سم اللقا صدفه و أسميه ميعاد انا انتظرتك و أنت مريت صدفه

Part 27

همست له تطمن روحه و روحها الي تحيي بقربه همست بكل مافيها من شعور تحكي بالصريح وتبين له هي وش تشوفه هو ايش بالنسبه لها وش هو ياسر عند هيامه: احبك ياسر احبك واختارك وابيك ومابي غيرك لو هم كثير مابي الا انت وحدك بكل مافيك تكفيني عن الدنيا ومافيها ابيك واحبك بكل مافيني كل مافيني يتمناك ويتمنى وجودك حولي والله اني ابكيك وابكي روحي معك احبك ولا يمر بالك اني مابيك لان والله وبالله وتالله ان كل مافيني ينده لك يبيك ويتمناك صديتك والله غصب عني ولا هو بكيفي كيف اصدك وانا اتشفق واتمناك كثرك وزود؟ كيف اصدك وانا داخلي غارق بكل مافيك؟ اي اقولها بالصريح انا طحت بحبك وطحت بدروب الغرام لكني دامي معك ما اخاف هالدروب لانك لي وانا لك وماني لغيرك تنور سنين عمري بوجودك حولي وبحنيتك وحكيك وهمسك ومسكت ايديك وشعوري معاك كله كله اسباب صمودي واماني
غمض عيونه من سمعها منها بالصريح يجزم كل مافيه ان هاللحظه تسوى لحظات حياته كلها يجزم انه ما عاش قبلها ولا بيعيش بعدها وقف كل كونه عند كلمه منها كلمه من اربع حروف لكن يقسم بانها من اجمل والذ الكلمات الي سمعها طول حياته هو سمعها منها من الي قلبه يودها ويبيها وما يبي غيرها هي تبادله شعوره وتحبه بعمق حبه لها هو يقسم ان جروحه وعلته كلها انبرت بمجرد انها قالتها بالصريح داوت كل ما في داخله من وجع وكسر وخذلان همست وهي كلها ترتجيه يرد لو بحرف لكنه ساكت يتركها تخاف سكوته: ياسر
اخذ نفس بعمق وكانه ما كان فيه أكسجين بالمكان الي هو فيه تفاقمت مشاعره داخله وتكاثرت تتركيه يهمس لها بكل حب: اجيك والله لو انك باخر الدنيا اجيك بكل مافيني
همست وهي تتمنى ما يفهمها غلط: لاتجيني الحين انتظر شوي انتظر على الاقل الين قبل زواج سيف وسمو يا ياسر اتركني احل سبب وجعك وجعي وسبب كسر ارواحنا وقتها تعال تعال لي بكل مافيك وانا وبيباني لك و نحتريك لوقتها اشتاق لك بكل مافيني من هاللحظه وكل اللحظات الي بتمر بدونك وبدون حسك بينا وبدون نظراتك و دخلاتك وطلعاتك
يحس نفسه طاير من الفرحه يحس نفسه بين الغيوم من عمق مشاعره وسروره وسعادته بحروفها قدرت تسعده وتمحي كل وجعه ياهي عظيمه بالنسبه له عظيمه بكل مافيها من صواب وخطأ يكفي انها هيام: نامي وريحي بالك يا بعد ياسر ودنياه ما اغيب عنك لو كل الدنيا اتفقت علينا وقت اجي بنخفف اشواقنا يا هيام ياسر يا كله روحه استودعتك ربي
همست والنوم بدا يسيطر عليها من حست بالامان والراحه: عساك في حفظ الرحمن وين ما تكون
انتهت ليلة جميع ابطالي بخيرها وشرها
يوم جديد
الكل صاحي والسبب سيف الا سمو وكان حريص محد يزعجها وخبرهم بخطته وبدت حالة الاستنفار بين الكل من تجهيز وترتيب والخ بعد ما خلصوا كل شيء راح الكل الا سيف وسمو الي الا الان نايمه دخل حصلها باقي نايمه ابتسم وقرب يصحيها بهدوء الى ان  صحت: سموي يلا يابوي انتي
سمو بنوم: شوي بس سيف شوي
ضحك على حبها للنوم: يلا الكل راح وينتظرونا
قامت وهي تتأفف ما شبعت نوم: وين راحو؟
سيف: قومي تجهزي وتعرفين
قامت اخذت لها شور وبعد ما خلصت تجهزت واخذت اغراضها وخرجت له كان ينتظرها برا وساهي بافكاره
قربت منه وحطت ايدها على كتفه سيف خلصت
قام مسك يدها يمشي معها الى ان ركبوا السياره
سمو بفضول: وين رايحين سيف؟
سيف بابتسامه مد يده شبكها بيدها: تعرفين اذا وصلنا
سمو برجاء: علمني طلبتك ما اتحمل
ضحك وهو يوقف ياخذ لهم قهوه وكوكيز ولا رد عليها مما خلاها تتنرفز : هين يا سيف هين
ناظرها متكتفه زعلانه: شفيك انتي تدورين الزعل
زمت شفايفها بزعل واضح: ما تعلمني سيف
سيف بحب: مفاجأة يابوي كيف تصير اذا علمتك؟ اصبري شويات بس
بعد مده من الوقت قضوه بالسوالف بالطريق وما يخلى من عبط سمو ولا من طقطقة سيف عليها الى ان وصلوا احد الشاليهات نزل برفقتها وهي زاد استغرابها وكل ما سالته قالها انتظري وما ان دخلت برفقته الا وهي تصرخ من السعاده وتحضنه: احبك احبك احبك
