مكاتيب🤍

الحلقه 8

#مكاتيب🤍
#الحلقه_8❤️
.
.
.
.
.
.
.
.
.
.
.
.
.
.
.
.
.
.
.
.
.
.
.
مر اسبوع .. أسبوع واحد كان كافي أن العيله يلموا فيها حزنهم ع مرات ولدهم .. بس حزنهم ع ولدهم وحاله مزال قائم ..
بوبكر .. اللي مش صابر ابدا .. رفض رفض قاطع ان مالك يمشي مع خالاته .. واما معين .. اللي سجله سيف ف هو ما شافش ولده بكل ..
وضع بوبكر .. كان موجع قلب امه عليه ..
اللي قعدت تبكي عند راجلها وتقول .."انا عشان حرمت ولد من امه ربي يبي يحرمني من عيالي .."
حنان اللي عايشه عذاب الضمير بين ان زكريا ولدها وحبيبها ورباته وكبراته وخلاته راجل .. وبين ان واجعها كونه غافل لتوا ..
زكريا .. اللي كان غايب عليهم واجعه وجع خوه بكل .. بس مش اكثر من وجع سارة .. اللي معش جت للمدرسة .. وشاغله باله بكل .. شاغلة تفكيره وكل حاجه .. وهو مزال لتوا مش فاهم شن المشاعر اللي يعيش فيها معاها هذين شنو؟ ..
ومن زكريا اللي زكريا مالك قلبها وعقلها وتفكيرها .. بس بينها بين روحها بدون ماتبين للناس واللي حواليها شي .. الا خالتها اللي قاعده تشوف ف بنت اختها كل يوم اذوب ع اليوم اللي قبله ..
ميسان ..اللي مش فاهمه اللعبة اللي حيلعبها عمها فيها ..
حياة الكل كانت ف ترقب مخيف .. بذات بعد تكررت زيارات سليمة لحوش سلفها .. والشي هذا كان يضغط ع فريال .. اما حفيدها او بنتها ..
....
راقدة ف فراشها وعيونها ع الروشن ودموعها خط .. لدرجه بللت المخده اللي راقده عليها ..
نفتح الباب وخشت اختها عليها ..قمعزت جنبها ع السرير..
سارة>>"حطت يدها ع كتفها .."انوار سادك بكاء ي ماما .. قطعتي قلب ماما ..
انوار>>"ببكاء .."مقطع قلبي مالك ي سارة .. وجعني كيف قعد يبكي ورايه وباتك اللي شن بيقول فمي قالي اطلعي وكرني كر .. ولا راجلها اللي داير روحه حازن عليها وهو اللي قتلها هو السبب .."ونهارت بكا .."
وسارة تبحت فيها بحزن .. اللي عرفاته واللي كاتبته لها نور مش حتقدر تصرح بيه توا ابدا ..
قعدت حاضنه اختها لعند هدت .. بحتت فيها ..
انوار>>"ببحه .."طالعه انتي ..
هزت سارة راسها .."بنمشي للمدرسة .. ساد ماغبت .."
انوار>>"هزت راسها وردت لفراشها .."طفي الضي ..
بحتت فيها سارة بحزن وتنهدت وصبت .. بحتت ف امها اللي اطيب ف المطبخ وصوتها ترشف .. تنهدت ..وطلعت ركبت للسيارة .. قمعزت وقعدت تبحت قدامها وهيا حايرة شن ادير .. شن تقول ولا شن حدير .. تستسلم لطلب اختها ولا تسكت ..
تنهدت وولعت السيارة وطلعت وهيا تبحت ف مرات باتها اللي طالعه بعيالها ..
وقالت بعد خطمت من جبنها سارة .."ذايحات .. حقيرات .. اركب هيا .."
....
يرجوا فيها تخش ..
برم واحد من الشباب معاهم ..وبحت فيهم ..
"حتى اليوم مش حتجي بنطلع انا .."
زكريا>>"صبا وقال بضيق .."حتى انا بنطلع ..
بحت فيه سامر ومعاه إسماعيل .. قدم للباب يبي يطلع قريب خبط ف سارة خاشه ..
بحتت فيه من فوق لعند لوطه .."وين ..؟"
وخشت تحط ف شنطتها ع الطاوله وزكريا يبحت فيها وهو مبتسم ..ردت بحتت فيه ..
