حبك في قلبي قصيده

البارت(٨)

-العزبه-
بدا يدخل وقت صلاه العشاء غيد منهاره من الجو ومنكتمه وياسمين تتأمل النجوم وورد مع جدها تسولف له ويسولف لها وغيدا راحت تزين اغراض العشاء
بدت العمه حصه تطبخ العشاء وفاحت الريحه الطيبه ومعروفه العمه حصه الكبسات تخصصها
الهنوف: يمه والله اني احبك حب مايعلم فيه الا الله
العمه حصه وهي تضحك: بنتي مصلحجييه
الهنوف: زعلت يمه صح اني جوعانه بس مو كذا
سلطان: عمه ابغى شاهي
الهنوف وهي تبي تنرفزه: امي تطبخ تشوفها واذا تبي شاهي ربي عطاك يد سو لنفسك
"الا يجيها ضربه من ظهرها "
العمه حصه: هنيف وصلاح تقولين كذا ليه ، معليه ياسلطان بسويه لك
سلطان: افا ياعمه افا كسرتني بنتك انا ازين لنفسي
العمه حصه : دام تقول كذا اجل الله لايهينك ادخل وسو لنفسك شاهي مثل ماقالت بنتي امي تسوي العشاء
وقامت تضحك بصوت عالي
وسلطان منصدم : انا وش سويت في حياتي ياررربيييي
راح لغيد
سلطان: غيد سوي لي شاهي
غيد وهي تبرد اظافرها: تستهبل صح سلطان شايفني وش اسوي وبعدين اذا تبي شي قل لو سمحتيييي عشان افكر هل اسوي لك او لا وابستمت ابتسامه منزفزه
سلطان وهو منقرف : الله يعطيك عقل بس احد يسوي اظافره في بر تراك بين صحاري تسوين اظافرك ليه
سفهته غيد ولا عطته وجه
شاف غيدا
سلطان: غدو تكفين طالبك ابي شاهي وماحد راضي يسوي لي
غيدا : طيب امش قدامي اسوي لك
سلطان ومستغرب منها : غريبه ماعطتني كف ذي غيدا ولا شبحها ؟؟ معليه اهم شي سوت لي
سوت غيدا شاهي للجميع
التمو كلهم على الفرشه
الجد: والله ان جلسه العزبه حلوه
غيد : والله ياجدي ماتفق معك في ذي النقطه
الجده : اي متعوده على اجواء المدينه مغير تسرحين وتمرحين
غيدا انهارت ضحك : اتفق معك ياجده الصبحي تقول كلام زي الفل
سلطان : سبحانك ياربي خذيت حقي بدون جهد مني
ابو تركي: ههههههههههههه سلطان والله انك مهبول
غيد وهي تلف على ابوها : طيب
ابو تركي تورط زعل غيد شينن : يوووهوووو كيف الطريقه

" بدت النار تطفى "
راحت ياسمين تجيب حطب من الصندقه والمصادفه ان عساف كان قريب من الصندقه رفع عساف نظره من جواله وشافها على طول قرب وراح اتجاها ،ياسمين وفي يدها الحطب مستغربه من جرائته، عساف واضح متردد
عساف وصوته واطي ومبين انه ضايع مايدري وش يقول: بس بسألك وابي منك جواب فقط اي او لا
ياسمين وهي منصدمه ذا وش فيه انهبل: كمل طيب
عساف: انا متأكد مثل اسمي  قبل صادفتك مرتين وفي نفس الكوفي اول مره حدث لك حادث بسيط والثاني كانت معك وحده وكنتي تعزفين ، هل هذي انتي او لا ؟
ياسمين من الصدمه طيحت الحطب الي في يدها
عساف نزل يبي يساعدها
ياسمين: اذا تبي الجواب ، الجواب اي ومساعدتك مابيها شكرا ولمت الحطب وابتعدت عنه
"عساف كأن احد معطيه كف وفي هذي اللحظه الدنيا ماهي بسايعته من الفرحه يبي يبتعد من هنا بسرعه ولا جاب العيد راح لين وصل عندهم وهو عينه على ياسمين بس تدارك وضعه ولف لابوه
عساف: يبه انا ماشي تبي شي
ابو عساف: ابد سلامتك
وركب سيارته وهو متشقق من الفرحه حلمه تحقق واخيرا طلعت هي والله طلعت هي تنهد تنهيده وتذكر البدر يوم قال
"الجنون عيون وعيونك وطن
والوطن من غيرك وش يكون
لا شوارع ، ولا اماني ، لا سكن
لا حياه ولا ممات وطعون
انت بالحالك زمن داخل زمن
كيف عمري ينحسب لو يحسبون

