لمن إتلفت و شفتها لقيتها رغد ، حبوبه سعاد كانت ضاماها عليها و رغد بتبكي و هناك أواب لسه بصارع في أبوهو و أخوانو أمير و أمجد و أولاد أهلو عشان يمسك الولد تاني !!
مشيت ناس حبوبه سعاد و قلت ليها رغد مالا ؟! في اللحظه دي رغد طوالي زحت من حبوبه سعاد و جات ضمتني و قعدت تبكي و هي بترجف من فوق لتحت....
حسيت إحساس ما عادي ! أول مره اشوفها بتبكي كدا و خايفه للدرجه دي ، كانت ماسكه فيني شديد و دموعها ملت فستاني ، خالتو خنساء قالت ليها خلاص يا رغد يا حبيبتي ما تبكي و الولد طلعو بكرا و الضرب الإنضربوا حـ يخليهو يفكر مية مره قبل ما يفكر يقرب من بنات الناس ، جات سناء مرة عمهم و قالت هي ذاتا البخليها تقيف جنب الأولاد شنو و ترقص في نصهم !؟
حبوبه سعاد قالت ليها ترقص وين ما عايزا ، دا معناهو إنو الولد يقل أدبو عليها ! و كمان كما عينو قويه ، في نص الحفله و قدامنا كلنا يقرب منها كمان !!؟؟
خالتو خنساء قالت لي سوقي أختك و دخليها جوه ، فعلاً سقتها و دخلت بيها جوه ، طبعاً الإكتشفتو انو ابوي ما جا الحفله ، مشيت غسلت ليها وشها و دخلت بيها غرفه من الغرف ، سوزان و رماز و براءه جوا وراي ، سوزان قالت كويس انو ابوكم ما جا و إلا كان الليله في جنازه حـ تطلع من البيت دا ، رماز قالت ليها أنتِ ذاتك يا رغد ما كان تقيفي و ترقصي قدام الأولاد بشكلك دا !!
لا هي اتكلمت معاهم لا أنا اتكلمت معاهم ، طلعت و براءه وراي مشيت جبت ليها مويه و جيت راجعه ، بعد ما شربت خالتو خنساء و حبوبه سعاد جونا داخلين ، خالتو خنساء جات ضمت رغد و قالت ليها معليش يا بتي ، حقك علينا ، حبوبه سعاد قالت نحنا غلطانين ما كان نخلي اصحاب أمجد و أصحابهم يجوا الحفله دي ، ياريت عملناها مخصصه و منعنا الناس الغريبه ، سوزان قالت ليها لا لا ما تعتذروا رغد ذاتا غلطانه ، خالتو خنساء قالت ليها بتي ما بتغلط 😊
هنا مرة أبوي سكتت و ما إتكلمت تاني ، بعدها ناس خالتو خنساء طلعوا و بعدهم بشويه سوزان و رماز طلعوا ، بقينا قاعدين أنا و براءه و رغد ، رقدت براءه و قلت ليها نومي و بقيت بعاين في رغد ، قلت ليها الولد مالو معاك ؟ عمل ليك شنو ؟؟
مسحت دموعها و قالت لي براهو بقى متابعين و محل ما أقيف بجيني و في كل مره بلقاهو واقف وراي ، لحد ما خت يدو على كتفي.....فجأه سمعنا صوت الباب ، لمن مشيت فتحتو لقيتهم أمير و أمجد ، قالوا لي رغد بقت كيف ؟
قلت ليهم كويسه الحمدلله ، دخلوا شافوها و إعتذروا منها و أمير قال ليها اتطمني و اطلعي عادي ، حاجه زي دي ما حـ تتكرر تاني ، طلعنا كل الأولاد الغريبين من الحفله دي ، قلت ليهو بعد شويه حـ نجيكم ، لمن طلعوا و كنت حـ اقفل الباب فجأه أواب ظهر قدامي ... طبعاً كان متضايق ضيق ما عادي و ملامح وشو متغيره ، قال لي رغد كويسه. ! نامت ولا صاحيه ، قلت ليهو صاحيه ، لمن دخل عشان يشوفها اتفاجأت لمن لقيتها راقده و مغمضه عيونها !!
