تغني على وتر حبي واقول في قصيد عيونها ديوان

البارت الثامن عشر

صفق صالح وقال : صح صوتكم بس سؤالي وش صار عليه !
ضحكو وهم يطنشون السوال تافف وهو يسكت ورجع ينسدح معهم الين الظهر ..
.........
بعد صلاة الظهر
صلو وخلصو واتجهو يجهزون نفسهم للعزيمه الي تلبس والي تحط ميكب ودائماً الهواش المعتاد على الميكب
دخلت بسرعه واخذت كل الميكب ودخلت غرفتها وسكرت عليها لحقتها ريهام وهي تدق عليها : ريما ي حيوانه ما خلصت هاتي بسرعه
ريما وهي تمشط حواجبها : ساعه عند المرايه في النهاية ماخلصتي دزي اخلص واعطيتس
تاففت ريهام وهي عارفه انها طولت وهي تحط مكياج بس احسن شي انو ما بقى لها الى شي بسيط وتخلص فراحت تساعد امها
عند ريما الي مشغله اغنيه وتدندن معها وترقص وترجع تكمل فزت من وصلتها رساله ابتسمت من شافت اسمه بس ما تنكر انها استغربت منها فتحتها وانصدمت اكثر من كلامه الي يقول فيه : سكري شباك البلكونه وقصري صوتس بسرعه
توسعت عيونها بصدمه اتجهت بسرعه البلكونه وهي تشوفه واقف ويناظر لها رجعت وهي تركض بسرعه ( يويلي يعني سمعني وشافني بعدين احد يرقص بالقوايل الله لا يبلانا بس ) ضحكت ورجعت تجهز نفسها ..
^ عند العيال ^
الي بعد ما صلو تجمعو بالمجلس ينتظرونهم يخلصون ويمشون لبيت ابو سعد
عبدالله لف لاحمد وقال : حميد ما لاحظت شي في مشاري ؟
احمد باستغراب : لا وش ؟
عبدالله : مدري احسه مو نفس قبل ما يجي معنا كثير وكل وقته مشغول واذا قلت له تعال قال انا مع اهلي ولا بالدوام يالله انه حضر الزواج
احمد بهدوء : مدري والله عنه يمكنه صدق مشغول ولا تنسى انه يكون الكبير فلازم يكون مع اهله ذكرني العصر ادق عليه ونطلع
هز راسه بمعنى طيب ولفو لصالح الي قال : يعيال وش اكبر امنياتكم
عبدالله مسك راسه وبضحك قال : ذا واضح ان الشمس صاكته في حد يسال ذا السوال بالقوايل اصه تكفى
ضحك احمد ولف لصالح وقال : ليه ما تجاوب انت يله !
ابتسم وهو يعدل جلسته وقال : الصدق اكبر امنياتي ان تكون خوتي مثل خوتك انت وعبيد ومشاري
ناظرو في بعض وابتسمو وكمل : يعني نكون اكثر من اخويا نكون اخوان نفسكم انت ما يصير شي الى وعبيد الاول وعبيد بالمثل ومشاري نفس الشي
عبدالله بابتسامه وهو يحضن كتف احمد وقال :
عز الخوي اللي ما تغيّر مباديه
لو جارت الدنيا على العز مبداه .
-
ابتسم احمد وهو يبادله الحضن و صفقو بحماس وقالو بصوت واحد : صح لسانك
عبدالله بضحك : صح بدنكم يا خواني
احمد وصالح : ابشر بنا
ابتسم وكملو يسولفون ..
^^^^^
بيت ابو فاطمه تحديدًا ( الصاله )
الي كانت فيها ام فاطمه وام محمد يتقهوون الين ما يخلصون البنات
ام محمد وهي تناظر لام فاطمه بتردد ودها تقول وماودها بعد مده قالت : يم فطوم وش رايتس ؟
لفت لها ام فاطمه وقالت : سمي في وش ؟
ام محمد: سم الله عدوتس ، ازوج عبدالله
ناظرتها ام فاطمه بابتسامة وهي تتمنى تقول الي في بالها : من في بالتس ي هدباء !
