دعنا نحيا سويًا (مكتملة)

الفصل الحادي و العشرين

السلام عليكم يا حبايبي يارب تكونوا بخير و اللي خد الأجازة يارب يكون مبسوط و اللي لسة بيمتحن ربنا معاكم و تخلصوا على خير .

انا متأسفة جدًا اني اتأخرت على نشر الفصل الجديد و انا مخلصة امتحانات من فترة مش كبيرة بس كنت مشغولة جدًا و اول لما فضيت و كتبت الفصل قولت أنزله علطول، يارب الفصل يعجبكم و حاجة كمان لو حد ناسي اللي حصل ممكن يبص بصة بس على الفصل اللي فات و هيفتكر الأحداث علطول .

متنسوش الڤوت بقى و تقولولي رأيكم في الكومنتات🥰❤️

***********************

بعد وقت قصير كان جميع الشباب و البنات يتبادلون أطراف الحديث عن اشياء كثيرة في المطعم الذي التقوا فيه، هتفت «رقية» بضيق :
" انا جعانة بقى و عايزة آكل، و انتوا شغالين رغي من ساعة ما قعدتوا، حرام عليكوا ارغي على معدة فاضية "

كانت تتحدث بحزن مزيف و عندما هتف باقي الشباب بأنهم جائعون أيضًا اقتربت «براء» من صديقتيها و قالت بهمس لم يسمعه سواهن :
" هنقعد ولا هنمشي؟ "

أسرعت «نداء» تجيب عليها بنفس النبرة الخافتة :
" لا لا هنقعد "

نظرت لها الفتاتان باستفسار فسارعت تصحح حديثها :
" اقصد يعني إن انا جعانة بردو..ناكل و بعدين نمشي "

كادت «آلاء» تعارضها فأكملت «نداء» بخبث :
" و ممكن أهبط منكوا في الشارع..الله أعلم يعني "

زفرت «براء» بحنق ثم اعتدلت و جالت بنظرها في المكان و عندما وقع بصرها عليه وجدته ينظر لها بدقة فهمست له بسبب اقتراب المسافة بينهما :
" بتبصلي كدة ليه؟ "

اقترب منها هو الآخر لكن حافظ على مسافة كافية بينهما و هو يهمس مثلها :
" شربتي العصير بتاعك ولا تلاقيكي نسيتيه؟ "

تسآئل باهتمام اعجبها فابتسمت ثم قالت :
" أيوة شربته من الصبح، بس بتسأل ليه؟! "

" طب و الأكل؟..في اكل معين مينفعش تاكليه ولا لا عشان لما نطلب الاكل؟ "

لم يجيب على سؤالها بل تسآئل مرة أخرى، بينما هى كان قلبها يرقص بسبب اهتمامه الذي ما إن قابلها يغرقها به دائما، ابتسمت ثم أجابته بهدوء :
" اه الدكتور قالي على اكل معين بس الحمدلله في أكلات تانية بديلة يعني عشان كان زماني بعيط والله "

ضحك على حديثها بخفة ثم قال بنفس الاهتمام :
" طب كويس قولي بقى قالك ايه؟ "

" عايزة اقولك حاجة بس الاول..العصير اللي بشتريه و اشربه ده طلع غلط عليا اصلا بسبب السكر اللي موجود فيه "

نظر لها ببلاهة و هو يرمش عدة مرات ثم تحدث بتلعثم :
" انا طبعًا لو حلفتلك اني مكنتش اعرف مش هتصدقيني صح؟! "