مكاتيب🤍

الحلقه 16

#مكاتيب🤍
#الحلقه_16🤍
.
.
.
.
.
.
.
.
.
.
.
.
.
.
.
.
.
.
.
.
.
.
يقولو ان حياة البنت بعد الطلاق تكون صعبة .. عليها وع اللي حواليها .. حتقعد نظرة الناس حاجه ثانية خالص لك .. وكل اللي حواليك حاسين بالشفقه اتجاهك ..لدرجه تحسي روحك دايره كبيرة من الكبائر .. بس انا عكس الناس .. نشوف ان المطلقه إنسانة عاشت تجربة فاشلة مع إنسان ماقدرهش ونهوها بالمعروف .. مهما كانت مطلقه بعيل او بدون بس نحس اي وحده أطلقت عاشت حاجات واجد مش وصلت لمرحلة الطلاق لذلك تريحت .. نشوف فيه إنجاز كبير وماديرش الا اللي حرة وقلبها كبير وقوية بكل وتقدر تواجه وتحط عينها ف عين اي حد ..
واللي نحكي عليها توا فوز ..🤍..
اللي كانت مقمعزة ف مربوعه عيت جدها .. يستنوا ف العروس تخش .. ماه اليوم فاتحة وزفة سالي اللي حتسافر مع راجلها مباشرة لكندا مش يكمل قراية .. كانت فوز يومها بكامل أناقتها رغم اه انها كانت ليلها كامل تبكي وتنوح .. بس الشي هذا نااثرش ع ظهورها قدام الناس وهيا ف احسن حالها .. كانت لابسة قفطان بسيط متاع مناسبات .. ورافعه شعرها بطريقة حلوة .. ودايرة مكياج خفيف بناتي .. ولابسة كندرة زحاف ف يدها عاديه جداً مع اكسسوارات بناتية حتى هنا .. اللي يحقها يحسدها ع قوة قلبها ..
وأغلب كلام العرس كان عليها هي ..
بس ولا مهتمه ولا مدورة .. المهم روحها ..
خشت تقى من فم الباب بحتت ف فوز اللي تهدرز ..وشيرتلها .."فوز .."
بحتت فيها شيرتلها تجي ..صبت ومشت لعندها ..
فوز>>كنك ..
تقى>>تبيك خويلة ميسو ..
هزت راسها ومشت وتقى وراها ..
فوز>>نعم ميسو ..
ميسان>>هاكي ابدي وزعي مع تقى .."ومدتلها الصفرة .."
فوز>>"مسكتها .."كيف بنات عمي مصعب وين ..
ميسان>>فل راقدة مريضه وورد قاعده برا تجيب ف السكر للقهوة ..
هزت فوز راسها وطلعت بالعصير هيا وتقى ..
هنا طلعن من هنا وخشت حنان من هن .. بحتن فيها ابتسمت وخشت تسلم ع الصبايا واللي يسألها وينك تقول .."كنت نشيل ف فلوس صبايا العيال .."
......
سيف>>سارة مش مسامحك لو ف شي ف بالك وماقلتيش عليه ..
سارة>>"بخجل .."سيف والله الفلوس اللي دزيتهن يسدن وبالزايد ..
سيف>>ان شاء الله ان شاء الله .. خوذي دبشك بس الحوش مش ناقصه شي ..
سارة>>ان شاء الله ..🤍
سيف>>"بضحكه .."هيا حنسكر انا خلاص خذينا راحتنا بالحيل ..
ضحكت وقالت .."تمام .."
سكر طول .. وهيا نزلت تليفونها وبحتت ف اختها اللي تبحت ف الفراغ ..
سارة>>افردي وجك خلاص اللي صار صار ..
انوار>>"دموعها نزلن.." لا مش اللي صار صار باتك هذا مش عارفه شن ندعي عليه لو خذا رايي شن كان صار .. ولا هذك الحيوان اللي خذا الموضوع بجديات وجايب فلوس طبعاً من اللي قتلها غيره اصلا ..
سارة>>"بحزن .."انوار هذا نصيبك وهذا ربي ماكتب .. ماتقوليش كلام كيف هكي .. وانتي عارفه ومتأكدة ان نور ماتت عشان مريضة ..
سكتت وهيا تبكي ..وسارة تبحت فيها بحزن ..خشت نزيهه ..
