بعد ما فطرت مع براءه أديتها الأدويه ، بعدها ياسر جا داخل ، جدع شنطتو طوالي و طلع لا قال جعان لا سأل عن براءه و ذاتو ما إتفاهم معاي ، بقى غريب و عنيد و ما بعمل إلا الفي راسو و خالص ما بسمع مني...
المهم لمن رغد جات حكيت ليها الحصل ، طبعاً براءه لمن انا خليتها و مشيت عشان أبيع التلفون هي قامت عشان تشوف أنا مشيت وين بس من شدة المرض و الجوع و التعب جات واقعه ، رغد قالت ليها كر عليك يا برو ما تستاهلي والله ، شالت مني التلفون و طوالي إتصلت على عمتي آمنه و كلمتها ، قالت ليها لو لقيت طريقه بجي عليكم ، قلت ل رغد ما كان تتصلي عليها ، ماف داعي نحملها مسؤوليتنا و نبقي ليها الهم همين ، براك عارفه ظروفهم شنو و غير كدا المسافه بعيده و المواصلات غاليه ، قالت لي في النهايه هي عمتنا و نحنا حالياً محتاجين ليها ، المهم ختيت ليها أكلت و دخلت الأوضه عشان أقرا بعد ما اتأكدت انو براءه نامت ، المهم أبوي لمن جا أنا لا كلمتو لا خطر على بالي أكلمو من الأساس لأنو ما ح يفرق معاهو و ردو أحسن عدمو ، أنا و رغد طلعنا السراير برا و فرشناها ، شلت براءه و رقدتها برا في الحوش ، أبوي جا قال ليها لسه عيانه ؟؟
هزت ليهو راسها بس ، خت يدو على جبينها و قال ليها حرارتك مرتفعه شويه ، نادى رغد و قال ليها أمشي ارفعي لحافي ، تحتو ح تلقي قريشات شيليهم و جيبي لأختك دي بندول و قرض و كركدي من الإجمالي ، بلوا ليها القرض مع الكركدي عشان تشربهم بعدين و بكرا بتبقى كويسه ، رغد قالت ليهو ماف داعي يا أبوي لأنو براءه ودوها المركز و أدوها أدويه للملاريا و الأنيميا ....استغرب و قال ليها الوداها منو ؟؟
فطوالي رغد حكت ليهو ، أنا دخلت شلت الأدويه و جيت أديتهم ل براءه تاني لأنو دا موعدهم ، أبوي قال لي المره دي منو ؟؟ قلت ليهو ما عارفاها ، عاين ل براءه مسافه و بعدها مشى قعد في سريرو ، رغد ختت ليهو أكل بس أبى ياكل حتى الشاي رجعو و قال ما عايز شي...
المهم اليوم البعدو كان يوم جمعه ، من بعد شراب الشاي أنا و رغد لمينا هدومنا كلها و قعدنا نغسل فيهم ، بعد ما خلصنا رغد مشت جابت لينا عيش و زبادي فطرنا بيهم ، قلت ليهم يلا بعد دا كل واحد يمسك كتابو و يقعد يقرا و العندو واجب يحلو ، براءه قالت لي أنا عيانه ، قلت ليها اي انتي نومي ساي لمن تبقي كويسه ، ياسر قال لي أنا ماشي ألعب ، رغد قالت ليهو هسي قاعد تلعب مع منو انت ؟؟ ناس عماد ديل مش اتشاكلت معاهم قبل كم يوم ؟؟ قال ليها يعني ماف غير ناس عماد ديل !! قلت ليهو ياسر اللعب ملحوق احسن تقعد تقرا ان شاء الله صفحه وحده بس ، قال لي بقرا بعدين ، قلت ليهو ح أكلم ليك أبوي ، قال لي كلميهو أنا ما بخاف ، عاين ل رغد و قال ليها جيبي التلفون ، قالت ليهو لا ماف ليك إلا تقرا ، قال ليها أنا ما بهاظر معاك يا زوله ، جيبي التلفون دا معناها جيبيهو...... طبعاً أنا استغربت في نبرة صوتو الكان بتكلم بيها !! حسسني كأنو راجل كبير أو كأنو هو أكبر مننا ، قلت ليها ايوه اوعك تديهو التلفون يا رغد ، عاين لي بطرف عينو بس و دخل الأوضه و قعد يفتش على التلفون لمن ما لقاهو جا طالع من الأوضه و هو شايل ليهو كتاب ، قايلنوا استسلم و عايزا يقرا بس اتفاجأنا لمن انتبهنا إنو دا كتاب رغد ، قال ليها توريني التلفون وين ولا أشرط ليك الكتاب دا ، قلت ليهو ياسر مجنون انت ولا شنو ، رغد طوالي قامت جاريه عليهو ، جرى منها للحوش و قال ليها والله لو جيتيني ح أشرطو ، أول ما مشت عليهو كدا شرط غلاف الكتاب ، طلعت ليهم برا و قلت ليهو رجع ليها الكتاب ، والله لو جيتك يا ياسر ما أخليك ، قال لي والله تجوني ح أقطع ورقه ، لمن مشيت عليهو قطع الورقه البعد الغلاف ، رغد صرخت فيهو و قالت ليهو بلا يخمك ياخ !! قالت لي خليهو و طوالي دخلت جوه جابت التلفون و جات طالعه ، كان في سرير في الحوش قال ليها ختي لي فيهو التلفون و زحي منو ، عملت القالو فطوالي جا شال التلفون و جدع ليها الكتاب في السرير و قام جاري على الباب و طلع ! رغد مشت على كتابها شالتو و بقت تنبذ في ياسر و هي عايزا تطق من الزعل.....أما أنا فكنت مذهوله بسبب الحصل ! ياسر دا كل يوم بتغير و كل يوم ببقى لئيم و حسود و دا كلو بسبب أبوي لأنو ما حصل مره شاكلو أو قال ليهو ديل أخواتك ما تتعامل معاهم كدا ، أبوي مديهو حرية التصرف بقول ليهو انت راجل البيت و انت الح تغير حالنا و ترفع راسي....
