استعجلت و عملت الشاي و ناديت ياسر أخوي ، لمن جاني قلت ليهو شيل الشاي دا وديهو لأبوي ، قال لي أبوي طلع ، قلت ليهو متين ؟!!
قال لي من قبيل ، قلت ليهو خلاص اقعد أشرب الشاي دا و اتخارج على مدرستك ، قال لي انتي ما ماشه ولا شنو ؟؟؟
قلت ليهو أمشي كيف و انتوا لسه بتتكاسلوا لي !
مشيت دخلت الأوضه و لقيت براءة و رغد لسه نايمين !! جريت من كل وحده بطانيتها و قلت ليهم المدرسه دي بتاعة أبوكم ! قوموا ياخ !!
رغد قالت لي الله يحرق المدرسه و سنينها ، ياخ في الإجازة كنا مرتاحين و بننوم و بنصحى على راحتنا ، قلت ليها إجازه و إنتهت ، قومي اجهزي يلاااا عشان أنا برضو ماشه!
براءه قالت لي أنا ما ماشه ، قلت ليها ما على كيفك ، قالت لي دا أول يوم ما ح يدونا فيهو حاجه ، ح يخلونا ننضف المدرسه و الحمامات ، قلت ليها برضو أمشي ، قالت لي ياخ ما ماشه و جرت البطانه و اتغطت!
رغد قالت لي و أنا ذاتي ما ماشه ، يعني أنا بيتنا ما قاعده انضفو أمشي انضف المدرسه ! بري مالي و مالا ! قالت كدا و إتغطت هي كمان ، قلت ليهم كويس خلوا أبوي يجي و شوفوا كما كلمتوا ليكم ، مشيت المطبخ لقيت ياسر لسه ما شرب الشاي ، قلت ليهو خير مالك انت كمان !!؟
قال لي يعني اشربو شاي ساده كدا ! ماف لبن بدره أو حليب ! قلت ليهو لو في أكيد ما كنت كبيت ليك شاي أحمر يا ياسر ، براك شايف و عارف وضعنا كيف و الشاي الساده دا احتمال بكرا ذاتو ما تلقاهو ، قال لي خلاص ما عايزو ، قلت ليهو أحسن ليك أشرب عشان ما يصدع بيك ، قال لي ما بقدر اشرب شاي ساده من الصباح ، أديني قروشي بس ، طلعت ليهو قروش و أديتها ليهو و قلت ليهو اوعك تشتري بيها حلويات و ما تفطر ، لو جيت البيت جعان ما ح تلقى حاجه تاكلها ، قال لي طيب و طوالي شال شنطتو و مشى ...
استحميت و سرحت شعري و جهزت نفسي ، شلت قروش و مشيت دخلت الأوضه و قلت ل رغد دي 500 جنيه شوفي بتفطركم بشنو لأنو ماف تاني ، قالت لي خلاص ح نشتري اتنين اندومي ، قلت ليها لا ما تشتريها ، ما ح تشبعكم ، أنا شايفه إنو أحسن تجيبوا ليكم عيش و طعميه تفطروا بيهم ، قالت لي خلاص بشوف هسي عايزا أنوم ، قلت ليها حاسه نفسي حأمشي و أجي ألقاكم لسه راقدين الرقده دي ! قالت لي لا ح نقوم بس بعد نكمل نومنا ، قلت ليها المشكله إنو نومكم ما بكمل ....
المهم مشيت خليتهم و لمن طلعت قفلت باب الشارع ، أثناء ما أنا ماشه على المدرسه لمحت ياسر أخوي من بعيد بلعب في الميدان و جادع شنطتو !!
من مكاني داك طوالي مشيت عليهو و لمن قربت من الميدان ناديتو و قلت ليهو الليله يا ياسر أصبر لأبوي ، طوالي شال شنطتو و قام جاري على المدرسه و الأولاد المعاهو ذاتهم لحقوهو ، المهم استعجلت في المشي لأنو الزمن شبه أتأخر ، لمن وصلت المدرسه لقيت الباب مقفول ، ضربت الباب كدااا لحد ما جا راجل و فتح لي و طوالي دخلت ، لقيتهم واقفين طابور ، في وحده كانت في واقفه في نص الطابور لمن شافتني أشرت علي و قالت زي دي مثلاً! جايه متأخره .... طبعاً أنا اتخشبت في مكاني و كل الأنظار اتجهت علي ، المره أشرت علي عشان أمشي و اقيف طابور مع باقي الطالبات ، قالت أهم حاجه عندنا في المدرسه دي هي الإنضباط و الحضور في المواعيد ، بس بما إنو اليوم اول يوم و في ناس جديده و ما عارفه الحاجه دي ما ح نعاقب زول ، إتلفتت علينا و قالت لينا سامعين الكلام دا يا أولى ثانوي ؟!!
