طرقت بابك

البارت ٣٢

اوبقيت الوحدي ادورك وين موجود
وانه ادري ابغيابك ماتجيني
اثاري الليل ذاك الراح حلمان
اوخيال الجان مابينك وبيني

ايهاب المالكي

________________

روايه :صار وراي ومد ايده ياخذ الكوب الي كبالي بطريقه ابد محلوه ،، ابتعدت

ابو علاء:ها لعفو ،، شرب مي وعينه عليه

روايه :رحت يم الثلاجه طلعت شغلات من عدها ضل منتجي ع الكاونتر يباوعلي،،، عفواً محتاج شي

ابو علاء:لا بس عجبني اتفرج عليج

روايه :ليش تلفزيون اني

ابو علاء:احب اللسان الطويل ،، رجع الكوب وطلع

روايه :شفت الساعه ب١ هم يلا اكمل المقبلات وهل امور ،، اشتغل وارتب المطبخ ولملمت كلشي رتبت الكاونتر هم ،، وياي مطبخهم يخبل ونازك وفخم ،، ضليت ل٣ خلصت كلشي مضل عندي شي

...دخلت عليه ام علاء ،، ببتسامتها الحلوه

رباب :السلام عليكم ،، عيني عيني ع الريحه شنو هاي

روايه :الله يساعدج خاله ،، تأخرتي

رباب :راح يبدي الفاينل وبعد هيج وكت اجي والله هلكانه

روايه: يووو حقج وصايمه ،، اني كملت كلشي

رباب :فدوه للنادره والله تستاهلين كُل خير انتي فدوه لعمرج شكد محبوبه

روايه :صفنت عليها ،، صار سنين مسامعه احد هيج يحجي وياي ،، خجلت شكرا والله كلامج يخبل

رباب :فدوه لعيونج ،، شكد حلوات اكولج امي نصيحه دربالج ع نفسج انتي هوايه حلوه واولاد الحرام هواي

روايه :اي والله خاله وشفتهم واحد واحد مرو عليه هههه بعد الله كريم صلاتي ودعائي يحميني

رباب :عفيه عليج سجادتج هي سندج بالحياة

روايه :اني كملت واليوم حتى الجاي سويته بس ما فرغته بالترمز لان خاف يبرد بس حمو وخلو انتم وجهزت المواعين كلشي كملت

رباب :عاشت ايدج وين جنت احلم تجيني هيج جنه بس الحمدلله ،وهاي يوميتج وهاي عيديه الجهال قرب العيد جيبلهم ملابس

روايه :لا فدوه لعينج لا تحرجيني شكراً جزيلا والله ممقصره

رباب :اني ممطيتهم الج هذول مني الهم عيديتهم حالهم من حال اقاربي الي يجون قابل شنو هم وحد

روايه :والله ده تحرجيني بكرمج

رباب:ليش شنو قابل مصدقه عليج لو مسويه منيه ،، انتي تشتغلين بتعبج وغصباً ما عليه انطيج واني كولتلج اذا عجبني شغلج ازيدج وهاي بعد ثبتت يوميتج

روايه : ردت بداخلي شكرا لله ع كرمه ولطفه ويانه ،، ابتسمت من كل كلبي ،، الله يجزيج الخير دنيا واخره