بقيت بس بعاين ليهو و انا مستغربه ، ضحك و قال لي تعالي يااااااخ و طوالي فتح لي باب العربيه ، ركبت معاهو و أنا حاسه إنو لساني مربوط ، هو عكسي كان مبسوط و كل دقيقتين يعاين لي و يضحك ، بعد مسافه قال لي حيرتيني معاك!! يعني انتي هسي متفاجأه و مبسوطه ولا متفاجأه و ما راضيه ؟؟
ما قدرت أقول حاجه ، قال لي عشان لو ما موافقه الخطوبه دي ما حـ تحصل ....لمن قال كدا اتخلعت و إتلبشت و بإستعجال قلت ليهو لا لا ، ضحك و قال لي يعني موافقه ؟....قلت ليهو يعني ما عارف !
قال لي عارف بس عايزك تكوني متفاعله معاي و مبسوطه زيي !
المهم طول الطريق كان بحكي لي عن إنو كيف مشى لأبوي و اتكلم معاهو و و و.... طبعاً اتفاجأت لمن قال لي أساساً أمي من زمان حاجزاك لي 😂
قلت ليهو شنووووو ! قال لي آي والله ، متذكره لمن كانت بتقول لينا أنها عايزا تعرس لينا بعد دا و لمن أمير قال عندو زولتو و ما عايز أمي تختار ليهو ، أما أنا و لأني عارف امك عايزاك انتي لي وافقت على انو هي تختار لي لأنو اكتر من مره كانت بتلمح للحاجه دي و أنا فهمت إنها خاته عينها عليك ، فـ المهم انو إختيار أمي هو نفس اختياري ، في أحلى من كدا تاني ؟؟
المهم وصلنا بيتهم و خالتو خنساء طوالي فتحت الموضوع و كانت مبسوطه حتى أكتر مني انا و أواب ، طبعاً من شدة الخجل ما قدرت أعاين لزول فيهم أو اتكلم معاهو ، أمجد قال ليها خلاص يا أمي خجلتي البت ، أمير قال ليهو و خلعوها كمان ، أواب دا أصلو ما بصبر ، مشى كابسها من باب المدرسه ، أواب ضحك و قال ليهو يا زول أنا صبرت و انتظرتها طول مدة الإمتحانات دي كلها 😂
المهم بعدها عدت الأيام و أبوي فاتحني في الموضوع ، عمتي آمنه قالت لي حظك والله لكن احسن تكون خطوبه بس لحد ما نتأكد من أخلاق الولد دا ، أبوي قال ليها أنا لو علي عقد طوالي ، خطوبة شنو عليك الله ، قالت ليهو لا ما تشفق و ترمي بتك ساي ، قال ليها الناس ديل أنا واثق فيهم و عارف أخلاقهم كويس و احسن منهم ما بنلقى ، والله كونهم يخلوا بنات الناس ديل كلهم و يجوا يختاروا بتي و يقولوا عايزين يناسبونا دا شرف لي والله ، عمتي قالت ليهو و بتك مالا يعني ؟؟ المهم اسمع كلامي و ما تستعجل و هم ذاتهم مش قالوا ليك عايزين خطوبه بس ؟؟ قال ليها غيتو خنساء دي كانت مصره انو يكون عقد ، قالت ليهو احسن تكون خطوبه و اسمع مني يا أخوي....
المهم مرت الأيام و حددوا موعد الخطوبه و من يومها عمتي جات قعدت معانا في البيت و بقيت تجهزني ليوم الخطوبه ، طبعاً الوقت داك كان باقي لنتائج الشهادة اسبوع ، المهم جا يوم الخطوبه و طبعاً لحد اللحظه ديك ما كنت مصدقه في البحصل بس في نفس الوقت كنت طايره من الفرح ، أواب قبل ما يلبسني الخاتم قال لي هسي لو كان عملناهو عقد مالو ياخ ! ضحكت بس ، بعدها كلهم بقوا يتونسوا و خلونا برانا ، بنخطط لمستقبلنا سوا ، أو خليني اقول هو الكان بخطط أما أنا فكنت بهز ليهو راسي بس لأني حرفياً كنت خجلانه شديد و الكلام غالبني ، بعد مسافه كدا جاهو تلفون فطوالي استأذن و مشى أول ما قام كدا ياسر جا و قال لي مها تعالي شوفي رغد عملت شنو ، قلت ليهو أمشي كلم ليها عمتي آمنه ، فعلاً مشى مني ، بعد مسافه كدا جاتني براءه و قالت لي رغد رمت ليك ملابسك على الأرض ، قلت ليها قولي ليها ترفعهم أو خليني أنا بجيها بعد شويه .... طبعاً الوقت داك افتكرتها بتفتش ليها على لبس تلبسو لأنو العصير ادفق فيها ، قلت أكيد عصبت و زهجت لمن ما لقت ليها لبس مناسب و هي لمن تغضب و تنفعل طوالي بتخرب أي حاجه ....لمن أواب جا قلت ليهو حـ أمشي و أجي راجعه ، قال لي لا خليك ما عايز أضيع ثانيه وحده من دونك ، قلت ليهو هسسي مش شلت تلفونك و مشيت بعيد مني !!
