مكاتيب🤍

الحلقه 7

#مكاتيب🤍
#الحلقه_7❤️
........
.
.
.
.
.
.
.
.
.
.
.
.
.
.
.
.
.
.
.
..
.
.
بصوت عالي وعصبيه"انا قلت لا لا ماتخشش حوشي ي بني ادم افهم مراه اكبر منك بقد سنين عمرك ..افهم افهمم انت كنك مش فاهم شي ."
"لأن نحبها نبيها ي باتي نحبها .." صوت الكف صدح ف كل المكان .."ف اخر عمري يجي فرخ كيفك مايحترمنيش .. ف اخر عمري فرخ كيفك يطلعني عن طوري .. انا بنت السكار بنت الفقر وانا ماعمري نظرت لحد بهالنظرة بس البنت هذي تضحك عليك ي غبيي ي مراهق ..ساد خوك وشن جابلنا ساد .."
"ناخذها نبيها حتى لو هك .."
....
...
قبل كم اسبوع ..
رن نقال مسعود .. اللي كان راقد .. بحتت فيه مراته اللي كانت جنبه ..مسكاته وبحتت من اللي يرن .."سارة .." مطت شواربها بملل وسكراته ورداته مكانه ..
مخليه سارة تبكي وتبرم وحنان وسيل يبحتوا فيها .. حنان بحزن اما سيف بأعجاب ..
حنان>>سارة بنتي قمعزي ان شاء الله ما هناك الا الخير ..
بحتت فيها وهيا تبكي .. حطت يدها ع وجها وزاد صوت بكاها .. صبتلها حنان حضنتها وقمعزتها جنبها .. زاد ابتعد سيف من جنبهن .. مع رنت تليفونه ..
"ايوا .."
محمد>>ها سيف شن صار كلنا مشغولين هنا ..
سيف>>"برم بحت ف امه وسارة ورد وخر .."والله ي باتي ادعولها .. الدكتورة خشت معش طلعت واخر شي قالاته ان ضغطها مرتفع .. وقلبها تعبان ..
محمد>>"بحزن .."لا حول ولا قوه الا بالله.. نخلي خوتك يجوا؟
سيف>>لالا مش لازم .."وبحت ف الدكتورة اللي طلعت .."هيا حاج الدكتورة طلعت ..
وسكر ع باته وقرب منهن بس قبل مايوصل ويفهم الكلام اللي بتحكيه الدكتورة .. عيطت سارة .. وحنان مسكتها وهيا تبكي ..
نصدم .. وقرب منها ..
سيف>>دكتورة شن صار ..
هزت راسها بأسف .."انا اسفه .. جتها جلطة قلبية اللي قدرت نديره ان نطلع المولود .. ومجرد ما طلعته ماتت الام .."
من هول اللي سمعه .. مسح وجه بيده ..وهو يقول .."إنا لله وإنا اليه راجعون .."
كملت الدكتورة تقول .."ضغط الولادة مع ضغط الدم سببن ضعف للقلب وبذات ان هو مايضخش ف دم صح وبشكل منتظم خلاها تصاب بالجلطة وللأسف ماخلتهش تاخذ نفس اكثر .."
تنهد بحزن وهو يهز ف راسه .. بحت ف سارة وهيا تعيط بأسم اختها .. وتقول .."مزلتي صغيرة ي عمري ماشفتي من الدنيا شي .. صغيرة ي قلب اختك شن شفتي منها الحياة .. الله يلعن الفقر والذل اللي يخلي الواحد يهونن عليه بناته الله يلعنهن .."
وحنان تحضن فيها وهيا تبكي .. وخر سيف ومسك نقاله .. مش يرن يخبر باته لعله وعسى واحد منهم يتجرأ ويرن ع بوبكر ويخبره بموت مراته ..اللي لا كان ف باله ولا خاطر عليه ..
....
