مرجانة🌙مكتملة🌙

🌙الجزء 5🌙

▪️مرجـــــــــــــــانة▪️
▫️من كتابة هيرا▫️
  ▪️الجزء الخامس▪️

حطات الولد خلاتو يجري غادي ويبكي
شامة: واش حتى ولد خوك ما هنتيه؟
مرجانة: هانتي غير سمعيني"هزات عينيها..شافت فيها" راه كنت دايزة وسمعت الخدم كيهضرو ويعيبو فينا بلا غنسيفطو الفطور غير معاهم..وتا حد ما مسالي لحورية ليوم هاضرين الخدم لغد ليه يهضرو فينا كاع الناس..وانا ضرباتني نفس علينا وعلى ختي هذا ماكان

هبطات شامة راسها كتخمم وتشوف هضرة بنتها وأكثر ما كتكره شامة هي هضرة الناس..ومرجانة عرفات ليها داكشي علاش قالت لها وخا.
شامة: سيري جمعي شغلك جهد لي تمشي تدي لفطور وتجي أنا نمشي نقولها لباك يدير بحسابك
ضحكات مرجانة فرحانة وعنقتها ومشات جيهت بيتها عـ الله توجد راسها..

قدام دار القصبة..واقفة شامة كتبكي وتمسح بيدها..كتشوف حورية لي كتسلم على العائلة من كبيرها لصغيرها والبكية ما خطاتها ما خلاتها..وصلات عندها وعنقتها ما بغات تطلقها حتى خدات رضاتها..عيونها حطو على عائلتها من كبيرها لصغيرها حطات الحيك على وجها وزادت مع موكبها كانو معاها الحراس لي يحضوها والخدمات لي مونسينها..بدا الموكب كيتحرك ومعاه كيضربو ويغنو في الطريق..باش كلشي بخبار العرس يسيق..غير غبرو وصوتهم قلال.. تفكات الجقلة وكل واحد مشا وقف على شغلو..

قبل الفجر ديال النهار الثاني كانت شامة حدا بنتها  فالباب اللوراني..ديال القصبة توصي وتعاود..كانت مرجانة راكبة فوق الخيل بقفطانها لي كيطير مع البرد ديال ليل ومغطية بالسلهام لي غطاها وغطا وراها..وحداها رحيمو حتا هي ركبات فوق الخيل ومعاهم 4 حراس وكانت رحيمو شادة لجام حمار رابطاه مع عودها وفوق منو الفطور والحوايج..

شامة: هاد الحراس ثيقة وعزلهم باك بيديه..حضي راسك وعنداك من قطاع طريق..وخا انا نخاف على الطريق وما يجي منها منك.
مرجانة: كوني هانية يا الحنينة كيف ما مشيت كيف ما غنجي..خليت ليكم الخير.
مع كملات الكلام ضربات على اللجام وزادت مع طريق مخلية غير الغبار والزمان الغدار ومها لي كتدعي بالعبار..

وصلو لغابة المنصورين مع الفجر لي فات والشمس لي طلعات.. وكلها ولا حاضي جنابو وعينيه هنا عينيه لهيه..وقفو حدا بلاصة فيها جوج طرقان ها ليمن ها ليسر بانت مرة كبيرة جاية ووراها معزة جاراها..نزلت مرجانة قالت هيا لي غسول

مرجانة: سلام الله عليك..الا سمحتي وخا نسولك فين طريق الحدود وفين طريق السحارة فطوش؟
هزات المرة عينيها مصغراها فيها وقالت: وفين غرضك أبنتي وإنا طريق حبيتي؟
مرجانة كتنعت وتقول: هزي عينيك بشوية وشوفي لبنت لي راكبة فالخيل راه ضرباتها جنية ومن ليل ليل كتسيف عليا..ملقينا حل من غير ديك السحارة لي معروفة دقة ببطلة..راه لا طاحت ظلمة ما نبقى لا انا لا لغابة لي لقاتو قدامها تحيدو.