قلب يليق بك

ذكاء إنجى 6

كانت إنجى تشتعل من الغضب بسبب الممثل الجديد الذى تعامل معها بوقاحة على حد قولها وطلبت أروى مكالمة فيديو وظلت تتحرك وهى تتكلم بغيظ: تصورى بيتكلم معايا أنا بالطريقة دى؟

إنت غلطانة يا إنجى.. فنانة كبيرة زيك لازم تحترم ضيوفها .

ده طبعى ومش هاغيره أبدا... ده قليل الذوق ,فلاح ...

إهدى بس...

بيرى... إنت فين؟

إقتربت بيرى وهى ترتجف فقالت إنجى: كلمتى سلام وأسعد؟

أيبوه كلمهتم وهاييجو الليلة..

طيب..

أروى :هاتعملى إيه يا إنجى؟

هامضى معاهم وأصور الفيلمين الأول وأسيبه كده قاعد جنب السيناريو بتاعه..

بلاش تعملى عداوة يا إنجى ممكن طارق يغير الممثل وخلاص..

لو مغيروش هاعطل له الفيلم..

لا إنت بقيتى صعبة قوى كده ليه؟

أنا هاعرفه مين هى إنجى سمير... ويبقى يقابلنى لو مثل تانى..

إنجى.. بصى لى هنا...

إلتفتت إنجى للهاتف فقالت أروى: أنت من إمتى بتعملى كده مع الناس؟ من إمتى ممكن تقطعى عيش حد أو تقفى له فى شغله؟ لأ يا إنجى انا مش عايزاكى تبقى كده...

هدأت إنجى وتنهدت ثم قالت: عندك حق... أنا غضبى سيطر على ...

إنت طول عمرك قلبك كبير ...

جلست إنجى وهدأت ملامحها وقالت: أنا هاقفل دلوقتى يا آرو وأكلمك بعدين..

أغلقت إنجى الهاتف ووضعت يديها على وجهها وإقتربت منها شهد ووضعت أمامها كوب ليمون وقالت: إشربى الليمون وإهدى ...

بيرى: هى هدت أصلا بعد ماكلمت إختها.

إختها دى بلسم..

الحمد لله إنها مش زيها... هو أنا ليه مشفتهاش ولا مرة..

هى بتشترط لما تيجى هنا متشوفش حد خالص من شغل إنجى.

آه .. علشان كده مقابلتهاش أبدا...

إنجى : بتقولو إيه ؟

مش بنقول حاجة.

طيب سيبونى لوحدى ياللا...

ابتعدت شهد مع بيرى .

طبعا لم ينتظر سلام وأسعد عندما وافقت إنجى على التوقيع معهم وحضرو لبيتها بالعقود والشيكات وقال أسعد: نصور فيلمى أنا الأول..

سلام: لأ انا اللى عرضت عليها الأول..

أووه بلاش تختلفو رتبو مع بعض مين الأول..