مر الوقت وجو اهل العريس
نبيله تحكي بصوت عالي عشان عبير تسمع : يادوجي شفتي الوليه هذك من بدري تبحت فيا شكلها تبي تخطبني
وتصبي الوليه من ع الكرسي وتجي شور طاولتنا
_____
نوال : ماما ماما جت
سالمه: صبت تجري
وتخش عزوز مكرمشه لين خلاص ومكحله عيونها ومحنيه يديها حنه برتقاليه
سالمه: خير ياعمتي مرحبتين بيك
سعيده: خير خير شحالك
سالمه: بخير ياعمتي خشي تفضلي
سعيده :وين كرسيي؟
سالمه تشير ع الكرسي الي قدام باب الصاله: اهو ياعمتي ف مثابة ام العروس انتِ قمعزي
سعيده ترفع ف حواجبها بطريقة تضحك: جو ل العريس ؟
سالمه: من بدري يا عمتي كنك طولتي؟
سعيده: الفرخ رمضان سواقته كي وجه قريب خششنا ف الشجر
____
نوران صبت : نمشي للحمام انا
عبير: تمام
قعمزت الوليه جنب عبير : كيف حالك يابنيه
عبير ابتسمت للوليه:الحمدلله كيف حالك انتِ ياعمتي
الوليه: بخير والله امم من انتِ؟
عبير: والله امي ماجتش ياعمتي لكن عمتي سالمه بمثابة امي
نبيله: كيف حالك ياعمتي
الوليه :الحمدلله كيف حالك انتِ
نبيله: عرفتيني ؟
الوليه بملل : لا والله
عبير ضحكت
نبيله احرجت : بنت مبروكه
الوليه ابتسمت بمجامله
الوليه لفتت انظارها لعبير وقالت: والله وليدي مواليد 75 وندورله ف عروس وانا ولدي دكتور وصاحب جلال راجل سناء لان جلال ولد خوي يقعد وبصراحه انتِ عاجبتيني من بداية الفرح تجري هك وهك ماشاءالله عليك
نبيله محروقه قريب تصبي تشنق عبير
عبير بحتت في نبيله وبعدين ردت انظارها للوليه وابتسمت ورفعت يدها للوليه وورتها خاتم زواجها: بالجوده بيك بس نمشي نسأل راجلي ونرد عليك
الوليه: ينعلي اسفه والله مابين عليك ان متزوجه ياحظه بيك راجلك ربي يهنيك شن تقربي لسناء
عبير ابتسمت: عادي عمتي ولا يهمك وتسلمي
نقعد مرات خوها
الوليه: قريبتنا يعني
عبير ابتسمت
زينب تضحك هي وسميره وكوثر
زينب :حلال توا تقولي للمرا شوفي نبيله تدور ف اي عريس والسلام
الوليه: عندك صغار؟
عبير: عندي عبد الرحمن
الوليه: ماشاءالله وينه؟
عبير: عند صاحبتي يتَعّب بسلامته
الوليه: اها كم لك متجوزه؟
عبير:سنه وشهور
الوليه:ماشاءالله مواليد الكم؟
عبير : 74
الوليه بصدمه: الله يبارك يبان عليك اصغر77
عبير: تسلمي من ذوقك
الوليه:مرات اي من عيالهم؟
عبير: يوسف
الوليه: اها... به هي انا نستأذن
نبيله: خليك يا عمتي
الوليه: لا والله نقمعز حذا حبيبه
عبير : تمام
__
سعيده: يا نوال وين امك؟
نوال: اهي حذا عمتي سالمين
سعيده: هيي حذا سالمين القرده امشي كلميها اجري مانقبلها سالمين هذي انا
نوال: حاضر ياحني
نوال: امي امي
سالمه: ايوا؟
سالمين: ماشاءالله هذي بنيتك؟
سالمه: اها
سالمين: ماشاءالله عليها عليك السمحه ناخذوها لخلوفه ولدنا
سالمه ابتسمت
سعيده تبحت من بعيد: ف ايش يهدرزن زعمك
سالمين رفعت يد نوال وشيرت لسعيده: ناخذوها لولدنا
وتشير بيديها بمعنى ناخذوها
نوال مصدومه
سعيده تشير بيديها بمعنى جيبي البنت : لالا هاتي البنت جيبيها
سالمين : لالا ناخذوها
سعيده تشير بيدها بمعنى حي عليك وحي: اتشي البنت
سالمين: لا خلاص خذيتها
سعيده تشير بيديها كيف البلديات :هاتي البنت خيرلك
سالمين تضحك: امشي لحنك را تاكلنا
نوال محرجه: امي تبيك حنينه
سالمه: هي بعد اذنكن
وتقول في عقلها : حي علي وحي توا تسود عيشتي
مر الوقت وخش جلال والبنات كلهن حاسدات سناء عليه
بجد جميلل
طول وعرض ولحيه وعيون عسليات ومبسم يضحك وسموريه تهبل والبدله الي راسمته
__
ف السياره
سعيده من قدام مع ولدها جمعه ونوال ومنى وسالمه
سعيده: مصح وجهها تبي تاخذ البنت ياكلا نعطوا بنيتنا لسالمين وولدها
جمعه: كيف؟
نوال وجهها انسلخ
سعيده: سالمين مرات ابريك تريد بنيتنا نوال لولدها عليش من قل الرجاله ؟ راك تعطيها له يا جمعه حي عليك تعطيها لهم ياجمعخ
منى تغير ف الموضوع: كنك ماجيتي الا اليوم ياحني
كنك ماحضرتي الفرح من البدايه؟
سعيده: والله كرعيا يوجعن فيا طيب في اللي اليوم جيت
____
عبير تمسح في مكياجها: كان نقولك يا اوسي شن صار؟
يوسف: شن صار
عبير: في وليه خطبتني
يوسف: من هذي؟ وعليش تخطب فيك مش شايفه الدبله؟
عبير: كنك اوسي عزوز اكيد مافطنتش
يوسف معصب: اكيده توا تحكي عليك لولدها وتوصفله فيك ومندري ايش
عبير: يوسف كنك كبرت الشطحه؟ وحده خطبتني وفضت وقلتلها متزوجه سيد التريس... وسكتت شوي...
اهدا حبيبي ماحتى توصف في شكلي واصلا شفتها تحكي مع بنيه اخرى اكيد حصلتله
يوسف: شن اهدى ؟ اكيد تحكي عليك توا
عبير: مستحييلل توا خلينا نهدرزوا ونحكيلك ع الفرح ...وبعدين امبدري كنت تبيني ننزل لما نبيله ركبت ها؟
يوسف ضحك: توا قلبتيها عليا؟
عبير ابتسمت
____
بعد شهر
