تغني على وتر حبي واقول في قصيد عيونها ديوان

البارت السابع والعشرين

ابتسمت وظلت ساكته تفكر بكلامة
الين نطق ببحه : والله اني احبتس واعشق طاريتس وزولتس وكل ما فيتس
ابتسمت تنزل راسها بخجل من تلونت ملامحها بالاحمر
ضحك من عرف انها تستحي منه وقال : غني لي بشتحن لصوتس !
رفعت راسها تفكر باغنيه ونطقت من وصلتها :
انا ذبحني بالهوى صاحبً لي
مايدري اني بالهوى صاحبً له
كانه على وصل الهوى مشفقً لي
فانا على وصل الهوى مشفقً له
من بعد غيبة صاحبي قلت من لي
وبدري ليا من غبت بيقول من له
—
تنهد يسند راسه على الباب يكمل بدالها : انا ادري انه لو اغيب اشتحن لي وهو يدري اني لو يغيب اشتحن له
ضحكت بخفه : وظايفك كثرت ، شاعر ومنشد وملازم اول ماشاءالله
ابتسم يهمس : وانتي مغنيه واحيانا شاعره وقريبًا دكتوره
رفعت يدينها في الهوى تدعي : يارب يارب انقبل
عبدالله : باذن الله
ريما : غنيت لك دورك تشعر لي
عبدالله بابتسامه : تذكرين اول ما غنيتي لي وانا قلت قصيده لتس
هزت راسها بنعم : ايوا
عبدالله : كتبت بيتين وقتها بس خبيتها الين اتاكد من حبي لتس
ابتسمت بهدوء : اقدر اسمعها
تنهد عبدالله بحب وده ياخذها لبعيد وما يتركها ثانيه حبها بكل ما عنده صار يحسها وكانها روحه يخاف عليها يداريها يبي يلبي كل ما تطلبه وصل لمرحلة الهيام فيها
فتحت جوالها تبي تسجلها بصوته وكونها اول بيتين يكتبها ببداية حبه ابتسمت من نطق :
غني على وتر حبي يالريم وانا
بقول في قصيد عيونتس ديوان
—
لفت للباب وهي تفتحه وفز يناظر موج عيونها ابتسم ياخذها بحضنه ويطبطب على ظهرها : ما اتفقنا نبكيتس كلها بيتين
ابتعدت عنه تمسح عيونها : لا تطول ولا مارح اغني لك !
ضحك ياشر على عيونه : من عيوني نذر ما اطول عليتس وان طولت فاعذري ظروفي يالريم تكفين ماودي ارجع واحصل الجفى منتس
ناظرته بعيون دامعه : ما كان جفيتك لو جفوك احبابك كلهم معذور ي عيني لو تبطي سنين بنتظرك
ابتسم بوسع ثغره ينطق : انتي احبابي كلهم وخالقتس مير استودعتس الله وانتبهي لنفستس ودراستس
هزت راسها بتفهم : لا تشيل هم الله يحفظك وانتبه لنفسك
مسكت جهة صدره اليسار مكان القلب ونطقت : وانتبه لقلبك ي عبيد تراني فيه
ميل راسه يمسك يدها ويشدها : ازهليني وازهلي قلبي الي يحبتس
ابتسمت تقرب لخده وتبوسه بهدوء وتمشي تاخذ اغراضها وتسكر الباب وتدخل البيت
بينما هو ظل واقف ويده مكانها يتذكر فعلتها وكيف تجمد من لامست نعومة شفايفها دقنه ابتسم يلمس مكان بوستها وتنهد يهمس : صدق من قال ان اليل ما يحلا الا بجلاسه
ضحك يمشي للمجلس وينسدح بجانب عايض ويتذكر كلامها والبيتين الي قالها كيف كانت خارجه من قلبه لانها تصف الي يعيشونه فعلا..
^^^^^^
بغرفه ريهام
الي طول الوقت متردده تتصل او لا تخاف تدق ويكون نايم وتخاف ما تدق يكون منتظرها وهاذا الصدق
احمد من قاله عبدالله بانها تبي تودعه وهو ينتظر رسالة منها باحر من الجمر يمكن لو ترسل نقطه طار من الوناسه
تنهدت تجلس على السرير وفزت من جت ريما ونطق : وش فيتس بسم الله!
ريهام بتوتر : ريما ادق ولا لا يمكن يكون نايم ؟
هزت ريما راسها : لا ي غبيه هو ينتظرتس لاني قالت لعبدالله يبلغه بانتس بتودعينه
شهقت ريهام تنطق : كذابه وانا طول الوقت افكر وش اسوي تتوقعين طولت عليه !
