مكاتيب🤍

الحلقه 5

#مكاتيب🤍
#الحلقه_5❤️
.
.
.
.
.
.
.
.
.
.
.
.
.
.
.
.
.
.
.
قبل أسبوع ..
عيون فهرية اللي شافت اللي خشت يعبرن عن حالة الصدمة اللي هيا فيها ..
ماحد قعد لاهي ف سارة اللي تسلم عليهن وتعزي .. استغربت ان اللي تعزيه منهن مايردش .. لعند وصلت ف أختها وسلمت عليها وقمعزت .. وهيا تبحت ف استغراب لحنان وفهرية وفريال اللي كأن الوقت عندهن وقف .. بس ماوقفش عند ميسان اللي قربت تسلم ع مرات عمها .."سليمة .." مراه قادرة واعرة .. ومن وجها تبان أنها ماتنقدر ..
سليمة>>كبرتي ي ميسان ..
ابتسمتلها ابتسامه مجاملة .. فاتتها وقربت من حنان اللي مصبيه .. دمعن عيون حنان وهيا تشوف فيها .. وعقلها شالها لزكريا .. تبحت فيها وهيا مادة يدها وتقول "كيف حالك ي حنان .." كأنها تقول هاتي ولد بنتي .. هاتي انتي مش امه هيا امه .. بنتي اللي نقهرت وتعذبت وقعدت بلا ولدها .. دموعها طاحن .. بيد ترجف مدتها وسلمت عليها .. بدون صوت بدون كلام .. وبعد سلمت انسحبت وخشت هاربه بدموعها .. وعيون سليمة معاها وهيا مبتسمه بأسف .. بحتت ف فهرية .. زين وكأنها تقوللها وقت الحساب بدأ .. خوف فهرية خلاها تبحت ف بناتها اللي مقمعزات مع نور وخواتها ويهدرزن .. حست نظرة سليمة تقوللها كيف مافرقتي بنتي ع ضناها ربي يفرقك ع بناتك .. واما فريال كانت متابعة المشهد بالبطيء.. اتخايل ف يوم جيت زكريا .. وكيف كانت سليمة تبكي وهما طالعين بيه .. المشاهد يتعاود .. بس هالمرة سليمة هيا اللي جاية تاخذ حقها .. بعد السلام قمعزت بعيد بدون ماتحكي شي ..
تركية>>جيتها مش لله مرات سيدي ونعرفها .. شن خطر عليهم توا وهم كانوا مقاطعين عمي ..
مروة>>"بحزن .."وجعتني حنان ..كأنها تشوف ف قهرتها بعيونها ..
تركية>>"بحقد .."الله لا يسامح اللي كان السبب وفرق بين الصحبات ..
رفعت عيونها ف تُقى اللي صبت خشت وهيا ترد ع تليفونها .. ونزلتهن وهيا رافعه حاجبها ..
سارة>>"تبحت ف سالي اللي مصبيه بعيد وتحكي مع فل .."مافهمتش عمتك وعمات راجلك كنهن ..
نور>>"بوجع .."كنهن ..
انوار>>"تبحت ف وجه اختها .."تحسي بحاجه انتي؟..
نور>>وجع يمشي ويجي ..كنهن ي سارة ..
سارة>>مش عارفه شكلهن غريب ..
هزت كتوفها بعدم فهم .. وبحتت قدامها وهيا تحاول جاهدة تخفي وجعها ..
....
سالي>>هذين بس ..
فل>>متأكدة ..؟
سالي>>اه والله وكان نسيت شي توا نرن عليك ..
فل>>خلاص معناها .."والتفتت ع امها .."ماما مشينا ..
رفعت يدها حيتها برمت طلعت وهيا تجري وورد وراها ..
قمعزت سالي من جديد جنب نور وخواتها .. لعند مارن نقالها .. بحتت فيه بضيق وصبت ..
تلاقت مع تُقى طالعة ..
تُقى>>مروان رن عليا مايحصلش فيك..
سالي>>"بضيق.." توا رن ماكانش معايا نقالي ..
تُقى>>ردي عليه ..
بحتت ف اختها نظرة فهمتها نزلت عيونها وخشت وتُقى ردت قمعزت مكانها ..
انوار>>سالي مخطوبه؟..
