حبك في قلبي قصيده

البارت (٢٨)

السلام عليكم
احب اقولكم برجع واقوى ان شاء الله
اعتذر منكم على تقصيري وتأخري في التنزيل لكن كنت امر بضروف صحيه وعمليه ايضا
اتمنى يعجبكم البارت ❤️❤️
.
.
-في قاعه العرس النسوان-
٩:٠٠ بدو يوصلون الحضور

وصلت غرور وامها ودلتهم مها عشان غرور تسلم علي ورد
غرور وهي تطق الباب
وصلها صوت ورد انها تدخل
طلت غرور راسها من الباب وهي تزغرط
وقفت ورد وفي يدها مسكتها الي متزين بالورد الابيض
غرور : اقدر اقول ياحظ تركي على ذا الجمال مابقيتي لاحد من زينك ارحمي قلبي
ورد ضحكت : غرور لاتخليني اخرب مكياجي من البكاء
غرور هي تنزل شنطتها : لا تكفين كل شي الا تبكين مكياجك لاتخربينه
ورد : امانه حلو شكلي ؟
غرور : تستهبلين من راسك الى رجلك زينه
دخلت عليهم ياسمين
ياسمين : اوه غرور هنا اهلا
غرور : ياسمين بعد انتي انتم شكلكم ماراح ترحمون قلبي
تحول وجهه ياسمين للاحمر
غرور : تذكرت انها تستحي يلا بنزل استودعتك الله
جلست ورد وهي مرتبكه من اصوات الاغاني ومن اصوات الحضور وكل شوي تشوف الوقت مرتبكه انها بتنزف لو الود ودها هجت من كثر الحياء

عند الاستقبال ام تركي وام فارس يستقبلون الحضور بكل ود واحترام وكل من دخل انبهر من جمال الترتيب وجمال اهل العروس والعريس
اقبلت غيد لامها
ام تركي : الحمدلله جيتي شليت همك
غيد : معليك بنتك ذيبه
جات من يمينهم غيدا : نور عيني روحي كلمي ولد راكان يبيك
راحت هي وغيد وبقت غيدا مع مها يستقبلون الحضور
اقبلت ترف مع امها ويوم شافت غيدا جمب مها بدت تفقد اعصابها صار عندها هوس في خالد
ام ترف وترف سلمو عليهم ودخلو
اكتمل الحضور

ورقصو اهل العروس والعريس من اساسيات الزواج
من ثم بدو يتفاوتون الحضور على المسرح يرقصون

-الرجال-
الجد عبدالله : فارس اتصل عليهم شف نجي الحين ؟
فارس : ابشر
اتصل عليهم وجاء وقت الزفه
فارس : اي الحين يقولون يلا
ركب تركي سياره جيب المرسيدس وبالبشت المهيب لونه اسود ومعه ابوه
وخلفه سيارات اعمامه وعيالهم اغمرته فرحه وشعور يحرك قلبه انها خلاص زوجته وبتكون معه في نفس السقف

-ورد-
دخلت عليها امها
ام فارس : ورد يلا بتبدا اغنيه الزفه بعد شوي الحين بيدخل زوجك العزيز وجدك واعمامك
ورد : يمه مابي خلاص
ام فارس ابتسمت : اهدي مراح ياكلونك
ابتسمت ورد بخجل
خذت ام فارس العطر من الطاوله وترش عليها وكل رشه تسمي
ام فارس : قريتي اذكارك
ورد : اي
يلا بنزل الحين
ارتعش صوتها من اغاني دخول الريجيل اصطفو جميعهم تركي في النص وعلى يمينه جده ويساره عمه محمد وعلى يمين جده ابوه وعلى يسار عمه محمد اخوانها طغى فيه شعوره ينتظرها تطل عليه بالابيض

