مكاتيب🤍

الحلقه 17

#مكاتيب🤍
#الحلقه_17🤍
.
.
.
.
.
.
.
.
.
.
.
.
.
.
.
.
.
.
.
.
.
.
.
.
بعد قعدوا عند هل العرسان اشوية .. ركبت كل وحده لشقتها .. وطبعاً انوار كانت شقتها نفسها شقة اختها .. بس كان بوبكر مغير الدار كليا ومخليها داره بروحه وهيا دايرلها دار بروحها جديدة ..خشت وهو وراها .. رفعت من ع وجها الكاب .. رفع عيونه فيها كانت نسخه طبق الاصل من نور بس الاختلاف ان نور ملامحها بريئة وانوار ملامحها حاده جداً .. رفعت عيونها فيه ..
انوار>>داري وين ..؟
كأنها عارفه شكل حياتها ..شيرلها ع الكرسي ..
بوبكر>>قمعزي اشويه لو سمحتي بنحكي معاك ..
بحتت وراها ف الصالون .. وقربت بحذر قمعزت .. وهو يبحت فيها لعند قمعزت ..قمعز مقابلها وضم يديه لبعضهن وهو يفرك فيهن بتوتر ..
بوبكر>>عارف شكل زواجنا شنو .. وانتي عارفه ان هذي وصية المرحومه ..اللي بنقوله ..
قطعت عليه كلامه وهيا تقول بصرامه .."اللي تبي تقوله انا عارفته .. وحافظته .. وقريته ومقتنعه بيه ..اللي بيني وبين مالك ومعين وغيرها ولا حاجه .. انت ف نظري مزلت راجل اختي وتؤمي ومش متأمله اكثر من هك .."
هز راسه بإيجاب .."اختصرتي عليا عرم حاجات بنقولهن ..تقدري اتريحي دارك اللي مصادره .."
صبت وهيا ماسكه قفطانها لعند خشت .. وهو بعيونه معاها .. بعدها تنهد وصبا خش لداره وسكر وراه الباب .. بحت ف صورة نور اللي معلقه وتنهد بوجع وقرب من السرير رقد بدبشه اللي عليه ..
اما هيا .. قمعزت ع السرير وهيا تبكي بوجع .. تبكي وتبكي .."الله يسامحك ي نور الله يسامحك .."
فعلاً الله يسامحك ي نور ع الوجع اللي خليتيهم يعيشوا فيه ..
.......
اما العرسان الاخرين ف مشت ليلتهم كيف اي عرسان عاديه جدا ..
..
اما هل العرسان .. ف حنان مارقدتش وهيا تخمم ف زكريا .. قلبها قابضها بالقوة وحاسه ان ف شي حيصير بس شن هو الله اعلم .. وفعلاً زكريا كان ف اسوء اسوء حالاته حالياً وربي يكون معاه وف عونه ..💔
.........
موت الأهل ديما صعب .. صعب ع السمع .. صعب انك تعيشه .. صعب انك تكمل وهما مش معاك .. بصفة عامه الحياة بدون اب وام صعبه جداً ..
بذات لو هل انت كنت بعيد عليهم .. كنت ماتعرفش بيهم او كنت تعيش بعيد عليهم .. وبعد فترة من انك تسد ريافك عليهم .. يسيبوك ويمشوا .. تحس كأنك كنت مقصر معاهم .. تحس أنك إنسان عشت بلا هدف ف حياتك وهما مش فيها زمان وتوا معش حتشوفهم بكل ..
هذا اللي عايش فيه زكريا توا .. رغم ان ماعشش مع سمر واجد .. بس كانت علاقته بيها مبنية من الاول ع البدايات دوبه تعرف عليها .. دوبه حس بحنانها .. دوبه بدا يحب فيها .. مزال ماشبع من هذا كله راحت منا ف رمشة عين .. بكاه عليها كان بقو جهده .. حاط يديه ع وجه ويبكي بشهقات متلاحقه .. قلبه موجوع .. ورايف عليها من توا .. ماقدرش عمر يهديه .. بل عمر بروحه يبي من يهديه ويمسح عليه .. وجودهم الإثنين مع بعضهم ف الوضع الصعب هذا زاد الأمر صعوبه واحد فاقد امه وواحد فاقد اخته .. ومش اي اخت .. عمر كانت سمر له امه مش اخته بس .. كانت حياته مرهونه بس بسمر .. وبعد ماتت رغم ان متوقع شي كيف هذا بس ماتوقعش بالوجع هذا ..