بوبكر .. اللي ماكنش خاطر ع باله ان اخر مرة يشوف فيها نور قبل مايطلع من الحوش .. ماكنش خاطر حتى ع باله الشي هذا .. وان خلاص مجرد يروح حيكون بروحه بدونها ..لو علم ان اخر لقاءه بيها كان قبل ساعات من وجوده هنا كان ماضيعش اصلا هالساعات هنا كان قعد معاها وجنبها .. بس الموت ماحد يتوقع امتى يجي .. وماحد فينا عارف ساعته امتى .. ولا ف حد فينا عارف ساعة احبابه امتى .. كيف ماكنت نزيهة راقدة بعظ تغدت هيا وانوار ومش خاطر ع بالها ان بنتها ماتت ومعش حتشوفها .. رغم احساس الام اللي كان ملازمها الا كذبت إحساسها .. مافيش ام ماتحسش ببنتها .. ويوم سألت نور "انتي كويسة .." كانت اتأكد من إحساسها .. ورغم اجابتها انها كويسة عرفت بنتها تكذب بس كذبت إحساسها .. كيف انوار اللي تبرم وهيا مضايقه .. مش فاهمه هيا سبب ضيقها شنو .. ولا عارفه ليش هيا هك مضايقه .. رغم جشع انوار .. الا انها كانت إنسانة قريبة من ربي ومواصله صلاتها .. مالقتش قدامها إلا أنها اتوضى وتصلي لعلى وعسى ربي يريح قلبها ..
قلبك انتي ي انوار يتريح بقربه من ربي .. بس اللي بعيد عن ربي شن يريحه؟ ..
يقولو ان الراحه يلقوا فيها ف النوم بعد تعب نفسي او اجهاد نفسي .. بس اللي عندهم هالمعلومه فاتت عليهم معلومة اهم وهيا الصلاة والتقرب لربي هنا اللي يريحن بعد تعب يوم كامل .. بس هالمعلومه كانت غايبة ع تُقى .. اللي للأسف كانت بعيده كل البعد عن ربي .. ولذلك بعد بكت لين شبعت رقدت .. بس بدون راحه ..
...
وصل الخبر للعيلة عن طريق محمد .. اللي كانت قبل خشته سليمه كانت طالعه .. الفاجعه اللي خذوها انس وزكريا خلوهم ينسوا يسألوا حنهم عليها .. وفطيمه كانت موجوعه ع نور مالحقتش تفكر اصلا ..ف الكلام اللي حكاته سليمة وكان كله جديه ..
سليمة>>"تكلم ف سمر .."رفضت قتلك ..
سمر>>"بتعب .."كنت متوقعه ي ماما انها ترفض بس بلا ما عُمر ياخذ ميسان مش حنقدر نشوف ولدي براحتي "وقعدت تبكي .." بنضمه ي ماما ونشمه مليت من البعد نحلم بيه ي ماما قعدت ..
سليمة>>"بحزن .." خلاص ي بنتي خلاص قطعتي قلبي هيا لزتني بس الدوه توا نخلي بوك يحكي لمحمد .. وعُمر راضي ناخذوها له ..
سمر>>الله يربحك ي ماما ديري جهدك بالله عليك ..
سليمة>>"بحزن ع حال بنتها .."حاضر يمي حاضر حسبي الله ونعم الوكيل في اللي كان السبب ..
..
اللي كان السبب؟! .. كانت مقمعزة وسط حوش خوها بحزن شديد .. لو يوم من الأيام هيا كانت مكان نور شن حيسير؟ .. كيف بتقابل وجه ربي .. كيف بتحكيله ع كل شي داراته .. كيف بتقوله راه انا حرمت عيل من امه راه انا جنيت ع خويا ومراته .. وهيا تفكر طلع ف وجها الضحيه متاعها .. كان نزل من فوق بسرعه .. وقف فجاءة بعد طاحت ساعته وجت عند كراعها ..
زكريا>>"بحزن .." عمتي بالله عليك مديها ليا ..
بحتت فيها .. ومدت يدها خذتها وصبت مدتها له وهو خذاها ولبسها وطلع يجري .. قبل خبط ف تُقى بس مسك فرينو وهيا بحتت فيه حق دموعها ينزلن .. تنهد بحزن وركب جنب فريال اللي هيا تولت دور انها تخبر نزيهة ..