نزيهه>>"بوجه منصفر .."امتى تبن تبدن توتن روحكن ..معش مزال شي الا خمس ايام قريب ..
زاد بكا انوار .. بحتت فيها نزيهه بحزن ماتقدرش تقول شي هيا بروحها واجعتها بنتها وواجعينها برضوا عيال بنتها .. ردت عيونها لسارة .. وبحتت فيها ..
نزيهه>>"بخنقه .."اتفقن وقوللي ..
وطلعت ..ردت وراها انوار .."ديما سلبية ديما نحنا اخر الناس تفكر فينا .."
بحتت فيها سارة وسكتت .. ونزيهه حطت يدها ع فمها وهيا تبكي بوجع ع بنتها اللي صغيرة للمرمدة هذي .. بس لا ف اليد حيلة
......
ابوبكر>>انا عارف باتها حيرد بالموافقة متأكد كنت ..
عابد>>"وهو يدخن .."إنسان تاعب مريض ..
بوبكر>>زمان كانت تحكيلي عليه المرحومة توا تأكدت اخره ..
عابد>>مالك وماله حدك عيالك ومراتك وخلاص ..
بحت فيه .. كسر عابد عينه فيه لقاه يبحت فيه ضحك ..
بوبكر>>حتى العمل بنرد خلاص سادني عطل ..
عابد>>عين العقل بس خليك مع عروستك اشوية قبل ..
بحت فيه بتضييق عيون .."اتحنط انت ..؟"
ضحك عابد .."لا ي را نحكي جد .."
بوبكر>>نعنبو الجد اللي تعرفه انت باهي .."وصبا وسيبه .."
وعابد يضحك من جده .. جوه سمح من اول ماقاله بوبكر ان اخته اطلقت ..بعدين فطن ان جايبه هو بلا سيارة صبا يجري وهو يعيط .."بوبكر اوووي راجي .."😂
عابد مطلق من عمر بوبكر .. ماعندش عيال وبعد طلق عجباته فوز ووقت جا يبي يخطبها او هو خطبها بس رفضت بسبب كانت تبي مازن هذك الفترة ..
......
دق باب الدار ..وهو فاتح نص عين ..
زكريا>>افتح ي عمر مفتوح ..
فتح الباب وخشش راسه .."كيف راقد لعند توا .."
رد حضن المخده وغمض عيونه .."ماعنديش نيه نصبي بكل .."
عمر>>كنك مريض؟
زكريا>>عمر اطلع ..
رفع حاجبه وقدم حط يده ع جبهته ..
عمر>>ماعندكش حراره ..
زكريا>>"بحت فيه .."مش مريض ماقلتش مريض ..
عمر>>كنك باه .."وقمعز جنبه .."من اول امس امك تسأل عليك ..
زكريا>>"برم ع ظهره .."مانبيش نشوفها ..
عمر>>"ضيق عيونه .."عليش؟
زكريا>>"بحت فيه .."عليش ماقتلي ان معش مازال شي مش تموت ..؟
سكت عمر وبحت ع الجنب ..
زكريا>>مانبيهش تموت .."وضحك بحزن .."تقول شن عشت معاها انت .. انا ماعشتش صح بس مانبيهش تموت نبيها تقعد معايا تقعد مش نعيش معاها كل شي ..
تعبن عيون عمر دموع وبعدين بحت فيه .."ماتندريش ع الدنيا وع العمر مرات ماتموتش ..ماتعلم ع شي ..ربي ع كل شي قدير ..ربي اعلم "
سكت زكريا وهو يبحت ف السقف .. بحت فيه عمر وخبطه ع يده بوني ..
عمر>>صبي صبي امك تبيك صبي ..
ضحك وبحت فيه وقمعز .. خبط عمر راس زكريا وطلع وهو مبتسم .. وزكريا ضحك بحزن وصبا خش للحمام ..
.......
نزلت سالي من السيارة اللي جايبها فيها إسماعيل .. وقرب مسك يدها وقعد يمشي بيها .. مع نزلت سيف من شقته وطلع جت ف وجه .. هيا كانت متغطيه بالكاب ماحقتش بس هو برم ومشا ..مدها إسماعيل لميسان ومشا برم ..
