_هوووس اسكتي اسكتي خلاص ما تلمي فينا الناس يا بتي
رغد اتكلمي مع أختك دي ، ما تفضحينا يا بت الناس
دي عمتي القالت كدا ، كنت برجف كلي و لساني ماسك في كلمة واي واي بصوت عالي و عمتي بتحاول تسكتني ، رغد هبطت و قعدت على الأرض و براءه كانت بترجف و دموعها عشره عشره و ملابسها مرميه جنبها على الأرض و هي من الصدمه و عدم إستيعابها بقت واقفه و منططه عيونها ، عمتي لفتها بالملايه و بقت تردد في حسبي الله ونعم الوكيل فيك يا عبد العزيز محل ما تقبل ، طبعاً هو طلع طوالي لمن أنا صرخت ، مع طلعتو دي لقى ناس عمتي جوا داخلين فطوالي مشى بسرعه و عمتي و رغد جوا جارين لمن سمعوني بصرخ بأعلى حس عندي ، عمتي ساقت براءه و طلعت بيها من الغرفه و أنا و رغد من مكانا ما قدرنا نتحرك ....أنا لحد اللحظات ديك ما كنت مستوعبه الشفتو ! حسيت نفسي بحلم !
دا شنو دا الشفتو قدامي !!
بالجد دا شنو ؟؟
عمتي جات راجعه تاني و هي بترجف قالت لي أختك كويسه و ما جاتها عوجه و مدام الله سترها انتوا ذاتكم استروها و ما تبشعوا بيها و بينا ، الناس حتقول شنو لو عرفت ، ما ح يريحونا والله...
بقينا ساكتين ساي و ما قادرين ننطق حرف !
عمتي خايفه اننا نتكلم !!؟
أساساً نتكلم نقول شنو ؟ و لمنو ؟!
في الوقت داك نحنا كنا صغار و ما في سن يخلينا نقدر نستوعب الحصل و نفهم انو اسمو تحرش و كان ممكن يكون إغتصاب ، ايوه ما كنا عارفين أبعادو النفسيه أو الحاجات المترتبه عليهو بس الأكيد اننا كنا فاهمين انو الحصل كان عيب و عيب كبير كمان و حاجه خطره و صعب إستيعابها عشان كدا ما كنا قادرين نقول حاجه لأبوي ! الشفتو كان حاجه ما منطقيه بالنسبه لي ! لساني إتربط بالجد....
المهم لحد اليوم البعدو راجل عمتي ما جا و نحنا دخلنا في حاله تانيه و عمتي كانت بتحاول تدارك الموقف ، تلفون رغد رن و المتصل كان أبوي ، والله بمجرد ما شفت اسمو ساي دموعي نزلت و يدي بقت ترجف ، رغد عاينت للإسم مسافه و قبل ما ترد عمتي جات شالت التلفون و ردت عليهو ، قالت ليهو لا لا كويسين والله ....التلفون كان جنبي عشان كدا رديت ، ههه لا هسي هم بحضروا ساي ....طيب تمام .... طبعاً نحنا بنعاين ليها ساي و كذبها دا حسسنا إنو بالجد الموضوع دا خطير و إنو ما لازم نتكلم ، عمتي لمن قفلت الخط قالت حسبي الله ونعم الوكيل فيك يا عبد العزيز ، جات قعدت جنبنا أنا و رغد و بقت تحنس فينا عشان ما نكلم أبوي و قالت لينا دي حاجه عيب ما بتكلموا فيها و بذلت كل جهدها عشان تقنعنا إنو ما صح نتكلم و نقول حاجه زي دي و نجحت في إقناعنا ، قالت لينا أبوكم قال جاييكم الليله ، بعدها قامت مننا و مشت تتكلم مع براءه ...
المهم بعد ساعتين كدا أبوي جا ، طبعاً عمتي فهمتو اننا لسه بنتخلع و انو الحصل لينا في البيت داك لسه مؤثر علينا عشان كدا نحنا ساكتين ، أبوي صدق كلامها و ما سأل كتير ، عمتي قالت ليهو لقيت ليكم بيت في الشارع التاني طوالي فيهو 3غرف و طوبو بلك و سيدو قال عايز فيهو 50ألف ، أبوي قال ليها ما قصرتي والله لكن لقيت لي بيت و شغل في نفس الوقت ، قالت ليهو والله ما شاء الله ... طبعاً عمتي بتتكلم و هي صوتها برجف ، أبوي قال ليها خير مالك انتي يا آمنه ؟؟
