طبعاً أواب كان طول الطريق بمدح فيني و انو مبسوط شديييد من النتيجه دي ، المهم لمن وصلنا المطعم و قعدنا قال لي انتي يدك دي فيها شنو من قبيل قابضاها كدا ؟؟
طبعاً ياداب انتبهت اني قابضه يدي من قبيل ، قال لي أفتحيها عايز اشوف داسه شنو .... طبعاً كان فيها الورقه الكتبت لي فيها ريما رقم أستاذ أحمد ، قلت ليهو ما فيها حاجه 😅
قال لي طيب أفتحيها ، طوالي سحبت يدي من الطاوله و لميتها علي ، هو هنا إستغرب زياده و قال لي جد جد في شنو في يدك ؟؟
قلت ليهو ما فيها شييي !!
سكت خلاني ، بعد مسافه قال لي حابه تاكلي و تشربي شنو ؟؟
قلت ليهو على ذوقك ، المهم هو اتناسى الموضوع و ما سألني تاني ، قعدنا مدة طويله في المطعم و حقيقة والله كنت مبسوطه شدييييد و إتمنيت انو اليوم دا ما يخلص ، المهم لمن ركبنا عشان نرجع ، المره دي أنا الكنت بتكلم ، و كلامي كان كتيييير و كلو دفعه وحده ، أواب ضحك و قال لي ما تتكلمي بسرعه كدا وترتيني معاك 😂 اتكلم كلمه كلمه حرف حرف ما مستعجل أنا و مستعد اسمعك لـ بكرا ، قلت ليهو خلاااااص سكته و ربعت يديني ، قال لي اهاااا قمنا للحركات ! بهظر معاك ياخ !
قلت ليهو أسكت مني ، قال لي زي أختك بتزعلي بسرعه ...قلت ليهو زي منو فيهم يعني و زعلت منك متين؟؟
قال لي ما تركزي قصدي براءه لأنو شايفها بتزعل بسرعه ، قلت ليهو بالعكس برو دي عسل و هاديه و ما بتزعل سريع ، قال لي غريبه أول مره اشوف آخر عنقود هادي ، قلت ليهو آخر عنقود دي منو ؟؟
قعد يضحك و بعد مسافه قال لي دي وحده كانت صحبتي في الجامعه ، عاينت ليهو بطرف عيني و قلت ليهو هسي الدخلها شنو يعني ؟؟
قال لي فجأه كدا اتذكرتها.... سكته و ما إتكلمت تاني. ...بعد مسافه قال لي عايشه الدور بـ كلو ، قلت ليهو عايشه دي منو كمان ؟
قال لي دي أخت آخر العنقود....قعدت أضحك لمن قال كدا ، قال لي يا مستهبله ، عارفك أنا ، قلت ليهو كنت بعمل ليك حركات ساي 🤣🤣
قال لي آي عارفك أنا و ما عندي مانع ، أخدي راحتك 😂🤣
المهم رجعت اتكلم و ارغي و أغري لحد ما وصلنا البيت ، طبعاً دي كانت أول مره اتكلم لفتره طويله كدا و بكل أريحيه ، بحس إني مع أواب ببقى إنسانه تانيه ، لمن وصلنا كانوا في شفع جنب بيتنا ، و جوا كم نسوان كدا طالعين من البيت لمن شافوني جوا سلموا علي و باركوا لي و مشوا ، المهم لمن دخلنا لقينا في شوية ناس كانوا قاعدين في الحوش و البيت كان مرشوش و مقشوش ، و خالتو خنساء بتوزع في العصير ساي ،
في اليوم داك حتى جيرانا الما كان بجونا جونا عشان يباركوا لي و حسيت إنو الناس دي مبسوطه لي شديد....