قال لي شكلها نامت ، طبعاً كنت مستغربه لأنها هسي كانت صاحيه ، قلت ليهو اي شكلها كدا ، إعتذر مني على الحصل ، قلت ليهو حصل خير و الحصل ما غلط زول فيكم ، قال لي تمام خليك معاها و لو إحتجتوا حاجه اتصلي علي طيب ؟؟ قلت ليهو طيب و أول ما طلع قفلت الباب و مشيت قعدت و أنا بعاين لـ رغد ، لمن ما فتحت عيونها قلت ليها أواب مشى ، لمن فتحت عيونها ما قالت حاجه و ما بررت ليه عملت نفسها نايمه قدامو....
بعد مسافه قالت لي أنا نعست ، نمشي البيت ؟؟
قلت ليها طيب ، طبعاً براءه نامت ، مشيت كلمت سوزان و قلت ليها نمشي بعد دا ، خالتو خنساء قالت لي انتظروني أنا ذاتي ماشه معاكم عشان أشرح لأبوكم الحصل ، قلت ليها لا لا يا خالتو ما عايزين نكلموا نحنا ، خلاص الحصل حصل ، قالت لي طيب تمام ، مشيت صحيت براءه و طلعنا الشارع ، أواب جا عشان يوصلنا ، كان بعاين لـ رغد ساي بس ما قال ليها حاجه ، خالتو خنساء و حبوبه سعاد ، كانوا واقفين معانا لحد ما ركبنا و مشينا البيت ، لمن نزلنا سوزان قال لأواب اتفضل معانا ، قال ليها لا لا ماشي طوالي ، براءه و ياسر دخلوا طوالي و أنا كنت واقفه لأني افتكرت إنو أواب حيكون عايز يتكلم معاي أو كدا بس أساساً ما عاين لي ، نظراتو كلها كانت على رغد ، دخلنا البيت و نحنا ساكتين و أنا قدر ما حاولت أفسر نظراتو دي على انها زي نظرة الأخ لأختو ما قدرت 💔 عقلي بدا يودي و يجيب من شدة التفكير و عدم إستيعاب للحصل كنت ما قادره اتكلم مع زول و لساني حسيتو مربوط ، لمن كنت بطبق في ملابسي و ملابس ناس براءه سوزان و رماز كانوا بتكلموا عن الحصل ، رماز قالت ليها واي يا خالتي ما شفتيهو ضرب الولد كيف ! والله من شدة الضرب لمن حنيت عليهو ، سوزان قالت ليها شفت لأني كنت قدام و والولد يستاهل ، شنو البخليك تحني عليهو !! مجنونه انتي !! طبعاً ماف زول جاب سيره لأبوي و أساساً نحنا جينا متأخرين عشان كدا ما شك إنو في حاجه ، لمن خلاص جا زمن النوم ، أنا شلت لي مخده و غطى و طلعت رقدت في المظله و خليتهم جوه الأوضه ، أول ما رقدت كدا رماز جات طالعه من الأوضه و هي شايله ليها مخده ، قفلت باب الأوضه وراها و جات رقدت في السرير المقاصدني ، خالص ما اتكلمت معاها لأني أساساً ما كنت قادره اتكلم مع زول ....بعد مسافه طويله قالت لي مها نمتي أنتِ ؟؟
ما رديت عليها ...
