سم اللقا صدفه و أسميه ميعاد انا انتظرتك و أنت مريت صدفه

Part 4

الصبح الكل مجتمع على الفطور الا سمو وسيف
الجد: وين سمو وسيف؟
هيام: سمو رجعت متاخر من عند صديقتها ونايمه اما سيف معرف
ياسر: سيف برضو نايم
الجدة: م عنده دوام وش منومه لذا الوقت؟
محمد: والله ي جده م اعرف عنه
الجد: ترف وليان وإلين كملو اكلكم واتركو عنكم السوالف لاحقين
غيث: شدعوه يجدي هذاهم ماشاءالله ياكلون ويسولفون خلهم
الجد: انت وش دخلك؟
مهند: احسن احسن اترك اللقافه عنك
الجد: مهند خلصت فطورك؟
مهند: اي الحمدالله
الجد: قم انقلع لدوامك اجل
الكل قام يضحك على مهند وهو مصدوم من الطرده الي جته من الجد
نجد: يبه
الجد: سمي يعيون ابوك
نجد: سم الله عدوك وش فيك على مهند ي ابوي ؟
الجد: ابد ما منه غير القرق الزايد خله يروح دوامه ابرك
نجد بضحكه: خله خله عشاني
الجد: خلاص مهند اجلس
مهند: لا والله تطردني وتقولي اجلس معليش مسحت بكبريائي الارض
ياسر: عاد الله والكبرياء اقول ابلع وانت ساكت
مهند: ياسر اسكت
الجد بعصبيه: لا بعد قومو تطاقو قدامي صدق قليلين ادب
خالد: يبه اذكر الله تراهم يطقطقون م تعودت عليهم؟
الجد: اسكتو كلكم لا اسمع حس احد وكملو اكلكم
ليان: افا جدي حسستنا بمعسكر روق من مزعلك اقوم اطاق معه
الجد: محد مثل ليان الله يسعدك ي بنتي ويوفقك
ليان: امين يارب
سيف: السلام عليكم
الكل: وعليكم السلام
الجده: غريبه يمه قايم متاخر وش فيك؟
سيف: نمت متاخر شوي عشان كذا
عبدالعزيز: مره ثانيه نام بدري وانت وراك دوام مب عاطل باطل
سيف: ابشر
بعد مده من بين السوالف والاكل جت سمو
سمو: السلام عليكم
الكل: وعليكم السلام
عبدالرحمن: ها يبابا عسى انبسطتي عند صديقتك
سمو بداخلها تقول ( وين انبسط وصار ذا كله ) حست على نفسها وقالت: الحمدالله كان يوم صراحه ولا اروع

