خالتو خنساء قالت ليهو لكن سليمان اتصل و كلمك يا سعيد ، قال ليها كلمني و أنا قلت ليهو ما عايز أي زول يسكن لي في البيت ، اذا هو عايز يعمل حسنه في الناس ليه ما يعملها بقروشو و أملاكو ، مرتو قالت ليها راجلك يا خنساء مدام عامل فيها طيب و قلبو رقيق ليه ما سكنهم معاكم في البيت ! الله أعلم جبتو لينا الأشكال دي من وين !
أبوي كان ساكت ساي بس كنت حاسه بالكسره الجواهو ، ما ح يقدر يقول حاجه لأنو أساساً البيت دا نحنا ما مؤجرنو لأنو عمو سليمان قال لينا اقعدوا فيهو ساي بعد ما كان أبوي متفق معاهو على قروش الإيجار بس هم ما رضوا يشيلوها ، الراجل كورك شديد في خالتو خنساء ، أبوي قال ليهو معليش يا أخوي و بيتك دا هسي ح نطلع ليك منو و إتلفت علينا و قال لينا أدخلوا لموا ملابسكم ، خالتو خنساء قالت ليهو تمشوا وين زي الوقت دا !؟ قال ليها ربنا كريم ، دخلت لينا جوه لقتنا بنلم في حاجاتنا قالت لينا ودوهم بيتي ، أرح اقعدوا معاي هناك ، فعلاً شلنا الملابس و طلعنا بيهم و أبوي كانت بتكلم براحه مع الراجل و هو عكسو كان بهين فيهو و بتكلم معاهو بنبره حاده ، أبوي جانا في بيت ناس خالتو خنساء و قال لينا اطلعوا قدامي ، خالتو خنساء كانت شايله تلفونها و بتحاول تتصل على عمو سليمان بس ما كان برد عليها ، قالت لأبوي والله كلو ح يتحلى انت بس اصبر و ما تستعجل ، الليله بيتوا هنا و الصباح رباح ، قال ليها كتر خيرك والله ، انتي و سليمان ما قصرتو والله ، و ربنا يجزاكم خير الجزاء و نحنا ما عايزين نسبب ليكم أي مشاكل ، قالت ليهو معقوله !! ثواني بس هسي بتصل على سليمان ، أبوي قال لي أرح اطلعوا يا مها ، براءه قالت ليهو ماشين وين يا أبوي !! ما رد عليها ، ياسر قال ليهو و سرايرنا و باقي حاجاتنا ح نخليهم !؟؟ قال ليهو بجي يوم و بشيلهم ، خالتو خنساء جات وقفت لينا جنب الباب و قالت لي أبوي والله ما بخليك تمشي بيهم زي الزمان ، خليني بس اتكلم مع سليمان ، أبوي قال ليها اسمعيني أنا.....قاطعتو و قالت ليهو حلفتك بالله انتظر شويه و سليمان ح يحل المشكله كلها ، بقينا واقفين في الحوش و هي بتتصل على عمو سليمان بس خالص ما رد عليها ، قالت لينا ح أشوف أمجد و فعلاً اتصلت عليهو ، رد عليها بعد مسافه ، قالت ليهو أمجد يا ولدي انت وين تعال البيت سرعه و لو قريب من مكان شغل أبوك اغشاهو معاك و تعالوا سرعه لأنو في مشكله حاصله في البيت....
بعد شويه قالت ليهو في شنو يا أمجد ! سامعني انت ؟؟
خالتو خنساء كانت بتتكلم بنبره ملانه خوف كدا خلتنا كلنا نركز مع مكالمتها ، فجأه وقعت التلفون و قعدت على الأرض ، جرينا عليها و بقينا نقول ليها في شنو يا خالتو خنساء في شنو !!، أبوي رفع التلفون و اتكلم مع أمجد بعدها ملامح وشو إتغيرت ، قال ليهو في مستشفى شنو انتوا ؟؟
بعد قفل خالتو خنساء إنهارت و بقت تبكي ، قالت لأبوي أنا ماشه ليهم هسي ، أبوي قال لي انتوا خليكم هنا و قال لخالتو خنساء أرح أنا ذاتي بمشي معاكم لكن اول حاجه نغشى أخوهو و نكلموا ، قلت ليهو في شنو يا أبوي ؟؟