حولت الكاب وبحتت فيها ..زغرتت ميسان وسالي تبحت فيها بأبتسامة ..
تقى>>"حاطه يدها ع فمها .."عسل طالعة تهبلي ..
سالي>>عقبالك ..
ابتسمت تقى وقربت حضنتها زين ..
مع طلعت فل اللي ابتسمت بوجه تعبان .. وقربت منها ..
فل>>سالي ي قلبي مبروك ..
ابتسمت وحضنتها وفل حضنتها زين ..
وبعد الاحضان من البنات .. قدمت ميسان وفتحتلها الباب خشت سالي للمربوعه ..
سالي>>قروها الفاتحه؟ ..
هزت ميسان راسها .. زغرتت تقى ومعاها ميسان .. وسالي تبحت فيهن ومبتسمه .. قدمت ورد ولعت اغاني ..
ومشن يديرن ف باقي العزومه .. وسالي مسندرة ف المربوعه .. مالبستش فيلو لبست قفطان ابيض بسيط ..
خشت فل من جديد ف دار التلفزيون .. وجربت ترن ع زكريا من جديد بالك تصدف ويرد ..من تليفون ميسان ..
رنت .. علق الخط ضحكت وهيا تراجي فيه يرد ..
...
طلع من الحمام وهو ينشف ف شعره .. سمع صوت تليفونه يرن قدم بيشوف من .. لقاه ميسان .. مط شواربه بضيق بس كان قلبه ملهوف ع حنان .. مسكه ورد وهو يقول .."ايوا .."
نهارت فل بكا بعد سمعت صوته .. "زيكو .."
زكريا>>"بضحكه وعيونه دموع .."فل ي شفشه وين وين ..
فل>>انت اللي وين انت وينك فقدتك بكل بكل ..
زكريا>>"تنهد .."اه ي فل لو تعلمي بحالي ماهو حال .. لا يسر صاحب ولا عدو ..انتم شن حالكم .. وهلي شن حالهم ..
فل>>فترة وتمر ي عيون اختك وتكمل هالمحنه ويرد كل شي كيف قبل واحسن .. الحمدلله كلهم تمام وانت شن داير ..
زكريا>>قاعد نهد وخلاص ف حاجات مش عارفهن .. "وسكت اشويه .."امي حنان شن حالها ..
فل>>"تنهدت .."مسكينه عميمه حنان من يوم مامشيت انت وهيا حالها ماهو حال ..
سكت قعدت تسمع بس ف نفسه .. كيف جت بتحكي خشت حنان ..
حنان>>فل امي نجيبلك حاجه تاكليها ..
فل>>لا عميمه مانبيش عطني البنات مبدري ..
حنان>>"فطنت للنقال.."تكلمي سامحيني مافطننش تبي حاجه ضبحيلي ..
كيف جت فل بتقول اسم زكريا فطنلها وقال .."ردي بالك تقولي انك تكلمي فيا ردي بالك .."وحكا بنبرة باكية .."احكي معاها فل احكي بنسمع صوتها .."
جت حنان بتطلع ..
فل>>عميمه ..
بحتت فيها حنان .."نعم .."
فل>>تعالي اشويه بنحكي معاك ف حاجه ..
استغربت حنان بس جت وقمعزت .."نعم حبيبتي .."
فل>>مرايفه ع زيكو ؟ ..
تنهدت حنان من قلبها .. ودموعها طول نزلن .."حرقة قلبي زكريا مش عير مرايفه عليه مرايفه وبس .. ياريت يرد حتى ع تليفونه نطمن ان بخير ومانبي من الدنيا شي بعدها .. وليدي انظر شن داير برا .. كيف عايش كيف ياكل ويشرب .. اسبوع ونحس فيه سنة .. الله يسامحك ي امي وخلاص .."
تسمع ف رشفات زكريا من التليفون .. كان يبكي بالعبره وهو يسمع فيها .. قربت فل من حنان وهيا تبكي وحطتلها التليفون ع وذنها .. رفعت عيونها فيها .. هزتلها فل راسها .. سكتت وهيا تسمع ف صوت بكاه ..