قالت لي أنا عارفاك صاحيه و حاسه فيك ، عشان كدا قلت ليك اعملي حسابك من أختك دي ....فتحت فلاش تلفونها و قعدت في نص السرير و قالت لي أختك مفتحه و فاهمه كويس انو جمال المرأه قوتها و اي راجل ما بقدر يثبت قدام جمال المرأه مهما كان عامل فيها يا جبل ما يهزك ريح و أختك النصيحه في الطبيعه سمحه و لمن عملت ميك اب بقت مبالغه و جمالها برز أكتر عشان كدا لفتت انظار الناس كلها من ضمنهم خطيبك و اقول ليك حاجه أنا زوله بتاعة ملاحظات ، بنتبه لأدق التفاصيل و ماف حاجه بتفوت علي ، جيت متأخره بس قدرت أعرف إنو أختك و خطيبك دا في شي بينهم ، نظراتهم لبعض بتقول كدا ، و عشان ما تقولي جبت شي من عندي أنا كذا شفتهم واقفين مع بعض و أكيد انتي برضو بتكوني عارفه الحاجه دي بس ما خاته حاجه في بالك و أنا عرفتك هبله ساي من يوم قلت ليك شفت رغد واقفه في الحوش مع أواب و ما قلتي حاجه و ما مشيتي تشوفيهم و على فكره لمن خطيبك وصلنا و رغد قالت ليك نست شنطتها و طلعت عشان تجيبها أنا كنت واقفه جنب الباب و شفتها واقفه معاهو ، كانوا بتكلموا مع بعض بس ما سمعتهم قالوا شنو ، في الآخر مد ليها شنطتها و هي شالتها و جات داخله و يمكن قصتهم دي باديه قبل أو بعد ما خطيبك المهم متأكده في شي بيناتهم....أنا ما بقول ليك كدا عشان أحرضك على أختك بالعكس بقول ليك كدا عشان تعملي حسابك و ما تخليهو ليها ، رغد دي صغيره بس حركاتها حركات ناس كبار و أصلا في الغيره و الخساسه ماف صغير ولا كبير فـ أنتِ بس خليك شاطره و مفتحه و شيلي عيون خطيبك دا عنها و عن أي بت غيرها ...
طبعاً و هي بتتكلم أنا دموعي بللت المخده ، ما كنت راضيه أصدق الكلام السمعتو ، أواب مستحيل يكون كدا و رغد أصلا بتكرهو فـ ما بصدق أنها ممكن تعمل حاجه زي دي و هي عارفه انو أواب خطيبي !
بكيت كدا لمن صدعت ، إتلفت على الحيطه و بقى في صراع داخلي جواي ، جزو كان رافضة فكرة انو في شي بين رغد و أواب و جزو مع الفكره دي 💔
قعدت افكر و اتذكر كيف رغد اتغيرت علي من يوم الخطوبه و كيف أنها قبل ما يخطبني كانت بتزعل و بتضايق لمن تعرف اني بتكلم مع أواب ، عشان كدا كانت بتهددني و بتقول لي بكلمك ليك أبوي...
الليل كلو قضيتو بكى و كل ما اتذكر حاجه دموعي بتجري زياده ، جاني صداع عديل و حسيت نفسي مخنوقه و إني ما قادره اتنفس ، قمت طلعت من المظله و مشيت قعدت برا في الحوش و الدنيا ضلام ، أبوي كان بنوم في الحوش بس اليوم داك كان نايم جوه أوضتو هو و مرتو ، قعدت على الأرض و حسيت إني عايزا أصرخ بأعلى حس عندي ، حسيت انو البكى ما كفايه و انو الوجع الجواي الدموع براها ما بتطلعو ، قعدت أبكي و اتذكر لحد اليوم الكنت فيهو مع أواب و كنت زعلانه منو و هو قال لي حركاتك زي حركات أختك و أنا الهبله ما دققت كتير في كلامو و ما عرفت انو كان قاصد رغد ، و إتذكرت لمن قلت عايزا اشتري هديه لأواب و شاورت خالتو خنساء و رغد هي الكانت بتجاوب بدل خالتو خنساء لأنها عارفه كويس هو بحب شنو و بكره شنو ...