ام محمد بابتسامه : شوق بنت ام سليمان
تغيرت ملامحها ماتوقعتها ابدا هي تعرف انها مو مناسبه لعبدالله ابدا كيف كذا : ما تحسينها مهي مناسبه له
ام محمد: ليه الى مناسبه في عمر ريما مافيها شي
هزت ام فاطمه راسها بهدوء وقالت : الي ودتس بس لو تخلينها شوي لانه ما استقر في وظيفته اصبري عليه شوي
هزت ام محمد راسها بنعم الين ما نزلو البنات كلهم ومخلصين فزو وهم يلبسون العبايات ويطلعون للعيال مشت ام فاطمه للمجلس وهي تدق الباب وتقول : ي عبود ي ابوي يله ؟
فزو لها كلهم وتقدم عبدالله يحب راسها وقال : لبيه ي عمه يله يله
مشو لسياره واحمد وصالح اتجهو لبيتهم ياخذون امهم بحكم ان الكل معزوم للغداء.....
..............
في الفندق
عند فاطمة الي قامت قبل سعد وترتب نفسها وتجهز اغراضها وتتقدم تمسح على كتفه و بهمس قالت : سعد ؟
ما تحرك ورجعت تناديه ولازال نايم الين طفشت وقالت متوقعه ما سمعها : والله لو جمل كان قد قام
لفت بفشله من سمعته يضحك وقال بضحك : صاحي بس قلت اشوف الاساليب الاخرى
ابتسمت بخجل وقالت : اسفه بس ما صحيت شسوي
وقف وهو يمسك كتفها وقال بهدوء: ما بينا اسف يله تجهزي عشان اصلي واخلص ونمشي للغداء
هزت راسها بابتسامه ومشى يصلي وهي تتامله بهدوء كيف كانو مع بعض من صغرهم ما توقعت بيوم انهم بيكونون مع بعض مجرد حب طفوله فقط بس بدون ما يتعبون صارو لبعض " فعلا اذا صبرت ومنعت نفسك عن شي تتمناه سيئ لك ربي بيعوضك عن صبرك بشي افضل من الي كنت تتمناه بكثير "
دخلت الحمام ( يكرم القارئ) وحطت ميكب ولبست وطلعت وهي تلبس كم سواره ذهب وسلس والباقي لفت لسعد الي كان لابس وجاهز ويعدل شماغه ابتسم وهو يتقدم لها وينزل لمستواها وياشر لها تعدلها ضحكت وتعدلها بيدها توسعت عيونها من لامست يدينه خصرها ويشدها له نزلت راسها بخجل ابتسم ويرفع راسها ويحبه بهدوء وقال : ياعساني ما انحرم منتس قولي امين
ضحكت وقالت بهمس : ولا منك يارب
ابتسم بخبث وسرق منها بوسه من منطوقها ناظرته بصدمه كيف كذا بدون مقدمات ابتعد عنها ولازال يضحك على صدمتها وقال : البسي عبايتس يله
ودها تروح وتصفقه على احراجه لها ناظرته بوجه احمر من الخجل وهي ترفع يدها وتخلف فيه وتقول : وصخ والله ما تسلم
ضحك بعلو صوته ولبست عبايتها ابتسم من شافها وهو يشبك يدينه بيدينها ويطلعون ...
______
في بيت ام سعد
الي كانت كل شي جاهز وام سعد بالصاله والبنات كل وحده بغرفتها يجهزون نفسهم وبعد مده نزلو ويشيكون على كل شي فزو على ترحيب ابو سعد لهم وتقوم ام سعد تفتح الباب وتستقبلهم استقبال حار من الترحيب والسلام والبنات مثل
ام سعد : يالله حيهم تو ما نور البيت اقلطو اقلطو
اتجهو على كلام ام سعد للمجلس تقدمت اثير تصب القهوى والبنات يوزعون الحلى والسوالف ما وقفت
ام فاطمه بابتسامة وتاشر على بناتها : الله يعينكم على غيرت البنات منكم
ندى بضحك : اي احسن فطوم بتجلس عندنا
ضحكو وقالت ديما : ايه مابخلي شي ما اصوره اقهركم
ريهام بضحك : تكفين الي يسمعك بيقول بنموت اذا راحت فطوم
ضحكت ريناد وقالت بهمس : احس منجد بنموت
ضحكو بهدوء وقالت ام احمد: بسم الله عليكم فيكم الخير والبركه يله عقبال مجنونتي ذي ( اشرت على البندري)
فزت البندري وقالت : يمه حرام عليتس مجنونتس ذي مليون واحد يتمناها
صفقت ريما وبضحك قالت : عاشت دودي اي الف واحد يبيها
دقتها البندري بخفه : علامتس قللتيها كانت مليون مو الف
ريما بضحك : المهم كلهم يبونتس
هزت راسها بنعم وضحكت وبعد مده فزو على صوت طلق النار من وصل سعد ..