قرب من زكريا .. حط يده ع كتفه ..ومسح عليه ..
عمر>>"بنبرة باكية .."زيكو ي خالي ..هيا معايا مش تحضر التغسيله متاعها ..
بحت فيه زكريا بوجع ..
عمر>>دزوا ع وحده مسلمة تجي تغسلها وانت تخش بعد هيا تكمل تغسل شعرها ..
هز راسه بلا وملامح وجه ارتسمن عليهن البكاء .."لا لا مش حنقدر لا هذا هذا هذا حاجه كبيرة عليا كبيرة .."
ودموعه نزلن .. رشف عمر وهو يمسح ف عيونه .."هيا طلبت الشي هذا مني مش اديره انت ..هيا سلم وليدي صبي .."
زكريا>>"ببكا .."باهي خليها اليوم ليش بالسرعه هذي بتدفنها .. بالله عليك خليني معاها اليوم ..
برم عمر وجه وهو يمسح ف عيونه .."باهي صبي معايا خالي هيا .."
مسك زكريا يده وصبا معاه .. قدموا هما الإثنين ف الغرفه اللي خلو فيها سمر .. بحتوا ف بعضهم .. واحد يستمد ف القوة من الثاني .. فتح زكريا الباب وعمر صبا وراه .. خش وخش وراه عمر .. شير للمراه تطلع .. طلعت طول ..
وقرب زكريا من امه .. كانوا مولعين مكيف .. مجمده الدار ..بس اللي هما فيه ماحسوش بشي .. مسك زكريا يدها .. وحول الفوطه من وجها ..
رفع يده وحطها ع وجها ..
زكريا>>امي ..
نزلن دموع عمر وهو يبحت فيه .. رفع تليفونه وهو يدز ف مسج وصل لراجل اخته ونفسه وصل لمحمد ..
زكريا>>"دمعته ع خده .."مزلت ماشبعت منك ي حنونتي مزال .. كنت نبي عمر معاك مش نشبع منك ونعيش معاك كل شي .. مزلت حتى"ورشف ودموعه ينزلن .." مزلت حتى شن تحبي تاكلي ماعرفت ي عيون زكريا انتي .. رايفت عليك من توا .. اسف عشان ماعطيتكش المشاعر اللي تبيهن .. انا اسف عشان ماعرفتش بيك الا متأخر وعشت كل شي مفروض نعيشه معاك عشته مع مراه ثانيه .. انا اسف ي عيوني اسف ي قلبي .. اسف ..
ونهار بكا وحط يده ع كتفها .. وعمر يبحت فيه بحزن .. قرب وحط يده ع كتفه وشد عليه .. برم وحضنه وهو يبكي وعمر يبكي معاه ..
........
وسط حوش العيله .. كان النسيب "عثمان .." قاعد معاهم ف لحظات غياب عمر عشان فتاح راجل كبير ..وراجل بنته الثاني مسافرين برا البلاد ..
كانوا يهدرزوا وجنبهم سليمه حاطه العداله ..
عثمان>>صبي ليلى بابا عطيني طاسة شاهي ..
ليلى>>حاضر ..
صبت وقربت من حنها اللي مدتها لها ..عطتها لباتها اللي جاته رساله .. مسكها منها وفتح ع الرسالة اللي كانت من عمر محتواها .." سمر توفت اليوم مالهش الا 3 ساعات لتوا ..خبر العيلة عندك .. والدفن هيا طلبت ان يكون ف بريطانيا بكره الظهر الدفن لو لحقت وجيت وجبت باتي تمام لو هك حندفنها انا وولدها .. "
هذا كان بس المسج .. اللي تلقائي خلا عثمان ينصدم ..
ركز مع عمته اللي تقول .."الله لو سموره تروح حتى هيا ومعاها ولدها .. وتكمل هالجمعه ربي ينوضها بالسلامه وتجي بنيتي .."
بحت فيها عثمان .. اللي ركزت معاه مراته ..
سلوى>>عثمان كنك ..