حسيت نفسي حـ أجن عديل ، متين بدأ دا كلو و أواب دا مش بحبني أنا ، ليه يعمل كدا ، عايزين يصلوا لشنو هم الإتنين 💔أواب دا أنا عملت معاهو شنو ! شنو الجريمه أو الذنب العملتو البستاهل انو أواب و أختي يخونوني !! عايز منو هو و لو بالجد هو بحبها خاطبني ليه !💔
من شدة البكى و الوجع حسيت قلبي إنشق نصين و حسيت بصخره على صدري ، قعدت في مكاني داك لحد صلاة الصبح ، لمن شفت أبوي من بعيظ طلع من أوضتو ، رجعت شويه على ركن المظله عشان ما يشوفني و فعلاً ما شافني ، أول ما إتوضى و طلع أنا قمت صليت و دخلت جوه المظله إتغطيت بس ما نمت ، لحد ما الشمس شرقت و هم صحوا و قاموا جهزوا و مشوا المدرسه ، كنت سامعه حركتهم و كلامهم بس نهاي ما إتحركت و رغد دي كل ما اسمع صوتها دموعي بتنزل زياده ، المهم بعد ما هم مشوا و الساعه 8 جات رماز جات عشان تصحيني ، من دون ما أتلفت أو اشيل الغطى قلت ليها خليني عايزا أنوم ، سوزان جات و قالت ليها مالا ؟؟
ما عارفه اشرت ليها و قالت شنو بس الإتنين سكتوا و دخلوا المطبخ شربوا الشاي ، أبوي سامعاهو جا داخل عليهم في المطبخ و قال ليهم مها دي مالا ؟؟
سوزان قالت ليهو بتكون تعبانه من فتر أمبارح ، قال ليها خلاص أنا طالع ، قلت ليهو طيب مع السلامه ....
المهم أنا ما قمت إلا الضهر ، قمت صليت و بعدها دخلت جوه و شلت تلفوني ، لقيت في 3 مكالمات من أواب أمبارح ، لمن دخلت الواتس برضو لقيتو مرسل لي ، فتحت الرسايل و لقيتو كاتب لي : قبيل ما قدرت اقعد معاك اطول فتره ممكنه ، عشان كدا حاسي اني مشتاق ليك
في الرساله البعدها كاتب لي : معقوله ياخ لحد الآن لا داخله واتس لا بتردي على المكالمات !
شكلك نمتي 💜 الصباح حـ تلقي رسائلي دي
و أنا بقرا فيهم حسيت عقلي جايط ، أول ما رفعت راسي كدا لقيت رماز شايله كباية شاي و واقفه بتعاين في تلفوني ، قفلتو و قلت ليها مالك !؟
قالت لي بما انو خطبك و حدد موعد العرس و هسي مرسل ليك خلاص نظراتو لأختك دي و مواقف امبارح إعتبري انو عينو زاغت لفتره مؤقته و دا حال الرجال بس بكرا لمن تعرسيهو حـ تعدلي ليهو راسو و تخليهو ما يشوف غيرك و طبعاً دا بـ شطارتك ....سكت ما اتكلمت معاها ، مدت لي كباية الشاي ، قلت ليها ما اتسوكت و طوالي طلعت منها ، مشيت اتسوكت و غسلت وشي و جيت راجعه ، قالت لي عيونك وارمه من شدة البكى و ليك حق والله عملة أختك بطاله ، قلت ليها ما عايزا شاي رجعيهو....
بعدها أخدت اليوم كلو زعل و نفسنه و تفكير حتى ما مشيت بيت ناس خالتو خنساء مع ناس رغد لمن جوا راجعين من المدرسه ، رماز قالت لي يا هبله كنتي تمشي ، هسي أختك ما حـ تصدق انو الجوا هدى ليها ، طبعاً هي بتتكلم و أنا ما شغاله بيها ، سوزان جات قعدت و قالت لـ رماز بتقولي ليها في شنو انتي و هي وقت ما عايزا كلامك تحسن تسكتي يا رماز ، قالت ليها لمصلحتها يا خالتي لأنو اختها فظيعه الصراحه ، سوزان قالت ليها رغد ولا منو ؟ قالت ليها اي و قعدت تحكي ليها و تقلب علي المواجع ، لمن خلصت سوزان قالت لي النصيحه أنا والله من يوم جيتكم و عرفت نسابتك ديل نظراتك أختك و غيرتها منك كانوا واضحين شديد ....أول ما هم بدوا يتكلموا لي في الموضوع قمت و طلعت مشيت المظله ، بعد شويه رماز جات شايله تلفوني و هو برن ، المتصل كان أواب ، قعدت أعاين في الشاشه ساي ، قالت لي يا غبيه ردي عليهو ، ما اتكلمت ، قالت لي ما تخليهو لأختك ، إذا هي مفتحه خليك مفتحه أكتر منها ، جات سوزان و قالت ليها رماااااز اسكتي خليها ، رماز عاينت لي و سكتت ، التلفون لسه كان برن ، بتردد شلتو و فتحت الخط ، رماز بصوت واطي قالت لي دا الكلام ، أواب قال لي اصلووو ما معقوله معاك السفهه السافهاني ليها دي ! شكلك عايزاني اشتاق ليك أكتر صح ؟؟ .....ليه ما جيتي بيتنا اليوم من قبيل بفتش عليك إلا هسي عرفت من أخواتك انك ما جيتي معاهم.... طبعاً من قال لي أخواتك طوالي رغد خطرت على بالي ...بعد مسافه قلت ليهو عيانه.....قال ليه من متين و ليه ما كلمتيني ، عايني هسي أنا حـ أجيك و نمشي الدكتور خليك جاهزه ، قلت ليهو لا لا ما نزله عاديه ما محتاجه دكتور ، قال لي جاي عليك و طوالي قفل الخط ...
