مكاتيب🤍

الحلقه 14

#مكاتيب🤍
#الحلقه_14🤍
.
.
.
.
.
.
.
.
.
.
.
.
.
.
.
.
.
تبحت فيه بأبتسامه حب وهو يبحت فيها بنظرة حزن مع ابتسامة خفيفه ..تمسح ع وجه وشعره .. وهو ماسك يدها الثانيه ويبحت فيها ..
سمر>>ادوي ماما خليني نسمع صوتك ..
برم وجه ع الجنب ورفع يده مسح طرف عينه ورد بحت فيها من جديد بنفس الابتسامة ..وقال .."احكي انتي بنسمع صوتك انتي ونشبع منا .."
ضحكت وهيا دموعها ينزلن .. وقالت .."هات خدك بنبوسه .."
ضحك من بين دموعه .. وقال .."مش بيبي انا .."
سمر>>وشن كان درت لحيه كبرت .. تقعد بيبي ف عيوني ديما ..
ابتسم وقرب منها باست خده .. وحضناته وهيا تشم فيه .. قعد يبكي من جديد ف حضنها .. بكاه قطع قلبها هيا اللي كانت حاسه بيه نافر منها .. كانت حاسه بولدها بس فرحتها بيه ماخلتهش تهتم لهذا كله ..
وخرت وبحتت فيه .."ماما حبيبي عارفتك ي عمري مزلت مش متقبل ..وعارفه حنان حنان عليك كيف ..بس انا امك ..ماتخافش مني .."
زكريا>>"ابتسم من بين دموعه .. ومسك يدها وباسها من جوا .."عارف يمي عارف عارف انك امي ..
ردت هيا المره هذي تبكي وهو يبحت فيها .. وقال"توا عليش تبكي .."
قالت بنبرة مرتعشه .."كنت نستنا فيها واجد ي عمر امك .."
ضحك وهو يمسح ف خدودها ..وقال .."عرفت سر النكد عندي من وين .."
ضحكت سمر وهيا تبحت فيه كيف يضحك ..ردت حضناته وهو تنهد وحضنها بس عقله ف ليبيا ..
.....
برم سيف وجه وبعصبية رد عليها .."إنسانة مش مستقرة نفسياً وانا متأكد واحد مايبيكش رفضك ع كم مره نقول عيب ي سيف بس زدوتيها خشيتي ع حاجات ثانية ومنها التلاعب بالشرف افطني لروحك ي بنت عمتي افطني للوهم اللي قاعده تعيشي فيه وعيشي لروحك وفكري ف الراجل اللي بعد كم يوم حتكوني ع ذمته .. استغفر الله العظيم وخلاص .."
وبرم وخش وخلاها هيا مصبية مصدومه من الكلام اللي قاله لها .. حست قلبها تفترش هو معاه حق .. بس مش هكي .. بلعت ريقها كم مره وقعدت تبكي .. مشت لحوش عيت جدها وهيا تبكي خشت للدار وبكت بألم وقهر لعند رقدت ..
اما سيف خش سلم وركب داره ادوش ورقد براحه مافكرش اصلا ف الكلام اللي بالنسبة له وهمي من تفكير بنت مراهقه مزالت تحبه ..
...
عكس بوبكر اللي كانن أفكاره يزاحمن فيه .. مقمعز ف شقته وف كل مكان فيها كان يشوف ف نور .. مش مصدق اللي حيديره .. ولا متقبل الموضوع ..
رن تليفونه خذاه ..ورد ..
عابد>>انا تحت ..
بوبكر>>جاي دق توا يفتحلك واحد من الشباب خش معاه ..
وسكر وصبا خش للدار يغير ف دبشه ..
اما عابد دق الباب .. وقعد يستنا برا ..
فوز>>"ف المطبخ .."باب الحوش البراني يدق العيال مش حيسمعوه ..
مروة>>عدي افتحي بالك خالتك تركية ..
هزت راسها وطلعت بسرعه .. فتحت هو برم بحت ف من اللي فتح ..
تنحنح وبرم عيونه وغمضهن زين ..