طفت انوار القاعه وبقى انوار الكوشه والممر يعلن الحين زفه العروس
بدت تشتغل اغنيه الزفه الي مخصصها لها ولا لغيرها
ماكانت ورد تدري ان تركي هو الي مسوي الزفه ورايح لافضل الشعار والمغنين عشانها
فتح الباب وطلت ورد على الحضور وكل مامشت سمو وذكرو الله عليها انتبهت ورد عليه خاصه شكله بالبشت وطوله وهيبته بين جدها وبين ابوها وشافت جدتها وامها وعماتها ابتسمت ونزلت دمعه من عينها دمعه رضى وفرحه
ام فارس ونزلت دموعها : ياعمري يامي
انبهر تركي انبهار قوي من طلتها وشكلها بالفستان وشعرها بالطرحه العروس توسط عينه على نحرها وانبهر من طول عنقها وكأن عقد الالماس يقول فزت فيها واغتر اني على عنقها
شاف يدها وابتسم انها لبست الدبله
اقبلت ورقت اول درج وثاني درج ورفعت عينها فيه عينه من اقبل عليها ومسك يدها وباسها وتقدمت وتوسطتهم وسلم عليها جدها وباس جبينها
الجد : استودعتك الله
سلم عليها عمها عادل ومن ثم ابوها وثم اخوانها
طلعو
تركي وهو يشوفها وكانه يملك العالم
اقبلت عليهم الجده وهي ترقص ومعها نوره ومها وبناتها
ابتسم تركي ومسك يده جدته ويراقصها
اقبلو غيد وغيدا وابتسم تركي من طلتهم
الجو لطيف بين ضحكات صادقه ودعاوي تغمر القلب سعاده
انتهى وقت الزفه وطلعو ورد وتركي
مها وهي تلبس بنتها عبايتها البيضاء المخصصه للعروس
مها : تركي
تركي : لبيه
مها : انتبه عليها
تركي : ابشري
اقبل عليهم فارس
فارس : اختي في امانتك واذا زعلتها بينهد فكك
تركي : في قلبي قبل عيوني
ركب تركي وهو يشوفها
ابتسم تركي ومايدري كيف يبدا يفتح سالفه طلعو على شارع تركي الاول متجهه للفندق وكان زحمه شغل اغنيه
مثير
"يا من على الحسن زاد
حسنه جمال و اناقه
لشوفه حن الفؤاد
يمشي في مشيه رشاقه
رقه و جمال و حلاوه
توه في عمره صغير
مثير حسنه مثير"
اخذ مسكت الورد وطلعها من الدريشه وبدت السيارات تضرب بوري والي يبارك والي يصفر والي يغني عريسنا يا بدري بادي ضحكت ورد والتفت تركي منبهر من ضحكتها
تركي : واخيرا شفت ضحكتك
لفت ورد بالرتباك تقدم ومسك يدها وصلو الفندق ونزل يساعدها ورقو للغرفه كان مجهز بالعشاء ومنظم باحتراف
تركي تقدم قدام وجهها ومسك يدها وسحبها لركن الي ورا الغرفه
ابتسمت ورد وهي تشوف كيكه مكتوب فيها
"شكرا لانك اصبحتي زوجتي "
وجمبها طقم الماس
تركي وبصوت هادي : اقل شي اقدر اقدمه لك في غضون شهر
ورد شوي وتموت من الخجل
ابتسم تركي : شكلي اليوم الي بتكلم بس
ابتسمت ورد
تركي : نتعشى ؟
توجهت ورد تبدل فستانها الضخم للبس حرير ابيض
استحت تطلع
ورد : يالله يامي مالقيتي الا ذا البسه
طلعت ورد وتشوفه على طاوله العشاء
تركي التفت عليها وبان انها خجلانه
تقدمت تجلس قدامه
قدم لها ورقتين وكل ورقه جمب صحن
تركي وهي يبتسم : اخذي كل ورقه واقري واختاري
اول ورقه : نقضى اليله فقط بالقبل
والورقه الثانيه : تصيرين حرمي بالحق والحقيق
خذت ورد الطبق الاول وهي تبتسم من حنيته مايبي يضغط عليها ولا يجبرها على شي هي ماتبيه في الوقت الحالي
ابتسم تركي وهو يشوف وجهها مشع باللون الاحمر
انتهت ليلتهم بقبله خاطفه من ثغرها