بعدها قعد يحكي .."وانا انا مش مصدق مزلت معقوله امي حنان تطلع مش امي .. مش مصدق ي فل .. نقول حلم وتوا يوم نوعا منا ونكمل حياتي عادي .. بس ماوعيتش ي فل .. خايف حتى امي سمر تسيبني ي فل .. قالولها ايام معدوده وتموت .. وانا انا عايش ومش عايش عايش ف متاهة مالهش نهاية .. بنموت ي فل ..بنموت .."
قال كلامه الاخر وهو يبكي بالعبره وحنان تبكي ع كلامه .. "زكريا امي .."
بعد سمع صوتها .. صوت عبرته خف وسكت ..
حنان>>احكي ماما احكي ..هزبني عاتبني .. كل شي ديره فيا انا راضيه ..
برضوا ساكت ..
حنان>>"ببكا .."زكريا ي عمري احكي حبيبي رايفت عليك وليدي ..
حول التليفون من وذنه بصعوبة .. حط يده ع الحمره وسكر عليها وهو يبكي .. حط يده ع فمه وشد عليه زين ..
واما هيا نهارت بكا ف حضن فل وفل حضنتها وتبكي معاها. ..
.....
خشت مروة للمبطخ ..
مروة>>ورد هاكي صاحبتك ..
بحتت فيها وسكرت الشيشمه ..
ورد>>تقيوه والنبي كملي ع بال ماجيت ..
تقى>>عدي مافضل شي اصلا ..
قعدت تسمح ف يديها وبعدها خذت التليفون من امها وطلعت بيه ..ومروة ردت طلعت قمعزت جنب الصبايا ..
بحتت ورد ف السماء دوبها باديه تغرب .. حطت التليفون ع وذنها ..
ورد>>ايوا سما ..
سما>>نسيت بكل ان تليفونك مش معاك بعدها اذكرت ان تليفون امك عندي ..
ورد>>"برمت وهيا حاطه يدها ف جيبها وتمشي .."ماه حكيتلك القصه ..
سما>>خلاص اللي صار صار توا ..
ورد>>لا والله قلبي واجعني ي سما بكل" ودموعها نزلن .."نشوف ف اختي مظلومه وانا ساكته وانا السبب .. خاطري نمشي لأنس ونقوله راه انا كنت نكلم فيه بأسم فل ..
سما>>بلا هبال خلاص اللي صار صار ..
تنهدت ورد بحزن .. وبرمت مش ترد لمكانها شهقت بفجعه بعد شافت انس وراها ويبحت فيها بغضب ..
......
خش للمستشفى .. وعمر وراه يبحت فيه ..
سمع صوت بكاه بس ماحبش يخش ويدخل .. ماحبش يكون ف الصورة بكل وخلاه براحته مع مشاعره اللي عايش فيهن ..
فتح باب غرفة امه .. وخش وهو مبتسم ..
زكريا>>لا الوجه منور اليوم .. وعيون رايحات سماح .. وقلبي انا كل يوم يذوب ف حبك ي مراه انتي ..
ضحكت سمر  .."بياع كلام ي وليدي انظر لمن طالع .. كنك غايب معش جيت .."
قمعز ع السرير .. "امي .."
سمر>>نعم ي امي ..
زكريا>>احضنيني ..
ابتسم عمر .. وسمر قربت منا حضناته وهو لف يديه ع خصرها زين ..
زكريا>>ان شاء الله ربي يجعل يومي قبل يومك ي غلاي انتي .. وربي شاهد ان حبيتك حب وكأنه نعرفك من زمان .. كل شي ندير فيه معاك ع انك امي وحياتي كلها .. نموت لو تفارقيني ..
قعدت تبكي سمر وهيا حاضنته .. وهو دافن وجه ف رقبتها ودموعه ينزلن ..
برم عمر وجه وهو يمسح ف دموعه ..ويذكر ف كلام الدكتور ..
"اسبوع بالكثير حالة اختك للأسف الشديد معش اتحمل ..كله ف يد ربي بس هذا اللي نقدروا عليه وبرضوا نقولك الاعمار بيد الله .."
رفع زكريا كرعيه بعد حول كاويشه ورقد ع كرعيها وهيا ضحكت وقعدت تلعبله ع شعره ..
زكريا>>وقت كنتي حامل بيا توحمتي ع عسل ..؟
سمر>>عليش ..؟
زكريا>>"بضحكه .."عشان النحل اللي ف بريطانيا كله يبحت فيا ..
