حبك في قلبي قصيده

البارت (٤)

-الديره-
طلع عساف يتمشى في الديره ويمر على ربعه يسلم عليهم ، كل ماراح لرياض يشتاق لديره على انه يرجع كل اسبوع لكن يحبها يحب الناس الي فيها كل واحد يساعد الثاني على قد مايقدر ولايشلون في خاطرهم واذا احد فرح بيفرحون معه واذا احد حزن بيحزنون معه واذا احد طاح بيرفعونه ويصيرون سند له بالمختصر اهل الديره عائله كبيره ويتمنى ان حال الديره يبقى كذا ولايتغير مع مرور السنين ، قابل ابو محمود
سلم عليه
ابو محمود: وشلون جدك والجماعه
عساف: والله كلهم بخير
ابو محمود: الحمدلله سلم عليه وقل له يعذرني مامريت عليه اليوم صارت مشكله في محلي
عساف: يوصل ياعم وش صار على المحل
ابو محمود: والله يقول ولدي انه رجع من صلاه الفجر وحس ان احد فيه يوم قرب من المحل الا يطلع واحد يسعى واختفى والحين ماندري وش يبي
عساف: الله ستر عليه ليكون احد يبي يسرق
ابو محود: والله مدري اول مره تصير هنيا ، لكن الغريب ان المحل مانسرق منه شي وهذا الي محيرني
عساف: الحمدلله اذا تبي شي ياعم انا موجود وابد ارفع السماعه واجيك انت عزيز وغالي وتعرف مراح نقصر معك في شي واولهم جدي
ابو محمود: والله اني اعرف ماتقصرون ياوليدي الله يوفقك ويسعدك ويرفع قدرك
عساف: اجل استودعك الله
راح عساف لبقاله الديره ياخذ اغراض الي امه موصيته عليه
عساف: سلام سويلم وش اخبارك وش اخبار الاهل
سويلم: الحمدلله كلهم بخير ، "سويلم كل اخبار الديره عنده ولايخفى عليه شي " عساف دريت وش صار في محل ابو محمود
عساف: اي توه يعلمني يادافع البلا من ذا الشخص وش يبي
سويلم: خبري خبرك بس يقولون ذي الايام الوضع مايطمن والخبر انتقل بسرعه وصار الكل خايف على حلاله وعلى بيته
عساف بضحكه جانبيه يعرف من نشر ذا الخبر : الواحد يتوكل على الله ومابه الا كل خير ولاتخوف احد ياسويلم
'اخذ الاغراض وطلع متوجه على بيتهم'
بدات الشمس تغرب وكان الجو اقل مايقال عنه جميل الناس رايحه جايه الي يسلم على بعض والي جالسين قدام الدكاكين ويسولفون والي يلعبون كوره والبنات الصغار متجمعين يلعبون بألعابهم ، في قلبه (الله يديم الحال )
قرب من البيت
-بيت الجد-
فتح الباب وشاف جده وجدته فارشين الفرشه ومعهم امه وعمته حصه وابوه
لاحض فزت ابوه يوم شافه وابتسم
الجده: يامرحبا ويامسهلا
اقبل عساف وحب يدها وراسها وسلم على جده بنفس الطريقه
عساف: بودي الاغراض واجيكم
بعد دقايق جاء وجلس معهم
الجد: وش اخبار الشغل معك
عساف: الشغل ماعليه خلاف بس انهم يضغطون علينا شوي
الجد: هذا الصح مايبون يتساهلون في شغلهم
عساف: الله يعين

(تنويه بسيط ' البنات يلبسون جلال اذا كان فيه عيال وعادي يجلسون مع بعض بس بحدود مافي سوالف جانبيه واذا سولفو بحترام ، علمهم الجد عبدالله الاحترام بين بعضهم ومعطيهم الثقه انهم مراح يسون شي غلط)

اقبلت ورد ومعها القهوه والشاهي نزلتها
عساف: وش اخبارك ياورد ؟
ورد: بخير الحمدلله ، وش اخبارك انت
عساف: بخير الحمدلله
"علاقه عساف وورد مثل الاخوان من الصغر متربين مع بعض ورد تشوف عساف مثل فارس وخالد ،وعساف يشوف ورد اخته"