عابد>>اسف جداً ..
نزلت عيونها "ولا يهمك انا خاشه تفضل .."
ومشت تجري وهو تنهد بألم وبرم رد الباب وقعد مصبي برا .. حس جسمه فشل ويديه رقدن ..
عابد>>عابد اشطح روحك هيا نص شوفه اشطح روحك ..
بعدين ضحك ع روحه .. برم بعد سمع صوت بوبكر يقوله خش ..
خش معاه تحت عيون فوز ..اللي قالت بندم .."ياريتني وافقت عليك انت بدل الحثاله اللي طحت فيه .."
مروة>>"من جوا .."فوز ..
فوز>>جيت جيت ..
......
مقمعزة ف الدار وهيا ترجف من الخوف .. دموعها ينزلن وهيا تسمع ف عياط اختها .. بس من خوفها ماقدرتش تصبي وتحكي الحقيقة ..ماتقدرش تقول راه انا درتها .. دموعها ينزلن ساخنات ع خدودها لعند مانفتح الباب نطت من الخوف .. بحت فيها باتها وقرب بسرعه بحتت جنبها للتليفونات خذاهن وهو يقول بغضب .."معش في تليفونات كلبات كيفكن خسارة فيهن القدر .."
وطلع بسرعه بعصبية وهيا تبحت فيه بخوف .. مافيش شي يخليها متهمه بكل كل شي ع اختها .. صبت بشوية .. بعد سمعت صوت باب الحوش طبق .. جت لدار الضيوف اللي فيها فل .. فتحتها مابتش تنفتح ..
قعدت تخبط وهيا تبكي .."فل ردي عليا فل بالله عليك ردي قولي كلمه طمنيني عليك ..فل"
سمعت صوت بكا بألم .. وصوتها وهيا تقول بصوت عالي غالب عليه البحه .."شن درتلك مش اديري فيا هكي شنوو شن درت .."
ورد>>"تبكي .."سامحيني بالله عليك انا اسفه .. سامحيني ..
سكتت فل معش حكت شي .. وهيا راقده ع الارض وتبكي وتحس ف جسمها كله يوجع فيها .. وورد ادق ع الباب لعند تعبت وقمعزت وهيا تبكي وتسحبن ع مازن ..
......
مقمعز وهو يحك ف شعره والدخان ف فمه .. ويبحت ف الفراغ ..
يذكر ف الكلام اللي قاله لعمه ..
كان مصعب جاي اصلا لعندهم .. درس انس ف نفس اللحظه اللي درس فيها مصعب .. نزل انس ودق عليه الروشن ..
مصعب>>"بضحكه .."اووو مالك شن حالك ..
ابتسم مجاملة لعمه .. وقال"بنحكي معاك ف كلمتين .."
مصعب>>اركب باه ان شاء الله خير..
ركب انس مع عمه ..
انس>>بنحكيلك ع فل ..
مصعب>>كنها شن دايره؟ .. نعرفها اهدا من اختها انا اكيد دايرات شي ف المدرسة ..
انس>>"هز راسه بلا .."فل تكلم ف مازن راجل فوز ..
عقد مصعب حواجبه وهو يبحت ف انس .. بعدين ضحك .."فل بنتي انا؟ انا بناتي مربيهن كويس ي انس افطن لروحك شن تحكي .."
انس>>عمي مصعب اكيد مش حنجي ونقولك بنتك دارت الشي هذا وانا مش متأكد منا ..
ومدله تليفون مازن اللي كان عنده .. وقعد مصعب يقرا ف المسجات وتأكد من الرقم بروحه .. وجه نسود وبحت ف انس ..
مصعب>>حنصرف انت ماتقول لحد انا حنصرف من عندي ..
هز انس راسه وخذا التليفون ونزل .. ومصعب برم بالسيارة وطلع ..
..