ريما بضحك : اتوقع ولا متاكده انتس طولتي دقي خلصي
طلعت ريما تاركتها على السرير وجوالها بيدها وترتب كلام بتقوله نزلت نظرها لجوالها الي يهز دليل وصول مكالمه نطت تنطق : يمه طيب اصبر ما فكرت
تنهدت وهي ترد وتسكت
ابتسم يسمع هدوءها ونطق : يامرحبا والمرحبا لك وتنقال ترحيبًا من عمق زوري تنصاك
ابتسمت بخجل وهمست : الله يبقيك ويسلمك
ابتسم بوسع ثغره من سمع صوتها واسترسل : كيفتس يابعد هالدنيا ؟
ريهام بابتسامه: بخير دامك بخير
احمد : ياعساه دوم
ريهام : تدوم
سكت احمد مايدري وش يقول يبي سالفه بس اهم شي ما تقفل عقد حاجبه من نطقت بغصه : ادري ان الوقت ما كان معنا و ما اعطيتك حب مثل ما اعطيتني بس والله يا حميد وهاذاني اقولها بلساني لك اني مابعد حبيت حد مثلك ولا بحب ما عمري جيت وصارحتك بمشاعري بس ما قويت اخبيها اكثر
ابتسم احمد بخفه ينطق : ياجعلني قبلتس يالهيم وجعلني في حبتس ما اتبدل يا هناي ، من قال لتس ان المحبه بالرسايل والمكالمات بدا الحب ياتي من القلب تحس به بقلبك يا عيني مهو من الجوال ما همني انتس ما ترسلين لاني عارف وش انا بالنسبه لتس
ابتسمت من بين دموعها لانها تشوف نفسها مقصره ماترسل له وتتطمن عليه وكانت تظن ان احمد يحمل عتب عليها ولاكنه كان العكس : ما ابيك تروح !
احمد با استغباء : وين ؟
ريهام بضحك : المهمه يويلي نسيت
ضحك احمد يهز راسه بلا : لا ما نسيت ، حتى انا ما ودي اخليتس بس ابي اخلص هالشهرين واجي لتس ركض واخطبتس
توسعت عيونها بخجل من صراحته : هاه وش تخطبني ب السرعه ذي !
احمد : اي ما ابي اطول خلاص بعد شهرين بتكونين متخرجه نتزوج وندور لتس وظيفه
مسكت ريهام راسها بابتسامه : وربي احمد منت بصاحي كيف فكرت في ذا كله ، متاكد تفكر بالمهمه !
احمد : لا ، افكر بتس
ابتسمت بخجل وناظرت الساعه واستوعبت انه لازم يغفى ولو شوي ونطقت : المعذره تاخرت عليك
احمد ببحه : لو تبين عمري كله والله انه فداتس
ابتسمت تحب نبرة صوته وهدوء وتعشق كلامه تنهدت تهمس : عادي تغني لي شوي
ابتسم احمد لانها ولا اول مره تطلبه يغني لها بدون ما يغني هو فز يسحب عوده ويدندن على طول :
يالبيه ياصوتٍ مهو
والله ايه صوت
الي لا سمعته
كل جرحٍ لقى علاجه
—-
ابتسمت بشعور غريب وكان قلبها يرقص بفرحه قربت تبوس جوالها بابتسامه كان ودها تحضنه بس لا يروح ونطقت : احبك
توسعت عيونه بضحك مهو مستوعب اول مره تقولها علني كذا فز ينزل العود وياخذ جواله : وش قلتي ما سمعت !
ضحكت ريهام : لا تستغبي سمعت
احمد بعبط : لا ما سمعت ما انتبهت تكفين يالهيم عيديها تكفين
ريهام بضحك : حميدد
احمد : يالبيه ياعيون حميد وقلبه سمي
ضحكت ريهام زود من كلامة وانسدحت على السرير تنطق : انتبه لنفسك واستودعتك الله الذي لا يضيع ودائعه ، الله يوفقكم ويرجعكم بالسلامة
ابتسم احمد بنطق : وانتي بعد انتبهي لتس والبندري معتس ، اللهم امين ويخليتس لي
ريهام : معليك بيدو وخالتي بالحفظ والصون
احمد : بعدي بنتي
ابتسمت ريهام : يالله اخليك تغفى لك شوي الين ياذن الفجر
هز احمد راسه هو يبي منها شي ويتمنى تقوله قبل تقفل لاجل يقولها
ضحكت تبعد الجوال عنها من فهمت قصده ونطقت بهمس : والله احبك ارتحت
فز بحب ونطق : وخالقتس يالهيم اني اهيمتس واعشقتس
ابتسمت تقول : مع السلامة
احمد : الله معتس ي هناي
قفلت وهي تحضن جوالها مو مستوعبه كيف جتها الجراءة تقول الي بخاطرها بس من صوته حست بالأمان وهي واثقه ان احمد مستحيل يخذلها او ياذيها ابتسمت تعيد نبرة صوته وكلامه ومشاعره ضحكت على تصرفاتها الغريبه ودخلت بفراشها
بينما هو يحس ملك الدنيا ومافيها مجرد ما قالت له كلمة كان يتمنى يسمعها و ياكبرهاااا بقلبه كيف وده ياخذها ويدخلها بضلوعه من كثر ما يحبها وصامل بقراره يبي يخلص هالشهرين باسرع وقت وينفذ الي خطط له ظل يفكر وتاره يبتسم من تذكر صوتها الين غفى مكانه ..