بعد مسافه أواب جا راجع و لقى الإستماره زي ما هي ، رفع القلم و جا قعد ، أخد نفس و قال لي المشكله شنو ؟؟
ما رديت عليهو...
قال لي الإستماره دي ما ليها علاقه لا بزعلي منك لا بزعلك مني عشان كدا خلصينا و أمليها ، قلت ليهو ما عايزا ، قال لي ما عارف اقول ليك شنو لأني جد جد تعبت ، خت القلم و قال لي أساساً انتي ما بتسمعي مني عشان كدا اعملي البريحه ، قال كدا و مشى طوالي ، قعدت أبكي مسافه بعدها مسحت دموع و مليت الإستماره ، فكرت في كلام خالتو خنساء و قلت أساساً أنا الغلطانه و أواب أكتر من مره سامحني و اتجاوز حركاتي البعملها و اتحملني ، مفروض أنا الأعتذر منو....
شلت الإستماره و مشيت بيها الصالون حق الرجال ، لقيتو قاعد هناك و زهجان ، مشيت عليهو و مديت ليهو الإستماره ، شالها مني عن سكات و طوالي وقف على حيلو عشان يمشي ، قلت ليهو أواب ، من دون ما يتلفت علي قال لي بعد أرجع و طوالي مشى ....حسيت انو في فجوه أو حاجز بقى بيني و بينو ، حسيت إني خسرت خلاص بتصرفاتي الغلط البعمل فيها ، ما قدرت أمسك دموعي فـ قضيتها بكى في مكاني ، شويه سمعت صوت خالتو خنساء و هي بتقول لي في شنو يا بتي ؟؟!
ما كنت قادره اتكلم من شدة الزعل و البكى ، جات ضمتني عليها و قالت لي معليش خلاص وقفي بكى ، مسحت لي دموعي و قالت لي إتناقشتي مع أواب ولا شنو ؟
هزيت ليها راسي ، قالت لي يعني اتشاكلتو تاني ولا الحصل شنو ، قلت ليها كنت عايزا أعتذر منو بس هو ما أداني فرصه ، قالت لي خلاص ما تبكي ، خليهو أنا بتكلم معاهو ...
المهم أواب ما جا راجع تاني و حسيت انو إتهرب مني و انو المره دي جد جد زعلي شديد و ما حـ يسامحني و حسيت إنو حـ يفسخ الخطوبه دي ، المهم فطرنا مع ناس خالتو خنساء بعدها مشينا التراويح و منها رجعنا البيت ، طبعا الحوش بنوهو بلوك و حالياً ببنوا في الأوضه في نهاية الحوش للمره الجديده ، بديت اغسل في العده و أنا قلبي واجعني شديد ، لمن خلصتها شلت تلفوني و دخلت الواتس و كتبت لـ أواب :
أنا عارفه إني غلطت كتير و انت في كل مره كنت بتسامحني و ما بتزعل مني بس انا كترتها و ليك الحق تكرهني ، أنا بس كنت عايزا أعتذر منك يا أواب لكن انت ما أديتني فرصه ، عارفاك حتكون كرهتني شديد و ندمت على اليوم العرفتني فيهو و أكيد انت هسي مفكر تفسخ الخطوبه دي 💔
استلم الرساله و ما رد علي ، قفلت التلفون و رقدت على السرير و أنا بلوم في نفسي ، أواب دا ما حصل غلط علي ، ما حصل قصر مني ، ما حصل طلبت منو حاجه و ما لبى طلبي ، بعمل أي حاجه عشاني ، أما أنا فـ ما قدمت ليهو شي غير وجع القلب ...
نمت في مكاني داك و ما صحيت إلا وقت السحور لمن براءه صحتني ، قلت ليها انتي صايمه تاني يا براءه ؟ قالت لي اي ، رغد قالت ليها يا بت هوي أفطري ساي ، برا لمن تكبري و يبقى رمضان حقك تقعدي تتبكي و تتجرسي ، قلت ليها خليها تصوم و لو تعبت شديد تفطر طوالي....
