*صحـــراء نجد *
××قبل سنـوات طويلة جداً .. مواليدها قد أصبحوا كهول هذا الزمان ××
كانت تمشط شعرها القصير .. الذي مهما فعلت لاتستطيع تفكيك تشابكة ...
سألتها زوجة أخيها بتعجب :وش فيتس يافهدة قطعي شعيراتس بذا المشط ...
فهدة وهي ترمي المشط بتبرم :عيى لاينكد أنفضحت فيه كل البني شعورهن حرير مغير أنا شعري ملبد كنه ذيل تسلب ..
زوجة أخيها :روحي أغسلية بعبس الأبل مثلهن ويغدى لتس مثل ذيل الخيل ...
فهدة بتقزز :أنا ماأحب الوصاخة نفسي ماتقبلهاا أكش من ريحته .. وبعدين ترى علمن ياصلتس ماني طالعة أحتطب ولاأجلب الماء ...كلن ماشافني أحد سألني عن عرسي ومتى بيجي عقاب يأخذني الله ياخذه عمره كانه فضحني ...تاركني سنتين ولاكني مرته ...
أخت زوجهاا :أعوذ بالله من لسانتس اتقي الله بالرجال ..مشغول ماتفهمين يقولون ماهو بالديرة كلها مسافر ...
فهدة التي لم تقتنع بموضوع السفر والطائرات وكل هذه الأمور التي تفوق خيالهاا :لا والله غير فرن راسه الحريم وماعاد يبغاني ومتفشل من محسن ..ياحر جوفي بعد كل هالعنوسة ويوم قلت قام حظتس يافهدة رجعت أطيح ...(( حين عقد قرانها عمرها 18 عام وأصبحت بالعشــرين من عمرها))
زوجة محسن :يافهدة وأنا أختس ماهو زين اللي تسوينه بنفستس ...ترى التسبد تنكوي صدق لاتقهرين عمرتس ...ماشفتي الناقة تسيف تسبدها مستوية يوم شقينا صدرهااا ...
فهدة التي فهمت تشبيها كسباب :وانتي تقارنين بناقة أنا فهدة بنت محماس ...
محسن الذي دخل على صوتها :أقطعي صوتس واصل للبيوت اللي حوالينااا ... وش فيتس ..
فهدة التي تعدلت بجلستهاا وأخفضت صوتها أحترام لأخيهااا :الناس صاراو يعايروني كلاً يقول عقاب هج من فهدة الغيور ...
محسن بأنزعاج من أخته اللحوحة وكأن الرجل سيفر منهااا ..وكم أحرجته بسبب شقاوتها وقوة شخصيتها :لاحول يامسلمة قلناا لتس الرجال عنده أشغال مسافرة للأفرنج عندة دورة بعسكريته .. ماراح يلعب ...
قالت زوجته ضاحكة :ياويلتس يافهدة كيف بيطل بوجهتس بعد مايشوف الأفرنجيات ...
فهدة بكبرياء كاذب:والله شكلي أنا اللي ماعاد بغيته خلوه لو ضحى وأشكالهااا ..
محسن بعصبية وعيونه قد أحمرت من الغضب :والله لو عاد أسمع منتس هالكلام غير ماسمعته
للسانتس هالطويل لطلعه وقصـــه قدام عيونتس ...أنتي ماتستحين ماعاد تحشمين أحد ..أنا ماني قلت لتس
لا أختي ماتدخل على مرة وأنتي اللي تمسكتي فيه وسويتي فين السوايا عشان أوافق ...والله مايفكتس منه
غير المــــوت ....
وخرج غاضباً ..
لتوبخها زوجة أخيها :زين اللي سويتيه قهرتي أخوتس اللي يسوي كل شي عشانتس ...ترى ماهو بس أنتي اللي زوجها راح وخلاهااا نص بناتنا يتزوج ويروح عنها بسنتين والثلاث ويمكن توصل للخمـــس ..شوفي شقحاء لها سبع سنين عند
أهلها ...
فهدة بوقاحــة وعزة نفس :لاتقارنين بأحد وشقحاء أبوها اللي مايبيها تروح عنه عشان ترعى أبله ... وأحسن تستاهل أنا قايله لها هجي مع هذال بس ماسمعت شوري ... خليه بكرة يأخذ عليها من بنات الديرة اللي هو فيها وتعض يديها قهر ...
*الرياض الآن *
أنت تقرأ
عشق من قلب الصوارم
Mystery / Thrillerهي عدة معارك استمرّت لسنين طويلة، حيث كانت كل تلك المعارك في سبيل الحُب، حيث يستمر بطل الرواية في خَوض معاركه باحثًا عن انتصار يُمكّنه من نَيل معشوقته ذات الكحل الثّقيل، والجمال العربي الفائق، والتي استحقّت عن جدارة كل ذلك الحب فهل سينتصر ؟ . . للك...
