#مكاتيب🤍
#الحلقه_11🤍
.
.
.
.
.
.
.
.
.
.
.
.
.
.
.
.
.
.
شهرين .. مرن ع العيله كلهم .. شهرين كانن مليانات ضغط نفسي ..
شهرين .. سافر فيهن بوبكر ومعش رضى يروح .. كان هارب وهروبه ماحدش كان عارف سببه الا زكريا ..
شهرين .. عاشت فيه أنوار جميع انواع العذاب النفسي بذات بعد يشوفها مالك ..
شهرين .. قرر فيهن سيف من بعدهن مش توصل نور ثلاث شهور ويقدر يقدم خطوة ..
شهرين .. عاشت فيهن سالي العذاب وهيا توتي ف روحها لفاتحتها مش تمشي مع مروان اللي بيقرا برا ..
شهرين .. كان عايش فيهن زكريا الحب .. وهو مش عارف ان خوه حاب نفس البنت .. ولا عارف امه اللي قاعده تموت بالعرق ..
شهرين .. كانت فيهن حنان تموت بالعرق وهيا تراقب ف تحسن حالة سمر ..
نفس الشهرين .. اللي عاشتهن بنتها ف حوش هلها ع بال الكل ان راجلها مسافر .. بس ماحد كان يعرف شن كان يدير ..
شهرين .. عاشت فيهن ورد الحب مع مازن .. تحت اسم فل اللي كانت غافلة ع اختها ..
شهرين .. مرن ع تُقى بالمر وهيا تشوف ف معاملة زكريا لسارة ..
وشهرين .. صار فيهن واجد واجد ..
........
مصبي وهو يلعب بكراعه ع الطين .. ويستنا فيها .. لعند سمع صوت كرعين برم وهو حاط يديه ف جيوبه .. بعد شافها ابتسم وهيا ابتسمت وهيا تمسح ف يديها وتلف ع روحها ف الشال ..لعند وصلت فيه ..
زكريا>>قالتلي ميسان مريضة .. قلت نطمن عليك ..
تُقى>>"ابتسمت ..وبحتت وبرمت عطاته بجنبها .." اشوية برد عادي ..
زكريا>>حتى المدرسة معش مشيتي برد عادي هذا كله؟ ..
ضحكت .. وهو ضحك معاها ..
تُقى>>تخيل وانا ماشيه بحرارتي ..
زكريا>>قولي خايفه ع عيال فصلي يمرضوا .."وميل راسه ع الجنب وهو يبحت فيها .."
ابتسمت وبحتت فيه .. ومن جديد ردة حالته اللي كل مايشوف عيونها .. حس قلبه دق زين .. لدرجه عقد حواجبه وسقم تصبايته وبحت جنبه وهو مستغرب من روحه ..
تُقى>>نقولها لك مش متحشمه منك لو صاح ..
زكريا>>"وهو يزابي ف صوتها .."لا واللهِ ..
شقلبت عيونها وقالت "والله .."
ضحك .."شن تحضيرات اختك لفاتحتها .."
تُقى>>"ربعت يديها .."كيف تحضيرات كل بنت ..
زكريا>>ي رااجل ..
رقصت حواجبها وهيا تضحك .. وهو ضحك ..
زكريا>>عدي خشي عدي العتب عليا مش عليك ..
ردت ضحكت .. وهو كرلها وشاحها ومشا وهو مبتسم .. وهيا تبحت فيه لعند اختفا من قدامها .. تنهدت وع وجها ابتسامه بس طول تحولت ابتسامتها بعد اذكرت حركاته لسارة ..
تنهدت من وسط قلبها وقالت يارب ومشت خشت .. بحتت ف اختها اللي راقدة .. مطت شواربها بضيق .. ومشت لميسان ..
تُقى>>ميسان ..
ميسان>>"من المطبخ .."هنا حبيبتي ..
مشت طول لعندها ..
........
فتح باب الحوش وخش .. سمع صوت معين يبكي .. ابتسم وخش للصاله ..
حق اخته فوز ماسكته وهيا تبرم بيه ..
زكريا>>كنه حبيب عمو .."وقرب منها خذاه .."
ابتسمت .."خليه عندك لعند مانشوف العشاء .."
زكريا>>"هز راسه وبرم يتبع فيها بعيونه .."امي مازالت ماجت ..
فوز>>"من بعيد .."مزال لتوا ..
هز راسه وهو يمسح ع ظهر معين ..بحت فيه لقاه منسجم ابتسم ..خشت فوز وقمعزت ..
زكريا>>وانتي وينه راجلك اللي لعند توا قاعده ..
فوز>>"بحتت فيه وتنهدت .."ماهو قلنا مسافر ..
زكريا>>"بشك .."من الآخر انت الراجل هذا من زمان مانحبه لذلك مش واثق ف كلامك هذا .. لو مزعلك احكي ..
خش انس .."من مزعل من .."
وقمعز جنب فوز ..
زكريا>>الذكر صاحبك .. لو مزعلها تحكي مش معقولة لتوا لا جا ولا نشد ..
انس>>اطلع منها انت نعرف نصرف انا لو في شي ..
زكريا>>"بعقدة حواجب .."تقول مش خوكم بكل .. مافي شي نعرفه ..