اتصل على خالد
عساف: هلا بأبو الشباب وينك فيه
خالد : تعال شف حنا في جلسه الشباب الي دايم يجلسون فيها
عساف: يلا جايكم

وصل لهم والجو كان خيال سلم عليهم وجلس وواضح ان فيه طاقه
مشعل: ولد وش فيك
عساف رفع حواجبه وابستم: افا يامشعل وش فيني
مشعل : مدري والله بس مستانس
ضحك عساف : واذا استانست حرام
مشعل: افرح جعل والله مايفرح غيرك
عساف: حمود عطني العود
خالد وفي حاله دهشه: عساف انت صادق
عساف: توك ماشفت شي
بدا يدق العود وبصوته يقول
"ابعترف اني اموت بحبها
ابعترف وشهود قلبي قلبها
ابتعترف اني بدون عيونها
اضيع في شرق الحياه وغربها"
صفر خالد ومشعل صفق والعيال منصدمين عساف يدق عود وفوق ذا كله صوته زين
خالد: معليش ياعساف كل شوي بخليك تغني لي اعذرني بتعب احبالك الصوتيه
عساف وهو يقوم: ذي المره الاولى والاخيره لان في سبب مطيرني من الوناسه ويلا استودعكم الله
خالد: وين وين اجلس العشاء قده بيجهز
عساف: اكرمكم الله بتعشى عند جدي يلا فمان الله
وركب سيارته وحرك متجه للعزبه
-عند فارس-
"فارس وهو ماسك خط لديره وهو يفكر بالرسايل الي تجيه مستغرب مره وش يبي ذا الشخص وش غايته بدون تفكير اتصل على ناصر
ناصر: ارحب فارس
فارس: البقى اسمع ابي اقولك شي
ناصر: سم
فارس: ياطويل العمر تجيني رسايل دايم والرساله ماتجي في جوالي لا يرسلها في ورقه
ناصر رفع حواجبه هل النقطه بتجتمع مع موضوعه: اسلم كمل
فارس: الرسايل تقول انتبه من فلان الفلاني ونبه جدك واهلك كلهم ياولد راسي شاب
ناصر وبدون مقدمات اخذ جواله ومفتاحه من المكتب ونزل مسرع لسياره: اسمع فارس انت رايح لديره ؟
فارس: اي رايح وينك فيه انت
ناصر: جبت الرسايل معك؟
فارس: اي كل شي معي
ناصر: انا بلحقك صاير موضوع وشكله بيوصل لطريق مانبيه وانتبه يافارس انتبه احد يدري اسكت الين اجيك فاهم
فارس: زين
"ناصر فتح سيارته وركبها وعلى طول توجه لديره وبأسرع ماعنده الي كان خايف منه بيصير "

-عند راكان -
نازل من الطياره ومنهد حيله وفيه نوم ماعد يقدر يتحمل وقف تكسي واتجه للبيت تذكر انهم في الديره
راكان وهو يفكر وش يسوي ينام واذا صحى ينزل لديره او يمشي لديره الحين وصل انه يمشي لديره
وصل البيت وغير ملابسه وخذا مفتاح سيارته ومسك خط وكل شوي ينعس

-عند فارس-
وصل للعزبه وشافهم ملتمين كلهم
نزل من سيارته وكان لابس ثوب بدون غتره
فارس: سلام عليكم
الجد: وعليكم السلام حي الله فارس
فارس: الله يحيك ويبقيك
سلم عليهم وشاف ورد وابتسم
فارس : ياهلا ويامرحبا وضمها
ورد : ياهلا فيك
فارس وهو ماسكها من كتفها : وشلونك وش اخبارك
ورد وهي منحرجه: بخير الحمدلله وشلونك انت
فارس : بخير يوم شفتك
ام فارس: الله الله
وضحك الجد: اكيد الي يشوف الورد بيحصل الخير
فارس وهو يشاور ورد: ترا جبت لك من الكوكيز الي تحبينه
ورد : كذذااب
فارس: والله
ورد تضمه: ياروووحي والله
طلع فيصل من الخيمه وانصدم من فارس : ياااللييل ابو اليييل الحين جانا الثاني وبياخذون ورد مني ورد لاتنسيني تكفين
فارس وهو ميت ضحك راح يسلم عليه
الجد: وين راكان ليه ماجى معك
فارس وهو يشرب القهوه: اتوقع انه الحين وصلت طيارته يانه رقد او مشى لنا
الجد: الله يحفظه
"نزل عساف من سيارته وهو متشقق من الفرحه "
عساف: هلا والله بفارس
فارس: هلا فيك