رد انس لعقله .. وتنهد بضيق بعد هدا من الاعصاب اللي صارن فيه ركز ان هو شن دار .. حس روحه حقير بعد حكا لعمه كان مفروض هو يصرف بدون مايحكيله عارف مصعب ف اللحظات هذينا شن يصير فيه .. تنهد بضيق .. بعدين صبا وهو يطفي ف الدخان وخش يدوش ..مسيب وراه بقايا دخانه اللي مايعملش بيه اي حد ف الحوش ان يدخن غير بوبكر ..
.......
زكريا اللي تمنت فل ان كان قاعد بكل وان حكتله كل شي وهو كان حيصرف .. زكريا اللي متعب تقى ف جرته لدرجه مزالت مريضه .. فتحت عيونها وبحتت ف اختها اللي تبكي جنبها .. تنهدت بحزن .. وردت عيونها للسقف ..
دق باب الدار وخشت ميسان ..
ميسان>>"ابتسمت .."نضتي تقيوه ..كويسة ماما توا؟ ..
تقى>>"ببحه .."كويسة بنصبي ندوش ميسان ..
ميسان>>"جتها مسكت يدها .."صبي حبيبي هي ..
مسكت يدها وصبتها ..بحتت ف اختها وبحتت ف ميسان وهزت راسها بمعنى .."كنها ؟"
غمضت ميسان عيونها بمعنى بعدين ..وطلعن هنا الاثنين مخليات وراهن سالي اللي بكت من كلام سيف اللي مزالت تسمع فيه لعند رقدت ..
.....
اما زكريا اللي كان مع امه ..
كان مقمعز جنبها بعد جت حنه وسلمت عليها .. وروح بيها عمر من جديد عشان خايف عليها من المستشفيات .. يبحت فيها وهيا راقدة بالنوم .. نزل عيونه ليدها اللي ماسكه يده حتى وهيا راقده .. تنهد بحزن ..وماتحملش قلبه .. طلع تليفونه من جيبه وفتحه ..وقعد يراجي فيه ينفتح وهو عين فيها وعين فيه ..
برا من الدار ف مكتب الدكتور المشرف ع حالة سمر كان خوها مقمعز معاه ويسأل ع حال اخته ..
"دكتور أنت عارف مرض أختك وعارف اللي مرت بيه .."
هز راسه بإيجاب وهو ساكت ..
"وعارف ان المرض هذا مالش علاج .. ومهما ضعفت قوته إلا ان مالش حل .."
عمر>>"بخوف.."اختصر ي دكتور ..بدون مقدمات ..
"للأسف حالة المدام سمر متدهورة جداً رغم توقعنا بعد ناضت من الغيبوبة انها تقعد كويسة بس عكس التوقعات .. وحالتها كل يوم للأسوء .."
عمر>>"بأحباط.."يعني ..؟
"انا اسف بس مش حيكون لها الا كم يوم .. وربي أعلم .."
غمض عيونه بألم .. ومن عينه نزلت دمعه .. حس بقلبه انتفض من مكانه .. اللي سمعه كان قوي عليه واجد .. هو عارف ان مافيش امل منها بس ماتوقعش الشي هذا بكل .. حط يده ع راسه والدكتور يبحت فيه بحزن .. دموعه نزلن وهو يقول بصوت مليان الم .."ي الله ي الله .."
صبا وسلم ع الدكتور وطلع .. يمشي ويتردد ف وذانه اللي قاله له .. وصل ف الدار متاعها .. بحت فيها قعد يمسح ف عيونه زين وفتح الباب وخش صبا قدام الباب وهو يسمع ف زكريا ..اللي كان يكلم ف ميسان ..
زكريا>>كيف حالكم انتم ..
ميسان>>حبيبي نحنا كويسين انت شن حالك .."وسكتت اشويه .."شن حال امك ..
زكريا>>"بلع ريقه .."الحمدلله .. ادعيلها ي ميسان ..
ميسان>>حالتها حرجه واجد؟ ..
زكريا>>"بحزن .."مش عارف بس حاس .. في حاجه حاس بيها مزلت معبية حزن .."وسكت .."
رشفت تُقى اللي كانت تبكي و تسمع فيه مع ميسان ..
ميسان>>ربي يشفيها ويعافيها يارب العالمين ..