سارة>>وين طالع .."وبحتت ف الطلبه .. وشيرتلهم يقمعزوا وردت بحتت فيه .."بتخش ولا بتطلع ؟
زكريا>>لا خاش .. "وقدم لعند صبا قدامها .. "عظم الله اجرك ..
بحتت فيه .."اجرنا واجرك ع الله .."
زكريا>>"بحزن .."نور كانت غالية علينا كلنا ..
سارة>>عليش شن تعرفها؟ ..
زكريا>>خو بوبكر ..
رفعت حواجبها بمفاجأة .. وشيرتله ع كرسيه .. هز راسه ورد قمعز ..
"طلعوا الكتابات هيا .."
وفتحت كتابها وقعدت تشرح وهو يبحت فيها .. كان باين عليها الحزن من عيونها .. ودبشها اللي كان اسود .. واضح الهم عليها ..
تنهد بحزن وركز معاها شن تحكي .. وورد مركزه عليه ..
.....
نزلت من فوق وهيا تمشي بحزن ..وخشت للمطبخ .. بحت فيها سيف ..
سيف>>شن صار ..
حنان>>"بحزن .."حاضن ولده وراقد .. مابيتش نواعيه الليل كله وهو واعي امس نسمع فيه ..
سيف>>لا حول ولا قوة الا بالله .. والعيل اللي مطوح ف المستشفى يمي؟ .. لعند امتى حيقعد حاله هكي ..
حنان>>خليه ف حاله اماى مايروق توا يمشي يشوفه ..
سيف>>"بعصبيه .."مش خلوه ف حاله ولده هذا .. العيل اليوم يطلع من المستشفى .. بالك بتقعدي تعاني فيه انتي وانتي صحتك ع قدك ..
حنان>>شن ندير باه ..؟ ..شن ف رايك ندير نضربه ..
سيف>>"تنهد .."استغفر الله العظيم .."وصبا .."انا طالع توا بعدين توا ناخذ ميسان ونمشوا نجيبوه ..
هزت راسها بإيجاب .. وأمينه تبحت فيهم ..
أمينه>>صدق ي حنان ماتسكتوش عليه..
حنان>>"دموعها نزلن .."ع عينك ي امينه كل اللي صار وقاعد يصير شن تدير باه انا؟ ..نقوله ماتحزنش ع مراتك ؟ ..مقطع قلبي"وقعدت تبكي اكثر .."مقطعني كيفه كيف خوه .. ع الاقل بوبكر جنبي ومعايا والاخر اللي عارفته حيخليني ..
تنهدت امينه بحزن وقربت حضنتها ..وكملت حنان بكاها بكل حزن ..وامينه اللي كانت شاهدة ع كل شي اطبطب عليها ..
.....
مقمعزة ف الدرج .. وراقده ع يدها اللي حاطتها عليه .. الرياضيات اكثر مادة ماتحبهش ف الدنيا .. حست بحد خبط الدرج رفعت راسها وبحتت فيه ..لقاته استاذ الماده .. شاب صغير .. اسمه ناصر ..
ناصر>>وين ..؟
ابتسمت بإحراج وقمعزت كويس ..
تُقى>>اسفه ي مستر بس انا مانحبش الرياضيات ومانفهمش فيه مهما صار ..
ناصر>>"ضحك .."انتي جربي نشوف فيك من بداية المحاضرة وانتي راقده هك .. قمعزي واسمعي ولو ماعجبكش الشرح عاودي ارقدي ..
ابتسمت وهزت راسها مسايرة .. وبحتت قدامها وهو بحت فيها اشويه وبرم رد للسبورة ..
"شكلها مؤدبه .."
ضحك صاحبه وبحت فيه .."كبدت ي طير .."
بحت فيه بنص عين ..ركزوا مع ناصر بعد خبط ع السبورة "ركزوا معايا .."
.....
مصبي جنب اصحابه ويدخن ..
أنس>>هيا نهايتها هكي اصلا ..
وسكت بعد رن تليفونه طلعه من جيبه ..استغرب بعد لقاها اخته ..
أنس>>"ابتعد من جماعته .."ايوا ..
فوز>>"تحاول تبين صوتها عادي .."ها انوس حبيبي تقدر تجيني توا ..
أنس>>كنك شن في ؟ ..
فوز>>"وهيا تمسك ف بكيتها .."شي بس نبي نمشيلكم ومازن مش فاضي ..