بحتت فيها تُقى وهزت راسها بإيجاب ..
نور>>حب ؟
تُقى>>"بضيق .."لا ولد صاحب بابا شافها خطبها منا ..
رفعت عيونها ف سارة لقتها تبحت فيها ابتسمت .. ردتها لها سارة وردت تبحت قدامها ..
"الو .."
مروان>>وين وين وين ..معقوله ليا كم نرن عليك ومافيش رد ..
سالي>>اجرنا واجرك ع الله ..
مروان>>"بان الضيق ف صوته .."عظم الله اجرك حبيبي .. الله يرحمه ويغفرله اسف ان مش معاك توا ..
سالي>>اجرنا واجرك ع الله.. مش مشكله عادي..
مروان>>بكرة ان شاء الله نقعد ف ليبيا .. وجايك طول ..
سالي>>"غمضت عيونها وفتحتهن .."اللي يريحك ديره ..
مروان>>كيف حالك وكيف حال عمتي فهرية ..
سالي>>"بحتت ف ميسان اللي خشت .."الحمدلله نصبروا ف ارواحنا ..
شيرتلها ميسان كأنها تلبس ف خاتم بمعنى .."خطيبك .." هزت راسها جت بتطلع مسكت يدها وهيا تسمع ف مروان يحكي .. شيرتلها انها تضبحلها .. وميسان تفنص .. فنصت فيها سالي ..
ميسان>>سالي .. تعالي اشويه ..
سالي>>"قطعت عليه كلامه .."خالتي تضبح توا نعاودلك ..
مروان>>"وهو عارف انها مش حتعاود .."تمام نتلاقو ..
سكرت طول .. نزل النقال بحزن وهو يبحت فيها وتنهد .. وصبا خش ..
وهيا تنهدت براحه ..
ميسان>>لعند امتى حالك هذا ..
سالي>>"بقرف .."مش متقبلته ي ميسان بكل ..
ميسان>>"بحزن.."وشن ذنبه هو ..
سالي>>ان خطب ف وقت ماما كانت معصبه فيه مني ..
وطلعت وسيبتها تبحت فيها بحزن ..
.....
رؤوف>>بسرعه بسرعه اه ..
فل>>بالله عليك اصبر بناخذ دبش ونغسل دبش رآه..
رؤوف>>"بضجر .."معناها ماشي وجاي ماتفتحن لحد ..
ورد>>اوك ي شخصيه مهمه من بيعبرك ويجيك ..
بحت فيها بنص عين وكر شعرها وطلع بعد ماخلاها تعيط وفل تضحك ..
فل>>"صفقت .."هيا بسرعه ابدي ضمي ع بال ما وتيت الدبش..
ورد>>"بملل .."عليك ملل والله تعبانه الله ..
فل>>هيا ي كلبه كلهن يومين ومروحين ..
مطت شواربها بضيق ومشت وفل تبحت فيها بإزدراء ..
......
مصبية مع خواتها فم الباب ..
سارة>>وجك اصفر ماتسكتيش ع روحك غير خليت ماما تمشي مش مانشغلهش ..
نور>>ان شاء الله خير ..
بحتت فيها سارة بقلق .. وطلعت .. ووراها انوار .. بحتت نور ف فريال اللي طلعت من الخيمة وشافت عمها وعمام راجلها جايين شور امهم سكرت الخيمة وخشت .. ف نفس الوقت شافت المراه اللي استكن بعد شافنها خشت جوا تبعتها بعيونها ..
ميسان>>نور ..
بحتت فيها شيرتلها تجي ..
ميسان>>انا توا جايتني صاحبتي بس خششي هذا لحنان تلقيها ف دار الشباب ..
هزت راسها وخذت النقال ومشت ..
..
رفعت عيونها ف اللي خشت عليها ..
سليمة>>حالك باهي ي حنان ..
حنان>>"دموعها ف عيونها .."شن مزال تبوا مني حرام عليكم ..
سليمة>>شن تحقي فيا جايه جارده عليك؟ .. جايه نعزي كيفي كيف الناس ..
حنان>>مانعرفكش يعني مرات عمي وخابزتك وعاجنتك ..
سليمة>>"ابتسمت بهزوة .. وقربت مسكت صورة زكريا وبحتت فيها .."يشبه امه واجد ..
