قلب يليق بك

بداية اللعبة 11

دخلت أروى حجرتها وهى تضحك كانت تعلم بأن إنجى ستلحق بها فورا فأخرجت ملابسها بسرعة ودخلت للحمام واغلقت الباب قبل دخول إنجى للحجرة ,دقت إنجى على باب الحمام وقالت: اروى اخرجى هنا كلمينى..

بآخد حمام ...

كده!! انا هاستناكى لحد ماتطلعى لما أشوف إيه لعب العيال ده ..

جلست إنجى على السرير تنتظر خروج أختها من الحمام وقالت: مش هاسيبك يا آرو...

تعمدت أروى أن تتاخر فى الحمام وعندما خرجت كانت إنجى جالسة القرفصاء على السرير وقالت: ممكن أفهم إيه معنى كلامك اللى قلتيه تحت ده؟

كلامى كان واضح يا جيجو , انا مش هاكون مكانك..

أروى متلعبيش بأعصابى لو سمحتى, أنا دلوقتى فى موقف وحش جدا وحياتى بين أديكى ..

نظرت أروى لأختها وقالت: يعنى مصممة إنى آخد مكانك بالرغم من الأخطاء اللى عملتها ولسه هاعملها.

معنديش حل تانى ...

طيب .. موافقة ..

قفزت إنجى بفرحة وضمت أروى وقالت بسعادة: مش معقول: ميرسى ميرسى يا آرو إنت أحلى أخت فى الدنيا ..

إبتعدت وقالت: متقلقيش خالص, أنا هاعلمك إزاى تتصرفى وتقفى قدام الكاميرا ,

ممكن , كل شئ ممكن لكن فيه حاجة صغيرة قوى مفكرتيش فيها ..

هى إيه؟؟

زى ما أنا هآخد مكانك, إنت هاتآخدى مكانى ياحلوة.

نعم.. أنا إيه؟ تقصدى ....

فكرت إنجى لدقيقة ثم إتسعت عيناها وقالت بصوت عالى: إيه؟ أنا أروح الجامعة مكانك ! مش ممكن طبعا ..

ليه مش ممكن , إنت عايزانى أنا امثل فيلم مكانك يبقى إنت كمان تشتغلى فى الجامعة مكانى.

أنا مالى ومال شغلك ؟ أفهم فيه إيه أنا؟

يعنى عايزة إنجى تفضل تمثل وأروى تختفى من الوجود مثلا مش لازم حد يبقى مكانى.

وأنا هاروح أعمل إيه فى الجامعة, أنا أفهم إيه فى شغلك ومحاضراتك يا آرو؟

أفهمك..

إنت بتهزرى يا آرو؟ صح !! بتهزرى!!

لأ بأتكلم جد يا إنجى ,أنا عندى شغل ومينفعش أختفى كده...

أنا... أنا مافهمش حاجة فى شغلك معرفش احل محلك , التمثيل أسهل بكتير...

ماهو ياتروحى إنتى يا أروح أنا! إختارى ..

لو رحت أنا هايرفدوكى من الجامعة ياحبيبتى..

ضحكت أروى بشدة وقالت: ده أكيد ...