أنس>>وتي روحك اشوية ونكون عندك ..
فوز>>تمام .."وسكرت .."
وبحتت حواليها ف الحوش اللي مكسر .. وف اوراق التحاليل اللي معزوقات ف وسط الصالة .. ردن دموعها ينزلن من جديد وبدبشها اللي عليها لبست وشاحها .. وحطت نقالها قدامها وهيا ثانية ايديها ع اركابها وتبحت قدامها صدمة ..
اما أنس اعتذر من الجماعه اللي معاه .. وركب سيارته وطلع هو عارف صوت اخته بعد تقعد تعبانه كيف .. يعرفها مش حيغبى فيها .. خبط الدومان بيده بغضب "حي عليك ي مازن لو نعرفك ملبز معاها .."
.....
نزلوا من السيارة ..
ميسان>>"وهيا تسكر ف شنطتها .."خوك مايبيش مسايرة ياما حكت ماما ماسمعوش ..
سيف>>"وهو خاش .."بيني وبينك اللي صار مش ساهل ساد انها ماتت وهو بعيد .
ميسان>>وشن ذنب ولده؟ ..
تنهد سيف .. وقربوا هما الاثنين من الحضانه وصبوا قدامها ..
سيف>>راجي هنا ندير إجراءات الخروج ونجيك ..
هزت رأسها .. وصبت تبحت ف الاطفال .. مشا سيف ..
سرحت ف تفكيرها .. تمنت لو مزالت طفلة كيف هالاطفال .. تمنت لو ترد هك ..
قرب وصبا جنبها ..
"تسرحي ديما هكي ..؟"
نطت بفزع وبحتت فيه .. لقاته يبحت قدامه بدون اي تعبير ..
وخرت خطوه منا .. هيا ماعرفتش بس هو عرفها ..
عمر>>نسيتيني بالسرعه هذي .."وبحت فيها .."
اول مابحت فيها .. نظرة عيونه .. ذكرنها بزمان .. زمان كانت فيه فراشة ف هالحياة خفيفه .. ما عندها لا هم ولا حزن ..
دمعن عيونها .. وهيا تبحت فيه .. وهو نظرته ثاقبه اللي كان داس وراها حن وحب كبير ..
بحت ف سيف اللي جا .. برم ومشا وهيا مزالت تبحت فيه ..
سيف>>ميسان هيا ..
ماسمعتش .. ضربها ع كتفها بخفه .."ميسان .."
بحتت فيه .. شيرلها ع الباب ..
هزت رأسها وهو مستغرب وخذت منا الورقه ودقت ع باب الحضانه ..
.......
مصبي مع ولد عمه وقدامهم فل ..
فل>>يعني لتوا حاله هو هو ..
زكريا>>"حاط يديه ف جيوبه .."وشن ف رايك يبي يتغير ي فل ..
سامر>>طلعوه من اللي هو فيه ..
زكريا>>كيف ي فهيم واللي ماتت مراته ..
فل>>صح ماحد يعرف اللي شن اللي عاشه معاها ..
سامر>>عليك ذكاء مايعيش الراجل ومراته مع بعضهم الا كل خير ..
بحتت فيه فل بنص عين .. وزكريا ضحك ورفع عيونه جن ف عيون سارة اللي تبحت فيه .. استغرب نظرتها بكل .. شيرتله بيدها ان يجي .. حول يديه من جيوبه .. وقال" توا نجي .." ومشا شورها وبنت عمه وولد عمه يبحتوا فيه وين ماشي ..
مش عيونهم بس حتى عيون تُقى اللي تلحق فيه لعند وصل ف سارة وخش هو وياها .. نزلت عيونها بحزن .. وتنهدت وقمعزت مكانها .. بروحها مادارتش صاحبات .. 🌪️
....
خشت للمكتب وهو خش وراها .. قمعزت وبحتت فيه ..
سارة>>رد الباب ..
برم رد الباب وصبا مقابلها .. شخصيتها وكيف مقمعزة وكيف ادير وكيف اتحرك مشدود لها بكل .. طبست .. ومدتله ورقه .. بحت فيها شيرتله ياخذها قدم ومد يده خذاها .. وقعد يقرا .. ويقرا .. لدرجه قمعز من اللي يقرا فيه .. وهيا تبحت فيه وعيونها دموع ..