اتصل الجد على ولده عادل
الجد: السلام عليكم
ابو تركي: وعليكم السلام يالغالي
الجد: وين قدك فيه
ابو تركي: قدنا قريبين نص ساعه وبأذن الله ان حنا عندكم
الجد: توقع الله يحفظكم ،وقفل الاتصال
الجده: وينهم فيه
الجد: يقول قده قريب
الجده: الله يستر عليهم يارب
ورد: اتصلت على ابوي يقول بيمشون المغرب او العشاء
الجد: الله يهديه دايم اقوله امش في النهار اليل ماحبه وماحب احد يمشي فيه ونزل عيونه وواضح فيه ضيقه
الجده: تعوذ من الشياطن ماراح يصير الا الي كاتبه الله
استغربت ورد وللان تدرك و تكتشف ان جدها يكره اي احد يسافر خط في اليل ويجلس ينتظره وكأنه خبر وفاه تجاهلت الموضوع ' الصمت عم في الجلسه ' بعد دقايق نطق عساف
عساف: جدي ابو محمود يسلم عليك ويقول يعذرني ماجيته محله دخله شخص غريب واختفى وانشغل مع ذي السالفه
الجد: لا اله الا الله ارب ماحد تأذى او انسرق شي
عساف: هذا الي محيرني المحل مانسرق منه شي او قطعه تحركت
الجده وتبي تهدي الموضوع : اكيد انه شخص نعرفه او يتوهم
ورد: الله يستر
ام عساف: الدنيا ماعد هي نفس اول كل شي بيتغير اكيد
حصه: شيهانه وشذا الحكي حطيتي من الحبه قبه مافي الا كل خير
ام عساف: وانا وش قلت ماقلت الا الحق
الجد ويبي ينهي ذا النقاش لان يعرف مراح يخلص: ورد قوميني بروح اتجدد قده بيذن
ورد: ابشر
راحت تجيب عصاه وعطته اياه حطت يدها فوق يده تطمنه دايم هذي الحركه تجمع ورد وجدها اذا قلق جدها ،لف عليها وابتسم

بعد ماتجدد راح هو عساف ولده عبدالرحمن للمسجد يحب الجد عبدالله يروح قبل الاذان بشوي صارت عاده من الصغر علمهم ابوه بذا الشي جلست معه ذي العاده ونقلها لأولاده ومن بعد اولاده لحفاده يحب يعلمهم كل شي يثقفهم
بعد اذان المغرب
ورد والهنوف والعمه حصه مجتمعين يسوون القهوه والشاهي والحلى
انطق باب البيت راحت الهنوف تفتح الباب
لقتها العمه لولوه
العمه لولوه: يامرحبا بذا الوجه السمح
الهنوف وجهها محمر من الخجل ماقدرت تنطق
وجا من خلفهم صوت فيصل
فيصل: لاه لاه لاه الهنوف تستحي هذي معجزه
الهنوف: فصولي عشانك خالي بسكت واحترمك ادخلي ياخاله ، الا وين لين مو معك ؟
لولوه: تعرفين متعلقه في اخوها مارضت تفكه وهو خذاها معه
فيصل: والله من الدلع بس
لولوه: الا وين امك يالهنوف
الهنوف: في المطبخ تلقين ورد معها
راحو للمطبخ دخلت وتفاجأت بالشغل الي مسوينه
لولوه : يوه حلاي نسيته في السياره مع ناصر
ورد: هههههههههههههههه عمه والله مانتي بصاحيه
لولوه: تضحكين علي الحين تشوفين بعدين وش بسوي فيك
ورد: والله مو قصدي عمه تكفين
لولوه: والله لو انك مو ورد كان ماسامحتك
ورد: تعالي شوفي وش مسوين شوفينا سنعات وبدات تعدد الاشياء الي مسوينه شوفي عندك خليه نحل تعرفين ابوي يموت فيها سويتها عشانه وشوفي ياطويله العمر القهوه والقشد سوتها عمه حصه وهنيف الي بس شغلتها تقرقر فوق راسي سوت الشاهي والعشاء جدتي تقول مراح يسويه الا هي الصبحي مراح تخلي عادتها اذا جاو عماني هي الي تسوي العشاء
العمه حصه: امي من الشوق لهم تسوي كل شي بيدها لو الحين بيدها طلعتنا وسوت كل شي