ضحكت سمر .. وطبست باست راسه ..وهو مبتسم ..
بحت زكريا ف عمر ..
زكريا>>عمر اوي ..
بحت فيه "نعم .."
زكريا>>اطلع وسكر الباب وطفي الضي ..
سمر>>زكريا عيب خالك ..
زكريا>>اس بنرقد والله تعبان ..
بحتت سمر ف عمر اللي ضحك .. ودار كيف ماقال زكريا .. وسمر ابتسمت بقلة حيلة وقعدت تلعب بشعره لعند غفا ورقد فعلاً .. وهي تبحت فيه وبس ..
حطت يدها ع لحيته .. وخدوده .. بعدين رفعت يدها وحطتها ع عيونه .. ونزلت ع خشمه .. كانت فيه لقطه ف فمه مميزة اشوي .. الشفة العلويه كانت فيها كيف النفخه مخليتها متقدمه بطريقة سمحه ع الشفة التحتيه .. والشي هذا كان ف فم سمر نفسه بالضبط .. ابتسمت .. حطت يدها ع لحيته وتنهدت ..
سمر>>ياريت عمري يطول وانا جنبك ي حبيب امك .. ياريت ربي يكتبلي عمر ونقعد ديما معاك مانفارقك بكل .. سامحني حتى بعد شفتني شفتني ع فراش الموت وف المستشفى .. ياريت نقدر نرد الزمان راني ماجريتش ورا وهم ولا عيشت روحي عيشة مالهش لزمه كنت بس قعدت عليك ومتت وعشت وانا معاك سامحني ي امي اللي عيشتك وجع اكبر من عمرك ..
دموعها نزلن وهيا تبحت فيه ..
فتح عيونه وهو شبه راقد .."ارقدي متريح راه .."
ابتسمت من بين دموعها ..وهزت راسها بإيجاب واتكت ع المخده ويدها مزالت ع شعره ..
.......
كيف جا انس بيحكي .. انسمع صوت زغاريت يعلنن ان هل العريس وصلوا ..
عيون ورد اللي كانن يبحتن ف خوف ف انس .. انتقلن ليديه بعد كرها بقوة وشالها ورا الحوش ..
وهل مروان خطيب سالي خشوا .. وخواته يزغرتن استقبلوهم جوا .. اللي دقائق بس وتطلع معاهم سالي عشان الطيارة ..
ف الوقت اللي كانت فيه ورد اتحاسب ع أفعالها ..
أنس>>شن اللي قلتيه توا ..عاوديه ..؟
ورد>>"بخوف .."شنو ماقلت شي انا ماقلت شي ..
انس>>"بعياط خبط الساس وراها .."ورد وربي المعبود لو ماحكيتي اللي سمعته توا تكون نهايتك ع يدي ..انتي اللي كانتي تكلمي ف مازن انتي ..
قعدت تبكي بالصوت .. "وراس انس ماتقول لبابا ولا تقول لحد وراسك .."
انس>>"حط يده ع راسه وهو يبرم .."نعنبوا فيتك نعن اصلك بكل كيفف كيف انتي كيف .."ورد عليه بسرعه دفها ع الساس وهيا تبكي .."واختك ي كلبه تغطي عليها صاح .. انتي تقولي هكي مش تغطي عملة اختك ..
ورد>>لا وربي لا انا والله انا فل مظلومه انا اسفه والله لحظه طيش بالله عليك ماتقول لحد ..
انس>>"حط يده ع راسه .."ياربي خليتيني نظلمها خليتيني نظلمها ي بنت الكلب .."وقرب يبي يضربها بعدها فطن لروحه .."ي كلبه ي تافها ي رخيصه كيف هانت عليك اختك حولي بنت عمك ع جنب اختك ي كلبه تخليها ف موقف كيف هذا .."وبغضب قرب منها .."اقسم بالله ي ورد اندمك توا مش فاضيلك بس حنوريك اللي خليتيني نديره ف فل كله .. وربي نوريك عليه ..تحركي قدامي امشي ..
وكرها من كتفها دفها قدامه وهيا تبكي ..وصلوا عند باب المطبخ مع طلعت فوز من جوا ..
انس>>"بهمس .."اضحكي اضحكي ي...... اضحكي
ورا ملامحها الخايفه طلعت ضحكه منها ..غصب عنها ..