^ عند الرجال ^
يتقهوون ويسولفون وبانتظار سعد والعيال يسولفون ويطقطقون
احمد وهو يحاول يكتم ضحكته لف لعبدالله وقال: عبيد شف لصالح
لف عبدالله لصالح الي كان جالس جنب ابو سعد ويقهويه ويسولف معه ضحك وقال : يبي يلعبها صح يكسب ابوها بالاول
هز احمد راسه وهو يصوره لمشاري ويكتب : عندي لك علوم عنه بتموت ضحك لازم تجي العصر وسكر جواله ورجع يسولف
لفو لابو فاطمه الي قال : والله تزوجو عيالنا
ضحك ابو سعد واشر على العيال وقال : وذولا بسم لله عليهم
ناظروهم وقال ابو احمد بضحك: اي اي تركي ما شاء الله عليه بس الباقين افضل انك تخرجهم من القائمة
ضحكو وقال ابو فاطمه : وانت الصادق خبلان مافي واحد صاحي منهم
فز صالح وقال : حرام عليكم والله اني افضل واحد فيهم صح يعم علي
لف احمد بصدمه على عبدالله الي يكتم ضحكته
ضحك سعود وهو يقول لتركي : والله صالح ذا اكثر واحد مهبول فينا
ضحك تركي ولف لابو سعد الي ابتسم وقال : اي بالله كلكم ما شاء الله تبارك الله
ضحك صالح وهو يلعب بحواجبه للعيال ضحكو بصمت وفزو من سمعو سيارة سعد وطلعو وطلع عبدالله سلاحه وهو يرمي لهم وسط صراخ وتراحيب الكل والبنات الي يطلون من الشباك
صرخ عبدالله وهو يرمي ويقول : ارحبببببببووووو
ضحك سعد وهو ينزل وتنزل فاطمه وتتجه لابوها وعمها الي واقفين عند الباب وتسلم عليهم وابتسمت من سمعت صوت عيال عمها يقولون : ارحبي ياعروستنا
اتجهو لها وهم يحبون راسها ويبتعدون عنها ابتسمت وهي ترد عليهم وتدخل للبنات واول ما دخلت وهو يبدا صراخهم وحضنهم لها
بينما العيال الغير الي يسلمون بهدوء وبعدها جلسو يتقهوون وبعد مده مو طويله قامو يتغدوون من قال ابو سعد: الله يحيكم على واجب زواج ولدي سعد وبنتي فاطمه
اختلفت ردودهم ب : الله يغنيك ، كثر خيرك
اتجهو وجلسو يتغدون وبعد ماخلصو قامو ورجعو للمجلس قام صالح واتجه للمغاسل يغسل تجمد مكانه من سمع نفس الصوت الي سمعه قبل وكانت تقول : ولد سعد تعال
فز وتنحنح وقال : ابشري بالسعد الحين
توسعت عيونها ورجعت بسرعه للمطبخ طلع صالح ودخل المجلس وقرب لسعد وقال : مسيعيد اهلك يبونك
قام سعد وقال بضحك : حلو مسيعيد بس يويلك
ضحك ورجع يسولف مع العيال ..