حنان>>"بأنفعال وقعدت تبكي .."انا امه انا مش حد غيري .. بنتك ماتعبتش معاه ماحضنتش وهو مريض ماسهرتش ع راحته .. ماحبهش كيف مايحبني هذا ولدي انا اناا امه انا ..
سليمة>>"ضحكت بهزوة .."امه بنتي انا ي حنان بنتي اللي حرمتوها من ضناها وقاعدة اتقطع .. بنتي انا .. زكريا حفيدي انا .. ولد بنتي ماعمره كان ولدك انتي ..
تبحت فيها حنان بغضب وحزن .. دموعها سيل ع خدودها ..
سليمة>>"وهيا تحلف بيدها .."حيجي وقت ي حنان يرد فيه حقها وولدها يعرفها .. انا ساكته توا بنخليكم لين يطيب مافي خاطركم وبعدها لكل حادث حديث كان ماكرهته ف شبح وجهك مانقعد انا سليمة ..
وطلعت وسيبتها .. وحنان تبحت فيها بحزن .. حطت يدها ع قلبها بعد حساته بيوقف ..
"عميمه انتي كويسة .."
بحتت ف اللي خشن .. الإثنين كانن يبحتن فيها بنظرة حزن .. بس اللي قربت نور اللي حطت النقال ع السرير وحضنت حنان بوجع اللي طول قعدت تبكي ومنهارة .. وتُقى تبحت فيها بصدمة وحزن .. قلبها اللي معبي حب له وجعه حاله لو عرف قبل مايعرف اصلا ..
.....
فريال>>انا كلمتكم انتم الثلاثه اليوم .. مش تنهوا هالخلاف اللي بينكم وبين اختكم ..اختكم حتعيش معانا من يوم وغادي وحرب نفسية ف حوشي معش نبي ..
محمد>>"بعقدة حواجب .."شن تحكي يمي انتي كان سكتنا مش معناها عاجبنا اللي دراته فينا .. سكتنا عشان بناتها مش ذنبهن شي ومش الناس ماتاكلش وجونا يقولو اختهم ومش قادرين يخلوها عندهم ..
فريال>>وشن استفدت من الناس ..؟ محمد هذا اخر كلام مانبيش فيكم حد يناقش .. ساد مهزله وهزوة وخليتونا للي يسوا واللي مايسوا .. وبعدين عمك شن خطر عليه يجي تو ..
صهيب>>مش متريح انا نظراته لزكريا ماطمنش ..
محمد>>"بضيق .."الباين اللي مدسوس حينفضح ..
مصعب>>من الاول غلطه كبيرة درتوها فيه وفيها وف حنان ..
فريال>>توا مش وقتها .. سيورة المدسوس يطلع بس مش توا ..
محمد>>"بحت ف امه .."امي سمر فيها الخبيث ..
سكتت فريال بصدمة قعدت تبحت ف ولدها ..
محمد>>"بحزن .."احتمال اي لحظه نخبر زكريا .. امه لازم تشوفه قبل ماتموت .. عارفها صعبة بس هذا الصح ..
مصعب>>من الاول هذا الصح اللي انت غلطت فيه من الاول مانخليش ولدي غافل ..
فريال>>ربي يستر من اللي جاي ربي يستر من اللي جاي .. كيف ماقتلكم مانفهم فيكم حد يضايق اخته بكلمه ..
بحتوا فيها وهزوا روسهم بإيجاب ..
صهيب>>ولو زكريا عرف ف رايك يسيب هنا ويمشي لأمه؟
محمد>>"بقلق .."هذا اللي خايف منا .. والاكثر من هك خايف ع حنان .."وبحت ف امه .."وتقولي سامح اختك .. الاخت اللي خلت خوها يدير هك؟ ..شن ذنب زكريا يمي؟ .. تستعمله ف لعبها مش تقهر حنان؟ .. ناض ع الدنيا ع ام وهو ف الحقيقة ولد وحده ثانيه .. شن ذنبه غير ان عمته خربت كل شي ..خلاته ناقص مهما كان نحس فيه ناقص مهما حنت حنان مش حتكون كيف امه الصح ..شن استفادت ولا حاجه
فريال>>"بحزن ع حال ولدها .."ربي يفرج يمي ربي يفرج ..
مصعب>>زكريا لازم يعرف ي محمد ..