بحت فيها ..
زكريا>>شن هذي ؟ ..
سارة>>"تنحنحت وهيا تمسح ف دموعها .."كاتبتها نور ..
زكريا>>انتي ف رايك بوبكر يوافق ع الكلام هذا ..
رفعت يديها بقلة حيلة .. وبدون مقدمات قعدت تبكي وهو يبحت فيها بألم ..
سارة>>حمل كبير مش عارفه نحكي ولا نسكت ..
حك حاجبه .. وقعد يبحت قدامه وهو يفكر .. يسمع ف صوت عباراتها المتتالية .. وصوت شهقاتها .. ويفكر ف حالة خوه اللي مش متقبل حتى ولده ..
...
بوبكر اللي يفكر فيه زكريا .. كان راقد ع السرير .. وجنبه مالك ماسك فيه زين ويبحت ف السقف .. بين عيونه نور يذكر ف اول ماتعرف عليها .. مرات يضحك ومرات يخوننه دموعه ويبكي .. كانت خوافه نور .. ومش جريئة.. كانت تخاف من خيالها .. وطول فترة تعارفها ع بوبكر كانت داسه الموضوع خوف من ان حد يعرف من هلها .. وهو كان راضي المهم معاه .. بعد خطبها وبعد تعب خذاها .. بس ماكملتش معاهم .. حط يده ع وجه وهو يبكي بألم .. بعد اذكر ان هو معش حيشوفها وان اخر يوم شافها فيه ماودعهش الوداع اللي تستحقه ..
ماودعهش وداع يليق بيها وبحبه لها ..
غم رأسه وعاود رقد وهو يهرب من كل شي ..
.....
يسوق ومره مره يبحت فيها ..
أنس>>كيف مازن وين ..؟
فوز>>حطني وطلع ..
هز راسه وهو يلعب بلحيته .. مره مره عينه عليها حاس انها مش تمام .. حاس انها مش متريحه ..
بس هو مش عارف ان هيا عرفت شي خلاها حزينه للدرجه هذ ..
اتكت براسها ع الكرسي .. برمت وجها ع الروشن .. دموعها ماقدرتش اتحكم فيهن ونزلن ..
صوته وهو يقول "كذابه الفسس فيك مش فيا ف وذنها .." .. هيا كيف حبت شخص هكي .. كيف ..
درس قدام الحوش .. مع طلعت ميسان من حوشهم ..بيبلها انس صبت وقعدت تراجي فيه ..
أنس>>حاس ان فيك شي وعارف اكثر من اتريحيله ميسان انزلي عدي ..
بحتت ف خوها بأبتسامه .. وفتحت الباب ونزلت .. تلاقتها ميسان سلمت عليها ومسكت يدها ومشن مع بعضهن وانس يبحت فيها بحزن .. طلع نقاله وهو يرن ع صاحبه وهو معصب ..
بس صاحبه .. اللي كان مدرس قدام المدرسة الثانوية متاع الشباب شاف الرنه وقلب التليفون .. ماكأنش شافه ..
يراجي فيها تطلع .. شافها صبت قدام الباب .. وضحكت للشخص اللي يحكي معاها من جوا .. شافها ركبت لسيارة رؤوف ومعاها اختها .. لحقهم ..
ف نفس الوقت اللي طلع فيه زكريا وهو يذكر ف كلام سارة .."انا مش عارفه اذا انت بتحكي ولالا بس انا قلت ان لازم في حد من اهل بوبكر يكون عنده علم انا حكيتلك لأن مانعرف حد غيرك .. بس ياريت ياريت لو شفت من خوك اي ردة فعل غلط تسكت وماتحكيش .." .. ركب السيارة وركب جنبه إسماعيل ووراهم تُقى اللي تبحت فيه ..
كان شارد ومش معاهم .. إسماعيل ركز عليه بس عشان تُقى معاهم سكت .. بس تُقى كانت بعيونها معاه .. كانت خايفه عليه حست وجه مش طبيعي ..
تُقى>>زكريا ..
توقعاته مش حيبرم ولا يرد عليها .. بس نتفضت بعد برم بحت فيها ..
نظرة عينه حسستها بكمية ألم في قلبها كبير بكل ..
بلعت ريقها .. وقالت" تعرف تشرح رياضيات .."؟
يبحت فيها وساكت .. ركز عليه إسماعيل بحت فيه وبحت ف السواقه ..