^ بقسم الحريم ^
بعد ما تغدو تقسمو الكبار كلهم بالمجلس والبنات تجمعو بالصاله وبدت السوالف ب البندري الي فزت وقالت : ايوه كذا تزين السوالف بدون خثاريدز الكبار
ضربتها ريما بخفه : وجعاه وش خثاريدزه لو يسمعونتس
ضحت ولفو لاثير الي قالت : للحين مو مصدقه ان فطوم بتسكن معنا
ندى بحماس : منجد يونس
ريناد بتمثيل : عادي ما يفرق اصلا
ضحكت ريما بعلو صوتها وقالت : ياكذبتس انتي اول وحده فقدتيها
ابتسمت ريناد وقالت : يعني
ضحكو كلهم وقالت فاطمه : يحزن بفقد جلساتنا بالحوش مع العيال
ريهام بابتسامه قالت : لا حياتي كل ما جلسنا بندق عليتس وانتي ادخلي بالجو
هزت فاطمه راسها بضحك وقالت هاجر : للامانه بفقد الشخص العاقل مثلي
شهقو كلهم من ريما وريهام وريناد وقالو بصوت واحد : وانا
التفتو لبعض وطاح الكل يضحك عليهم قالت هاجر بضحكه : اقصد يعني الكبيره مثلي افهمو عاد
هزو راسهم بمعنى فهمت وضحكو كملو على هالنمط الين كبر المؤذن يعلن دخول صلاة العصر فزو وقامو يصلون والرجال توجهو للمسجد
..............
بعد العصر " تحديدًا بيت العم عبدالله "
بعد مارجع الكل للبيت البنات بالصاله وام فاطمه وام محمد عند الجيران وابو فاطمه و حمدان وتركي بالمحلات
وسعود نايم عبدالله واحمد ومشاري والباقين جالسين بالتكه عند الباب
فزت ريما وقالت : يع طفش ليت مارجعنا
تاففت ريهام وقالت : خامس مره تقولين كذا خلاص رجعنا وانتهى
قامت ريما وقالت : ورب البيت طفش قومو نطلع ونتمشى
فزت ريناد : تم يله
ضحكت ريما وهي تسحب ريناد معاها ودقت باب الشارع بقوه فزو العيال وصرخ احمد : ابن فيصل
لف صالح لاخوه : وانت ابنً له
ضحك عبدالله وتقدم للباب وقال : بسم الله وش فيكم ؟
كتمت ريناد ضحكتها وريما مثل وقالت : سوري بس نبي نطلع ممكن !
ابتسم عبدالله ولف للعيال وقال بصوت جمهوري : يعيال تبون نطلع ؟
صرخو كلهم من قالو وبصوت واحد : ايووه
ضحك ولف لها من قالت : خير عبود قلت حن مو هم
ابتسم من نطقها لاسمه : وين المشكلة نطلع حن وانتو للعزبه عادي
هزت راسها بنعم : اهاه طلعه شبابيه فقط
ضحك من كلمتها : الي تشوفينه يله تجهزو وترا اختكم الثانيه بتجي معنا
صرخت وقالت : دودي يس
ضحك ولف للعيال : يله اذلفو كل واحد يجهز نفسه ونتجمع كلنا بالعزبه ونكشت هناك حن والبنات وحميد جب اختك بيموتون لو ما تجيبها
ضحك احمد وقال : على خشمي
ابتسم عبدالله وقال بعلو صوته وهو يدخل البيت : يله خمس دقايق ونتقابل عند الباب والي ما يجي بنخليه
ركضو العيال لسيارات وراحو يجهزون اغراضهم والي يجيب حطب والي اخذ كل السوبر ماركت
بينما البنات الي من وصلهم الخبر ركضو يلبسون ويجهزون ملابس احتياط والسماعات والشاحن الين ما اكتملت اغراضهم وجلسو بالصاله ينتظرون عبدالله يبلغهم يمشون
طلع لغرفته وهو يبدل لثوبه الاسود وشماغه البيج ودق على عمه وابتسم من وصله صوته يقول : ارحب ي عبيد
عبدالله : الله يبقيك ي عم ، وينك فيه ؟
ابو فاطمه : في المحل ليه ؟
عبدالله : والله ياعم ودي نطلع للعزبه زمان مارحنا لها وقلت نطلع انا والبنات واحمد واخته واخوه ومشاري واخوه يعني طلعه شبابيه ضحك من تذكرها وابتسم من رد ابو فاطمه الي قال : الله والطلعه الشبابيه اطلعو اطلعو وانا ابوك وانتبه لهم وبلغ امك وعمتك
هز راسه متوقع يشوفه وقال : على خشمي
ابو فاطمه : عليه الشحم يله فمان الله
سكر وعلى طول دق على امه يبلغها وكلم عمته وبلغها وفز ياخذ اغراضه وينزل لبنات الي جالسين بالصاله بعباياتهم ضحك من شافهم وقال : الله لا يبلانا يله امشو
ضحكو وقامو يركبون معه ابتسم من شاف احمد وبيده العود وقال : والله اليل حامي يبو فيصل
ضحك احمد وقال: الله الله نمشي ؟
هز عبدالله راسه وقال : توكلنا
............
