..ونهار عرف بحقيقتك..قتلتيه بيدك..فكيني من هادي ولا غادي نفضحك!
بدات لطيفة كترعد كثر من لول..و شدات فقلبها..وتكات على الحيط لي وراها..تلفتات لفخرية قبالتها..وتلاحت على عنقها قاجاها.
لطيفة: سكتي سدي فمك سكتي..ولا غادي تقتلك بيدي..غبري ووجهك منبقاش نشوفه قدامي!
لاخرى زراكت وطاحت للأرض ولطيفة تبعاتها..وما بغات تطلق منها..حتى شافتها غتموت عاد حيدات يديها.
خلات لاخرى كتزحف هربانة منها..وهي رجعات كتضرب فحناكها..وتشد قلبها.
فاقت مرجانة من سهوتها..وداكشي لي بدل خططها..وعرى لها على نياب لي قدامها.
قربات وجلسات حدا لطيفة حاطة الرجل على الرجل كتشوف فيها.
مرجانة: نهارك دايز زوين أحماتي؟
ضحكات لطيفة نافخة جلايلها..وما بغات تشوف فيها.
لطيفة: حماتك؟ عاد عرفتي بحقي حتا جريتي على بنتي..ونيت كيقولوها إلا كانت الغلة قد الواد..راه الحماة تبغي مرت الولد..وكنت جاية نتي ماسكوتية ولا درويشة وفيك العجايب!
مرجانة: واش الا سكت وسديت فمي قلتي فيا العجايب..وإلا دويت وبغيت حقي قلتي كنجيب غير المصايب!
قربات لها..حتال ودنها وبدات توشوش لها.
مرجانة: ولا خاصني نكون بحال فخرية عاد تبغيني..نوريك السحارات ونعاونك تقتلي!
بعدات منها..كتشوف بشوية فيها..وتبسم لها..خلات لاخرة صفارت وبدات ترعد قدامها.
لطيفة: كيف درتي حتى عرفتي!
مرجانة: ماشي مهم كيف عرفت..المهم شكون غيعرف من بعدي.
لطيفة: أش بغيتي مني!
مرجانة: غادي تكوني توحشتي بنتك..من معزتها عندك..سيري شوفيها وسكني معاها ونسيها!
قبل ما تجاوب الاخرى مرجانة سرحات رجلها..وشدات يدها قدامها..كتنفخ وتحك فضفارها مع ففطانها.
مرجانة: آه حگا إلا فكرتي تلعبي معايا ولا "كتقج راسها وتدير راسها مخنوقة بلعاني" الخبار غتوصل غتوصل ماشي غير بحدي لي عارفة..وموتي غادي يتزاد لعقابك..اللهم سيري همدي تما ودعي لربك!
تمات نايضة حتا وقفتها لطيفة من يدها..جاراها لعندها.
لطيفة: أش هادشي كديري أنا حماتك..خاصك تهزيني فوق راسك..وتقولي غير حماتي لالاتي وبنتها مولاتي!
تلفتات لها..ونطرات يدها..وقالت بعد ما مسات وغمزات لها.
مرجانة: حماتي يا وجه الدلو..نتي حارة..وولدك حلو!
▪️توقعاتكم وأرائكم▪️
أنت تقرأ
مرجانة🌙مكتملة🌙
Romance💎مكتملة💎 🌙🌙🌙مرجـــــــــــانة🌙🌙🌙 ✨كان يا مكان في قديم الزمان! ✨ جملة سحرية فتحات البيبان وخلات الأنس يتزوج بالجن والغول حتى هو ليه مكان.. كاين السلطان وكاين الخدم والحشم...وكيفما كاينة الفهيمة كاينا الدميمة.. كان يا مكان جملة تقالت فكل مكا...
