بعد اسبوعين من الكلام دا كان تخريج أواب ، أنا ما كنت عايزا أمشي لكن خالتو خنساء غصبتني و أخواتي كانوا مصرين يمشوا ، ما شاء الله أهلو و بنات و أولاد خالاتو و خيلانو و عماتو و أعمامو كان كتار شديد و دا غير أصحابو و معروفو الفيهم جزو كبير ما قدر يدخل و جزو هم ما قدروا يعزموهم عشان العدد كبير ، المهم كان تخريج حلو و فخم شديد ، لمن كنا راجعين هو ركب معانا في بص الوالي الجينا بيهو ، كانوا جايبين باصين و في ناس جات بعرباتها ، طبعاً بنات أهلو طول الطريق كانوا بغنوا و بصفقوا و برقصوا في البص و رغد و براءه بغنوا وراهم إلا أنا كنت قاعده زي الصنم....
المهم بعد فتره من تخريج أواب ، اخوهو امير البرا السودان رسل ليهو و قال يجي يشتغل معاهو ف خالتو خنساء رفضت و قالت ليهو لو مشيت ما ح تجي تاني زي ما عمل أخوك و دقت جرس و قالت ليهو أنا عايزاكم تكوني قدامي و اقدر اشوفكم الزمن كلو و عايزا أعرس ليكم و أشوف أولادكم و أضمهم علي ، أواب قال ليها ما تخافي يا أمي ، أنا مسافر أكون نفسي و لمن أجي راجع ح أجي زول عرس إن شاء الله ، المهم أقنع أمو في النهايه ، بتذكر قبل يوم من سفرو رسل لي براءه ، جات قالت لي أواب بناديك جنب الباب ، استغربت و قلت عايز شنو ، على بال ما ألبس عبايتي لقيت رغد مشت ليهو ، قلت أحسن ذاتو ، بعد شويه لمن جات راجعه و سألتها عايز شنو قالت لي كان عايز يقول ليك ياسر دا خلي بالك منو ، المهم يعني عايز يوصيك عليهو ، قلت ليها ما عندو موضوع بس !! قالت لي عادي ما فيها حاجه لأنهم بتعتبرونا منهم و فيهم ، المهم تاني يوم طوالي سافر ، بعدها طوالي يوم جاتنا خالتو خنساء عشان تتفقد أحوالنا ، قالت لينا ليكم يومين ما جيتوني ، قلت ليها بقينا نتكاسل مع الطلعه ، لقينا الإجازه دي و ما صدقنا ، رغد قالت ليها كلها مقضنها نوم ، قالت لينا المدارس يوم الأحد ، ياسر قال ليها ياخ حريقه تحرق كل المدارس ، قالت ليهو عاد انت و أمجد نفس الطينه لكن هو الحمدلله بالجلاله نجح و هسي قدم و منتظر نتيجة القبول ، المهم بقت تتونس معانا و الكلام جاب الكلام ، قالت لينا قبل 3 أيام كدا في مره جات دقت ليكم الباب ؟؟
قلنا ليها لا لا ، قالت لينا لأنو جات وحده و دقت الباب و سألت عن الناس الكانت ساكنه في البيت الإنتو كنتوا ساكنين فيهو ، ف قلت ليها رحلوا و سكنوا في البيت الجنبنا دا ، الوقت داك كان مع المغرب كدا ، ف ما عارفه تاني جاتكم ولا لا ، قلت ليها بري ما جاتنا !!
المهم بقينا نجهز للمدرسه و أنا متحمسه شديد للسنه الجديده و لأني ح أشوف أستاذ أحمد تاني بعد الإجازه الطويله دي كلها ، يوم بعد ما جينا من ناس خالتو خنساء بابنا دقه ، براءه جرت و فتحتو ، بعد شويه جاتنا جاريه و قالت لي مها أمي جات ...
أنا و رغد في نفس الوقت وقفنا على حيلنا ، فجأه جاتنا داخله و هي ماسكه مؤيد ولدها! طولنا ما شفناهو ، بقيت منططه عيوني و ما مستوعبه إنها جات !!