ختيت يدي على راسي من شدة الصداع البسبب الضغط و التفكير ، أواب عايز منو و عايز يصل لشنو ! حـ أطق أنا أو أجن من كترة التفكير ....رماز قالت لي قال ليك شنو ؟؟
حكيت ليها الحصل ، قالت لي اجهزي طوالي و أمشي معاهو ، قلت ليها لكن أنا ما عيانه ، قالت لي لمن تركبي معاهو فهميهو انك مصدعه بس و حاولي تكوني طبيعيه قدامو و افتحي معاهو موضوع عرسكم و كدا و اقعدي اتكلمي معاهو عن حياتكم بعد ما تعرسو و كدا ، فهمتي علي !؟
قلت ليها ما عارفه ، قالت لي أصلك غبيه ، قالت كدا و مشت خلتني ، فكرت شويه كدا. بعدها ظبط نفسي رغم انو عيوني كانت وارمه من شدة البكى و من شكلي واضح اني يا عيانه يا كنت ببكي ، رماز قالت لـ حـ اعمل ليك شوية ميك اب و فعلاً عملتو لي ، لمن أواب جا و طلعت معاهو قال لي و تقولي لي نزله عاديه ما محتاجه دكتور ؟؟ ما شايفه نفسك انتي ؟؟
قلت ليهو أواب أنا كويسه بس حاسه اني عايزا اغير جوا ، قال لي طيب بعد نطلع من الدكتور حـ اسوقك شارع النيل ، قلت ليهو لا لا ما عايزا أمشي لأي دكتور و دي ما أول مره تجيني فيها نزله ، قال لي لا ، قلت ليها اواب جااااده أنا ياخ و بعدين انت مش بكرا عرس أخوك ! يعني ليه مخليهو و حايم ! ضحك و قال لي ما لو كان جيتي البيت ما كان خليت أخوي و حمت 😂
غيرت الموضوع و قلت ليهو أمير استعجل شديد للعرس دا ، قال لي لأنو عارف أمي دي ما راضيه شديد بالعرس دا عشان كدا عايز يعرس زولتو دي بأقصى سرعه قبل ما أمي تغير رايها و تنق ليهو تاني 😂
قلت ليهو أنا زهجانه أديني تلفونك ألعب بيهو ، خليت تلفوني في البيت ....قال لي مها إنتِ كويسه ؟؟
قلت ليهو أكيد ، قال لي الظاهر ما كدا ، في شنو أحكي لي !؟
قلت ليهو ولا شي ياخ ، قول بس ما عايزني ألعب بتلفونك ، قال لي أبدا والله ، فتحو و طوالي أداني ليهو ، قال لي الألعاب الفيهو بايخه ....ما رديت عليهو لأني كنت بفتش على الواتس حقو لحد ما لقيتو ، بإستعجال بديت أفتش على اسم رغد ، قال لي ابت تشتغل ليك ولا شنو لمن ميّل نفسو عشان يشوف التلفون أنا اتخلعت و بقيت اضغط على التلفون و أنا مخلوعه بعاين لأواب ، عاين في التلفون و قال لي تيك توك ؟!