بحت فيها ..بحزن .. وفتاح ركز عليه ..
عثمان>>سمر ..
فتاح>>"حط كباية الشاهي .." ي ساتر استر ..
سليمه>>"بخوف .."كنها بنتي ..
رد بنبرة وجع.." توفت اليوم ..توا خبرني عمر .."
.......
كان راقد .. وجنبه حنان اللي مجافي عينها النوم .. فطنت لتليفونه طنطن .. بحتت فيه وهيا تقرا ف قراءن سكرت المصحف وقربت من محمد بشويه ..
حنان>>محمد محمد نقالك طن بالك عمر ..
بحت فيها بوجه ناعس .. مسح وجه بيده وقمعز وهو يكر ف نقاله .. فتح ع مسج عمر .."سمر توفت .. والدفن بكره الظهر .. وضع زكريا صعب وانا معش عرفت كيف نصرف معاه ..لو تقدر دزلي واحد من الشباب ع الاقل يكون معاه وقت الدفن .."
تبحت فيه حنان بترقب .. نزل التليفون وهو يقول .."لا إله إلا الله محمد رسول الله .."
دموع حنان طاحن طول .. "ماتت ..؟" سألت بنبرة وجع .. هز محمد راسه بحزن ..زاد صوت بكاها ..حطت يدها ع فمها وهيا تبكي ..قرب منها حضنها وهو يهدي فيها .."عمرها هذا لا إله الا الله .."
حنان>>رفيقة عمري .. الله يرحمها ويوسع عليها خيتي مش صاحبتي بس مش بنت عمي بس .. ي حرقتي عليك ي سمر الله يرحمك ويسامحك ي حبيبتي ..
ابتسم محمد بحزن باس راسها وصبا ..
بحتت فيه ودموعها ينزلن .."وين ماشي .."
محمد>>انا موقفي حساس مش حنقدر نمشي وانتي مش حنخليك تمشي زكريا مانعرفش ردة فعله وجوازك طايح .. حنمشي نحجز لأنس هو انسب واحد يمشي توا يصبي مع خوه ..
هزت راسها بإيجاب .. لبس دبشه وهو يبحت فيها كيف تبكي وتخبط .. طلع ..
دق ع دار انس ..رد بصوت ناعس .."من .."
فتح محمد الباب وبحت فيه .."صبي انس ام خوك توفت ونبيك تمشيله قبل الدفن .."
قمعز انس وهو يمسح ف وجه .."لا إله الا الله .." وصبا "ماشي تحجز ..؟"
هز محمد راسه وطلع .. دق ع فوز اللي فتحت وهيا لابسة ملايتها ..
محمد>>بابا امشي لأمك ام زكريا توفت وقاعدة تبكي ..
فوز>>"حطت يدها ع صدرها .."يناري ..
ومشت طول لامها .. سيبها محمد ونزل ولحقه انس وهو ف يده الجواز متاعه  ..
خشت ع امها لقتها تبكي وف حالة ..
فوز>>ماما ..
حنان>>"بحتت فيها .."ماتت رفيقة عمري ي فوز ماتت .. وخوك بروحه ي فوز خوك ..
قربت حضنتها وهيا تبكي معاها ..
وخلال نص ساعه حصلوا بالواسطة حجز لأنس وتطلع الطيارة بعد ساعتين ..يعني الساعه ف ليبيا كانت 12:5 ف بريطانيا كانت 11:5 بعد ساعتين تطلع الطيارة بأنس 2:05 ماوصل لزكريا الا قريب الفجر يلحق عليه ..
......
بس حرقة ام سمر وبوها وخواتها بروحها ..
عيطت سليمة لين نبح صوتها .. ف قولة .." ي نا ي امي اللي متي وانتي مانكواللي متريحه .. يانا ي بنتي اللي ماشبعتي من كبدك وضناك .. يانا بنتي المحروقه يانا بنتي المحروقه ع ضناها ماتهنت بيه .. يا نعليا سمر ي امي .. يانعليا بنتي .."
وفتاح ف قولة بس "إنا لله وإنا اليه راجعون لا إله الا الله .."
وحتى هما بالواسطة حصل عثمان حجز له ولفتاح ومعاهم ليلى اللي بالسيف شالوها ممكن يستحقوا شي وتقعد معاهم ..