سعيده: هذا من تدليعك لها قعدت تضارب هي والبنته ف الشارع الخبر هذا ماداروه حتى العيال
سالمه سكتت
سناء: عادي يا حني طفلة
سعيده:انتِ انصبطي محد حكالك
سناء شقلبت عيونها
سعيده: هذا الي شاطرات فيه شقليب العيون
كوثر توشوش في عبير: خذت حقنا ثالث ومثلث
سعيده: نجوى يانجوى
نجوى حطك في فجوه
نجوى شقلبت عيونها: نعم يا حني ؟
سعيده: بعد قتلك حطك في فجوه رديتي....ناديلي ناصر
نجوى: مش قاعد
سعيده: رني عليه
وبحتت في عبير وكوثر :كلمن رجالتكن نريدهم يكسدوا معايا
عبير: في الجامع يوسف
سعيده: اهها وبحتت في سناء: انتِ امتى جايك راجلك المغرب اذن من بدري
سناء: قاعده في حوش بوي يا حني
سعيده: بوك ماصدق طلعتي من الحوش وشكله حتى راجلك ماصدق جابك لهلك🤣
سناء:توا نكلمه ه الوقت يا حني
سعيده: كلمي كلمي
____
:يوسف؟
يوسف: اوووو وين وين يا راجل مش باين؟
:والله مشاغل انتَ شن جوك؟
يوسف:تمام الحمد لله حال هالدنيا
:به الحمدلله نبيك في موضوع
يوسف:ان شاءالله خير تفضل؟
:والله ...
___
ناصر: سلام عليكم
:وعليكم السلام
سعيده: مرحبا مرحبا تعال اقعد حذايا صبي يامنى ديريلنا شاهي وكعك واحسبي يوسف وصالح وجمعه اكيده قريب يجوا
جمعه: السلام عليكم
سعيده: الطيب عند ذكره
ناصر: سناء راجلك برا قال نرن عليها ماتردش
سالمه: كنك ماقتله تفضل؟
ناصر: قتله لكن قال عنده مايدير
سناء صبت تلبس في عبايتها : هي مع السلامه
سالمه: مربوحه
وصبت ف جرت بنتها
يوسف: السلام عليكم
وعليكم السلام
سعيده: مرحبا بالغالي مرحبا
يوسف: خير يا امي كيف حالك
سعيده: بخير بخير
عبير: يوسف جبت عبدالرحمن
يوسف ضرب جبهته: اوووف نسيته بكل توا نمشي نجيبه بس نبي نقوللكم حاجه قبل
ناصر: انا طالع شوي اخرى كان تبوا نمشي نجيبه
يوسف: تمام باهي
سالمه خشت هي ومنى
سالمه: كوثر صالح ركب فوق وقال ناديلي كوثر
كوثر صبت: هي توا نمشيله بالسلامه
عبير تشرب في الشاهي وتصلي ع الرسول في سرها
سعيده: ف ايش تقولي ياعبوره
عبير: نصلي ع الرسول يا امي
سعيده: امباهي اللهم صلي وسلم وبارك عليه
"صلوا ع الحبيب المصطفى"
سعيده لفتت انظارها ليوسف: ايش كنت تريد تقول يا يوسف؟
يوسف: اححم والله اليوم ياباتي
جمعه: كنك شن في
نجوى ضحكت: كنك ازوجت ع عبير؟
ناصر : مثقل دمك
عبير: فال الله ولا فالك
سعيده: قولي خير يا العانس
يوسف: صكري فصختك
نتو فيها كلهم مسكينه
جمعه: خلاص انهو ! كنك يايوسف شن في؟
يوسف:اححم اليوم موسى جارنا طلب يد اختي منى
ناصر: مفيش مشكله نقصوها ونعطوها له 🤣
يوسف: مثقل دمك
جمعه: انصبط
منى صبت تجري
نجوى عقدت حواجبها
سالمه: مش صغيره؟
سعيده: اين صغيره؟ كبيره خلاص خليها تمشي خير ماتعنس
نجوى طلعت برا
سالمه: هو طلب منى والا قال وحده من خواتك؟ كان هذا ياخذ الاكبر نجوى
ناصر: شنو ياخذ نجوى اختار من بين الاقواس هي؟
يوسف:هو قال نبي منى ف انتِ يا امي اسأليها وخوذي رايها
سالمه:باهي تمام
يوسف:والراي الاول والاخير لك ياباتي توافق ع الراجل والا لا
جمعه صبا :خلي نشوفوا اختك توافق والا لا قبل
وطلع م الدار ولحقاته سالمه
يوسف: هي بالسلامه انا عبي تركبي؟
عبير: شويا نكسد مع امي ونجي
يوسف: باهي وبحت في ناصر راك تنسا عبدالرحمن
ناصر: هي انا طالع بس وين يسكن هو؟
يوسف: ف الـ... حذا جامع ..... العماره اللي مقابلته
ناصر: باهي هي بالسلامه
نوال: يا عبوره حتى انا بديت نحفظ في قران حنقعد زيك حافظه القران كله
عبير: ماشاءالله ماشاءالله وايش اتمنى العين لصبيها
نوال: شن معناها؟
عبير:معناها انا مانتمنالك الا كل خير
نوال : اهها
__
منى: يانعلي يانعلي يا قلبي عليك فرحه
نجوى: ياما يطلع منك اهو طلعتي عاجبتيه يالغضيبه
منى حاطه يدها ع قلبها وفرحانه: ينعلي مش مصدقه
نجوى: ماتبيش تكملي قرايتك؟
منى: حنقوله انديروا خطوبة توا وهك لين نكمل محد التمريض !
