رواية أهوَاك

Part 38

ثاني يوم
مكتب الدكتور سِراج
: اتضح ان والدكم عنده كيس في الدماغ
يوسف حط يديه على راسه ومصدوم: لا اله الا الله
ناصر وقف : كيف؟ بلكي غالطين انتوا عاودوا التحاليل والصور من جديد
سِراج: انا متأكد تقدر تمشي لاي عياده او مستشفى تقولك نفس الكلام
صالح: باهي يا دكتور شن لازم نديروله؟
سِراج: ح نحول حالته عند احسن دكتور في العياده دُكتور مراد وهو ح يشوفه لان هذا مش تخصصي
ناصر:ووينه هذا امتى يمسك ؟
سراج:هو على وصول دوامه يبدا من ١:٣٠ اليوم
يوسف وقف : تمام صحيت يا دكتور نحن مع بوي
سراج: تمام والف لاباس عليه
وطلعوا الخوت الثلاثه
وهما حاسبين بجبل فوق كتوفهم
____
نوال:اغلبهم روحوا
منى: ووه عليا تعبانه
سناء متكيه: انتِ مفروض ما اشتغلتيش حامل
منى: شن ندير عاد نتعاونوا
نوال: خشيتي شهرك؟
منى: اها امس اول يوم
قصت عليها ميار: منوشه
منى: نعمين ؟
ميار: يبيك عمو موسى
منى وقفت:توا نمشيله
ميار قمعزت جنب نوال: ها نويله
نوال: عيوني
ميار: كلمتيهم سألتي على جدي ؟
تسنيم جت تجري قمعزت في حجر ميار
نوال: لا شويا اخرى
ميار تلعب بشعر تسنيم: ان شاءالله خير يا رب قالقه بكل انا
نوال: ان شاءالله مافي الا الخير
تسنيم بحتت في ميار: ميوره ديريلي جدّوله (ضفيرة)
ميار: حاضر
وبدت تلعب في شعر تسنيم
ميار:نويله بعد خطرها صبيتك الي واخذينها عيت من ؟
نوال: اي من صبيّاتي؟
ميار: حنان
نوال: عيت ال.. عليش ؟
ميار: ساره بنت خالي خاطبها غرباوي ويوم الي قلتيلي جت صبيتك م الغرب وهك هي قالتها قالت خطيبها قاللها مرات عمي جت بنغازي وبعدين مشت شحات واسمها حنان وعندها وليد وبنيه حتى هي
سناء: ماشاءالله هذي بنت رجاء والا؟
ميار: اها
نوال: والله؟ شن اسم امه هو ؟
ميار: نورا
نوال: اها معناها حنان صبيتي تقعد نفسها مرات عمه لان سلفتها اسمها نورا وقالت خذوا وحده م الشرق لان نعرفها نا نورا
ميار: اها
خشت نبيله قمعزت جنب ميار: ان شاءالله يطلع طيب عمي خايفه عليه
سناء: ان شاءالله
نوال سكتت وقلبت وجهها
امّا ميار مش معدله تمشط في شعر تسنيم
نبيله: عارفه يا انوله ؟
نوال: اكره ما ع قلبي الدلع هذا
نبيله ضحكت: اسمك ثقيل مافيه ما يدلع
نوال: ع ساس انتِ اسمك ماشاءالله اخف من الريشه مش من ايام جدي
ميار نغزت نوال
نوال: والله نا صادقه عليش تنغزي فيا
نبيله: عادي عادي عليش تنغزي فيها من قال اسمي من ايام جدك؟
اسمي جميل معناه النبل
نوال: نبيله ماعنديش خلوق نتعارك معاك انتِ ف كبر امي مانخليني نغلط فيك
نبيله: لا اغلطي اغلطي وتشو
سناء: خلاااص خلااص ازعجتنا شن هذا اربع وعشرين ساعه تتعاركن كبار راكن!
سمر وقفت ع باب الدار: ميار
ميار بحتت فيه: نعمين ؟
سمر: نبيك شوي
ميار رفعت حاجبها وهزت راسها بمعنى شنو؟
سمر: شويا بس
ميار صبت باهي
وطلعتلها
مشت هي ويّاها ووقفت قدّام دار حنّاها وجدها هي و سَمر
ميار بصوت واطي: شن في خلعتيني؟
سمر متفركسه: بنقولك
ميار : خير؟ شن في اهدي
سمر : بصراحه انتِ غاليه عليا بكّل
ميار رفعت حاجبها: وحتى انتِ غاليه عليا بس شن سبب الفضفضه الي توا؟
سَمر : وما نحب نخبي عليك شي
ميار: انا وانتِ والبنات كلنا متعودات م نخبوا شي ع بعض متعودات ما نخبوا شي ع بعضنا شن في؟
سمر:لا انا بنحكيلك انتِ وريحانه وريناد بسس
ميار: وعليش؟
سمر: ريحانه و رناد لانهن كبار ويعرفن ينصحني امّا انتِ لان الموضوع لك علاقه بيه
ميار: شغلتيني شن في؟
سمر بتردد: م مح تعالي نقمعزوا برا كلنا ونحكيلكن
ميار: به يا ستي بس ريحانه مازالت ما جت
سمر: تمام تعالي بس
وطلعن للحاجر قمعزن الثلاثه سَمر وميار و رناد
____
د. مراد : انا بصراحه بعد درت صور وتحاليل طلع صاح كلام الدكتور سراج بس الكيس صغير
يوسف: يعني تقدر تديرله العمليه؟
مراد: طبعاً وهو صغير يكون احسن لكن بصراحه بنقول لكم شي
ناصر قلق: شن في يا دكتور؟
مراد: بعد العمليه ح يكونن فيه مضاعفات ممكن يفقد حتى الذاكره مؤقتاً اذا كان المريض ضعيف لكن اذا كان المريض قوي ح تكون المضاعفات خفيفه يعني ممكن اول مايصحى من العمليه مش قادر يحرك جسمه وضحك ان شاءالله تقعدوا فهمتوني؟
صالح: اها
يوسف: نحن نقدروا نطلعوه ونعالجوه برا
مراد: وعليش؟
يوسف: مرات تكون برا احسن والا مضمونه العمليه ؟
مراد ابتسم : هذي مشكله الشعب الليبي عندهم دكاتره عظماء ويطلعوا لدول برا يعطوا في ندوات ونحن لا مش مقتنعين بيهم وما عندنش ثقه فيهم
عموماً مش موضوعنا ويا سيدي العمليه هنا مضمونه 100‎%‎
ناصر هز راسه: اها
يوسف: باهي امتى ح تكون العمليه
مراد شاف الجدول متاعه: انا بعد شفته حددتها له بكرا الساعه ٢ ظُهراً
صالح: تمام بارك الله فيك يا دكتور
____
منى :نروحوا يعني
موسى:اها انتِ تعبانه ولازم ترتاحي
منى: باهي
موسى: انتِ اصلاً عندك موعد تمشي للحوش ترتاحي شوي وتردي
منى:باهي
موسى: وخلي البنات هنا روحي انتِ بس
منى: تمام توا نشوف
موسى: نراجي فيك في السياره
منى: تمام