امتلن عيون فوز دموع وفاضن .. بكاها فجعهم هما الاثنين ..برم عليها انس وزكريا جاها يجري ..
زكريا>>حي ع الهبله والله ماقصدي حاجه ..خلاص اقعدي امتى ماتبي ..
انس>>فوز كنك كبارة شورخ ..
بحتت فيهم .. وضحكت وهيا تمسح ف دموعها وهما يبحتوا فيها ..
فوز>>معش تقول كلام هكي انت خونا ..
زكريا>>"بضحكه .."لالا انا ولد باتكم ي بليده عارف ان خوكم شن الجديد ..
ابتسمت فوز ..
زكريا>>تي امي وين ماشيه هذا كله ..
انس>>حنان بعد باتي سافر قعدت تنش وتعودت ع النش باهي اللي روح ..
ضحك زكريا .."وتكر معاها ف امينة منظرهن كيف تيمون وبومبه .. امي طويلة ورقيقه وامينه سمينة وقصيرة .."
اطربقت فوز ضحك .. وانس بضحكه قال .."حيوان .."
......
مقمعزات هنا الاثنين .. سارة تصلح ف اوراق امتحان دراته .. وانوار جنبها راقدة وتلاها مالك ..
سارة>>"تبحت ف ورقه زكريا بعدين ضحكت وهزت راسها .."الإنسان هذا غريب ..
وردت تصلح ف الورقة ..بعدين بحتت ف اختها ..
سارة>>ليش ماجابوا حتى معين ..
انوار>>"وهيا تمسح ع شعر مالك .."بوه قال مالك بس ..
سارة>>"حطت الورقة وبحتت فيها .."انتي فكرتي ف اللي قتلك عليه ..
انوار>>"بحده .."لا ومش مفكره ..
سكتت سارة وهيا تبحت فيها .. بعدين ردت للاوراق .. جتها رسالة فتحتها .."ضحكتك تجعل المدينة تتحطم
أنتِ إضحكي وأنا أعيد بناء المدينة "🤍
ابتسمت وردت "❤️"
بعدين ضحكت وهيا تشوف ف ورقة زكريا وردت تصلح فيها ..وانوار تلعب بشعر مالك وهيا سارحه ..
......
ركبت حنان السيارة وركبت معاها أمينه .. نزل سيف التليفون وبحت فيهن ..
سيف>>كملتن السوق ..
حنان>> ي باتي الصيف بيخش ولازم نوتوا من توا ..
سيف>>"ولع السيارة .."امي انتي اللي مكبرة المواضيع راه ..
حنان>>"هزت راسها مسايرة .."مكبرة اها .. كلمت خوك ..
سيف>>كلمته مروح بكره ..
حنان>>"بحتت ف أمينه .."سجلتي اللي تبيهن بنت فهريه ماه ..
امينه>>كله سجلته ..
هزت راسها .."وانت بوك قال بتخطب .."
سيف>>"يبحت ف الطريق .."اها بنخطب اخت نور سارة ..
حنان>>ماني عارفه انت وخوك شن عجبكم ف هالعيلة ..
سيف>>مش حنبدو من جديد ي امي ولا؟"وبحت فيها .." ساد الحاج وانا ماطلبت منكم شي حدها فاتحه وبنجييها وتمت بالله فكونا من النكد ..
حنان>>باهي باهي انا نكد باهي ..
سيف>>"باس يدها .."انتي حبي ي مراه انتي ..
هزت راسها بهزوة ضحك وباس يدها وامينه تبحت فيهم وهيا مبتسمه ..
.....
راقدة واختها جنبها تكتب ف واجبها .. جتها رسالة بحتت ف التليفون وبحتت فيها وردت بحتت ف الكراس وصبت بشوية بعد ماكرت التليفون .. وخشت بيه للحمام .. رنت عليه طول .. رد عليها طول ..
مازن>>وين وين من مبدري ..
ورد>>"بهمس .."اسفه انشغلت اول شي وثاني شي اختي معايا ف الدار معش عرفت نكلمك وبابا اليوم عند ماما ..
مازن>>يعني اليوم مافيش مكالمه ..
ورد>>"ضحكت .."اها ..
مازن>>تمام .. بس خلينا ع الرسائل ..
ورد>>مازن بكره عندي مدرسة ..
مازن>>"تنهد .." ي عيون مازن تم تريحي ونحكوا بكره ..
ورد>>تمام تصبح ع خير ..
مازن>>قدامك الخير ..نحبك ..
ابتسمت وسكرت وطلعت بسرعه وهو مط شواربه بملل .. ومسك نقاله بعد جاته رسالة ع الماسنجر ..
"السلام عليكم .."
ابتسم بعد حقه ايميل بنت .. ورد طول .."وعليكم السلام .."
أنت تقرأ
مكاتيب🤍
Romance" لقد أدمنَّ كلانا اللُعبة أنا أتظاهرُ بالثبات ونبضي يرتجفُ اليه شوقًا، ويردد بإسمهِ ترانيمًا، وهو يتظاهرُ بالحب وقلبهُ أسيرً عند امرأة أُخري واقعٌ في عشقها سرًا، كلانا لا نبوح وكلانا تفضحهُ عيناه "
