زينب خشت للدار وسكرتها بالقفل
سليمان جا وراها وحل الباب لقاه مقفول دق ع البا : زينب ؟
زينب :
سليمان دق ع الباب اخرى : زينب حلي
زينب: لا
سليمان دق ع الباب بقوه: تحلي والا نكسره؟
زينب لوت شاربها ؛ باهي توا نحل بس اوعدني
سليمان يحاول يكتم غضبه؛ حلي بلا حانطه را نكسر على راسك ؟
زينب خافت : باهي باهي خلاص
وحلت الباب
سليمان دف الباب بقوه : شن الحناطه الي تديري فيها لوطه هذي؟
زينب بعباطه: شن درت؟
سليمان عصب: بلا عباطه؟ را خيرلك!
زينب خافت وعيونها تعبن دموع قالت بدلع : انتَ انت الي قعدت تصمط عليا وتقول تبي تاخذ عليا وحده وفي واحد يكره الصبايا ومش عارف شنو
سليمان خذاها في حضنه: المشكله ما نقدرش على دموعك هذينا خلاص خلاص كنت نبصر انا
زينب بدلع : معش تبصر
سلميان ضحك : تعالي نقولك بصاره احلى من هذي
زينب دفاته وضحكت: لا لا نبيش
سليمان ضحك: غير تعالي
زينب طلعت تجري وتضحك: لا لا
__
يوسف خش ع عبير في الدار
عبير صبت قدامه: ممكن نفهمني شن القصه وعليش ضربتني هالضرب هذا كله ؟
يوسف خذا نفس عميق : بس توعديني
عبير تمسح في دموعها: شنو؟
يوسف مسك يديها: انك ما تسيبيني؟
عبير فكت يديها و حطتهن وراها وهزت راسها بمعنى لالا : لا ما نيش واعدتك
يوسف قرب منها: ارجوك
عبير بحزم : لا لا لا وهي احكي را نكلم واحد من خوتي يجي ياخذني انا وولدي وما نقعد لك فيها ثانيه
يوسف خذا نفس : نجوى
عبير باستغراب : كنها؟
يوسف قمعز ع السرير : قمعزي نحكيلك بهداوه
عبير قمعزت جنب يوسف وهزت راسها: و باهي؟ احكي؟
يوسف خذا نفس : اححمم نجوى الكلبه شكلها مصاحبه والا ما نندري عليها شكلها مكلمه واحد يجيها دايره موعد يعني
وانا كنت مروح من العمل
شفته لاصق في الباب ويوشوش ويقول يا في كلام سخيف جن جنوني
جيته نجري نبيي نقتله ومالحقتش نمسكه لان كراعي خبطت في الدرجه وهو هرب
خشيت نبي نذبحها قالتلي ان هي ما تندري على شي وما طلعت بكل وقالت انك انتِ كنت
عبير رفعت حاجبها: كنت برا مع الراجل
يوسف هز راسه: قالت انك كنت لوطه نازله برا وقالت مرات طلعتي للشارع
عبير عيونها تعبن دموع وحطت صبعها على صدرها : وانت صدقت فيا
يوسف :ء انا م
عبير قاطعاته: وكيف عرفت اني بريئة؟
يوسف خذا نفس: تذكرت ان رصيد الارضي كامل و ولعت الارضي وشفت اخر رقم مكلمتيه عبير ارجوك نجوى هي الي تبلت واء انا م نيش
عبير قاطعاته و حطت يدها على فمه وقالت بحزم وعيونها مليانات دموع : ما تحكي شي ما نبي نسمع منك ولا كلمه اول ما ياذن الفجر تاخذني لحوش بوي تمام!
وصبت
يوسف مسك يدها بترجي: عبير
عبير حاولت تفك يدها لكن يوسف كان اقوى منها وماسك يدها زين: يوسف لو سمحت ولا كلمه واطق يدي ونفذ الي نبيه ارجوك !