زكريا>>يارب .. خلاص ميسو قلت نطمن عليكم .. تبي شي؟
ميسان>>لا حبيبي سلامتك انت بس طمني كل فترة عليك وع امك ..
زكريا>>ان شاء الله مع السلامه ..
وسكر .. تنهد وحط التليفون جنبه .. ورد يبحت ف سمر ..
سمع صوت وراه "رقدت.."
بحت فيه وابتسم وهز راسه بإيجاب ..
عمر>>انا ماشي نغير دبشي ونرقد اشويه ..
زكريا>>تمام انا معاها ..
هز عمر راسه .. وبحت ف اخته بحزن .. وبرم طلع مجرد مافات فم الباب دموعه نزلن من جديد ونهار بكا بصمت .. وزكريا رد بحت ف امه وابتسم وغمض عيونه ..
....
ميسان>>صوته كويس ..الحمدلله ..
تُقى>>"تمسح ف دموعها .."الحمدلله بس اكيد مش حيتخطى الموضوع بسرعه ..
قلبت شواربها ميسان بضيق .. وقالت تلقائي .."معاه عمر اكيد حيصبي معاه .."
ضيقت تقى عيونها وضحكت ..بحتت فيها ميسان وضحكت .."كنك"؟
تقى>>انتي اللي شن في ..
ميسان>>شن في؟
تقى>>عمر ما عمر🌚
ضحكت ميسان .."خزي تفكيرك مغبر .."
رفعت تقى حاجبها .. سرحت ميسان .. بعدين قالت .."سالي اختك صايره بينها مشكله هيا وسيف .. رن عليا سيف قالي قوليلها تحترم روحها احسن مانوصل الموضوع لعمتي انظر اختك شن حاكيتله مابش يقول .."
تقى>>"بضيق .."انا هذا عليش نبيها تزوج بسرعه احسن ..
مطت ميسان فمها .. بحتت فيها تقى وقالت "اييه شن قصة عمر .."
ضحكت وصبت وسيبتها وتقى تبحت فيها وتضحك لعند اختفت من قدامها ..
......
مقمعزين هما الإثنين ..
واحد يسمع والثاني يحكي ..
بوبكر>>"بخنقه .."مش عارف شي ي عابد انا مش عارف .. كل شي يقولي لا عقلي قلبي نفسيتي .. حتى حوشي ريحتها هيا .. قولي بالله كيف نجيب وحده اخره ..
عابد>>عيالك ..عيالك لازمهم ام ي بوبكر .. اختك مش حتقعد ديما عندها حوش .. وامك مراه كبيرة بالله تعانيكم وتعاني باتك ..ماتقعدش اناني فكر ف عيالك ..
بوبكر>>"بنبرة الم .."وشن كاسر ظهري غيرهم .. وشن مخليني مش عارف شن ندير غيرهم نقول معليش تشبه امهم مش حيحسوا بالفرق بس انا حنحس بيه وواجد مش اشويه ي عابد ..
تنهد صاحبه بضيق ع حاله .. تنحنح بوبكر وقعد يمسح ف وجه بعد قرب منهم انس ..
انس>>اوووو عابد ..
ابتسم وصبا سلم عليه وقمعز .. وقمعز معاهم انس ..
انس>>حصلت زكريا؟ ..
بوبكر>>لا ..حتى رنيت ع خاله ماحصلتش ..
انس>>الله يسامحهم وخلاص .."وبحت ف عابد ..ورد عيونه لبوبكر .."مش كنت ناوي تخطب انت وسيف؟ ..
قلب بوبكر عيونه .. وبحت قدامه بدون مايرد .. ضحك انس نص ضحكه ..وعابد مبتسم ..
انس>> ي را اخطبوا امكم بالك تلها معاكم اشويه ..
بوبكر>>انس اقلب وجك ..
عابد>>صدق انس ومعاه حق .. توا كنت تحكي ع اللي صار وشن صار ف عمتي حنان أخطب وازوج خلوها تنسا اشوية ..
بحت فيه بوبكر .. وتنهد وسكت ..