...
مصبيه تشوف ف ولد اختها وهيا حاطه يدها ع فمها وتبكي .. قرب سيف وصبا جنبها وهو يبحت فيه ..
سارة>>"ببحه .." كيف بيقعد بلا امه وليد صغير ماشاف من الدنيا شي ..كيف يبي يعيش كيف بيقعد مالك بلاها .."وردن دموعها ينزلن .." نحنا الكبار ومانتحملوش بلا امهاتنا طشه ي بال هو وليد صغير مزال ما شاف من الدنيا شي .. ي عمري ي وليدي شن بتشوف من دنيا انت جيت فيها وامك ماتت ..
سيف>>استغفري ربك ربي ف الوجود ماينسا حد بعدين عنده انتي وامك وامي وعمامه كلهم معاه ..
هزت راسها برفض وهيا تبكي .."مش كيف امه مش كيف .."
بحت فيها بحزن ..
محمد>>"قرب منهم .." ي بنتي ي سارة باتك لازم يعلم .. عطيني رقمه خليني نخبره ..
قعدت ترشف .. وهيا تمسح ف دموعها واطلع ف النقال من جيب بالطوها .. ومداته لمحمد بعد طلعت الرقم .. سجله ومده لها .. ومشا بعيد يرن ع مسعود ..
...
ف نفس الوقت وصلت حنان بعد جابها انس لحوشها .. خشت طول قابلتها ميسان حضنن بعضهن وهنا يبكن بالصوت .. وجنبهن تُقى وسالي يبكن ..
ف نفس اللحظه اللي وصل بيها زكريا بفريال لحوش هل نور ..
نزل بسرعه وفتح لباب لحنه وساعدها تنزل .. وهو ماسك يدها ويساعد فيها ..
وصلها للباب ودق عليه ومشا ركب ف السيارة من جديد ..وهو يبحت ف الباب بحزن .. هو عارف مدى تعلق خوه بنور .. بش مش متوقع ردة فعله بعد يعرف شن حتكون ..شاف الباب نفتح وخشت حنه وسكرن الباب ..
لحظات ونسمع صوت العياط ..غمض عيونه بشدة وهو حاط يده ع فمه زين .. نفتح الباب وحق مراه كبر امه هك طالعه تجري وهيا تعيط ..وتضبح بأسم نور ..نزل يجري .. مسكها ..
زكريا>>وحدي الله ي خالتي وحدي الله ..
نزيهة>>"وهيا تبكي .." يانعليا نويره .. نعليا يمي ..شن شفتي ي ماما من الدنيا انتي شن شفتي .. شن شفتي مش تعدي بسرعه هك .."وقعدت تخبط ع صدرها .."ياريتها فيا انا ولا فيك ي روح ماما ياريتني انا متت قبل مانسلمك للموت بيديه .. ياريتني انا اللي مشيت وقعدتي انتي وليدك من بيه ي نور .. وين عديتي وانتي مانك متريحه ي امي وين ..
وخر بعد حق انوار طالعه تجري حضنت أمها زين وقعدت تبكي هيا وياها ..وهو دموعه ف عيونه .. الشبه بين انوار ونور خلاه ينصدم بس بسرعه مااذكر انهن تؤام متطابق ..بحت ف حنه ومشا مسك يدها .. قعدت اطبطب ع يده بحنيه ..وتقول "خليهن يفرغن مافي قلبهن خليهن الفقد شين ي باتي شين .." وهو يهز ف راسه مسايرة لها ..
....
ماردش مسعود ع تليفون محمد .. اللي اضطر هو بروحه يكمل إجراءات الدفن .. بس لأن الوقت مغرب مش حيكون الدفن ف نفس اليوم وحيكون ف ظهر ثاني يوم ..
نقام العزاء ف حوش هل بوبكر بأعتبار نور كنتهم .. ركبت الخيمة .. ولا سارة لا امها لا انوار صابرات ..
والمهمة توا قعدت لمن يكلم ابوبكر ويقوله ..
سامر>>كلموا حد من اصحابه معاه غادي ..
