قلب يليق بك

توأمى الجميلة 2

إنشغلت أورى فى مساعدة أختها فى ترتيب ملابسها وقالت: جايبىة كل الهدوم دى؟

يادوب يكفو ال10 أيام ..

وأكيد هاتنزلى تشترى من هنا؟

طبعا ...

نظرت إنجى لأختها وقالت بحنان: آرو .. إحنا مش هانعيش مع بعض تانى؟

أعمل لك إيه بقى إنتى اللى دخلتى عالم التمثيل وسبتينى..

كانت إمنية حياتى يا آرو .. وحققتها .. بس عايزاكى معايا...

صعب يا إنجى .. كل واحدة فينا بقى ليها حياتها..

ونفضل مقسومين كده؟

نظرت أروى لأختها بحيرة وقالت: علشان نعيش مع بعض لازم واحدة فينا تتخلى عن حياتها

زفرت إنجى بقوة وجلست على السرير وقالت: طيب هاتفضلى عايشة هنا لوحدك لإمتى؟

هاعمل إيه يعنى؟

تيجى تعيشى معايا.

لأ ياستى أنا معرفش أعيش معاكى, إنت ليكى نظام وأنا لى نظام تانى خالص...

نظام إيه ؟ هو إحنا هاتحارب باقولك تعيشى معايا فى القاهرة بدل ماكل واحدة عايشة لوحدها.

أنا حياتى هنا يا إنجى وشغلى هنا.

ممكن تنقلى شغلك بكل بساطة لجامعة القاهرة..

بس أنا مش عايزة, أنا لى جيران هنا وأصدقاء..

وهاتفضلى سايبانى لوحدى؟

إنت حياتك مشغولة برامج ولقاءات وشغل يعنى لو جيت أعيش معاكى مش هاشوفك..إنت ناسية آخر أجازة قضيتها معاكى. كنت لوحدى مع القط بتاعك 24 ساعة.

هاعمل إيه؟ مانا كان عندى تصوير..

خلاص يبقى تعالى إنت قضى أجازتك هنا معايا.. على الأقل هانشوف بعض ونروح البحر..

نظرت إنجى بإحباط فابتسمت وربتت عليها كما تربت على طفلة صغير وقالت: متزعليش هآخد أجازة وآجى أحضر عيد ميلادك..

بجد؟؟ هيييه

بس بشرط...

إيه ؟؟

نحتفل بيه لوحدنا يعنى لانجوم ولاصحافة ممكن؟؟

دى ممكن لأنه عيد ميلادنا إحنا الاتنين.

إبتسمت أروى فى وجه توأمتها وأختها الوحيدة وأكملت إنجى: وأنا كده كده هاعمله مرتين ..

ضحكت أروى: لسه بتعملى عيد ميلادك مرتين؟

وأحيانا تلاتة؟

ليه؟

باعزم أصدقائى الفنانين والمنتجين والصحافة على مرتين؟ ؟