طبعاً اليوم داك المدرسه كلها بقت تتكلم عن الحصل و عن أستاذ أحمد و كالعاده دائماً رابطين إسمي بإسم أستاذ أحمد ! تقريباً كل المدرسه كانت عارفه إنو استاذ أحمد كان بعاملني معامله خاصه و الما كان عارف بعد الحصل عرف !!
في نهاية اليوم دا و أنا واقفه جنب الباب و منتظره رغد لمحت بنتين واقفين بعيد شويه مني بس كانوا بعاينوا لي و بتكلموا و وحده عديل كانت بتأشر علي ، عرفتهم بتكلموا في شنو ، و أنا واقفه كدا رغد جاتني و قالت لي دا شنو الحاصل دا !؟ قلت ليها ما مهم خلينا نمشي البيت ، أول ما طلعنا كدا ، لقينا أواب في وشنا ! قلبي عمل شححح ، و شوفتو خلعتني والله ، لأني كنت بفكر فيهو و فجأه هو طلع في وشي ! كان مربع يدينو و بعاين لي بحده كدا ، ما عرفت أمشي ولا أسلم ولا اعمل شنو ، فتح باب عربيتو و قال لينا تعالوا ، رغد قالت ليهو لا ماشين البيت نحنا ، قال ليها رغد ! ما اسمع حسك دا تاني و أركبوا عن سكات ، عاينت لـ رغد و أنا متردده ، من جواي عايزا أرجع معاهو زي زمان بس حاسه إني ما مفروض أرجع اتواصل معاهو تاني ، عاين لي و قال لي ما تشتغلي بكلام رغد ، قبل ما اقول أي حاجه لين جات طالعه و وراها قريب ال10 بنات ، جوني زي السيره و قالوا لي المديره بتناديك ، قلبي حسيتو رجف من الخوف ، قلت ليهم ليه ؟ لين قالت لي نظام ما عارفه حاجه يعني ؟! الحاصل قدامك من قبيل دا كلو قايلاهو مسرحيه ولا شنو ؟؟!
أواب قال لي في شنو يا مها ؟؟
هزيت ليهو راسي و انا منططه عيوني ، أديت شنطتي لـ رغد و دخلت مع ناس لين ، أواب جا لاحقني قبل ما أدخل المكتب و قال لـ لين في شنو المديره عايزاها لشنو ؟
رفعت ليهو أكتافها بس ، لمن دخلت المكتب لقيت معاها أستاذ أحمد و معلمين ، قلت ليها ناديتيني ! قالت لي آي تعالي ، لمن مشيت ليها ، قالت لناس أستاذ أحمد خلونا نتكلم برانا ، أستاذ أحمد قال ليها جداً و طوالي طلع مع المعاهو ، قالت لي اقعدي ، لمن قعدت قالت لي أكيد سامعه الكلام و الإشاعات الطلعت و أنا لحد الآن بقول إنها اشاعات لأني لا شفت بعيني لا سمعت بإضنيني ، للسبب دا انا جبتك و عايزا أعرف منك الحاصل شنو ، و قبل ما تقولي أي حاجه خليك عارفه انو الكلام دا حيكون بيني و بينك و أستاذ أحمد ذاتو ما حـ يعرف بيهو ، ....سؤالي ....انتٖ استاذ أحمد دا قاعد يقول ليك كلام أو بتلاطف معاك ؟؟
ما عارفه إذا فهمتي قصدي أو لا و ذاتي ما عارفه اجيب ليك السؤال بطريقه مباشره كيف !...قلت ليها ما فاهمه حاجه ...
قالت لي أكيد....طيب استاذ أحمد بتعامل معاك كيف ؟؟
قلت ليها عادي
قالت لي بناديك في مكتبو ؟
قلت ليها لا
قالت لي ولا مره قال ليك تعاليني في المكتب ؟؟
هنا اتوترت والله و حسيت انو اسئلتها مخيفه ، قلت ليها يعني ما....قاطعتني و قالت لي حصل ولا ما حصل ؟؟