زكريا>>عندي رقم صاحبه عابد ..
سيف>>ترا عطيه ليا ..
خذا منا النقال وسجله .. ومشا بعيد وهو يتصل بيه ..
سامر>>بحت يوم عجباتك بنت قلبت الدنيا ..
بحت فيه زكريا بنص عين .."ماه وقته .." .. ضحك سامر .. ورد يبحت ف سيف ..
اللي يحكوا عليها .. كانت تبكي وف حضنها اختها .. بطلن عياط بس يبكن مزالن .. رن نقال سارة خلاها تفطن .. لقاته باتها ..
ضحكت من وسط دموعها بهزوة .. وردت عليه ..
مسعود>>كنك ي بنت لقيتك رانه عليا ..
سارة>>"دموعها ينزلن .."باتي نور توفت ..
معش سمعت صوته .. هدوء صار غريب .. لعند رد عليها بصوت عادي جدا وهو يقول .."وباه؟"
الهدوء اللي كانت تراجي ف اللي بعده ان يتأثر حتى اشوي .. معقوله ف اب يكون بالقسوة هذي ؟ .. معقوله مافيش حن ابدا ..ماقدرتش تسمع منا حاجه حولت التليفون من وذنها وسكرت عليه .. وهيا تبحت ف الفراغ ..
انوار>>شن قالك ..
بحتت ف اختها .. وبلعت ريقها وردت تبحت قدامها .. وهيا تشوف ف امها كيف تستقبل ف المعزيين .. وجنبها حنان ..
..
عابد>>"بحزن .."لا حول ولا قوه الا بالله تم ي سيف تم ..
سيف>>عابي عليك ..
عابد>>ان شاء الله خير هيا السلام عليكم..
رد عليه سيف السلام وسكر .. بحت عابد ف بوبكر اللي مقمعز قدام نار مولعينها .. ويشرب ف شاهي ..
قرب منا وقمعز جنبه ..
بوبكر>>مكالمه ماتسرش اللي وجك نقلب ..؟
بلع ريقه وهز راسه بالرفض ..
ابتسم .."خليني نرن ع هلي نسأل عليهم .."
يبحت فيه صاحبه بحزن ..عاش معاه فترة علاقته مع نور كلها وعارف شن حيحس صاحبه بعد يفقدها .. دمعته ماسكها بالسيف ومش عارف كيف يخبره .. بحت ف القلق اللي ع وجه بعد ماردتش ..
عابد>>"بحزن .."كنك؟
بوبكر>>"بقلق.." ماتردش .."وصبا .."
عاود رن .. ماصار شي .. كيف جا بيعاود يرن للمره الثالثه .. سمع صاحبه قال ..
"مش حترد .. توا كان يكلم فيا خوك سيف .. عظم الله اجرك ف المدام .."
بعدم استيعاب بحت فيه .. وضحك ..
بوبكر>>كنك اليوم انت ..
عابد>>"بحزن .."قل لن يصيبنا الا ماكتب الله لنا ي بوبكر ..
ضحك من جديد بصوت اعلى .. وهو يقول .."ياربي عليك ضحك .." وعابد يبحت فيه بحزن ..
رد رن عليها .. وهو مزال يضحك ومن بعدها نقلب لعصبيه وعزق نقاله بعيد وهو يقول "ليش ماترد ليش ليش ..ليش .."
رن عابد ع سيف من جديد ..
عابد>>سيف بوبكر يسمع فيك ..
سيف>>"بحزن .." قل لن يصيبنا الا الله ماكتب الله لنا ي بوبكر .. توفت نور اليوم بعد العصر .. وجابت وليد قبل مااتوفى بساعه ..
بوبكر>>"قرب بسرعه من التيلفون وهو يقول .."تكذب كذاب تكذب ..
سيف>>إنا لله وإنا اليه راجعون ..
عيط وهو يقول "تكذبوا كذابين كلكم تكذبوا مستحيل ادير فيا هكي مستحيل .."