وانس وعابد بحتوا ف بعضهم .. بعدين صبا انس .. وعابد قعد ساكت وهو يراجي ف قرار بوبكر ..
.....
مقمعز ف داره .. حاط يديه ع راسه .. ودموعه ينزلن اللي سمعه من الدكتور ف باله ماقدرش ينساه بكل .. هو بعد كم يوم حيفقد اخته .. اي اخت هيا كانت اكثر من اخت صاحبه وامه وكل شي له ..
حط يديه ع وجه .. وبحت فوق ودموعه يطيحن منا .. "ياربي كل شي ف يدك انت دير طريق ياربي .. يارب كيف مافرحتها بجيت ولدها بعد طول هالمده فرحنا بأنها تشفى يارب .."
بلع ريقه .. برم بعيونه ف الدار .. بعدين صبا وهو واخذ معاه دبش .. وخش يدوش ..
اللي كان يدعيلها كانت تاكل من يدين ولدها ..
زكريا>>هيا امي عاد تدلعي عليا ..
ضحكت .."بشوية ي امي مش هكي .."
زكريا>>"بحت ف الصونيه .."ماكليتي منها شي .. هيا بس بشويه بشويه ..
ابتسمت وفتحت فمها وهو ابتسم بعد كلت .. نزل من يده الكاشيك وبحت فيها ..
زكريا>>جميلة .. اعترفي كنتي مطيحه الشباب كلهم زمان اه ..
ضحكت بخجل .. "زمان كنت ماننقدر .."وتنهدت بحزن .."وماملش عيني حد غير باتك .."
رفعت عيونها فيه .. لقاته يبحت ف الفراغ بحزن .. ابتسمت .."مش حتوكلني .."
بحت فيها وابتسم .. "هي افتحي فمك .."
عيونها كانن حزينات .. وهيا تبحت فيه .. مهما دار عارفه ولدها عقله وين .. مره معاها ومره سارح ..
وهو فعلا بعد قالت ماملش عيني حد غير باتك .. اذكر حنان .. مرايف عليها  .. حاس يومه ناقص من دونها هيا اللي تعبت عليه هكي ..
حنان اللي حتى هي حاسه الحوش ناقص من دونه .. رغم وجود اختها وجت ميسان ومروة وهناء وعيالها حواليها .. الا انها حاسه كل شي ناقص من دونه .. دموعها ينزلن كل ماتذكر .. وأكثر شي يقهرها أنها جت منها الموجعه هيا ووجعاته وهيا ماتحمل فيه شي ..
اصبري ي حنان .. ع نقاء قلبك ..🤍
.....
ف الليل ..
مقمعزة قدام الدار اللي فيها اختها .. نهدت من البكاء والعياط .. وفل نفسها من الالم اللي تحس بيه معش قعدت تحس بشي .. غفت لحظات وناضت من الألم اللي فيها .. فتحت عيونها اذكرت كل شي ردت تبكي من جديد .. نفتح باب الحوش .. وخشت مروة اللي بحتت فيها ورد .. خشت مروة عرفتها ورد .. كانت معصبه بكل ..
مروة>>شن دايرات ي وجوه الكشايف شنو ..شنو ..
صبت ورد ووخرت وهيا تبكي ..
مروة>>"بعصبيه .."ماعرفتش نربي انا ماعرفتش .. باتك حطني وهو يحكي ف كلام تقول سم وقال مسافر .. شن دايرات شنو بس ..
وقربت للباب فتحت ع فل اللي رفعت عيونها ف امها .. عيطت مروة ع طول رقبتها بأسمها بعد حقتها وخشتلها بسرعه وورد حطت يديها ع وذانها وهيا تبكي بألم ع حال اختها ..
...
مر أسبوع من هاليوم ..
خشت مروة وهيا ماسكه ف يدها مق بابونج ..
مروة>>ماما فل هيا حبيبي صبي اشربي ..
بحتت ف امها بحزن .. وتقعدت وخذت منها الكباية .. مسكتها وقعدت تبحت قدامها بتوهان ..