سيف شد عليها يدفن راسه بين رقبتها وكتفها: اموت فيك يا كل سيف
سمو ببكي: كنت اقولك كذا عشان ما تفكر ب ياسر وتوقعتك نايم ما جاء ببالي انك تسويها فعلاً
ضحك عليها ومن فرحتها الواضحه: لاجل عين تكرم مدينه وانا وعدتك وما اخلف بوعدي يا سمو
سمو بخجل اقتربت تقبله بكل معاني الحب الي تحملها داخلها له شد على خصرها يقربها منه اكثر الا انها ابتعدت تدفن وجهها بصدره بخجل من الي سوته تحت تاثير مشاعرها  بسبب المفاجاة الي ما توقعتها ولا واحد بالميه ولا توقعت كيف قدر يجهز ذا كله بكم ساعه فقط ضحك عليها وشد عليها اكثر: لو علي ما تركتك لكن لازم شوي وياذن المغرب ولازم تجهزين وتبهريني كعادتك
ابعدت بغرور : اكيد مو انا سمو مبهره اكيد
ضربها على راسها بخفه: اعقلي لا تصير امور ما تعجبنا
ابعدت بذهول تدخل من اشر لها على احد الغرف الي ينتظرونها فيها الميك اب ارتست والهير ستايل وراح هو بقسم الرجال يجهز لاجل يحتفلون بعقد قرانهم الي المفروض انه يحتفل فيه من قبل لولا المشاغل
قبل بوقت من خرجوا الكل راحو لباقي اهلهم يتجهزون هناك جميع من بعدها يروحون للشاليه لاستقبال الضيوف والي يقتصرون على المعارف القريبين وما كانوا بذيك الكثره اساساً بعد مده من الوقت جهز الكل وبدو يخرجون وكانت ريف مع ريناد بكل وقتها من بدت تجهز الى ان خرجوا وهي طايره من الوناسه كون ابوها وريناد سوا وهي الي تحب ريناد حب طفله لامها تقريباً وهالشيء مخلي خالد طاير من الفرحه
خرج الكل من العائلتين الا هيام الي مسكتها نهى وخبرت الكل ان هيام بتكون معها هي وعبدالعزيز تبيها تونسها لكن مقصدها شيء ثاني تماماً تبي تحاكيها هي عرفت من سيف ان ياسر راح وهي متاكده الموضوع فيه هيام او بالاصح صار شيء بينهم وهي الي عارفه ولدها وحافظته وشايفه كل تصرفاته معها ومع الباقين وعرفت من خلال هالشيء حبه الواضح لها بكل بساطه
نهى: تعالي نجلس نحكي شوي
هيام بتوتر: بس بنتاخر
نهى بلطف: معليه يامي شوي بس
جلست هيام بتوتر الكون كله ما عمرها توترت كثر هالمره ولا تدري وش هو سبب توترها مع ان زوجة عمها لطيفه حيل مع الكل وما بعمرها توترت او خافت منها لكن تحس غير هالمره غصب عنها: تعرفين يا هيام اني اعدك بنتي واني ما ارضى عليك الغلط ولا ارضى بزعلك
هزت راسها هيام بالايجاب وهي تشتت انظارها كملت نهى بكل هدوء: اعرف عنك وعن ولدي واعرف مشاعره ومشاعرك وكل شيء
هيام بتبرير: يا عمه مو مثل ما انتي مفكره
قاطعتها نهى وهي تشد على يدها: اسمعيني ماله داعي التوتر والخوف اثق فيك وبتربيتك واثق بولدي وتربيتي واعرف ما بيرضى عليك لكن فيه شيء صاير ولدي ما يروح كذا بدون سبب وانا اشوفك اليوم ذبلانه تفكرين وتسرحين كثير فيه الي شاغل بالك احكي وبساعدك وما اخليك انا ما اخلي زوجة ولدي حبيبي ضحكت وضحكت معها بخجل هيام بعد تردد دام لعدة دقائق: بقولك وساعديني لاني فعلاً احتاج المساعده
نهى شدت عليها: قولي ولا تخافين معك انا
حكت كل شيء هيام من كلام ياسر من اعترافه من حكيها واعترافها وبعدها اختمت كلامها بالسبب بهالشيء وما كان غير امها لطيفه الي تبيها لولد اختها او بالاصح خالتها قايله لو ما تصير بنتك لولدي ماني اختك وطبعاً شافت ان اختها اهم وقالت مع الوقت بتحبه واصرت عليها ومن عرفت بياسر وحبه هددتها ان لو خربت الموضوع لاهي امها ولا تعرفها وطاحت بين نارين نار حبها لياسر ونار امها جنتها ونارها ختمت حكيها والله محتاره يا عمه مابيدي شيء امي ذي مقدر اسوي شيء ولا اقدر اقول شيء احرقتني والله العظيم
مسحت دموعها نهى وهي تطمنها: انا معك وانا احلها بس كذا؟ انا احلها معليك وزي ما قلتي مو ياسر بيرجع قبل زواج سمو وسيف بكم يوم اكيد وما بيجي الا وباذن الله حاله كل شيء واخطبك له بنفسي من اهلك وياحظي اخذت احسن البنات لعيالي يلا يامي قومي عدلي الميك اب حقك ونخرج لعمك لا يشب فينا ضحكت بخجل هيام  وقامت تعدل شكلها وتضبطه وخلصت وخرجوا يلحقون الباقين للشاليه