فوز>>ورد تعالي سالي بتطلع .."وبحتت ف خوها بأستغراب .."شن كنت ادير انت هنا عدي ..
انس>>كنت نشوف ف ورد بالك تبي شي ..
قرنت فوز حواجبها بأستغراب وماجش ف بالها الا شي واحد .. ضحكت ..ومسكت ورد من يدها وخشت وهيا معاها وانس معاهن بعيونه فهم ع اخته شن فهمت .. بس ماركزش .. مشا بسرعه طلع من الجنان لحوشهم ..
فوز>>ف شي بينك وبين انس ..
بحتت فيها ورد بصدمه .."لا والله لا .."
ابتسمت فوز وقربت لسالي تسلم عليها .. اللي فكوها من تقى بالسيف وهيا تبكي .. طلعت سالي مع هل راجلها .. وتقى تبكي وراها ..
تقى>>"ببكاء .."معش قعدلي اخت ي ميسان ..
فوز>>"ببكاء .."كلنا خواتك ي تويقه بلا بكا خلاص ..
حنان>>فهريه بلا هبال تريحتي عليها ..
هزت راسها وهيا تبكي ..
وميسان حضنت تقى وتهدي فيها .. وجنبهن ورد تبكي ..بخوف وإحساس بالذنب ..
.....
مر اسبوع بلمح البصر ..
زكريا زاد تقرب من سمر .. وقعد يرقد بس ع كرعيها واغلب وقته ف المستشفى معاها .. كانت معش تاكل .. وضاعفه بكل ..
...
محمد>>"بحزن .."قالي عمر معش تاكل .. وزكريا معاها اربع وعشرين ساعه ..زادن عليها نوبات الصرع .. بقولي ي حنان مش حطول ..
حنان>>"دموعها ينزلن .."ربي يلطف بيها ربي يلطف ويرحمها ..
محمد>>انا خايف لو صار فيها شي وزكريا حضر خايف عليه من الصدمه .. قالي عمر تعلق بيها ف هالاسبوعين واجد ..
غمضت حنان عيونها وهيا تبكي .."امه ي محمد امه اكيد بيتعلق بيها ويحزن .."
محمد>>"تنهد بحزن .."خشي عدي للصبايا وانا خليني نعدي للرجاله العصر قريب ..
هزت حنان راسها .. وخشت .. ومحمد طلع للرجاله مش يمشوا للصلاة عشان فاتحة سيف وابوبكر اليوم ..
خشت حنان عليهن .. كانت امها مش حاضرة عشان عندها قريبتها ميته ..
فريال>>كنك يمي وجك اسود ..
حنان>>ام زكريا قالي محمد ربي يلطف بحالها تعبانه ..
تنهدت فريال بحزن وهيا تبحت ف حال كنتها .. تحاول تنسجم مع الصبايا اللي عازمينهم ..
وف المطبخ البنات ..
ميسان>>مروة كيف البنات وين ..
مروة>>قاعدات ف الحوش ي حنه بدن امتحانات كلمن سيف باركنله هو وبوبكر وقمعزن يقرن ..
بحتت ميسان ف تقى اللي مقمعزه ف المطبخ معاهن وف يدها الكتاب وضحكت ..
ميسان>>كيف حال هالبنيه قريب تموت ..
بحتت فيها مروة وضحكت .. وتقى منسجمه مش فاطنتلهن بكل ..
..
لحظات وانسمع صوت زغروته من فهريه وتركيه عرفن بعدها ان نقرت الفاتحه ..
......
مقمعزة سارة وجنبها انوار .. وحده ع وجها ابتسامة والثانيه ملامح الحزن عليه ..
الاثنين لابسات فساتين بيض وكل وحده وتسريحتها  ومكياجها ..
قربت نزيهه من انوار ..
نزيهه>>افردي وجك ..
بحتت فيها انوار بحده .. وبعدها غيرت عيونها عنها وهيا تبي تبكي .. وسارة مبتسمه طول الوقت  ..
..
كيف حال انوار كان بوبكر ..