إسماعيل>>زكريا ..
هز رأسه بإيجاب وبرم وجه قدام .. ماحطتش ف بالها الا ان اللي صاير فيه من تأثير سارة عليه .. تنهدت وهيا تحاول تمسك دموعها ونجحت ف الشي هذا ..
......
تسمع فيها عمتها وهيا تبكي ..وتحكي ..
فوز>>راضيه ي ميسان .. المهم معاه وانتي تعرفيني .. شهر مر ع زواجنا وامه تقول كنك ماحملتي وكنك وكنك .. كنت مش معدله وعادي .. ليا اسبوع دايره تحليل وهو معايا .. "بحتت ف ميسان وهيا تبكي .." بعد طلع هو عقيم ي ميسان قالي انتي كذابه والخلل فيك مش فيا .. قالي انتي مغيره نتيجه التحليل مش تمسكي عليا جميل وتخليني ديما معاك .. مش هذا اللي حبيته ي ميسان .. مش هذا ..ماكانش هكي ي ميسان ..
.....
درست سيارة رؤوف .. نزلن البنات .. ومشا ..
خشت فل .. وورد قعدت تستف ف الكوايشات .. دق الباب برمت وفتحت ..
....
فوز>>تعرفيني كيف نحبه ي ميسان وراضيه معاه بكل شي "بألم .."حتى انس صبيت ف وجه وقتله راضيه بيه .. رضيت بحاجات واجد ي ميسان .. بأمه .. وهله وكل شي وف الآخر قالي هكي ..توا انا هكي ي ميسان؟ ..
.....
قابلها مبتسم .. ابتسمت ..
مازن>>عارفك فاطنه للسيارة من اول ماطلعت .."مد يده اللي فيها الورقه ...."هاكي ..
تبحت ف يده وفيه .. سمعت صوت امها قرب من الباب خذاته من يده وسكرت الباب ف وجه وهو ضحك مشا للسيارة
.....
حضنتها ميسان زين .. وهيا كملت بكاء ف حضنها ..
فتحت الباب تُقى وبحتت فيهن ..
جت وقمعزت جنب فوز وحتى هيا حضنت ميسان وقعدت تبكي .. فتحت سالي الباب وبحتت فيهن .. صبت وهيا تبحت فيهن بأستغراب .. ومافيش حد حاس بالوجع اللي يحسن بيه فوز وتُقى الا ميسان اللي عاشت حالتهن كلها .. كلها بحذافيرها ..
........
مقمعز ع سريره يراجي ف مكالمه اخته ..
اشويه ورن السكايب .. تنهد وفتح الخط ورسم ع فمه ابتسامه مجاملة بسيطه ..
عمر>>منورة اليوم ..
ضحكت سمر بتعب .."شن صار ..؟"
عمر>>"وجه نقلب وتنهد .."
تعبن عيون سمر دموع .." عمر ..!"
بحت فيها وعيونه دموع .."انتي عارفه اكثر وحده شن كانت تعنيلي ميسان .."
سمر>>"دموعها نزلن .." وانا والله مانبي نأذيها بكل والله .. بس نبيك تجيبلي ولدي ي عمر .. ولدي اللي خذاه مني محمد ي عمر انت اكثر واحك عارف شن عشت .. وراس خيي انا قاعده نموت نبي نشمه قبل مانموت .. انا ماشفتش الا وقت جبته وخذوه مني .. نبي زكريا ي عمر .. نبي ولدي ..
حس صوتها ضعف .. قعد يعيط وهو يقول .." سمر كنك سمر حاضر حاضر اللي تبيه سمر" وزاد عياطه بعد شاف راسها طاح .. واللاب طاح منها ..
......
كان راقد وهذا اللي يدير فيه وقت يزعل او يضايق ..او يفكر واجد ..
فز من وسط نومه .. وبحت حواليه وهو عارق .. بلع ريقه حسه مر نزل .. حط يده ع قلبه اللي ينبض بالقوة .. وحول من عليه الورغان وصبا ..
صبا قدام الباب وعيط ..
"امي .."
بحتت حنان ف امينه ..
حنان>>صوت زكريا ..
وسيبت اللي ف يدها وركبت تجري وامينه وراها ..
......
.
.
.
.
#يتبع🌪️
#فافي🤍