سكر عابد ع سيف .. وهو يبحت ف بوبكر .. اللي هدا فجاءة وقمعز ع الكرسي وهو مصدوم .. اخر شي جا ف باله بعد حضنها وباس راسها قبل مايطلع .. ودعاته بضحكه وهيا تقول .."ف امان الله ي عمري .." وحطت يدها ع بطنها ومالك مصبي جنبها وردت تقول .."نرجوا فيك كلنا .. ونحبوك واجد .." دموعه نزلن .. وحط يديه ع عيونه وقعد يبكي وصاحبه يبحت فيه بحزن ..
......
الصبح ..
جا مسعود بس قدام الناس مش يحضر دفن بنته ..
بدون مراته اللي رغم هك اصرت انها تمشي .. وحطها قبل مايمشي للمستشفى ومشا ..
كانت حنان مصبيه مع زكريا ..
زكريا>>"بعيون منتفخه من قلة النوم .."ماحصلش طيارة بس ..وعطا تصريح لسيف ان يدفنوها ..
حنان>>"بدموع .."يانعلي وليدي مايشوفها حتى وهي تندفن ..
قرب من امه وهو مبتسم بحزن .. وضمها عنده ..
زكريا>>خلاص حبيبتي دموعك جفن من امس وانتي تبكي ..
بساته ع صدره .."ربي يخليك ليا حنوني انت .."
ابتسم .. وباس راسها ..وخرت وجت بتخش ..
زكريا>>ترا كلميلي ورد يمي قبل ماتخشي ..
هزت راسها وخشت ..لحظات وطلعت فل وهيا عيونها منتفخه بس من البكاء ..
زكريا>>"حط يده ع وجها .."اول مره نعرف ان عندك احساس ..
فل>>"بعيون مليانة دموع .." ي باسل ..شن تبي ..
زكريا>>انتي فل مش ورد ..
فل>>شن الفرق راضعين حليب واحد ..
ضحك .. وهيا ابتسمت ..
زكريا>>نبي رقم سارة ..
عقدت حواجبها .."سارة من ..؟"
زكريا>>كم سارة عندنا ي فل ..الابلة اللي تقري فينا ..
فل>>لاهيه غير بيك سارة توا .. اللي هيا فيه مكفيها ..
ضيق عيونه .."وشن اللي هيا فيه .."
فل>>ي حمار ماهي اخت نور تقعد ..
فنص عيونه .. وفل تبحت فيه بأستغراب ..
خبط يده وهو يقول .."وانا نقول وين شفت امها .."
برم بعد ضبحله سيف .. "هيا جاي .." ورد بحت ف فل .."خشي خلاص .."
خشت وهو مشا لسيف ..
مع خشت فل خشت وراها "تغريد .." مرات مسعود ..
وصلت فل ف ورد ..اللي سألتها .."كنه زيكو .."
فل>>بعدين نقولك ..
هزت راسها .. ركزن هنا الاثنين ع انوار اللي صبت وهيا متوجهة بسرعه وبعصبيه لمرات بوهن ..
وقالت بصوت عالي.." امشي اطلعي برا .."
بحتت فيها تغريد وركزن معاها امها واختها اللي صبت سارة وجت شورها بسرعه ..
انوار>>"قعدت ادف فيها وهيا تبكي .."عليش جايه جايه تشمتي امشي اطلعي برا امشي ..
تغريد>>"بصدمه .."كنك ي بنت الستر ..
سارة>>"مسكت انوار .." انوار اهدي .. اهدي مش قدام الناس ..
قعدت تعيط وهيا تقول .."طلعوها برا نبيش نشوفها طلعيها ..طلعيها "
بحتت سارة ف ميسان بحزن .. اللي طول جت لتغريد وقالت .."لو سمحتي .."
بحتت تغريد بتهديد ف انوار .. وبرمت طلعت ..
قرب مالك اللي كان ماسك ف تُقى .. وصبا قدام انوار اللي قعدت تبكي بالصوت ..وقال .."ماما .." ..
بحتت فيه انوار بصدمه .. واللي حواليها توجعوا جدا .. خذاته ف حضنها وهيا تبكي .. وتقول .." يعمري ي روحي انت .."
وسارة تبحت فيها بحزن ودموعها ينزلن ..
