حسيت إني حـ أطير من الفرح!
دا معناهو إنو أستاذ أحمد ما حـ يمشي !....ضحكت من دون صوت لمن اتذكرت كيف قبيل كنت ببكي قدامو لمن قال لي حـ يمشي ، قال تالته السلام عليكم للمره التانيه ، قالوا ليهو و عليكم السلام ، قال ليهم عملت ليكم وجع وش مش ! رهام قالت ليهو أكيد لا يا أستاذ ، شروق قالت ليهو هو نحنا لاقنك وين ، وراهو طوالي جات أستاذه و تيسير و صفاء و أستاذ بكري ، كلنا بقينا نتلفت و نقول في شنو ، استاذ أحمد قال لينا إتطمنوا ماف شي ، وحده قالت ليهو خلعتونا لأنكم جيتوا داخلين كلكم كدا ، قال ليها هه فعلاً ، المهم يا تالته انا جاي عشان أودعكم و العفو و العافيه و آسف لو قصرت في حقكم أو غلطت على وحده فيكم بقصد أو بدون قصد ، صباح و رهام في نفس الوقت قالوا ليهو شنووو !! باقي الفصل قالوا ليهو كيف يعني ! ماشي وين مخلينا !
طبعاً أنا كأني اول مره اسمع الكلام دا مع انو قبل شويه كلمني إنو حـ يمشي ، عيوني إتملت دموع ، قال ليهم المهم يا تالته ، اجتهدوا شديد و الناس الكانت مهمله تشد حيلها عشان ما تجوا راجعين تاني و ربنا يوفقكم.... قالوا ليهو لكن يا أستاذ نحنا عايزنك ،، ما تمشي ، أستاذه صفاء قالت ليهو والله يا أحمد كلهم عايزنك و ديل طالباتك و بناتك و أخواتك و المشاكل دي بتحصل في أي مدرسه سواء كانت بين الطالب و الأستاذ أو الأستاذ و المدير ، أستاذ بكري قال ليهو كلام أستاذه صفاء حقيقه و المديره فايزه دي نحنا ياما اتحملناها و ياما اختلفنا معاها ، أنا القدامك دا متناقش معاها أكتر من مية مره مع ذلك متواجد معاها في المدرسه لأني عارف انو حاجات زي دي بتحصل في أي مدرسه و زي ما بقولوا اختلاف الأراء لا يفسد للود قضيه ولا شنو يا أستاذه تيسير ! قالت ليهو فعلاً....و يا أستاذ أحمد نحنا و طالباتك واثقين فيك و عارفين انت شنو و طول مدة تدريسك في المدرسه دي ما شفنا منك إلا كل خير ، ما حصل قلت لا لزول أو سمعتو كلمه ما طيبه و محترم نفسك و طالباتك، قال ليها و أنا كمان ما شفت منكم إلا كل خير والله و ما كنت متخيل انو رحلتي في المدرسه دي حـ تنتهي بالسرعه دي لكن الرحيل بقى واجب بعد دا......ريما قالت ليهو عليك الله ما تمشي يا استاذ أحمد و نحنا آسفين شديد لو زعلناك ، قال ليها أبدأ والله ما زعلان أنا من وحده فيكم ، و أنا خلاص اتخذت قراري و ما حـ أتراجع عنو ، استاذ بكري قال ليهو كدي يا أحمد استهدي بالله و تعال خلينا نتكلم شويه ، قال ليهو ماف حاجه تتقال تاني و المفروض أوضحو و ابررو، وضحتو و اتكلمت عنو قدامكم و قدام المديره ، أستاذه صفاء قالت ليهو لكن يا أحمد المديره لا طردتك لا تاني قالت ليك حاجه ! و الحصل دا انتهى و كلو لتوضح و تاني ماف شي ، قال ليها للأسف ما انتهى و أنا شايف و سامع الكلام البنقال و ياريت لو كان القالوا الكلام دا طالبات كنت حـ أعذرهم و انتوا عارفين أنا قاصد شنو ، أستاذه تيسير قالت ليهو طنشهم بس و ما تركز مع زول مش واثق في نفسك ! و نحنا كمان واثقين فيك ، قال ليها كفايه ما حابب نتناقش قدام الطالبات و أنا ما حـ أتراجع تاني يا أستاذه تيسير و لي أسبابي ، قالت ليهو ما عارفه اقول شنو يا أحمد لكن غيابك حيكون فقد كبير والله ...