محمد>>"هز راسه برفض .."مستحيل مستحيل تموت حنان لو عرف زكريا وعاملها معاملة شينة ..
تنهدوا خوته وهما يبحتوا فيه بقلق .. وامه تبحت فيه بحزن ..
.......
قالبات الحوش .. وحده اضم ووحده تغسل ف الدبش ..
رن جرس الباب ..
فل>>"من الحمام .."فرخه ورد شوفي الباب ..
تنهدت بعصبيه وعزقت اللي ف يدها وفتحت وهيا تقول "مش عندك مفتاح .."
اختفا صوتها تدريجي بعد حقت اللي ع الباب ..
مازن>>"بأبتسامة .."مساء الخير ..
تنحنحت وجت ورا الباب وحطت وشاحها ع راسها .."مساء النور تفضل .."
مازن>>رؤوف قاعد؟ ..
ورد>>مشا مشوار وراد قال ..
ابتسم مازن وهو يبحت فيها كيف تبحت ف الارض ..
مازن>>قوليله جاك مازن ومالقكش ..
هزت راسها بإيجاب .. بحت فيها وبرم بيمشي جت بتسكر الباب رد من جديد وبحت فيها انفجعت وفنصت عيونها ..
مازن>>انتي ورد ولا فل؟ ..
رفعت عيونها فيه "عليش"؟
مازن>>"بتضييق عيون .."ف بنية لطيفه كانت تحكي معايا ايام علاقتي مع فوز ..قصدي يعني بعد نتعاركوا وهك ..حسيتك نفس الاسلوب ..
ورد>>"ف عقلها كذاب غير بتعرف اسمي ..وحكت بدون تفكير .."فل انا ..
ابتسم بتضييق عيون .. بعدين هز راسه .. وبرم طلع وهيا تبحت فيه ..
تنهدت بهيام .. "وين كنتي داستيه ي فوز هالراجل الطرف .."
بعدين فنصت بعد سمعت اختها تضبح خشت تجري ..
وهو بعد طلع قعد يبحت ف الباب لحظات ..وتنهد ..
مازن>>شن جاب لجاب بالله ..
وركب سيارته ومشا ..
......
بعد نوبة البكاء اللي صابت حنان .. رقدت .. ونور وتُقى جنبها .. مافيش فيهن وحده حكت حاجه .. يبحت ف حنان اللي وحتى هيا راقدة تشهق ف نومها ..
استنتجن بروحهن تعبها النفسي بدون ماتحكيه ..غصب عنهن حيسكتن .. مافيش مجال.. دموع تُقى طاحن وقعدت تبكي ونور تبحت فيها بحزن ..
لو بتحكي شن تحكي .. شن تقول كيف ترضى تأذي قلب اكثر انسان تحبه ف الدنيا .. حتختفي ضحكة زكريا ي تُقى حينهار زكريا .. حيقعد بلا روح ..
لو عرف ..باهي لو ماعرفش ؟ .. يقعد عايش ف كذبه عمره كله؟ ..
تُقى>>"بألم .."ياربي ..
زكريا .. اللي تفكر فيه تُقى .. اللي شاغل بالها .. كان مصبي مع الشباب فم باب الخيمه .. ويأس ان مالقش السيارة اللي يبيها بين السيارات .. يضحك ويبصر وينكت .. ومايعلمش ع العيون اللي تبكي وجع ع حاله .. وغيرهن مايعلمش ع العيون اللي تبحت فيه بحسرة ..كيف كبر وقعد راجل ..
سليمة .. كانت تصور فيه من بعيد وهيا تبكي بألم ع حال بنتها ..
اللي كانت ف غرفة ف المستشفى ف المانيا .. وف يدها نقالها تبحت ف ولدها اللي نحرمت منا 18 سنة .. تبكي بألم وندم .. تبوس ف الشاشه وتبكي ..
"كبرت ي ماما كبرت ي حبيبي قعدت راجل ي امي راجل ..الله لا يسامحكم كلكم اللي فرقتوه عليا .. الله لايسامحكم .."
.....
مشن الأيام تباع ..
بدون أي أحداث تذكر .. فض العزاء .. اللي خلا الماضي يرد .. وقعدت حنان من بعده مريضه .. الشي اللي اضطرت نور تسكت عليه ومعاها تُقى بعد عرفن ان السر يقعد مدسوس احسن من مايطلع ويخرب الدنيا ..