يوسف طلق يدها ونزل راسه وقال بصوت مخنوق : تمام
__
نجوى : حي بعدك نسمع فيها امبدري تعيط شكله دقها طريحه باهيه
سناء: حي عليك حي عليك جاي دورك معناها والبطريحه ح تكون دبل
نجوى تمسح في دموعها : باهي خلينا فيك انتِ توا عليش مروحه تحسابيني صدقت انك جايه تباتي معايا شن صاير معاك ؟
سناء : تعاركت مع جلال بكرا توا نحكيلك اكيده نبيله قريب تطلع من الحمام
نجوى هزت راسها : تمام باهي
وسمعت صوت الحمام تسكر
نجوى: قيسها نبيله طلعت
سناء: اه خلاص انهي ما تحكي شي
نبيله طلعت من الحمام وخشت عليهن في الدار : بنات شراي هييييي كنك يا نجوى
نجوى تضحك بـ مجامله: كني؟ شن في؟
نبيله قربت منها : عيونك حمر باكيه؟
نجوى ب ابتسامة صفره: هي و عليش نبي نبكي
سناء ضحكت: عليش تبي تبكي يام ؟
نبيله ضحكت : مندري عيونها حمر
نجوى تخزرطت: اه؟ عيوني حمر ما ندير في قطره متاع ضعف النظر
نبيله سلحت المنشف الي على شعرها: اها ؟ مازلت قصة ضعف النظر عندك؟
نجوى: كيف مازالت ؟قالولك تحول بالسحر هي
نبيله: وكنك نطيتي فيا يا بتي؟
نجوى لوت شاربها: لا ما نطيت
سناء : خلاص انتن الاثنين انهن هي خلونا نفتحوا على التمثيلية ونجيبوا تسالي وشوكلاطات ونديروا كابتشينو
نبيله: و جبت معايا كيكه حطيها بالمره
سماء صبت : باهي هي تعالن ديرن معايا
نبيله تنشف في شعرها: نشف شعري ونلحقك
سناء لوت شاربها: عادتك ما تغيريها ديما تجي في الاخير وتاخذي النوره
نبيله ضحكت : خزي عليك
سناء : طلعت من الدار
نبيله تنشف في شعرها بالمنشف : باهي يا نجوى
نجوى: ها ؟
نبيله: شن حالك؟
نجوى: باهيه
نبيله: ماعندك ما تحكي
نجوى: مكسده
نبيله: ما زلتي ما خشيتي في سريب العلاقات
نجوى : ها؟ علاقات ؟ لا يابتي كله الا ثقة الاهل
نبيله حطت المنشف وخذت مشط تمشط في شعرها: اها ما شاء الله
نجوى : باهي وانتِ
نبيله: ييييي عليا انا في الجامعه درهو كبدي يرموا في ارقام و
يرموا في كلام وانا فايتتهم
عارفه حتى الدكتور الي يقري فيا جا
وصبا عليا
وقالي نبي نخطبك وانتِ عاجبتيني
قتله كنك انتَ دكتور وانا طالبه عندك وما فيش بينا الا كل احترام وتقدير بس
وانا اصلا رافضه فكره الزواج
وعاد هو ما صدق حطني في راسه بعدها قعد ديما حاط دوبه من دوبي
مشيت وحكيت معاه وقتله عليش يا دكتور
قالي انا احسن دكتور في الجامعه تحطي دوبك دوبي تي والله نسقطك !
انا جتني صدمه عاد اخر سنه ليا و يسقطني ؟
اجديته اجديته ماصار شي جبتله خوي ودرت فيه شكوى
ايوه وبس
نجوى بحتت فيها من فوق للوطه : اها باهي
نبيله صبا: هي نعدوا نساعدوا اختك سناء صبي هي بلا تنبله
وطلعت
نجوى : تف تدره الكبد بنت خالة العازه!