مروة>>"تمسح ع راسها .."اشربي مش تقعدي احسن وتمشي للمدرسة ساد ماغبتي ..
بحتت فيها فل .."اهي ورد تمشي مش لازم انا ماخاطري ف شي .."
وحطت الكباية ع الطاوله جنبها وردت رقدت .. وامها تبحت فيها بحزن ..
تنهدت وطلعت بعد ماسكرت وراها الباب .. نزلن دموع فل بألم .. اكثر شي حارقها مش الضربه لا .. كلام انس وخداع اختها اللي خلا كل اللي حولها يحط عليها الحق وهيا مش دايره شي ..مافيش حد صبا معاها الا امها اللي كانت حاسه ان في شي .. اما خوتها الشباب ماحد حاول يفتح الموضوع قدامهم ..
....
ضام بصوابعه لبعضهن .. وخوه مصبي جنبه ..وقدامهم امهم ..
حنان>>"بغضب .."مش قادرين تصبروا اشوية مش قادرين لعند يروح خوكم ويقعد معاكم ..
محمد>>شن الكلام اللي تحكي فيه هذا .. زكريا انظر امتى يروح بتخلي العيال هكي؟ .. وعليش يرجوا اصلا وخوهم كويس مافيش شي بطلي قطاف فاضي .. وخلي هالحياة تمشي ..
هزت راسها بعصبيه وصبت طلعت .. بحت محمد ف عياله .."توا نمشوا العشيه لباتهن ونتفق معاه انا .. فاتحه وتاخذوهن وتمت .."
هز سيف راسه بابتسامة .. وبوبكر صبا طلع ركب لشقته ..
تنهد محمد وصبا لحق حنان ..
فتح الباب لقاها مقمعزة ع السرير وتمسح ف دموعها ..قمعز جنبها ..
محمد>>حنان خلاص هوني ع روحك .. زكريا بخير ونعمة وراه عند امه .. هوني ع روحك وخلي العيال يفرحوا ساد ماشافوا من حزن ..
حنان>>"بنبرة باكية .."انا مش قادرة نفرح ي محمد ووليدي بعيد عليا .. خايفه خايفه واجد ان معش يرد ..
محمد>>"مسك يدها .."يرد ي قلب محمد يرد .. زكريا مهما برم مرجوعه لك انتي انتي امه وانتي كبرتيه ..
حنان>>"بحتت فيه .."ولو حب عيشته غادي .. ولو خذاته سمر كيف ماخذاتك انت زمان ..
محمد>>"ضحك .." ي والله عليك حنان وخلاص ي بنت الناس انا ماخذاني حد انا لك من زمان من اول ماولدتني امي وانا لك انتي وبس وعيالي كيفي"وغمزلها .."
ضحكت من بين دموعها .. ابتسم ع ضحكتها وحضنها وهو يمسح ع راسها ..
......
مقمعز قدام الدار وهو يهز بكراعه بتوتر ..وعمر مصبي جنبه ..
زكريا>>هذي ثالث نوبة تجيها ف هالاسبوع ي عمر شن في احكي ..
بحت فيه لقا ف عيونه نظرة خوف .. تنهد وباع ريقه هو بروحه خايف وخايف واجد ..
عمر>>"بخنقه .."مافي شي مافي شي ..
زكريا>>عمر امي بتموت؟
بحت فيه عمر وعيونه تعبن دموع وهز راسه بلا .."لا ان شاء الله لا .."
تنهد زكريا وهو يفرك ف يديه ف بعضهن .. ويبحت قدامه ..وهو حاس بخوف كبير ع سمر .. اللي حالتها ساءت بكل الايام هذينا وقعدن يصيرلها ف نوبات صرع والدكاترة مش عارفين سببهن لدرجه حتى جرعات الكيماوي معش قدروا يعطوهن لها ..ومن قوتهن تفقد ف الوعي طول ..