انتهى عرس الرجال وتجهو لبيت الجد
وصلت الساعه ٤ الفجر ورجعو كلهم

دخلت الجده البيت وشافتهم في الجلسه
الجده : غطو وجيهكم البنات بيدخلون
دخلو البنات وغيد تسرق نظراتها لناصر تبي تشوف يده
غيدا وهي تعبانه : بسرعه ارقي الدرج قبل لاطيحك ويقولن قاتلت اختها
غيد: اووف
كل وحده من البنات دخلت تنام معد لهم حيل

دخلت مها للغرفه وشافت محمد مسرح في السقف
مها : محمد
تعدل في جلسته : ارحبي
تقدمت وجلست جمبه : تخيل صديقاتي وخوالها منبهرين فيها يقولون كبرت مره منبهرين في طلتها
محمد وهو يضمها : مانبهرو في ام العروس طيب ؟
مها وهي تدفه : محمددد
محمد : وش خليني اتغزل فيك وتنهد
مها : في بطنك كلام قوله
محمد : كبرت مره يامها كان امس اشلها في حضني والحين بتأسس بيت
مها : هاذي الحياه نام لان اذا جاو يلقونا صاحين
محمد وهي يبتسم : يمكن مابيك تنامين
خذت المخده وحذفتها عليه : نام
مسك المخده : ابشري

-العصر -
٤:٠٠
البيت كله مشتط من ترتيب لان بيجون ورد وتركي قبل مايسافرون
ياسمين وهي في المطبخ تسوي حلى رافعه شعرها ونازل منه خصلات من قدام وجهها وكانت تصف الحلى في صحن وتحط عليه اللمسات الاخيره لابسه فستان ناعم برز بياض بشرتها
دخل عساف وسعق وكأن جسمه التمس باللاتماس
لفت ياسمين وحطت الطفريه على وجهها
ابتسم عساف : معليش ابي مويه
اشرت ياسمين على كرتون الماء
عساف وهو يبي يفتح معها سالفه : طيب تقدرين تبقين لي من الحلى
ياسمين انخرشت ماتوقعت انه بيسولف : تمام
طلع عساف من المطبخ للجلسات الخارجيه وشافهم مجتمعين
راكان : الابتسامه شاقه وجهك يالطيب
عساف : بشوفتك يالطيب
فيصل : اوف معسول الكلام
سلطان : انت وش عرفك خلك على نياقك
فيصل وهو يضربه من ظهره : ناقه من نياقي تسواك
سلطان وهو يمسك ظهره : اهخ ظلوعي
خالد وهو يفكر : انتم من بيخاويني اليوم
راكان وهو يتراكى على الجلسه: وش جدولك
خالد : نروح للبوليفارد ورلد ها وش قلتو ؟
فيصل : وشذا
سلطان وهو يشر عليه : هذا اخر تحديث له الثمامه
فطسو ضحك
فيصل : ايا قليل الادب ويحذف عليه الفنجال
راكان : هذا ياطويل العمر العاب وما العاب يعني تبي فرنسا ابد تلقاها
فيصل : انت صادق
خالد : اي والله حتى الشام موجوده وش تبي اكثر من كذا
فيصل : يلا معكم
خالد : كفو

-ورد ، تركي -

قدام المرايه تزين مكياجها ابتسمت من الرضى على شكلها كملت و خلصت من كل شي وبقى سلسالها ماقدرت تسكره
طلعت عليه وشافته يزين كبكه
ورد وهي ترفع سلسالها : تزينه لي ؟
ابتسم تركي من شكلها ورفع كبكبه : بشرط تسوينه لي
تقدمت ورد وتاخذه من يده وتركبه وهو ذايب على شكلها بالفستان وبشامتها تحت عيونها وعلى عنقها وده يسحب على روحتهم ويجلس يغرقها بالورود
ورد : خلصت
خذا السلسال وبعد شعرها عشان يسكره وبعد مانتهى تقدمت تروح وسحبها وباسها من عنقها
تقشعرت ورد من بوسته بارده وناعمه تركها ودخلت
مسكت قلبها وهي تحس نبض قلبها يتسارع
ورد وبصوت خافت : اثقلي اثقلي اثقلي