ظلمات حصونه الجزء الثانى (الأنتقال من الظلمة إلى النور)

-مناقشة-

عاملين إيه يا بنات يارب تكونوا بألف خير.

مناقشة مش عارفة هتكون قصيرة ولا طويلة، المهم هقول فيها على شوية حاجات كده اتمنى تكون واضحة.

أولا هتكلم على تأخير الفصول وصغرها، صلوا على النبي، انا حاليا فى فترة حياتي حرفيا ماشية بالمعكوس، مش عايزة أتطرق لتفاصيل ممكن تكون متهمش الكثير منكوا وتكون تضيعه لوقتكم، بس حرفيا أنا تعبانة جدًا والنفسية تحت السفر، ضغوطات أسرية ومشاكل عائلية ومسؤلية زوج وبيبي وشوية حاجات كده حرفيا اليوم بيتبخر مني، والله حتى مأهمله جدا فى نفسي ومُعرضة إن جوزي يتجوز عليا فى اي لحظة😂😂

فمعلش أستحملوني وأنا هحاول متأخرش أوي كده، بجد مش عايزه أوقفها تاني لأنها بتساعدني أخرج الطاقة السلبية اللي جوايا، بصوا فى خطوة كده أنا مقبلة عليها وهي اللي شاغله كل تفكيري ووقتي أدعولي من قلبكوا ربنا يكملهالي على خير زي ما انا بتمناها وإن شاء الله وقتها بالي هيروق وأخلص الرواية وأنزل أسيرة مخاوفي، وفيه رواية كده مفاجاة تقيله أوي هعملها بس محتاجه ذهن صاغي ووقت كافي عشان هتكون حاجه تانية خالص، أدعولي من قلبكوا والله بجد فى أمس الحاجة لدعاء بتساهيل ربنا🤍🤍

ثانيا الرواية

بصوا يا جماعة ديانة وزينة مش مُعقدين أو باردين أو أي حاجة من الكلام اللي بعض المتابعين وصفوهم بيه ده، ديانة وزينة مروا بتجربة مشابه لبعض ومريرة جدا، انا ك منة لو مريت بتجربة أي واحدة فيهم حقيقي عمري فى حياتي ما هسامح ولو كان بينا سنين من الحب، الكرامة والكبرياء وإعتزاز النفس حاجات كبيرة جدا، والاهانة احساس بشع والاتنين حسوا بيها.

قلة الثقة تدمر اي علاقة وده اللي حصل مع زينة، لو مالك كان واثق فيها، كان على الاقل سمعها، لكن ده حتى مسبش عقله يفكر للحظة، حتى لو مش سوي نفسيًا، حتى لو كان مجروح قبل كده، هي ملهاش ذنب، هي مش مركز تأهيل، هي مش مجبرة تتحمل أي أذى أو إهانة لمجرد انه مكنش في واعية، اللي مالك عمله كارثة ومصيبه سابت اثر نفسي كبير، لازم زينة تتعافى منه الاول عشان تفكر إذا كانت هتقدر تسامحه ولا لا، وعلى فكرة حته تسامحه فى حالة مالك وزينة تعتمد على مقدار الحب اللي بينهم، يعني لو فيه رصيد كافي من الحب هل هيكون كافي لدرجة انها تسامحه او لا؟

اما بقى بالنسبة ل ديانة، فهي محتارة ومشوشة، مش عارفة تعمل ايه، وده هيوضح الفصل الجاي، ديانة اتربط فى بيت مليان حب ودفئ، علاقة اسرية سوية اب بيحب مراته واخوات بيحبوا بعض ومفيش تفرقة بينهم، حتى وهي عارفة انها مش اختهم، عمرها ما حست بكده، عمرها ما اضربت قلم واحد بس لا هي ولا حد من اخوتها، فجاة اتجوزت واحد ضربها واهانها واغتصبها ، عايزنها تعمل ايه! اي نعم هو مكنش سوي نفسيا وتربيته كانت غلط ومر بحاجات قاسية جدا، بس بردو هرجع واقول هي مش مركز تأهيل، هي مش مجبره تسامح وتتعايش مع واحد اذاها جسديا ونفسيا.

اي نعم مشتته بسبب مشاعر الحب اللي ظهرهالها بس بردو لا، مش كفاية، هي من جواها لسه فيه حاجز الخوف وكسرة القلب من نحيته، لازم هو يغير كل ده وعلى الاقل يظهرلها حبه فعل مش كلام.

الحاجه الحلوة فى جواد واللي ممكن تشفعله بالنسبالي، إنه خب ديانة وتخلى عن فكرة الانتقام من قبل ما يعرف الحقيقة، بس ديانة متعرفش كده، جواد حبها واتخلى عن انتقامه عشانها حتى وهو متاكد ان لبنى هي اللي قتلت امه، ومع ذلك اعترف بحبه ليها وهو سكران بس ديانة كانت وقتها فاكره سكران وبيقول كده عشان اللي عمله معاها بعدها.

اتمنى تكون الفكرة وضحت ومحدش يقولي ياريتك كتبتي الفصل بدل المناقشة عشان ده تعليق سخيف، اهم حاجه يكون الكل فاهم وماشي معايا على الخط.

هحاول اكتر فى المشاهد بين الابطال بس راعوا ان كلهم ابطال وانا شخصيا والله بصدع من كتر التفكير فيهم كلهم، بس ان شاء الله هحاول اراضيكم.

محدش يسالني على مشاهد ملك واياد عشان نش عايزين نحط البنزين جمب النار دلوقتي، الواد مش على بعضه ومش مضمون، مش عايزين نزود قائمة المجروحين واحده.

كفاية كده لحسن عيني بتقفل وبنام على نفسي، تصبحوا على خير.

دُمتم بخير♥️♥️