.....
بعياط "دبر ي عابد دبر طيارة معش نبيه انا الشغل هذا معش نبيه .."
عابد>>بوبكر اهدا .. اهدا مافيش طياران قالوها لك الا بعد اسبوع ..
بحت فيه بعيون مليانة دموع .." لا ندفنها لا ناخذ عزاها واجد ي عابد واجد .." ودموعه نزلن "ساد انها ماتت وانا بعيد ..ساد ان معش بنحقها ي عابد وانت اكثر من يفهم عليا .."
هز راسه وقرب حضنه .. وبوبكر نهار بكا ..
...
دفنوا نور .. بلا بوبكر .. تحت دموع خواتها وامها اللي دمعتهن ماجفتش .. رغم حزن هل نور .. الا ان عيون تُقى العاشقه بدموعها كانت تبحت ف سارة بغيرة .. سمعت كلام فل لورد اللي قاله لها زكريا .. وصلت بيها لدرجه التشكيك ف نفسها .. وقعدت عندها عدم ثقة ف نفسها حرفياً يعني اللي شافه ف سارة كان يقدر يشوفه فيها .. بس افكارها هذين ما طولنش .. وهيا تبحت ف حزن ف حال مالك اللي ماسك ف خالته زين ع باله انها امه ..
رفض رفض قاطع ان يجي لفوز اللي مقمعزة تبكي مع خوات نور كأنها اختهن .. وحنان تبحت ف حيرة بكل شي وعقلها يفكر ف ولدها اللي خبروها ان مافيش طيران الا بعد اسبوع كيف بيتحمل؟ .. وكيف حيقدر .. يعيش عادي ..
استغلت سالي الفرصة ف العزاء .. ومعش ردت ع مروان اللي يأس .. وميسان زاد حزنها اكثر ..
واستغلت برضوا تغريد الفرصه وحكت لمسعود اللي دراته فيها انوار .. وتوعد مسعود ف بنته شر توعد .. بس رغم هك ماقطعش العزاء وقعد يستقبل ف الناس اللي تعزي .. بنته وف وجه .. هذا كله ومحمد مش راضي .. شايف ان مسعود مايناسبش عيلته لا من قريب ولا من بعيد ..
وهو مش مركز ف عياله الاثنين اللي شغلت بالهم نفس البنت .. زكريا بطيش شباب ومراهقه .. وسيف بعقل رازن وثقل ..
بس ماحد حط ف باله ان مازن راجل اختهم الوحيده يكون يبحت ف بنت عمهم .. واخت خوهم ..
حتى فوز نفسها ماعمرهش شكت ولا تشك ف راجل حباته 6 سنين ..
..
مشن ثلاث ايام العزاء بدون اي شي يذكر ..
انوار>>ماما عيال نور مانخليهمش ..
نزيهة>>"بحزن وهيا بتصبي .."ماحد مخليهم ي ماما بناخذهم معايا ..
هزت انوار راسها وهيا حاضنه مالك .. وطلعت نزيهة لمسعود ..
مسعود>>بالك سادكن وروحن خلاص بنتك وترابها جف ..
نزيهة>>"بحزن .."وحتى نحنا ناويين نروحوا الليلة ..
مسعود>>خلاص .. مع المغرب توا نرن ع وحده من فرخاتك اطلعن .. وفكني من كركرت الفروخ .. انا ماعند بيش نصرف عليكن مش نصرف عليهم .. اهو بوهم عنده يصرف عليهم ..
تبحت فيه نزيهة بحده .."عيال بنتي مانخليهمش .."
مسعود>>بعد تقعدي تصرفي انتي احكي ..
وبرم مشا وهيا تبحت فيه بغضب وحزن .. بحتت ف محمد اللي طلع من ورا الخيمه ..وع وجه ملامح العصبيه ..فهمت ان سمع كل شي .. تنهدت وخشت ..وهيا تبحت ف بنتها كيف متعلق بيها ولد اختها وع باله انها امه ..
.....
ركبت لشقة اختها .. تبي اطلع دبش لمالك .. فتحت الباب وخشت ..
