حبك في قلبي قصيده

البارت (٢٢)

-الديره-
بدت تشرق الشمس على ديره النور وكل الي في المسجد اتجهه لشغله ، الجد طالع من المسجد ويتفاجأ بوجود ناصر وفارس عند الباب ينتظرونه
الجد : عسى به خير
ناصر : مشينا للمجلس وتعرف
توجهو للبيت ودخلو المجلس وسكرو عليهم الباب
جلس الجد وهو مستغرب وجيهم فيها شي كايد وسكوتهم زاد الطين بله
الجد: انطق انت وياه
فارس : ياجدي مدري كيف نفاتحك بالموضوع
الجد وهو ينزل عصاته جمبه : قله من البدايه
طلع فارس الاوراق للجد ووراه كل الرسايل ودقق على الرساله الاخيره
الجد وهو يرفع راسه لفارس : انت صادق
ناصر وهو يطبط على يد جده : صادق يجد صادق
الجد : ياعني قليل الاصل بيزوج ورد للورع الي معه ويبيني اسكت والله العظيم لايشوف شي يندم عليه والله
ناصر : جدي ركز جيناك لان قراراتك منطقيه وتعرف الصح والغلط وبعدين ياجد التهديد الاول ماعرفناه ومدري وش المقصد منه
الجد: نار حاميه ياعني وحده من ممتلكاتي بتحترق
لفو على بعض ناصر وفارس
ناصر : وش
الجد: يالمزرعه تحترق يالمحلات تحترق
فارس وهو يمرر يده على وجهه: فهد فهد
الجد وهو يمد يده على فارس : كل شي بصوب والشي الثاني بصوب
كان ورا الباب تركي وسمع كل شي من الاول الين الاخر وفتح الباب بكل هدوء
تركي : عندي اقتراح
انصدمو من وجوده
تركي : ادري ماتبون احد يدري عشان محد يخاف بس من نصيبي اني دريت
الجد وهو يشر له يجي : تعال ابي اسمع قرارك
تركي : اول شي ياجد وفارس القرار ماخذيته من طناخه وفزعه لا والله الا خذيته لاني ابيه من زمان
الجد وهو عرف وش يبي تركي : اسلم
تركي : اذا تكرمت بخطب ورد على سنه الله ورسوله
فارس وهو يعقد حواجبه يبي يركز الي قاعد يسمعه صح ولا غلط غمض عيونه بأقوى ماعنده ووقف
فارس: قم معي
الجد سكت مانطق ولا كلمه ينتظر رده فعل فارس وش بتكون
وقف تركي مع فارس وطلعو من البيت
ناصر في حاله صدمه ولف على جده
ناصر : تتوقع بيكسر فكه
الجد: بيكسر فكه ثم بيقدم يحب راسه
ناصر: واذا البنت ماوافقت
الجد : ورد واعرف لها لولد عمها افضل من سطام
ناصر: طيب ممتلكاتك وش بيصير عليها
الجد: اتوقع بتكون المزرعه لان بدايه المشكله ضهرت منها
ناصر : اجل بستدعي من المركز يراقبون المكان
الجد : تفعل خير

توجهه فارس لبراحه فاضيه مافيها احد
فارس: انزل
تركي ضحك : ماطلبت شي
نزل تركي وعلى طول لكمه فارس تعثر تركي بس ماطاح
فارس: تخطب من نوخه
تركي وهو يمسح الدم الي في طرف شفته : ابيها كاورد مابيها من نخوه ولا فزعه ولا طناخه ولا عشانك اخوها ابيها هي ورد بنت محمد بنت عبدالله فهمت
فارس وهو يمسك ياقته ويعطيه كف : دامك تبيها من زمان ليه ماخطبت
تركي : مالقيت فرصه
فارس : ورد مراح توافق على زواج اجباري واذا رفضت بوقف معها ولا علي من تهديد الزق لو ترتمي رصاصه في صدري راضي دام انها ماتبي
تركي وهو ينفض ثوبه : ياعني الحين مراح تعترض على الخطبه
فارس وهو يعطيه نظره : مراح اعترض بس ارجع كعابي للبيت
ضحك تركي بأقوى ماعنده : كل شي منك حلو يالخوي
ركب فارس الموتر وتوجهه لبيت جده والصداع يفتك كل خليه في مخه ماتوقع ينحط في ذا الموقف مايقدر يسيطر على الموضوع والمشكله اخته اخته هي الاساس مو اخته وبس الا بنته وصديقته مايتخيل يوم من الايام تنجبر على شي هي ماتبيه ولا عمره قدر يرفض لها طلب وكانت اول مره رفض فيها شاف اهتزاز فكها السفلي وعرف من هذاك اليوم انه مستحيل يرفض لها طلب ولو تبي عيونه بيعطيها
دخل لبيت جده يبي يشوفها
ورد كانت في الصاله تنزل فطور جدها
فارس وقف يتأملها كبرت مره
لفت ورد وشافته وميلت راسها واضح مو على بعضه
ورد: فارس فيك شي
اقبل فارس وضمها بقوه : لا مافيني شي
ورد: متأكد فارس وجهك يقول غير
باس راسها وطلع
شاف جده مقبل
الجد وهو يبتسم له : سهلات يابوي سهلات
فارس: ان شاء الله سهلات