يذكر ف فاتحته ع نور كان اسعد واحد ف الدنيا .. كان حاس ان الدنيا كلها ضحكتله اما توا حاس وكأنه قلبه مقبوض ومش فرحان حاجه كاتمه ع نفسه مش اكثر .. عابد صاحبه كان اكثر انسان فاهم عليه .. حط يده ع كتفه بحت فيه بوبكر ..
بوبكر>>الله يسامحك ي نور كيف بنعيش معاها ..كيف ..
حضنه عابد وهو يطبطب ع ظهره ..
واما سيف كان وسط جماعته وفرحان قريب يطير ..وجنبه خوه الصغير مش عارف كيف يصرف ف قصة اخته .. ورد من يوم عرس سالي معش شافها ورقمها مقفل ماحصلهش بكل .. فطن لباته يضبحله مشا شوره بسرعه ..
.......
اما اصغر واحد ف خوته .. كان مصبي جنب العناية .. يفرك ف يديه ف بعضهن بتوتر وهو ماشي جاي .. عمر يبحت فيه بخوف ودموعه ف عيونه .. بس ماحكش شي بكل ..
يبرم وبس .. كان حاس روحه مضايق بكل اليوم من الصبح .. حاس ان ف شي ي اما ف ليبيا او هنا يبي يصير وماصارش شي .. لعند تعبت سمر وسأت حالتها جداً وخشت للعناية ..
تنهد بحزن وبحت ف خاله اللي نظرته كانت كفيلة تخلي الرعب يدب ف كل جسم زكريا ..
......
ووسط الغناء والرقص والمنظومة .. ف ليبيا مع قصاد 9 الليل .. جت سيارة سيف وكان فيها ميسان وسيارة بوبكر وكان معاه تركية ومروة .. نزلن الثلاثه .. لحظات وطلعن بسارة وانوار .. سارة عاديه بس انوار كانت تبكي ..
طلعن بيهن وكل وحده ركبت مع راجلها ..
وميسان وتركية ومروة ركبن مع انس اللي طلع ورا سيارات خوته ..
..
كان بوبكر يسمع ف شهقات انوار النتلاحقه ومش عارفه شن يقول .. كان كله حزن أشر منها .. اليوم بالذات له معاه ذكريات واجد .. بذات ان اليوم بالتاريخ كان عيد زواجه نفسه من نور .. كان اغلب الطريق يتنهد وماحكش هو وياها حتى حرف واحد ..
....
عكس سيف وسارة اللي اول ماركبت معاه ..قال .."انستي ونورتي .."
ضحكت وقالت .."منور بيك .."
سيف>>مبروك علينا وان شاء الله طول العمر مع بعضنا ..
ابتسمت سارة .."يارب .."
ضحك وهو عارفها متوتره .. واغلب الطريق كملوها هدرزه متقطعه مره مره يحكي سيف وهيا ترد عليه ..
.....
بس ف بريطانيا فرحة خوت زكريا كانت عكسها عنده .. وهو عايش حاله الترقب والخوف من مبدري ..
كان خايف يسمع الخبر اللي مش عارف كيف حتكون ردة فعله عليه ..
وبعد طلع الدكتور توا .. بحت فيه بعيون مليانة دموع وهو خايف شن بيقول .. وجه الدكتور كان واضح .. ووجه عمر اللي قعد يبكي مجرد ما طلع كان باين منا كل شي ..
بس عيونه هو كانن يدورن فيها وراه .. قدم .. والدكتور يبحت فيه .. وعمر رفع راسه وبحت فيه ..
قدم وقدم لعند وصل للحجرة .. وفتحها .. حقهم وهما يحطوا ف الفوطه عليها .. بعد مافكوا الاجهزة كلهن ..
اذكر اخر كلمة قالتها له .."سامحني وقول لحنان تسامحني ..انا نحبك ي ماما واجد ولو متت توا فرحانه ان متت بعد ماعشت معاك كل شي تمنيت نعيشه معاك .."
يديه خاننه وطاح ع اركابه .. برم وعطا الباب بظهره وحط يديه ع اركابه اللي ثناهن قدامه .. حط راسه ع يديه .. وقعد يبكي بالصوت العالي .. صبا عمر قرب منا بسرعه وحضنه ..
وزكريا بعبرات متلاحقه كان يقول .."امي امي ماتت ي عمر امي قعدت بلا امي .. امي ماتت .."
.....
..
#يتبع🤍
#فافي🤍