برم عمر وطلع وزكريا يبحت فيه بخوف ..قمعز ف الحديقه وهو حاط يده ع عيونه .. اذكر شكل زكريا بعد جت نوبه لسمر ..طول الايام اللي فاتن كان هو يكون معاها وقت النوبه ويحكي عليها لزكريا بس .. اما اليوم شافها .. عياطه وهو يضبحلها حسه وجعله قلبه .. ندم اشد الندم ان ساهم مش يجي زكريا لأمه .. تمنه ان ولد اخته ماشفش امه وهيا بالحاله هذي وعرف ف وضع احسن ..
تنهد بألم .. وطلع دخانه وقعد يدخن .. وزكريا بألم مصبي يبحت ف امه اللي غابت عن الوعي بعد عطوها المهدئ ..
....
وفعلاً العشيه جت ومشا محمد ومعاه بوبكر وسيف ..
ولأن بوبكر كلم مسعود قبلها كان ف الحوش واستقبلهم استقبال كويس ..
وقمعزوا مع بعضهم ..
سارة كانت متريحه ..بس انوار لا .. كانت تمسح ع شعر مالك اللي مقمعز ف حضنها بدون مادير اي ردة فعل .. وامها اللي عارفه كل شي كانت تبحت فيها بحزن ..
مسعود>>مانلقا خير من نسبكم ي حاج محمد .. نسبكم يشرف كل حد ..
محمد>>بارك الله فيك ي خوي مسعود بارك الله فيك ..اللي نبوه بس فاتحه وتمت انت عارف المرحومه نور ماطق ع موتها شي .. وراجل اختي حتى هو ..
مسعود>>ان شاء الله اللي تبوه انا فيه ..
ابتسم سيف براحه .. عكس الشعور اللي كان يحس بيه بوبكر من كمده ف قلبه ..
.......
مقمعزات وهنا يوتن ف الخلط والحاجات متاع الفاتحه ..
فوز>>سالي الله يبارك حاجتك جت سمحه ..
بحتت فيها وابتسمت ..
تقى>>لعقبه لميسان ياربي ..
ضحكت ميسان ..'خليك ف حالك فرخه تقى .."
ضحكن البنات ..
فوز>>ميسو معش كلمك زكريا ..
ميسان>>"بحزن .."لا من اخر مكالمه اختفى من جديد ..
تنهدت فوز بحزن ..
تقى>>غريبة بنات خالي مصعب ماجنش ..
سالي>>كلمت ورد قالت امتحانات ويقرن ..
فوز>>ياناري وخيي راحت عليه السنه ..
تنهدن البنات بحزن واكثرهن تقى ..اللي تفكر فيه وف حالته ..
.....
فوز كانت تفكر ف زكريا وماعندهش ادنى فكرة ع اللي جايه لخوها ..
اللي كان مقمعز مع جماعته ..ف قهوة ..
جاهم واحد من الشباب صاحبهم سلم وقمعز .. اشويه .."انس ترا تعال نبيك اشويه برا .."
بحت فيه وصبا معاه وطلعوا ..
انس>>شن في ..؟
مدله ورقه .."دزها لك معايا مازن .."
مد يده وخذاها فتحها .. فتح عيونه ع كبرهن وهو يقرا فيها وصاحبه يبحت ف ملامحه ..
.....
طلع محمد وعياله وروحوا .. ومسعود طول طلع من الحوش بدون مايحكي شي لسارة وانوار اصلا هو حاسم الموضوع وموافق وموافقتهم لا تقدم ولا توخر ..
خش ..لقا مراته ف الباب تراجي ..
"شن في ..؟"
مسعود>>"وهو يحول ف سوريته .."جاي يخطب لضناه ..ف انوار وسارة ..
"اللي تفتكه منها تفتكه .."
مسعود>>انا خايف الفرخه انوار ادير حاجه انا عارفها البنت قليلة ادب ..
غمزلته"مافي شي يصعب عليك مسعودي .. بعدين ماتنسش لزتها ليا ف عزاء اختها .."
مسعود>>لا مانسيتهش خليها هيا تقول لا ونقلبها عليها وع امها ..
ومشا خش للحمام ومراته ابتسمت بنصر ومشت ..
......
..
.
.
#يتبع🤍
#فافي🤍