السكوت اللي اختاروه محمد وخوته .. واضطرهم يقبلوا أختهم رغم كل شي ..
السكوت اللي دراته ورد وخلت مازن يحساب انها فل بدون ماتحسب حساب للي دراته ..
السكوت اللي خلا فهرية قاعده تعيد ف حسابات عقلها ..
السكوت اللي خلا نور تسكت ع وجعها وماتحكيش عليه لبوبكر .. اللي حيمشي للصحراء ..
السكوت واه من السكوت🌪️🌪️🌪️
.....
مصبيه فم باب الحوش ..وتبحت ف ولد خالها اللي مقمعز مقابلها ويشرب ف قهوته ..
دق الباب ..
بحت فيها وشيرلها تخش ..تنهدت بضيق وفتحت باب حوشهم وخشت بس قعدت مصبيه فم الباب من جوا ..
فوز>>"طلعت من جوا .."توتو صباح الخير خشي كنك مصبية هنا ..خشي ..
تُقى>>صباح النور.. لالا نبيش نراجي ف إسماعيل يطلع معش طلع خش يواعي ف زكريا ..
نفتح باب الحوش بحتن فيه ..
سيف>>"بحت ف اخته .." وتي روحك راجلك برا .."وبحت ف بنت عمته .."لو نقالك معاك رني ع اختك راجلها برا .."وبرم طلع .."
بحتت فوز ف تُقى .. اللي طلعت نقالها ورنت ع سالي ..
تُقى>>نوضي صحصحي مروان برا ..
سمعت صوت تنهيدة اختها .."باهي من معاه برا .."
تُقى>>"بحزن .."سيف ..
سكتت سالي .. بعدين سكرت الخط .. وصبت ..
مع نزلت الشباب من فوق ..
زكريا>>مش طالع بدون حليب وشاهي ..
حنان>>"بغضب .."هاك امسك ..
ضحك ومسك المق وإسماعيل يبحت فيه بقرف ..
إسماعيل>>بالك هيا ي ولد الباشا ..
زكريا>>انا ولد محمد ..
بحت ف تُقى"صباح الخير .."
تُقى>>"ابتسمت .."صباح النور ..
حنان>>هيا زكريا طولت راك ..
زكريا>>امي حبيبي طالع وحق الله ..
هزت حنان راسها مسايرة .. ضحك وقرب باس خدودها .. وطلع ووراه اسماعيل وهو يهزب بصوت واطي وتُقى تضحك عليهم ..
تنهدت حنان وخشت ..
فوز>>"قربت سلمت عليها .."ماشية انا مازن برا ..
حنان>>ف امان الله .."وخشت .."
طلعت فوز وركبت حنان .. دقت باب دار انس ..
أنس>>خشي يمي ..
فتحت عليه الباب بحتت فيه وهو يسقم ف شعره وعريان من فوق ..
حنان>>انت بذات نسيت نربيك ..
ضحك .. وبحت فيها "غير بلا طروح ياما لبستيني زمان مذكرة .."
حنان>>"ابتسمت .."كان نحسابك تطلع خايب هك مالبستك ولا قربتك ..
أنس>>"لقط ماليته وقعد يلبس فيها ..وقرب منها باس راسها .."مش خايب ي الحب فرفوش .. متنعنش ..
حنان>>"برفعة حاجب .."ي متنعنش انت عندي طلعه ف العشية ومافيش غيرك ..
أنس>>"عيط بصوت واطي .."روحي يمي روحي عندك زكريا عليش يسوق ..عندك غير 3 فروخ ..
حنان>>"بحده .."وبالله وتالله ماشايلني غيرك ..
أنس>>"عقد حواجبه وقلب شواربه .."عليك سماطه ام وخلاص ..
حنان>>"بحتت فيه بنص عين .."وقت ع محاضرتك لو حقك باتك حتمسك مكان زكريا ف المحل اليوم راه .."وطلعت .."
سمعت صوت كرعيه وراها .. بحتت فيه بعد خطم من جنبها بسرعه وهيا تضحك ..ونزل وسمعت صوت الباب اسكر ..
محمد>>"طلع من الدار .."صباح الخير ي وجه الخير ..
