__
سعيده ماده كراعها وغامه خشمها وفمها بمحرمة الرداء وتقصف 😂
سعيده: ياسناء ديريلنا شاهي
سناء: اهو ياحني
سعيده: لالا هذا حمره نبي خضره انا
سناء: الحمره خير ياحني
سعيده: صبي ديري وانتِ ماشاطره غير في طلوق اللسان
سناء صبت وتنفخ
سعيده: وانتِ يا كوثر امتى تبي تجيبيلنا عيل ان شاءالله ؟
كوثر:حامل ياعمتي انا وفي الثالث توا
سعيده:امباهي طيب فيك مع ان مش باين عليك حامل
كوثر: نكذب يعني ياعمتي ؟
سعيده: صاحب العله ينخصنا مرافقه
كوثر انصدمت وصبت تخبط
سعيده بحتت في سالمه
سالمه: اححم نصبي نقول لسناء تسقد روحها
ناصر : معش في الا انا يعني؟
سعيده: انتَ ياليد امتى عرسك ؟
ناصر: مازلت ما خطبت يا حني
سعيده: هئ والي خطبتها لك امك من شهرين؟
ناصر: ماتفاهمناش
سعيده: بلا كذب قول شينه
ناصر ضحك: مشكلتك فاهمتيني
سعيده: شينه بلكل؟
ناصر: زيرو مقومات
سعيده:مشفوطات بلكل؟
خشت منى
ناصر: اححح
منى: خير يا حني "وسلمت عليها بالخد"
سعيده: وين كنتي تشنشي من صباحات ربي ؟
منى:في السوق ياحني
سعيده: وهه مغلا عليك الدوران في السوق
ناصر: نسقد نا يا امي نكسدوا بعدين
سعيده : مع السلامه ولفتت انظارها لمنى
منى: حاجات ناقصات ياحني شن ندير
سعيده: عدي عدي !
منى قلبت وجهها ومشت
سناء: خاشه بالشاهي ووراها عبير
عبير : السلام عليكم
سعيده: يامرحبا يامرحبا انورت واشرقت
عبير:مرحبك يا امي كيف حالك
سعيده: الحمدلله كيف حالك انتِ
عبير: بخير وبشوفتك احسن
سعيده: سلمك كنه وجيهك؟ تقول مريضه والا مزعلك يوسف
سناء: يا سعد الناس ياسعد الناس ياريت تدلعينا كيف ماتدلعي في عبير
سعيده: كان تقعدي كيف عبير راك مدلعه وبعدين صبي وانتِ ساكنه
سناء تصب في الشاهي وتغلي
عبير بصوت واطي : يانعلي يا امي طلعت حامل
سعيده: به ماشاءالله مبارك بس مش وليدك مازال صغير شوي
عبير: عاد شن ندير
سعيده: عرفته يوسف مايتحمل ، بس انتِ عليش خايفه
عبير ضحكت: الدكتوره قالتلي لازم تقعدي سنتين بلا حمل وانا خايفة يصير شي للبيبي والا ليا
سناء تمد ف الشاهي لسعيده : تفضلي يا حني ،تبي يا عبير
عبير:لالا صحيتي
سعيده خذت الشاهي وتحكي بصوت واطي : لا ماتخافي ان شاءالله خير مشيتي للطبيبه انتِ؟
عبير: اها قالتلي نجيها بعد شهر وقالتلي احتمال يجيني الحمل صعب بس
سعيده: باهي اهم شي مايصير للعيل شي
سناء: كنكن اتوشوشن يا حني؟
سعيده: ماكانبك سو
سناء: شن صار في تحليلك ياعبير
عبير: اه؟ مازال ماطلع يوسف بعدين يبي يجيبه و يجيب عبدالرحمن من خوي
سناء: امباهي
ولفتت انظارها شور التلفزيون
_
نوال:ماني بنطلع نلعب في الشارع
سالمه: اطلعي اكن ماتطوليش
نوال: باهي باهي
وطلعت تجري
هناء بنت جيرانهم : ماما قالتلي ماتوسخيش دبشك
نوال بحتت فيها ومشمئزه من اسلوبها: مش صغيره انتِ عادي كان لبزتيه
هناء متلعب بـِ ضفيرتها : لالا انا نسمع في كلام ماما اصلا
نوال:هي يا بنات نلعبوا سباق من حوش عمي خلفيه لعند حوشنا
منيره وسلوى :هي
نوال: واحد اثنين ثلاثه
هناء:تجري من جد جدها ودفت نوال بالغلط
نوال: ستوب استوب يا غشاشه ياغشاشه
هناء بعيون بريئة : كنك شن درت
نوال وجهها حمر ومعصبه وداهشه: دفتني الغشاشه
سلوى: كيف دفاتك ؟
نوال :ونحن نجروا دفتني عشان انا غلبتها
هناء : لا والله
نوال : تحلفي يا الكذابه
وتكرها من ضفيرتها وتبدا تبرم بيها في ه الشارع
سلوى تحز
منيره: حي ع امه نمشي نقولها لعمتي سالمه
وتمشي تجري فراره
منيره: ياعمتي سالمه ياعمتي سالمه
سالمه طلعت تجري: هنعم شن تريدي يامنيره
منيره داهشه: حي عليك يا عمتي سالمه نوال تمتع بهناء ف الشارع
سالمه: هي كيف تمتع بيها وطلعت تجري تشوف ف بنتها
منيه ام هناء: يانعلي يا بنيتي فكنها ليا
سالمه تفك في نوال :امسحيها في وجهي والله ماقصدنا
وفنصت في نوال : اعتذريلها
نوال طبست عيونها وسكتت
منيه: عليش تعاركتن؟
منيره:نلعبوا في سباق هناء دفت نوال
منيه: صاح هالكلام يا هناء ونوال؟
نوال : اها
هناء: اها لكن مش بقصدي
سالمه :والله نوال اول مره تضرب حد ديما هاديه معليش السموح
منيه: لا عليش السموح نحن نعتذروا وبحتت في بنتها هناء: اعتذري
هناء بعيون مدمعه : اسفه
سالمه بحتت في نوال: اعتذري حتى انتِ هي
نوال برفع حواجب : اسفه
منيه: خلاص صاحبات توا
سالمه: اها هي مع السلامه
هي معايا يانوال
ومشت تكركر في نوال وتهزي فيها
سناء: كنكن؟
سالمه: معش في طلوع تضرب ف البنته في الشوارع
سناء عقدت حواجبها: عليش من ضربت
نوال: هناء بنت عمتي منيه اصلا ديما تجعون وتحكي بصوت واطي وتدلع زي البيبيهات وانا ضربتها عشان دفتني
سناء ضحكت: كيف ضربتيها؟
نوال:شديت شعرها
سالمه: اين شداته ؟ نتفاته لها جتني منيره قالتلي را نوال تمتع بشعر هناء في الشارع
سناء تضحك
نوال: اصلا دفتني خلت دبشي يتلبز
سناء: لالبزت دبشك مفروض كريتيها وفكيتي بلعومها وبعدين كسرتي رقبتها وبعدين نتشتي شعرها
سالمه: هذا شن يابت انا نربي ف البنت وهي تعلم فيها الفشل
