سليمان طق طقتين
وفتح الباب لان عارف ان خواته وخوه جوا بس
سليمان : سلام
: وعليكم السلام
سليمان: الف مبروك يا وخيتي يتربى في عزكم ان شاءالله
عبير تكنطت : الله يبارك فيك يا خوي يتربى في عزي ان شاءالله
سليمان غمض عيونه وفتحهن وبصوت هادي : ايه عز بوه وامه !
زهره تغير في الجو : اي شن جبت لعبوره معاك وخيي؟
سليمان : هديتين هذي الهديه الاولى شكلاطه جت فيسع فيسع والله سامحيني
عبير : ربي يخليك ليا وخيي شوفتي لك عندي بالدنيا
سليمان ضحك : والله كان مبلغتينا انك بتولدي را جبنالك ذهب
زهره: ايه ايه ياريتني عبير مدلعه من كل الجيهات
سميره: والهديه الثانيه شن هيا؟
اسلام: اي صح؟
سليمان: لا تطلعوا كلكم معايا برا الا عبير عشان نخششولها الهديه
اسلام: كيف ؟
سليمان غمزله : هديه كبيره نبيكم تدخلوها معايا
سميره فهمت: هي صبي يا زيزي ندخلوها
زهره :كيف شني؟
عبير حست ان في حاجه غلط م: هدية شن يا وخيي؟
سميره فنصت في زهره وبهمس : اوقفي بسرعه
سليمان: توا تشوفيها
وطلع وطلعوا في جرته خوته
قعدوا قريب دقيقتين برا
وعبير في الدار تخمم
زعما خيرهم طولوا زعمك صايرتلي حاجه ومايبوش يقولوا؟
والا ماما صايرلها حاجه ومايبوني نعرف انظر خيرهم الي طولوا ه التطويله يا نا علي انا بدا الفار يلعب في عبي
وفي عز تخميمها و تفكيرها طق عليها الباب
عبير ساوت قعدتها: اُدخُل ؟
خش يوسف مبتسم وماسك في يده باقة الورد والكيسه : اهههه احلى ادخل نسمعها في حياتي استاحشتك يا حبي الف مبروك عليا وعليك يتربى في عزنا ان شاءالله ويطلع من حملة القران الكريم يارب
عبير مصدومه: شن هذا؟ وعليش جاي انتَ؟ واستاحشتك؟ تستاحشك كلاب جهنم ان شاءالله
ومبروك عليا وعليك؟ هههاي
و يتربا في عزنا؟ تحلم انتَ امالا؟
يوسف قرب منها وباس راسها: الله محلاك وانتِ معصبه قديش رايفت ع عصبيتك وغيرتك وكلام السمح
عبير دفاته : يا اخي لزيتك هزبتك شتمتك وانتَ شي شي مُصِر
ماعندكش كرامه انتَ؟ اول مره نشوف حد بلا كرامه هك؟
يوسف قمعز جنبها ع السريع : اول شي ما فيش كرامه ف الحب
تمام! ثاني شي امسكي الباقه هذي "ومدلها الباقه وقعد يفتح ف الكيسه
شد يدها ولبسها الاسواره "
خذا يدها وباسها
ثالث شي سامحيني والله خلاص تبت وماعاد تنعاد سامحيني انتِ عارفه ان نجوى محبوسه ف الدار وحتى الجامعه انحرمت منها ؟ ع خاطرك وهذا كله بوي مازال ما سمع بالقصه
وكل يوم دايرلي فرو ف السماء عشان نردك انتِ عارفه انك قديش عزيزه عليه ويحبك والا ؟؟ وقديش انا نحبك والا؟ خلاص سامحيني يا قلبي والله توبه والله ما تنعاد انا نحبك ونموت فيك و مرايفلك بكل ومرايف لصوتك ولهداريزك ولـ الغناوه الي كنت نقول فيها لك كل يوم قبل ما ترقدي تتفكريه؟
"مانك مثيل لحد
انتِ الغلا والروح وانتِ الود
؏ الكل مختلف
مانك مثيل لوالي
انتِ السعاده كلها وانتِ خريطة دنيتي
وبعون ربنا جنبك نكون سند
مانك مثيل لغيرك
في الحُب في طبعك وفِي تفكيرك
ممتاز لاول في الغلا تقديرك
وبالشعر مهما نوصفك ما يسد
مانك مثيل لحد
انتِ الغلا والروح وانتِ الود"
