مكاتيب🤍

المقدمة

#مكاتيب 🤍
#المقدمة🤍
......
.
.
.
.
.
.
.
.
.
.
ليا زمان رايفت حتى قطاري رايف عليا😂 .. قبل كنت انش من مكان لمكان ومن قصة لقصة .. ورديت ان شاء الله نلف ونحكي ..
وسط اوراق مذكراتي بديت نكتب .. بحروفي قصة جديدة .. قصة تعب ومعاناة .. اول كلمة خطيتها وانا نبحت من روشن القطار اللي ناوي يفوت بيا لحوش فيه عرم حكاوي .. بسم الله نبدأ🤍
......
مكاتيب .. كل شي يصير لنا ف هالحياة مكتوب .. من اول مانحطينا نطفه ف بطون امهاتنا ونحنا معروفه حياتنا حتكون كيف .. لا هذا ياخذ نصيب هذ ولا هذا ياخذ حق حد .. كل واحد له نصيب وحق يرضيه ويفيض من الرضى .. حط بيا قطاري لحوش جميل .. مبني من البناء الجديد .. فتحت باب البوابة وخشيت .. عطر وفل وياسمين .. تصميم فيلا مصغرة ع دورين .. بجنان كبير واسع .. وف باب ف الوسط ع اليمين يفصل بين هالفيلا وفيلا جنبها باين انها متاع العيلة لأنها اكبر .. خطيت خطواتي وسميت بالله وفتحت الباب .. هدوء .. سكون .. الباين ان الكل راقد .. صوت راديو كاسر صوت الهدوء هذا .. مولع فيه قرءان .. قربت بخطوات اكثر .. سقيفه طويله ف الوسط منها باب كبير .. فيه مدخل كبير بمرايته .. ع اليمين باب شكلها مربوعه .. كملت وخشيت للباب الكبير .. بانت عليا صاله كبيرة .. بس طويلة طول .. ع اليمين فيها 3 ديار .. وحمام ..وف طاولة كبيرة ف النص .. ونهايتها دروج جنب الدروج مطبخ .. وكان صوت الراديو جاي منا .. طليت مراه كبيرة اشوية ف السن .. شكلها توتي ف الفطور .. عرفتها .. خدامة الحوش إسمها أمينه .. مراه كبيرة ف السن جنسيتها مصريه بس عايشه ف ليبيا من زمان .. ومن وهيا صغيرة كبرت ف الحوش هذا وهيا اللي تخدم فيه .. ابتسمت وانا نشوف فيها تسبح .. وبرمت ركبت من الدروج .. درجه ورا الثانية لين لقيت روحي ف وسط سقيفه صغير تربط بين ممرين .. مشيت للممر اللي ع اليمين .. ممر طويل كيف متاع الفنادق بالضبط فيه ثلاث ديار .. شيرت بصبعي ع اول دار .. دار الاب والام .. وفعلاً كيف نزلت يدي طلع الحاج محمد وهو يتوكل ع الله .. ووراه مراته حنان وهيا تسكر ف باب الدار .. وتوصي فيه ع حاجات الجمعه لمة حوش العيلة عندهم .. حنان ومحمد ضنا سيد خذوا بعضهم ع حب .. وصراعات وخبر ماهو خبر .. وف الاخر خذاها محمد ربي عطيه من خيره .. راجل صلب صلاي يخاف من ربي وديما ع الحق .. كلمته ماتقعدش اثنين بذات مع عياله .. حنون بس صعب بكل وبرا حوشه شكل وجوا حوشه شكل ثاني وعصبي بطريقه مش عاديه .. عكسه حنان .. هاديه ومسالمه وف حالها .. حنونه لين فايض فيها من الحن .. بس يوم تعصب الله لا تروعك .. خليتهم ورا ظهري وجيت لثاني دار .. صوت اللي فيها يقرا ف الكهف صوته واضح .. جميل حَسن .. الصوت صوت اول اولاد محمد واللي هو سِيف الحق .. خريج تربية إسلامية عمره 33 عام .. الكبير ف خوته يأخذ من اطباع باته واجد شخص قيادي حسن الخلق والخلقه جميل بشكل مش طبيعي .. وبالنسبة لأمور الدين حافظ كتاب الله .. بس مش متدين بدرجه واو يعني يتبع الدين والسنة بس مش باللبس واللحيه الطويلة .. الدار اللي جنبه .. صوت التلفزيون فيها عالي .. بس اللي جوا الدار راقد بالنوم .. مسكين مش منا اي حد خريج هندسة نفطية يتعب نفسياً بسرعه😂 .. وهذا الإبن الثاني اسمه أبوبكر عمره 30 عام .. خريج هندسة نفطية .. ويومين ف حوشهم وعشرة ف الحقول .. إنسان واعي .. مرح .. بشوش .. ف الجمال مايقلش ع خوه سيف .. بس ف الاطباع طبعه اخف من سيف مش حاد الا ف امور معينه واما الباقي سلس وجوه سمح .. متزوج من نور وحنحكوا عليها تحت .. طلعت من هالممر .. وخشيت لثاني ممر .. كان نفس الشئ ثلاث ديار .. وحده من الديار دار بناتية .. فاضية لأن اختهم الوحيدة فوز الصالحين متزوجه من شهر بس .. اصغر من أبوبكر بسنة .. وخذت حب حياتها .. خريجه صيدلة .. انسانة محترمة وحنونه كيف امها بالضبط .. ثاني دار كان صوت شخير صاحبها مالي الممر .. ضحكت وانا نسمع فيه .. وهذا رابع عيال محمد واللي هو أنس بن مالك .. عمره 25 عام .. يقرأ قانون .. انسان مايختلفش ف خوته ف الجمال بس يختلف عليهم ف الطبع .. بارد بليد مايحسش😂 .. لسانة اطول منا وديما ماد وجه ويضحك .. وصلت ف اخر دار .. البطل متاع قصتنا كلها .. زكريا اللي لفتني عند داره صوت المنبه اللي قالب الدنيا بس مافيش حد ناض وطفاه .. عمره 18 عام يقرا ثالثة ثانوي قسم العلمي .. ماعندش حلم معين .. لذلك مش معدل مزال ع موضوع التخصص .. إنسان اشر من خوه انس .. رغم ان يختلف عليه ف الفصلات اللي يدير فيهن فجأة .. عنده طبع باته ف التعصيب .. ولو شخص مايعرفش مايعطيش وجه اصلا .. وهذا هو اخر شي ف هالحوش .. نزلت كيف ماجيت .. فتحت الباب بنطلع قابلني اللي خاش من الباب الفاصل .. وهذا إسماعيل عم زكريا الأصغر وكبره ف العمر .. فتح الباب وخش وهو يلقي ف السلام ..