بحتت فيه بأبتسامة .."صباح الورد .."
محمد>>اللي طلع توا انس؟
حنان>>اها عنده جامعه ..
هز رأسه "الفرخ هذا لا حول ولا قوة الا بالله العلي العظيم.."
ضحكت حنان ..
....
بحت ف خوه اللي مصبي مع واحد وشاف سالي جايه من بعيد .. ركب سيارته وشغلها وتحرك طول بدون مايرجاها تسخن ..من فوق يبحت فيه بوبكر اللي كانت نور توتيله ف دبشه ..
بوبكر>>"ماسك فنجان قهوته .."انس طالع يجري شكله باتي بيغلضه ف شي 😂
ضحكت نور "تنبال .."
برم بحت فيها .. ابتسم ع شكلها وهيا مبتسمة ..
رفعت عيونها وبحتت فيه ..
نور>>"بضحكه.."كنك ..
هو>>نحبك ..
ابتسمت بخجل ..وهو يبحت فيها بنفس الابتسامة ..بعدين تنحنح ..
ابوبكر>>ديري بالك تمام ..مش حنقدر ناخذ اجازة الا ف جيبتك لذلك هالفترة ديري بالك ودروج واجد لا ..
نور>>ماتخافش كل شي حيكون تمام ..
ابتسم وقرب باس راسها ..
وهيا طول خشت ف حضنه وحضناته زين ..
......
قربت من خطيبها .. بحت فيها سيف ووخر ..
مروان>>"مد يده سلم عليها .."كيف حالك ..
سالي>>"بربكه من سيف اللي مصبي يبحت فيهم .."الحمدلله ع كل حال كيف حالك انت ..
مروان>>الحمدلله .. سامحيني كيف حصلت فرصه نروح .. وانتي معش رديتي ع اتصالاتي مش نقولها لك ..
سالي>>"هزت راسها.."مش مشكله ..
بحت ف سيف لقاه ماشي شور شاب ..رد بحت فيها ..
مروان>>"باس راسها .."حبيبي عظم الله اجرك ..
بحتت فيه بعيون مليانة دموع ..ابتسم بأسف ..
سالي>>ماما قالتلي ماطولش واجد ..
مروان>>"ابتسم .."تمام خشي وعزيها ليا .. وردي ع تليفوناتي بالله عليك بنطمن ..
هزت راسها بإيجاب وودعاته ومشت وهو صفر لسيف شيره وطلع ..
بوبكر>>كيف روح ..
سيف>>كان ف المانيا .. ايوه ماشي انت ..
بوبكر>>كنت نسلم ع امي متسقد توا .."وحط يده ع ذراع خوه .."دير بالك بالله عليك. ..
سيف>>ماتخافش ولو ف شي حنقولك ..
هز بوبكر راسه وشيرله ومشا .. وسيف معاه بعيونه بعدين غيرهن وبحت وين ماكانت مصبيه سالي ..
......
مقمعز فوق الدرج .. وهو يضحك ..
سامر>> موقف يعي اسكت خلاص ..
زكريا>>"بضحكه .."داير روحك شخصية تي انت جاي لوسط مكان معبي وحدات يبن يزوجن وتكحل ..
إسماعيل>>يستاهل😂 ..
قربت منهم ورد ..
ورد>>مخزرطين سامر شن داير ..
سامر>>مش داير شي "ويفنص ف زكريا .."
زكريا>>"بضحكه .."هذا ي ستي .. سيدك سامر جايني ف المحل .. ويدلع دروحه شخصيه .. وهو خاش من الباب انظر شن قاله عقله سلح كاويشه وخش ..
ضحكت ورد بصدمة ..
زكريا>>دروحه طارح ويفشك .. انقلب المحل عليه ضحك ..وماخذا غير الحشايم ..
حط سامر يده ع وجه "حشم بيك .."
بحتوا ف الباب بعد طلقت الابلة السلام وقمعزوا كلهم ف مقاعدهم ما عداه هو اللي يبحت فيها بصدمه ..
ملامحها الحاده كانت باين فيهن العصبيه من حركته ..
سارة>>المقهى سكر ي استاذ تقدر تقمعز كويس ..
بحت فيها .. وابتسم ع الجنب بعد عرفها تحكي عليه ..وصبا قمعز جنب سامر ..