نجوى برفعة حاجب: امباهي بس حسيت مازال بدري
"نجوى حاسه بشي غريب داخلها هي شبه غايره من منى لان منى اصغر منها وانخطبت وهي بدت تحس ان القطار فاتها وان صاحباتها كلهن انخطبت وهي المسكينه قاعده في حوش بوها مازال ماانخطبت او تزوجت *قعدت عانس*"
هذا تفكير نص بنات ليبيا
"لكن في جزء اخر من بنات ليبيا يعجبني لاتهتم بزواج ولا شي تحب تقرا وتتعلم بدون ماتعصي ربها او توطي راس اهلها واهم شي عندها انها تحس من نفسها وتمشي للافضل ولاهمها الراجل ولا الزواج حتى لو حطت هالموضوع في بالها ح تدور راجلها يشبه تفكيرها متفتح بس بدون مايعصي ربه او يدير الغلط ويحبها ويصونها ويخاف عليها كيف مايخاف على نفسه"
____
ناصر يرن ع عبير: ايوا
عبير: ايوا ناصر؟
ناصر: نكلم في يوسف مايردش عليا نقاله مقفل
عبير: اي توا حطه في الشحن وخش يدوش تبيه في حاجه؟
ناصر: كلمي سليمان ينزلي رحموني
عبير: تمام في امان الله
ناصر: اوكي
ععبير: ايوا زوبه؟
زينب: هلا عيوني
عبير: قتلك ناصر لوطه قدام العماره جاي ياخذ في رحموني قولي لسليمان ينزله له
زينب: والله سليمان مش قاعد مشا يجيبلنا في حاجات عشان اماني جتنا
عبير: الله اماني القرده عندك
زينب: اهها جت اليوم
عبير: به كيف يصير توا
زينب: قوليله يركب فوق وتوا نمده له من عند الباب
عبير:باهي تمام انتُوا الدور الثاني الشقه 6
زينب: ايوا
عبير: تمامف امان الله
زينب؛ سلام
_
:ايوا نصور
: ايوا عبير؟
:قتلك نصور خوي مش قاعد اركب فوق توا تطلعه لك زينب مراة سليمان
: ماشي اي شقه؟
: 6 الدور الثاني
: تمام ماشي اوكي
: ف امان الله
___
زينب: اماني طلعيه انتِ انا كان طلعاته سليمان ح يديرلي طواطي
اماني: وين نريد طالعه للراجل؟
: مديه له من عند البا ارجوك منّي
: اوووف ماشي
طق طق
: هي منّي حلي
: باهي اوف
لبست محرمة الصلاة وخذت رحموني وحاجهاته وحلت الباب
: السلام عليكم
ناصر رفع عيونه ع السريع بس سرح من جمال اماني لكن فطن لروحه وتنحنح وحك حاجبه: وعليكم السلام
ومد يديه خذا منها عبد الرحمن: بارك الله فيكم سلميلي ع سليمان
زينب تنادي من ورا الباب: اماني اماني
اماني التفت: ايوا؟
مدت لهاية عبد الرحمن: نسيناها
اماني: هاتي ومدتها ل ناصر
: وفيك بارك الله يوصل
ناصر برم ونزل من الدروج
اماني خشت وسكرت الباب
ناصر يحكي في عقله:سمحه الزح تهبل.....لكن متجوزه ياناصر.....ياحظه بيها سمحه.....لكن عبير قالت اسمها زينب بس نادتها وحده يا اماني....مرات اسمها اماني ويقولولها زينب.....لكن سمحه العطيبه....استغفر الله متجوزه ياناصر كنك
__
طقق طق
عبير تلبس في ملاية الصلاة: هي هي