محمد الأب عنده ثلاث خوت واختين  .. مصعب وهذا اصغر من محمد ومتزوج اثنين .. وعنده شابين وبنتين تؤم .. ومن مراته الثانية اطفال مزالو .. مروة .. وهناء صباياه .. وعياله رؤوف وخليفه .. وورد وفل ..الشباب من عمر سيف وابوبكر والبنات من عمر زكريا ..
الثاني صهيب .. متزوج من اخت حنان تركية .. وعنده اربع شباب بس .. اللي هما سالم وسليم هذوم من عمر سيف وابوبكر .. وسرمد وسامر .. سرمد من عمر انس .. وسامر من عمر زكريا ..
والاخير اللي هو إسماعيل ..
اما البنات .. فهرية .. متزوجه وعندها بنتين بس .. سالي 29 سنة مخطوبه .. وتُقى 16 سنة ..
واخر وحده ميسان عمرها 29 سنة .. وقاعده مش متزوجه 🤍
طبعاً ام محمد فريال .. وباته متوفي رحمة الله عليه ..
........
حالة الهدوء والسكينة في حوش محمد كانت عكسها ف حوش ثاني .. ناضن البنات ع عياط بوهن المعتاد .. بحتن ف بعضهن وبعدها كل وحده فيهن عطت بظهرها للثانية .. لعند سمعن صوت الباب اسكر .. حكت الاولى .."انتلف .." .. سكتت أختها بدون ماتجاوب .. لعند سمعت صوت رشفات اختها .. تنهدت بحزن .. وهيا تبحت ف الفراغ .. حوش بطراز بسيط جداً .. من دور واحد كله 4 ديار .. دار للأم ودار للبنات .. دار معيشه ومربوعه .. وبس مع صالة وحمام ومطبخ .. الأم قليلة الحيلة .. إنسانة بسيطة رزقها ربي بزوج سيء الطبع والمعشر .. بخيل .. سكار .. مايخافش ربي .. يده تمتد قبل لسانه ولو مش يده لسانه الموذي .. تعودن البنات .. تريحن بعد ازوج ع امهن بس قعد كل مايبي فلوس يجي ويدير نهار احرف .. شبه باع اثاث الحوش كامل .. اسمه مسعود .. مسميينه ف الشارع مسعود الشحيح من كثر عملة الاسود .. ازوج من نزهة وجاب منها سارة عمرها 28 سنة .. ابلة كيمياء متخرجه من قسم الكيمياء .. حميلة واخلاقها جميلة .. انسانة واعيه وعقلها كبير حادة الطباع جدا .. ومن بعدها انوار 19 وعندها تؤمها نور متزوجه واللي هي مرات أبوبكر .. متأخره سنة حالياً ثالثة ثانوي .. طايشة وعينها فاضيه .. وكيف مانقولو نحنا خفيفه .. مش عاجبها وضعهم بكل عكسها نور ف كل شي .. ومن بعدهن صارن مضاعفات لنزهة وامتنعت عن الحمل .. ولذلك ازوج مسعود بعدها بكم سنة .. ولتوا مراته ماجابتش ..
.......
ع روشن دارها كانت مقمعزة .. تهز ف يدها جاي وغادي وتفكر .. لعند شافت سيارة باتها خاشه من برا .. نزلت يدها ونزلت من الروشن وجرت طلعتله .. اول ماسمع الباب بحت فيه وضحك .. وشيرلها تجيه مشت تجري حضناته .. وخش هو وياها .. كانت تتمنى ان امها تصبي وتسلم ع باتها كيف البشر بس امها مش معدله .. كانت تنقي ف العدس بدون حتى ماترفع راسها .. بحتت ف باتها اللي عيونه ع امها .. عيونه يحكن الحب .. بس شن اللي يخلي فيها هيا متجاهلته هك .. التفتت بعد سمعت صوت امها .. نطقت .."سالي سقدي روحك ولمي الدبش عرس خالتك الاسبوع هذا وبنقعدوا عندهم .."
"حاضر ماما .." .. بحت فيها الاب زين ..وتحرك لداره تحت عيون سالي اللي دمعن ..
........
نبذه بسيطة ع ابطالنا وعوالمهم .. وكل حلقه حتوضح كل شخصية وكل قصة ..🤍
#فافي🤍