عند مشاري
الي دخل البيت وكان هادي كعادته وابتسم من شاف اخته جالسه على جوالها وفزت تركض له وتحضنه وقالت : ميشو
مشاري بابتسامة: يا عيون ميشو
سحبها وهو يجلسها على الكنب وقال : كيفتس وكيف الدوام ؟
الين بابتسامه: حلو كعادته
مشاري : عساه دوم ، وين فراس ؟
الين : تدوم يارب بالغرفه اكيد
باس راسها وقام لغرفه فراس وهو يدق الباب مره مرتين ما فتح قام وفتح الباب ولقاه نايم مش يصحيه : فراس ولد قم بسرعه
تحرك فراس بقرف وقال : شتبي خير
مشاري يمثل الخوف : قم قم يويلك من ابوي يدور لك
فز فراس من فراشه ودخل الحمام ( يكرم القارئ) ضحك مشاري وهمس : ايوه كذا تقوم على طول
جلس ينتظر فراس يطلع ومن طلع فراس حتى ضحك بعلو صوته مشاري يناظر وجهه المخروش وقال : البس البس بنطلع العزبه مع العيال
تقدم فراس يضربه بالمخده وقال : يلعن بليسك يا شيخ وانا قلت ابوي مجهز جنازتي لعنتك انت والعيال
ماري بضحك قال : اسف بس مارضيت تقوم شسوي لك امش والله بنفلها
هز فراس راسه وقال : طيب قم اذلف برا
طلع مشاري ولازال يضحك كل ما تذكر فراس وطلع يلبس ويجهز اغراضه الين خلص ونزل وعلى نزوله طلع فراس معه ونزلو سواء بعد ما بلغو امهم
...............
عند سعد وفاطمه
الي رجعو من العزيمه ونامو وصحو على المغرب وصلو اتجهو يتمشون ويجهزون لشهر عسلهم مع انو فاطمه اغراضها كامله بس منها يتمشون وقف وهو يلبس ثوبه وشماغه وهي تلبس عبايتها ابتسمت من شافته واقف والمبخرة بيده تقدمت وهي تاخذها وينزل لها وتبخره ضحك وقال : ذي حركتي من اليوم رايح لا تنسينها
ابتسمت واشرت بيدها على عيونها وقالت : من عيوني مارح انساها
ابتسم وتقدم يبوس عيونها : يخليتس لي ي رب
فاطمه : امين ويخليك
لبست وخلصت وطلعت وشبك يده بيدها ومشو وقف عند اقرب قهوه وهو ياخذ لهم ومشى يوريها الاماكن الي يروح لها والنادي حقه وكل شي يخصه يبيها تعرف كل شي عنه ابتسمت وهي تشوفه يوريها كل شي له وقالت بدون شعور : يازينك ياخي
ضحك من لف عليها وهي تتامله وقال : والله يازينتس انتي بس
ابتسمت بخجل ونزلت راسها ولف يشغل اغاني ويمشيها وبعد مده وقف عند مول ونزلو وتقدم يشبك يده بيدها ناظرته وابتسمت ومشى يدخلونه ابتسم وهو يدخلها محل اكسسوارات استغربت وهمست : وش فيك ؟
سعد : تعال ناخذ لتس على ذوقي
ضحكت ومشت معه وتشوفه ينقي لها وما يهتم لسعر اهم شي يعجبها ويعجبه قدم لها واحد وقال : هاه وش رايتس حلو ولا الثاني احلى
فاطمه بابتسامه : كلها حلوه بس مالها داعي والله عندي
ابتسم وهو يلف للمحاسب : بالله عطني الثنين ذولا
العامل : بتطلع ب 2300
توسعت عيونها بصدمه وناظرته يبتسم وقال : عطني ياها
اخذها وهو يدفع ويطلعون تحت دهشتها ناظرته وقالت : سعد مو من جدك غالين ليه اخذتها
ناظرها وابتسم : مافي شي يغلى عليتس واعتبريها اول هديه مني لتس
ابتسم بحيا وقالت : ي حبيبي الله لا يحرمني
اتسع مبسمه بحب : ولا منتس
كملو يتمشون بالمول ويتقهوون ..