دموعها نزلن وهيا تبحت فيها .. قربت وخشت طول لدار مالك ..فتحت الدولاب ..وقعدت اطلع ف الدبش .. طاحت منا ورقه ..طبست ورفعتها لقتها مكتوب عليها .."سارة اختي .."
دموعها زادن نزلن وقمعزت ع الكرسي .. وفتحتها .."سرو .. كان تقري ف رسالتي هذي معناها انا خلاص معش قعدت من اهل الدنيا .. بالله عليك نفس الرسالة وريها لبوبكر .. وقوليله انها وصيه مني .. انا مش زعلان من حد .. ومش شايله ع قلبي لحد .. بس عندي طلب منك انتي سروره .. بالله عليك سلم خيتي .. عيالي ..
قعدت تبكي سارة بالصوت .."عيالي ماتخليش غريب يربيهم .. هل بوهم حنن عليهم بس مش كيف حنكن انتم عليهم .. سارة اقنعي انوار تاخذ بوبكر عشان عويلتي .. لا هو حيحس بالفرق ولا هما .. نبيش يتغير عليهم وجي بعد نموت وينسوني .. حتقولي انانية .. بس تعلقهم بيها نفس تعلقهم بيا .. ومافيش فرق بيني وبينها .. مش حيحسوا انهم فقدوا امهم .. وبوبكر مع الوقت توا يحبها .. راهو حباب .. وكويس ي سارة ..سلم خيتي هذي وصية مني لك .. بالله عليك .."
حطت يدها ع راسها من هول اللي قراته .. وهيا تبكي بالصوت ..
كيف تقدر اديرها؟ .. كيف تطلب من بوبكر طلب كيف هذا او توريه رسالة كيف هذي .. قعدت تبحت ف الرسالة وهيا تفكر شن ادير فيها ..تحرقها ولا توريها لهم .. باهي ومستقبل انوار ؟ .. حطت يديها ع راسها وزاد في البكاء ..
اللي كان يسمع فيه زكريا وهو ف الباب وموجوع عليها .. بعدين نزل بدون مايزعجها وطلع من الحوش بكل ..
ف نفس الوقت اللي درست فيه سيارة أجرة .. نزل منها عابد ومعاه بوبكر .. اللي جا بسيارة بس ماخبر حد من هله ..
......
خش للكافي .. لقاه صاحبه ..
"اووووو عريس .."
تنهد وقمعز ..
بأستغراب .."كنك قالب وجك ..؟"
مازن>>"بغضب .."عريس مااستمتعت بشي عيلة نكد ف نكد ..من موت راجل عمتها لموت مرات خوها ..نكد ف نكد ..
"وباه الشي هذا مش ف يدها .."
مازن>>"بغضب .."ترا فكني بالله ..واطلبلي شيشة خلي الواحد ينفس قريب ينفجر ..
هز صاحبه راسه بأسف .. وشير للنادل ..ومازن معصب ويبحت قدامه ويهز ف كراعه ..
.....
خشت للمطبخ وعيونها مليانات دموع ..
بحتت فيها عمتها .."كنك .."
فوز>>مازن قالي روحي خلاص .. قتله بنقعد مزال ..قعد يعيط وهذي مش عيشه وانظر شن ..
ميسان>>"قعدت تمسح ع يدها .."صدق ي ماما الراجل عريس راه وانتي توا مراه متزوجه وعيب تباتي برا واجد ..
تنهدت فوز .."بس واجعتني نور ي ميسان وواجعني بوبكر بكل .."
ميسان>>الله غالب ي امي هذا عمرها ..بس مش معناها انتي تنكدي ع الرجل سلم بنتي عدي كلميه وروحي لحوشك وبدلي هالساعه بساعه .. بوك وخوتك مش حمل مشاكل اخره ..
بحتت فيها بحزن .. وهزت راسها وطلعت .. وميسان تبحت فيها لعند اختفت بعدها تنهدت وقالت .."الباين انها مش متريحه .. واضح ربي يهدي سرها وخلاص .."

.
.
.
.
#يتبع🤍
#فافي🤍