لمن عاينت في التلفون لقيت نفسي دخلت التيك توك من دون ما انتبه ، قلت الحمدلله في سري و ياداب قدرت اتنفس ، قال لي انتِ اليوم ما طبيعيه و لونك دا مالو مخطوف كدا !!؟
قلت ليهو و أنا بتمتم مـ مـ ماف شي ، مالي عاديه ، قال لي حالتك دي ما عاجباني ، إبتسمت و قلت ليهو إرهاق عادي ، قال لي بالمناسبه اليوم حاسي شكلك غريب يمكن عشان عامله ميك اب ، قلت ليهو أنا ذاتي حاسه كدا ، قال لي انتِ حلوه في كل حالاتك و ما محتاجه دا كلو عشان تكوني جميله في نظري ....في سري قلت ليهو الميك دا لمن رغد عملتو امبارح انت قربت تجن عديل ، المهم فتح لي الشبكه و قال لي عايزا أعرف التيك توك صح ؟؟
قلت ليهو أيوه ، بقيت اشوف في التيك توك عشان هو ما يشك بعدها قلت ليهو ممكن تديني سماعه ، قال لي حدا و طوالي أداني ليها ، ركبتها و عملت نفسي فاتحه التيك توك و في الحقيقه أنا دخلت الواتس و بقيت افتش على اسم رغد ، كتبت اسمها في أعلى الواتس فـ طوالي ظهر لي حسابها ، قلبي بقى شغال دق دق و حسيت بوخزه في قلبي ، لمن فتحت دردشتهم و بقيت اسحب في الرسايل لقيتها كتيره شديد ، نزلت تحت و لقيت انو آخر رسايل كانت خلال الأسابيع دي ، أواب كان كاتب ليها عايزا تصلي لشنو يا رغد بحركاتك دي ! و على فكره تعاملك السئ مع أختك ما طريقه كويسه عشان تتفشي و تطلعي كل زعلك مني فيها ، رغد كتبت ليهو : أنا أصلاً ما شغاله بيك و تعاملي مع اختي انت ما عندك شغله بيهو ، هي جات شكت ليك ؟؟
بعدها مرسل ليها و كاتب ليها :
كـ نصيحه مني يا رغد ماف داعي تطلعي من البيت و شعرك برا ، من متين بقيتي تعملي كدا ؟
"هي قرت الرساله دي بس ما ردت عليها "
بعدها كان رادي على استوري ليها و كاتب ليها : يا رغد خلي حركاتك دي و تاني لو من المدرسه طلعت و مشيتي شارع النيل أو غيرو صدقيني ما حـ يحصل خير 😊
قالت ليهو ياخ انت مالك و مالي ، أمشي شارع النيل ولا شارع جهنم ما عندك بي شغله
قال لي الكلام دا أكيد ما برضي أهلك ، قالت ليهو انت ما أهلي عشان كدا اطلع منها 👍
قال ليها ما تتكلمي معاي بالطريقه دي ما قدرك أنا ..
برضو قرتها و ما ردت عليهو
بعدها في رساله كاتبه ليهو فيها : أواب أنا ماشه شارع النيل مع صحباتي
كاتب ليها : إياك تمشي يا رغد كلمتك أنا
رسلت ليهو : حـ أمشي ولا على كيفك 🙂😊
بعدها :
_ كويس انك ما جيتي شارع النيل و إلا المره دي يا رغد ما كنت حـ أسكت ليك
= كنت بلعب بأعصابك و ما أنا البستأذن من زول لمن أكون ماشه مكان
_ رغد أنتِ عايزا تصلي لـ شنو ؟
= عايز اوصل ليك فهم انو انت ما عندك بي شغله أمشي وين ما عايزا و ما انت البتتحكم فيني و ما ليك حق علي
_ كـ أخ بتهمو مصلحة اختو ...برضو ما عندي حق
= اختو ؟؟!
_ ايوه لأنك في مقام أختي
= يعني مها برضو في مقام أختك و مع ذلك خاطبها !؟
_ دي مشكلتك يا رغد و أساساً أنتِ السبب في دا كلو لأنك الكذبتي علي من البدايه و انتحلتي شخصيه ما شخصيتك
= طييييب تمام تاني ما تدخل فيني و خليك مع خطيبتك و أنا ان شاء الله امشي السما الأحمر ما تسألني...
"قلت معناها رغد عامله لي إستثناء من الإستوري حقها أو عاملاها مخصوص لأواب "