_-_-_-_-_
العزبه الساعه 6 المغرب
وصلو كلهم بنفس الوقت نزلو وتقسمو البنات اتجهو للقسم حقهم والعيال مثل تقدم احمد وهو يشب النار وعبدالله يجهز القهوه ومشاري يرتب المكان وصالح وفراس ينزلون الاغراض
البنات
بدو وهم يرتبون المكان والشبسات والعصيرات والي تصور شكلها والي تشبك السماعه فزت ريما من جابت الحطب الموجود وتقدمت البندري بالبنزين يبون يشغلونه رتبتها ريما واشرت للبندري تجيبه اعطتها بندري وقالت بتردد : يالريم انتبهي لا تشغلينه خلينا ننادي العيال
هزت ريما راسها بلا وقالت : لا تخافين وانتي معا الريم
ضحكت البندري وقالت : حي عينها شغليه اجل
حطت ريما شويه على الحطب وقامت هي والبندري وابعدو شوي عنه شغلت الكبريت وهي ترميه على الحطب وشب بسرعه صرخت البندري وهي تصفق وتقول : حيها بنت عبدالله
ضحكت وهي تسحبها معاها للخيمه ويجلسون كلهم ويصورون ويضحكون ويسولفون فزت ريهام تقول : بنات نوفي تدق بقولها تجينا
صرخو كلهم بصوت واحد : ايييوه تكفين
ضحكت وطلعت تكلمها وتقول : هلا نوفي ارحبي
ضحكت نوف وقالت : هلا فيتس ، وينكم ي تبن جيت ما لقيت حد بالبيت
ابتسمت وقالت : اي كلنا بالعزبه وامي وعمتي كانو عند الجيران واكيد راحو السوق او باقي عندهم تعالي تكفين
نوف : اما تم اجل بنجيكم
ابتسمت بفرحه وقالت : كفو نوفي
ضحكت نوف وقالت :كفوتس ي هيمي
ابتسمت من سكرت نوف والتفتت لنفس المكان الي صار فيه خطفها مروان منه توترت وتذكرت خاتمها وانه طاح منها ابتسمت وتوقعته باقي مكانه راحت وهي تدور بالارض وتحفر الين تعبت وزفرت بتعب : اف تعبت وما لقيته شكله ضاع حسافه كنت احبه
تجمدت من سمعت ضحكته وقال : منهو الي تحبينه !
