دعنا نحيا سويًا (مكتملة)

اقتباس من الفصل الثالث عشر ✨

دي تصبيرة كدة بدل فصل النهاردة عشان بدأت امتحانات الشهر و ملحقتش اكتب، و هخلص يوم الخميس الجاي إن شاء الله و لحد يوم الخميس مش هقدر انزل حاجة فاعذروني، انا قولت انزل اقتباس صغنون كدة بس عشان محدش يزعل🥺🤎
_______________________

وصلت الفتيات عند منزل «براء» فخرجت الفتيات واحدة تلو الأخرى ثم صعدن إلى الطابق الثالث حيث المنزل تحديدًا، قامت «براء» بإخراج مفتاح المنزل ثم فتحت الباب و دلفت للمنزل هى و صديقتيها ثم قالت بصوتٍ عالي :
"يا بطـوط أنتِ فين؟"

خرجت والدتها بفرحة من قدوم ابنتها و عندما وقع نظرها على صديقات ابنتها فقالت بضحك :
"اه يا سوسة منك ليها انا عارفة انتوا جاين ليه!، بس و الله لو واحدة فيكم زودتها و قلت أدبها مش هخلي منيرة ولا سِهام يعرفوا يخيطوا فيكوا حتة"

اقتربت منها الفتيات و هن مبتسمات بخبث فتحدثت «آلاء» ببراءة مصطنعة :
"ايه يا بطوط هو احنا بنعمل حاجة؟، بلاش ظلم بقى!"

نظرت لها «فاطمة» بشر ثم قالت :
"حاسبي يا بت جناحاتك جت في عيني!"

ضحكت عليها الفتيات ثم قبلتها كل واحدة منهن فقالت لها «نداء» :
"بطوط حبيبة قلبي ممكن متدّخليش أنتِ و بنتك خالص النهاردة عشان لامؤخذة البت سلعوة دي انا مبطيقهاش"

نظرت لها بضيق و هى ترفع إحدى حاجبيها فأكملت الأخرى دون اهتمام :
"انا عارفة انها بنت اختك بس انتِ اكيد بتحبي بنتك اكتر، ولا ايه يا بطوط؟"

اومأت لها بابتسامة فأكملت حديثها :
"و عشان بنتك الغلبانة دي و رخامة سلعوة ليها احنا مش هنسكتلها، أنتِ عارفة يا بطة عمايلاها محدش بيطيقها!"

تدخلت «آلاء» تكمل حديث «نداء» :
"و متخافيش يا بطة و الله مش هنضايق اي حد غيرها، أنتِ عارفة أننا مش بنبدأ بالمشاكل"

كانت كل واحدة منهما تتحدث بصدق لأجل صديقتهما العزيزة و شعرت كلا من «فاطمة» و «براء» صدق حديثهما فنظرت لهما «براء» بحب ثم اتجهت لهما تعانقهما بحب، ابتسمت لهن «فاطمة» ثم قالت :
"انا ميهمنيش غير بنتي و اللي يجي عليها ملوش عندي خاطر، ربنا يقويكم عليها يا بنات، و يبارك فيكم و يخليكم لبعض"

ابتعدت الفتيات عن بعضهن ثم اتجهن إليها يقومن بمعانقتها بحب فتحدثت «آلاء» بمزاح :
"اهو بسبب الدعوتين دول الواحد هيبذل كل جهده عشان يولع في سلعوة هانم، و كله بثوابه"

ضحكت الفتيات عليها بشدة فوكزتها «فاطمة» في كتفها بخفة و هى تتجه إلى المطبخ مجددًا تخبرهن أن يذهبا خلفها لمساعدتها.
_______________________

#دعنا_نحيا_سويًا
#ملك_عادل