قلب يليق بك

أول نظرة 8

جلس طارق مع يوسف فى الصالون وقالت بيرى: هادى لإنجى خبر ..

إبتعدت بيرى فقال يوسف: برضه هاتنزل متأخرة ,أنا متأكد.

وبعدين بقى يايوسف إحنا لسه واصلين

,المفروض تكون فى إستقبالنا .

مش إتكلمتا فى الموضوع ده وإتفاهمنا ... دى نجمة كبيرة ومن حقها تشوف نفسها , من فضلك إمسك نفسك وقول الكلمتين خلينا نخلص...

زفر يوسف بقوة وهو يحاول أن يتحكم فى غضبه ونظر فى الساعة بإمتعاض.

فى حجرة إنجى وبعد تفكير وقفت أروى وقالت وهى تحرك رأسها: لأ لأ... مش هاعرف.. أنا مبعرفش أكدب.

وهى دى فيها كدب إيه؟ إنت مش هاتتكلمى خالص ولاهاتقولى حاجة .. علشان خاطرى يا آرو علشان خاطرى,

أوف عليكى يا إنجى,,, هايعرفو إنى مش إنت.

يعرفو منين؟

مش أنا أختك توأمك.

ياستى الكل يعرف إن عندى أخت وبس محدش يعرف إنك توأمى... شهد هى الوحيدة اللى تعرف, حتى بيرى عمرها ماشافتك.

صمتت أروى وأكملت إنجى: إنت بس شاورى بصباعك كده لبيرى وهى هاتتكلم أنا متعودة على كده... وهى بتفهمنى..

ياسلام عليكى يا إنجى ...

أرجوكى ... ها ... ياللا شهد هاتى لها هدوم تغير بسرعة ...

بدلت أروى ملابسها وطبعا أرتدت من ملابس إختها ووقفت تنظر لنفسها فى المرآة , أرتدت بلوزة زرقاء تناغمت مع لون عينيها وبنطلون ضيق أبيض اللون أظهر جمال جسمها أيضا وقالت إنجى: جميل عليكى قوى...

إستدارت أروى لترى ظهرها فى المرآة وقالت: أنا مش بارتاح فى اللبس الضيق ده يا إنجى , مبين جسمى قوى..

الحكاية كلها نص ساعة مش أكتر...

لأ شوفى حاجة محتشمة شوية أنا هاتكسف أنزل لهم كده.

مفيش وقت بقى إنزلى وأقعدى على طول هو إنت هاتتمشى قدامهم؟؟

زفرت أروى بضيق فابتسمت إنجى قائلة: علشان خاطر أختك حبيبتك....

وشعرى هانعمل فيه إيه؟

آه أهو ده مشكلة ...

شهد: ولامشكلة ولاحاجة لفى عليه سكارف وإلا إعملى سبانش ..

برافو عليكى ياشهد .. بس أنا مش هاعرف أعملها علشان دراعى.

شهد: أنا باعرف ياست إنجى...

أمسكت شهد إيشارب لونه أبيض فى أزرق وبدأت تغطى شعر أروى التى إستسلمت ليدها وعندما إنتهت قالت إنجى بإعجاب: واو تحفة,, والقصة اللى نازلة منه شكلها مغرى , شهد إبقى إعملى لى كده أنا كمان.