ابتسمت وهي ترفع شيلتها على وجهها وتقول : وانت وش دخلك من احب ؟
تخصر احمد وهو يمثل الزعل : والي بغت تنكسر يده ما تحبينه ؟
ضحكت ريهام بخفه من تذكرته وقالت : امم مدري
توسعت عيونه وضحكت اكثر من ملامحه حاول يخفي ابتسامته من ضحكتها لاكنه ما قدر ابتسم بوسع ثغره وهو يرمي عليها خاتمها وقال : خذي الي تحبينه كان مع ريما واخذته منها بذاك الوقت
ابتسمت بحماس وفرحه وهي تحضنه وتلبسه وقالت بدون ما تحس : اااخخخ شكرا حمود مره شكرا
مسك قلبه من نادته ما عمر احد قال له كذا ابتسم وقال : ياجعل يفداتس احمد وحميد وحمود
ضحكت من استوعبت ومن كلمته بعد نزلت راسها بخجل ومشت من جنبه بهدوء وقبل تروح قالت : مجار ، وعمومًا الشخص الي كانت بتنكسر يده ذاك عرفته ؟
ضحك وقال : اي وش فيه ؟
ابتسمت وقالت بهمس قدر يسمعه : تراني احبه حيلل
ورجعت ركض للبنات
تجمد مكانه من كلمتها لا مبتسم ولا مكشر ما حس الى بنفسه يركض للعيال ويحضن عبدالله ويقول بهمس : قالت احبه قالت احبه
ضحك عبدالله وهو يرفعه وقال : بسم الله منهو ؟
تنهد احمد وهو ينسدح على فخذ عبدالله وعيونه قلوب : اف احبها يا عبيد والله اني احبها
ابتسم وهو يربت على كتفه : ايه اعنبوك طلعت خفيف وانا اقول انت اثقل واحد فينا
فز احمد : وش اسوي ما اقدر اثقل عندها ياخي
قام عبدالله وهو يقول : قم قم اذن للعشاء وانا بصلي بكم
تقدم احمد وهو ياذن للعشاء ومن سمعوه البنات قامو وهم يصلون والعيال مثل وبعد ما انتهو فزو من دخلت سياره وهم يرحبون من نزل مشعل منها ونوف وتوق اتجهو لقسم البنات صرخو البنات من دخلت وركضو لتوق وهم ياخذونها ويحضنونها ضحكت نوف وقالت : اصلا عادي ما يزعل تعودت
لفو لها وتقدمو يسلمون عليها وجلست معهم وبدت السهرة
^ عند العيال ^
رحبو بمشعل وقلطوه وجلسو يتقهوون ويسولفون التفتو لصالح الي قال : وش دراك ان حن بالعزبه ي مشعل ؟
ابتسم مشعل : ولله يا طويل العمر رحنا للبيت ودقينا ما فتحتو واتجهنا لبيت العم عبدالله وما حد فتح لنا ودقت وحده من البنات على مرتي وقالت لها وجينا
هز صالح راسه وقال : والله الي مرحبا
مشعل وهو يرفع فنجاله : الله يبقي من يرحب
التفتو العيال باستغراب على عبدالله الي جاء وبيده سماعه ومشغل شيلات فز له احمد وقال : من وين جبتها
ضحك عبدالله وهو يتذكر
- قبل خمس دقايق -
بعد ما دخل مشعل وجلسو يسولفون قام بدون محد يدري وهو يدق عليها
فزت من وصلها اتصال وهي تسولف مع البنات استغربت وقامت ترد وصلها صوته يقول : يامرحبااا
ضحكت بخفه وقالت : من يرحب يبقى
ابتسم وقال : ريمي ممكن طلب بسيط ؟
ابتسمت وهي تدري انه يبي شي : عيوني !
تنهد بحب وقال : عساني ما انحرم منها ، ابغى السماعات نبي نلعب
ابتسمت بهدوء وقالت : ولا منك ، السماعات حقتنا مارح اعطيك لان البنات بيذبحوني بس
كشر من قالت كذا عقد حاجبينه من قالت بس وقال : بسسس ؟
ضحكت وهي تميل راسها : جبت وحده احتياط وبعطيك
صرخ بفرحه وهو يقول : كفو كفو يالريم ما ترديني 
ابتسمت وهي تقول : متى رديتك اصلا تعال تعال خذها
هز راسه متوقع تشوفه ويقول : ذلحين ذلحين سكر وهو يركض لجهتهم وهي متلثمه وتطل له ضحكت من شافته مشمر ويركض رغم شكله المبعثر الى انه كان يجذب فعلا ابتسمت وهي تشوف يتنفس بسرعه وتقول : وش هو له تركض شوي شوي
عبدالله: مدري جلس على رجلينه ياخذ نفس وهي دخلت تجيب له ماء وتعطيه ابتسم واخذها وشرب ورفع نظره لها صح ما لمحها كلها بس يشوف عيونها وحجاجها ونص من شعرها ابتسم وهو يتكي على وجهه بيده ويقول :
لا تلوم الشاعر الي يدور له رصيد
ياخذ عيون القصايد من اهداب العيون