فى يوم أجازته أخذ أشرف إنجى للبحر ووقفت إنجى فى الماء تبلل قدميها وتلعب وجلس أشرف تحت المظلة يتابعها ويلتقط لها الصور فاقتربت منه وأمسكت يده قائلة: إيه إنت هاتفضل قاعد كده قوم معايا.
أخذته للماء وملأت يدها وأغرقته وظلت تلعب بفرحة ,لم يغضب منها أشرف وشاركها اللعب وعادو للبيت لتغيير ملابسهم ثم خرجو لتناول الطعام فى الخارج . شعرت إنجى بأنها تغيرت مع أشرف وأصبحت كما كانت فى السابق قبل التمثيل والشهرة, شعرت بأنها حرة وليست مقيدة بالأعمال واللقاءات وحرة أيضا فى أن تحب وتجد من يحبها سألته فجأة: إنت مش هاتآخد أجازة؟
دلوقتى صعب قلت لك دى فترة إمتحانات.
طيب هاسافر القاهرة بقى أقعد مع اختى شوية.
ترك أشرف الطعام ونظر إليها وقال: إيه تسافرى لأختك؟ طبعا لأ ...
إبتسمت إنجى بشقاوة: عارفة إنك متقدرش على بعدى
ولما إنت عارفة عايزة تسافرى ليه؟
يعنى مش هاتسيبنى أسافر خالص حتى علشان أشوف أختى ؟
أنا ماليش حد ... إنت كنتى جارتى وصديقتى ودلوقتى حبيبتى وهاتبقى مراتى وأم عيالى و....
وضعت إنجى يدها على فمها ودمعت عيناها فنظر إليها وقال: مالك يا أروى؟
عجبتنى قوى مراتى وأم عيالى دى ... يعنى أنا هايبقى عندى عايلة ... وأولاد وكده...
طبعا أكيد...
سالت دمعة على وجنتها فوقف أشرف و إقترب منها ومد يده ومسح دموعها وهمس: إنتى حساسة قوى يا أورى , كنت دايما فاكرك جامدة.
مفيش ست فى الدنيا جامدة, الست اللى بتبقى كده بتتظاهر إنها جامدة علشان متصعبش على حد وبتبان قوية لكن جواها بتبقى هشة, محتاجة سند جنبها , بتستنى كلمة حنينة وراجل يحبها ويخاف عليها ويحميها ..
رفع وجهها إليه وقال: وأنا بأحبك وأوعدك إنى هاخاف عليكى وأحميكى..
إبتسمت إنجى بفرحة وقالت: تعزمنى على آيس كريم بعد الأكل..
حرك أشرف رأسه وهو يتعجب كيف تحولت من إمرأة عاطفية إلى طفلة فى أقل من الثانية فقال: وبالشيكولاتة كمان.
لأ بالمانجة.
ضحك أشرف وضحكت معه إنجى وأكملو طعامهم.
إنتهت فسحة إنجى ودخلت لشقتها مع أشرف وقالت: أنا هادخل أعمل كوباية شاى , أعملك؟؟
وحطى قرنفل,
حاضر
وضعت إنجى حقيبتها على كرسى ودخلت للمطبخ وجلس أشرف يقول: أنا أكلت كتير قوى .
أنت تقرأ
قلب يليق بك
Romanceلايوجد فى حياتنا شئ يحدث صدفة, كل شئ يحدث لنا بسبب ربما لانفهم لماذا ولكن يقودنا هذا السبب لمعرفة حياتنا ولمقابلة سعادتنا وربما تتغير الأقدار لتصبح أجمل بالنسبة لنا ,صدفة قد تضع أمامك طريقا مختلف عن كل مارسمته فى حياتك ,طريق يقدم لك فرصة وإختيارات...