بحتت فيهم كلهم ..وتنهدت بكتم ..
سارة>>انا استاذكم ف الاحياء ..اسمي سارة ..محضرة ماجستير ف الاحياء ..وهذي ثانيلي مدرسه نقري فيها .. الجدول خذيتوه من امس صاح ..
ردو بأصوات متقطعه .."اها .."
هزت راسها ..برمت فتحت شنطتها ..وطلعت دفترها ..والخطاطات ..
وقربت من اول واحد ف اول صفه ..وحطتله ورقه ع درجه ..
سارة>>اكتب اسمك ومرر ع زملائك ..
هز راسه ..وطبس يكتب ..
وهيا برمت ع السبورة ..
"ماعندنش مزاج لحصه اليوم اول حصه واحياء لقنك فكينا .."
فنصت ورد وبرمت بحتت فيه .. وهو يبحت ف سارة بأبتسامة ماعمرهش شافتها ع وجه ..
عقدت حواجبها وبرمت ..ف نفس الوقت اللي برمت فيه سارة وهيا معصبه ..
سارة>>من اللي حكا توا؟ ..
زكريا>>"رفع يده  .."انا ..
سارة>>ترا صبي..
صبا ..وربع يديه ..
سارة>>"وهيا تحكي بيديها ..بحده .."باب الفصل اهوا ..تقدر تطلع اذا تحب ..انا جايه نعطي حصه مش نهدرز ..
زكريا>>"بأبتسامه"ارخي روحك ..انا ماقلتهش هدرزي انا قلت مش جو احياء صبح ..
فل>>"بهمس .."شن يخرط ولد عمك ..
هزت ورد كتوفها بعدم فهم ..
سارة>>وبما ان مش جو احياء صبح .."شيرتله ع الباب .."تفضل ..
ابتسم ع الجنب وتنهد وتنحنح ..ورد قمعز ..
وهيا تبحت فيه بحده وبعدها غيرت عيونها من عليه ومررتهن ع الفصل ..
سارة>>افتحو كتباتكم ع اول صفحه ..وركزو معايا ..
وقربت من طاولتها وصبت عليها ..وحطت يديها ع الكتاب ..
واما هو ف عيونه كانن عليها ..ومبتسم ابتسامة عبيطه ..
زكريا>> ي ابلة ..
تنهدت بضيق وبحتت فيه ..
زكريا>>عاوديها اللي توا ..
سارة>>مافيش حد قاعد يعقب غيرك راه ..
زكريا>>"برفعة حاجب .."والله انا دافع فلوس .. عشان تعطوني احسن شي ..
فنصت فل بصدمة .. وبحت فيه سامر بنفس الصدمة ..
سارة>>"بيدها شيرتله .."اطلع برا .."وبصوت عالي .."صبي ..
ابتسم .. وصبا قرب منها ..
سارة>>"وهيا تكتب .."اسمك ..
"زكريا .."
بحتت فيه .. ضيق عيونه وهو يبحت ف عيونها زين .. حسها نحرجت ابتسم .. مدت يدها قدامها ..ضحك وطلع ..
سارة>>"بعصبيه مكتومه .."هيا نردوا لشن كنه نحكوا ..
.....
أما هو .. طلع قمعز برا .. تنهد ..
زكريا>>شن اللي انا فيه هذا .. لقنها عيونها يقتلن ..
ضيق عيونه بعد حق اللي جايه شوره ..
تُقى>>كنك برا ..
زكريا>>خفت نموت جوا قلت نطلع نشمس ..
رفعت حاجبها ..
"واضحه لزوني .."
تُقى>>من اول يوم ..
زكريا>>"بثقه .."ولد خالك ف كل وقت وكل مكان يلزوا فيه ..
ضحكت .. رد عقد حواجبه وضيق عيونه وبحت فيها زين .. ارتبكت وبان ف عيونها انها ارتبكت .. حس بنغزة ف قلبه .. قبل مايحكي سمع صوت الجرس ..مع طلعت سارة بعصبيه ..
سارة>>امشي قدامي ..
ابتسم وصبا .. وتُقى تبحت فيهم .. لعند خطموا من جنبها ومشوا وهيا تبحت بغيره وعيونها دموع ..
......
.
.
.
.
#يتبع❤️
#فافي🤍