على وقت كلامها رفع راسه سيف وناظرها وشاف وجهه واضح انها بكت الين قايله امين
الجده: سمو يمه وش فيه وجهك فيك شي؟
سمو: ها لا مافيني شي شوي تعب خفيف
الجده: سلامتك ي بنتي
سمو: الله يسلمك
الجد: يلا عاد اتركو السوالف وكملو اكلكم وعلى دوامكم يلا
سمو: انا م بداوم
الجد: طيب كلي ي بنتي
سمو: عليكم بالعافيه مالي نفس وقامت
ليان بهمس لهيام: شفيها اختك؟
هيام: مدري م شفتها من امس ولا اعرف شي
إلين: اتركو عنكم السوالف وكملو اكلكم وبالليل كلنا نجتمع بالسطح ونعرف شفيه
نجد: والله صادقه يبي لنا جمعة بنات وسوالف وطقطقه
هيام: طيب كلمي ريناد
نجد: اكيد بقولها
بنفس الوقت عند بيت الجد (حمد)
سلمان: يبه
الجد (حمد): ها وش وراك بعد
سلمان: شدعوه يبه بس بغيتك بموضوع
الجد (حمد): بعدين مب فاضي لك الحين
الجده (ندى): هو ولدك يبيك بموضوع تقوله مب فاضي
الجد (حمد): اي مو وقته الحين بعدين اتفاهم انا معه
فهد (ابو ريناد): يبه شفيك عليه
سلمان: خلاص خلوه ولف على امه وباس راسها وقال الحمدالله انا شبعت و وراي دوام تبين شي؟
الجده (ندى): لا يروح امك انتبه لنفسك
سلمان: ابشري ويبه تبي شي؟
الجد (حمد): لا الله ييسر لك
ريناد: صباح الخير ي عايلتي الحلوه
سلمان: اخص اخص ريناد مروقه!
ريناد: والي يشوفكم م يروق؟
سلمان: ريناد بسرعه وش وراك
ريناد: احم احم ابيك توديني بالليل بيت جدي محمد
سلمان: وليه؟
ريناد: تو كلمتني نجد وقالت فيه جمعة بنات وكذا
وسلمان من قالت اسمها وحس انه روق وشلون لو شافها: خلاص تمام اجهزي و اوديك على طريقي
ريناد: على طريقك؟
سلمان: اي بروح لخالد
ريناد تحس بشعور غريب من يجي طاريه: اها تمام
فهد: ماشاءالله ريناد من مين اخذتني الاذن تروحين؟
ريناد: اكيد بابا حبيبي م بيرفض صح؟
فهد: ولو رفضت؟
سلمى: فهد بتروح بنتي لا تخليها بخاطرها
ريناد وهي تحضن امها: اوف ي الام البطله
فهد وسع عيونه من الصدمه: ايش وانت ي الوصخه عناد فيك منتي برايحه
ريناد وهي تضحك وراحت تحضنه: افا انت سيد الاباء والاحباب
فهد: ياربي مدري هو منك ولا من كلامك خلاص روحي روحي
ريناد: احبك مرهه
الجد (حمد): مالنا من حضنك نصيب؟
ريناد بضحكه: الا لكم كلكم
ريناد بعد م حضنت الكل: ماشاءالله هاذا وحنا قليلين تعبت وانا ادور عليكم
سلمان: ابد مافيك لياقه اجلسي وافطري بس
الجد (حمد): سلمان تعال مكتبي دامك خلصت
سلمان ابشر
بالمكتب عند الجد (حمد) وسلمان:
الجد حمد: اقول وش وراك؟
سلمان توتر: ها وش وراي م وراي شي
الجد حمد: اخلص ي سلمان وش كنت تبيني فيه لا تقولي مصيبه جديده
سلمان بضيقه: شدعوه يبه كل م قلت شي قلت مصيبه
الجد حمد: بلاك ي ولدي الله يهديك انت وخالد مغير هبال ب هبال
سلمان: مو معناته نتهبل ونطقطق م عندنا اشياء جديه ومسؤولية
الجد حمد: طيب قول وش بغيت
سلمان: يبه ابي اخطب
الجد حمد: منجدك تتكلم ؟
سلمان: اي من جدي ولا تشوف فيني عيب وقاصرني شي؟
الجد حمد: لا الد بس امك كم لها تبي تزوجك وانت رافض
سلمان: ذا قبل الحين ابي اتزوج
الجد حمد: زين ي ابوي اكلم امك وتدور لك وحده زينه
سلمان بتوتر: لا يبه فيه ببالي احد
الجد حمد ب استغراب: ومين ببالك؟
سلمان: ابي نجد بنت عمي محمد
الجد حمد بفرحه: ماشاءالله زين م اخترت بنت كامله والكامل الله والاهم نعرفها وتكون بنت اخوي ونعم التربيه والاخلاق
سلمان: تكلم عمي محمد ويصير بعدين نروح نخطب رسمي؟
الجد حمد: ابشر ي ابوي انت ولا تشيل هم والحين رح دوامك والله يكتب الي فيه الخير
سلمان كان هم وانزاح عنه: ابشر ي اطلق اب
الجد حمد بضحكه: رح رح الله يخلف عليك وعلى بنت اخوي الي بتاخذك
سلمان: معليه كل شي منك مقبول وطلع لدوامه
عند الجد (محمد) ببيتهم اتصل عليه اخوه الجد (حمد) وبلغه ان اليوم بيزورونهم وانه فيه موضوع خير يبيه فيه وطبعاً كان رد الجد محمد حياك ي اخوي البيت بيتك بعد م انتهو الكل من دواماتهم جمعهم الجد وقال: ي عيال وبنات اليوم اخوي واهله جايين المغرب كلكم تكونون فيه والي وراه شي يخلصه بدري ولا يأجله الكل رد: ابشر ، سم ، حاضر
هيام: سمو تعالي ابيك
سمو: طيب
واشرت هيام للبنات يجون بعد م اجتمع الك بغرفة هيام قالت: بسرعه اي وحده وراها شي تتكلم
سمو: انا م وراي شي بس غيري مدري
هيام: انتي اول وحده وراك شي من رجعتي م شفتك والصبح حالتك حاله
سمو: تعبانه تعرفين اجتمعنا وكذا وعاد تعب وحوسه
هيام: طيب بسكت ونشوف تاليها بعدين وانتو الباقين؟
نجد: انا اخره وحده بتكلم
إلين: انا م وراي شي
هيام: إلين بلا كذب والله لو م تقولون شي اني معد اقولكم شي
ليان: والي محتار؟ م يدري هو يحب ولا؟
هيام بضحكه اوه طلع الوضع كذا؟ منهو المحظوظ ؟
ليان: محمد
هيام بصدمه: اخوي محمد!
ليان بضحكه: اي شفيك بسم الله بقولكم وش صار
الكل قولي والي تعدل جلستها بحماس وتكلمت ليان: وقالت كل شي صار بينها هي ومحمد بعدها قالت: بس ي بنات انا محتاره صح فيني شعور غريب تجاهه لكن مب متاكده ولا ودي اعطي جواب بدون الاكيد ولا ودي اسوي شي ممكن يزعله واخسره بالنهايه برضو هو ولد عمي
سمو بضحكه: ماشاءالله على اخوي العاشق الولهان
إلين بضحكه: صدمه تكفون صدمه صدمه
ترف: اصبرو بتجيكم الصدمه الثانيه مني
نجد: صبر تكفون استوعب متى كبرتو انتو؟
هيام بغمزه: يوم انك كبرتي يروحي
نجد: ابلعي لسانك هيام لا نطاق
هيام بضحكه: ابشري
ليان: بنات تكفون صدق محتاره معرف مب قادره احدد
هيام: انا اقول اهجدي واصبري وخليها على ربك كل شي بيوضح لك عطي نفسك وقت تفكرين بروقان